འདྲེ་མགོ་རྡོ།
སྐད་ཆ་མང་པོ་བཤད་ན་མི་མང་པོའི་མཐོང་ཐོས་བསྐྱར་ཟློས་བྱས་པ་ལྟར་ཆགས་འགྲོ་བས། དོན་གྱི་མདོ་རྩ་ལག་ཏུ་བཟུང་ནས་ལོ་རྒྱུས་དེབ་ཐེར་དུ་བྲིས་པ་ཡིན་ན། བོད་རྒྱལ་ཁབ་བཙན་བྱོལ་དུ་འབྱོར་ནས་མི་ལོ་དྲུག་ཅུའི་ཁའང་བཀང་ལ་ཉེ་ཞིང་། མི་ལོ་དྲུག་ཅུའི་རིང་རྒྱ་ནག་གི་ཞལ་རས་དཀར་ནག་འཚོས་ནས་བོད་ལ་འགྲོ་ས་འདུག་ས་རེ་ཨེ་ཡོད་བལྟས། མཚམས་རེར་རང་ཉིད་རང་བཙན་གྱི་རྒྱལ་ཁབ་ཅིག་ནས་བཙན་འོག་གི་རྒྱལ་ཁབ་ཅིག་ཏུ་གྱུར་ཚུལ་སྨྲས་ཤིང་། གྲོས་མཐུན་དོན་ཚན་བཅུ་བདུན་ཟེར་བ་སོགས་ནི་བཙན་འཛུལ་རང་ཡིན་པས་རྩིས་མེད་ཡིན་ཚུལ་གྱི་གནམ་ས་གཡོ་བའི་སྐད་ཆེན་པོ་རྒྱབ། ཡིན་ནའང་མཚམས་ལན་རེར་རྩིས་མེད་དང་བརྩི་མཐོང་མེད་པར་རྨེག་མེད་དུ་བཏང་ཟིན་པའི་གྲོས་མཐུན་དེའང་གཞི་འཛིན་ས་ཞིག་ཡོད་པའི་རྣམ་འགྱུར་བསྟན། གང་ལྟར་ཡར་ནུར་མར་ནུར་གྲངས་ལས་འདས་པ་ཞིག་བྱས་རྗེས།
སྐབས་བཅུ་བཞི་པ་ཟེར་བའི་སྤྱི་ལྷན་འདི་དང་ཟམ་གདོང་བླ་མ་ཟེར་བའི་བཀའ་ཤག་འདིའི་ཁ་རྗེ་དབང་ཐང་ལ་བོད་ཀྱི་ཚེ་སྲོག་ཡོངས་སུ་དབང་བར་བྱས་ཏེ་དེ་རིང་གི་ཉིན་མོར་སླེབས་པ་ན། མི་རབས་གསར་པའི་གསོན་ཤུགས་དང་ཤེས་ཡོན་གྱི་དུས་རབས་ཁད་ཀྱིས་བཞད་པའི་ཚེ་ན། བརྡ་འཕྲིན་དུས་རབས་ཀྱིས་སའི་གོ་ལའི་ཤར་ནས་ནུབ་ཏུ་སྐར་ཆ་རེའི་བར་ནས་འབྲེལ་བ་བྱེད་ཐུབ་པའི་དུས་ཚོད་ཅིག་ཏུ། བོད་རྒྱལ་ཁབ་ཟེར་བ་དེའི་བརྒྱུད་པ་བར་མ་ཆད་པར་ཡོང་བའི་ཁྲིམས་མཐུན་གྱི་བཙན་བྱོལ་བོད་གཞུང་དེས། རང་གི་མི་མང་གིས་བླ་ན་མེད་པར་ངོས་འཛིན་གནང་བའི་རང་གི་༼ གཞུང་༽དེ། རྒྱ་གར་ནག་གཉིས་ཀྱི་རྔམ་བརྗིད་དང་གདུག་རྩུབ། ཁེ་ཕན་ལ་ཞེད་ནས་རང་ཤུགས་ཀྱིས་མིང་བསྒྱུར་བྱས་སོང་། རྒྱལ་སྤྱི་དང་རྒྱ་ནག་གི་མིག་ནང་དུ་ཡོད་པའི་བོད་གཞུང་དེ་གློ་བུར་༼ སྒྲིག་འཛུགས་༽ཟེར་བ་ཞིག་ཏུ་བསྒྱུར་སོང་།
འདི་ནས་མར་རྩིས་ནས་མི་རབས་ཁ་ཤས་ཤིག་འདས་མཐའ་ན། བོད་མིར་འབོད་པ་རྣམས་ཀྱིས་འདི་ལྟར་སྨྲ་སྟེ། ” སྔོན་༧ཏཱ་ལའི་བླ་མ་ཟེར་བའི་རླབས་ཆེན་གྱི་དབུ་ཁྲིད་ཅིག་ང་ཚོའི་མི་རིགས་འདིར་འཁྲུངས་འདུག ཡིན་ནའང་དེང་གི་ཀྲུང་གོ་འདིས་བཙན་འཛུལ་ལས་ཁོང་གིས་དབུ་ཁྲིད་པའི་ང་ཚོའི་གཞུང་དེ་བཙན་བྱོལ་བ་ཆགས་འདུག བཙན་བྱོལ་ནས་བོད་ཕྱི་ནང་གཉིས་ཀྱི་མི་མང་གི་སྙིང་སྟོབས་དང་མངོན་འདོད་གཞིར་བཞག་ནས་བོད་གཞུང་གི་རྒྱུན་དེ་མུ་མཐུད་གནས་འདུག ཡིན་ནའང་༧ཏཱ་ལའི་བླ་མ་ཟེར་བ་དེ་སྐྱེས་བུ་རླབས་ཆེན་ཞིག་ཡིན་སྟབས། ཁོང་ལ་སྲོལ་རྒྱུན་ནས་ཡོད་པའི་མཚན་གནས་རྗེས་འབྲེལ་གྱི་མིང་ཙམ་གྱི་དབང་ཆ་རྣམས་དུས་རབས་ཉེར་གཅིག་པའི་ནང་ཁོང་གིས་མི་མང་ལ་རྩིས་སྤྲོད་བྱས་ཤིང་། སྐབས་དེའི་བཅའ་ཁྲིམས་སུ་གསལ་བའི་ཁོང་གི་ཆབ་སྲིད་དང་འཛིན་སྐྱོང་གི་འགན་ཁུར་རྣམས་འོས་འདེམས་བྱས་པའི་འགོ་ཁྲིད་ལ་གནང་དགོས་པའི་བཀའ་ལྕི་ལྡོག་མེད་ཕེབས་འདུག སྐབས་དེར་གཤམ་འོག་ལས་བྱེད་པས་དང་པོ་བཀའ་དེ་བློ་ཡིད་དུ་མ་ཤོངས་ཁུལ་ལ། གློ་བུར་དུ་བཀའ་གསུང་རྣམས་ལག་ལེན་བསྟར་རྒྱུར་འཚུབ་ཆ་ཞེ་དྲག་ལངས་ནས་དུས་ཡུན་ཟླ་གཅིག་དང་ཉིན་ཁ་ཤས་རིང་ལ་ཁོང་དང་ང་ཚོའི་བར་གྱི་ལོ་རྒྱུས་ཀྱི་འབྲེལ་བ་དེ་ལ་སྡུད་གསོག་རྒྱབ་འདུག” ཅེས་དང་། ཡང་ཁོང་ཚོས ” དེང་སང་ཡིག་ཆ་ལག་སོན་བྱུང་བ་དག་ལ་ཞིབ་འཇུག་བྱས་ན། སྐབས་དེར་ཚོགས་ཆེན་ཞིག་འཚོགས་འདུག དེའི་མིང་ལ་༼ བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་༽ཟེར་གྱི་འདུག དེའི་སྐབས་སུ་ཁོང་གི་ཆབ་སྲིད་དང་འཛིན་སྐྱོང་གི་འོས་འགན་རྩིས་སྤྲོད་གནང་ཕྱོགས་བཅའ་ཁྲིམས་སུ་ཅི་ལྟར་གསལ་རྒྱུའི་སྐོར་ལ་རེད། ཡིག་ཆ་དག་ལ་ལྟོས་པ་ཡིན་ན་ཕལ་ཆེར་སྐབས་དེར་ཚོགས་ཆུང་ཆ་བགོས་བྱས་འདུག ཚོགས་ཆུང་ ༥ པ་ཕུད་ཚོགས་ཆུང་གཞན་རྣམས་ཀྱིས་བོད་གཞུང་གི་མིང་དེ་རྒྱུན་གནས་ཡོང་ཐབས་ལ་སྤྱི་མོས་བྱུང་འདུག་ཁར། དོན་ཚན་དང་པོའི་ནང་སྐུ་ཕྲེང་ན་རིམ་འཁོད་རྒྱུར་སྤྱི་མོས་བྱུང་འདུག ཡིན་ནའང་ཡ་མཚན་པ་ཞིག་ལ་༧ཏཱ་ལའི་བླ་མར་སྙན་གསེང་ཞུ་དུས་བརྗོད་ཚིག་དེ་དག་ལ་འགྱུར་བ་ཐེབས་འདུག དེའི་རྐྱེན་ང་ཚོའི་བོད་གཞུང་དེ་དུས་རབས་ཉེར་གཅིག་པའི་དཀྱིལ་ནས་ཡིག་ལམ་དུ་མངོན་རྒྱུ་ཉུང་དུ་ཕྱིན་པ་རེད་ཅེས་“བཀའ་མོལ་གནང་།
གོང་གི་སྒྲུང་གཏམ་བཤད་མཁན་གྱི་བོད་ཕྲུག་འདི་དག་ནི་རྒྱ་མི་ཤེས་ཡོན་ཅན་གྱི་གྲས་སུ་ཚུད་པའི་ཀྲུང་གོ་བ་རྐྱང་རྐྱང་ཡིན་ལ། ཁོ་ཚོ་ལ་མཚོན་ན་བྱུང་རབས་འདི་དག་ནི་སྒྲུང་གཏམ་ཙམ་དང་གནའ་གཏམ་ཙམ་ལས་གཞན་ཅི་གང་ལ་འང་བརྩི་ཡི་མེད།
ཀྲུང་གོ་གུང་བྲན་གྱི་སྲིད་དབང་སྒེར་གཅོད་ལམ་ལུགས་ཀྱང་དུས་རབས་ཀྱི་འགྲོས་དང་རྒྱ་ནག་མི་མང་གི་འཚོ་བའི་གནས་ཚད་དང་བསྟུན་ནས་འགྱུར་འགོ་ཚུགས་ཤིང་། དུས་རབས་ཉེར་གཉིས་པའི་རྒྱ་ནག་གུང་བྲན་སྲིད་གཞུང་ནི་མང་གཙོའི་བྱང་ཆ་ཚད་མཐོར་སླེབས་པའི་རྒྱལ་ཁབ་ཅིག་ཡིན། རྒྱལ་ཁབ་དེའི་ནང་དུ་འཐིམས་ཟིན་པའི་གོང་གི་བོད་ཕྲུག་འདིའི་རིགས་ཀྱིས། སོ་སོའི་མི་རིགས་ཀྱི་ལོ་རྒྱུས་ཀྱི་དབུ་ལྟ་བུ་ནི་དེ་རིང་བོད་མིའི་སྒྲིག་འཛུགས་ཀྱི་འགྱུར་འགོ་འདི་ནས་ཡིན་པར་སེམས་ཡོད་ལ། ཁོང་ཚོ་ནས་ཡར་རྩིས་ན་དེ་རིང་བར་ལོ་བརྒྱ་ཕྲག་གཅིག་ལྷག་འགོར་ཡོད་པ་རེད། སྐབས་དེར་རྒྱ་ནག་གཞུང་གིས་སྨྱན་སྦྱོར་བྱས་པའི་༼ ངོ་ལོག་པ་མཐར་བསྐྲོད་བཏང་བའི་ལོ་རྒྱུས་༽ཁྲོད་དུ་༧ཏཱ་ལའི་བླ་མའི་མིང་འདི་ཡང་ཡང་ཐོན་གི་ཡོད་ལ། རྒྱ་ནག་གཞུང་གིས་སྐབས་དེར་ལོ་རྒྱུས་འབྲི་སྟངས་ཀྱང་དེ་རིང་གི་༼ བོད་མིའི་སྒྲིག་འཛུགས་༽ཀྱིས་མགོ་བཅུགས་ཏེ་ལོ་རྒྱུས་གཞན་རྣམས་ལྟག་ལོག་རྒྱབ་སྟེ་བྲིས་ཡོད། དེ་ནི་རྒྱ་ནག་གི་བོད་མིའི་སྒྲིག་འཛུགས་༼ ངོ་ལོག་རུ་ཚོགས་ཤིག ༽་ཕྱི་ལོག་ཏུ་གྱར་ཚུད་ནས་ལོས་འབྲི། གང་ཡིན་ཞེ་ན་༼ བོད་གཞུང ༽ཞེས་པ་ཞིག་འབྲི་དགོས་ཚེ། སྐབས་དེའི་མི་ལ་དེང་སང་ལྟ་བུའི་མགོ་བསྐོར་གཏོང་མི་ཐུབ་ལ། བཙན་གནོན་ཀྱང་བྱེད་མི་ཐུབ། ཁོང་ཚོ་རྣམས་དེ་ལྟར་རྒྱ་ནག་གི་བོད་མི་ངོ་མར་གྱུར་ནས་འགྲོ་བཞིན་པའི་སྐབས་སུ།
རྒྱ་ནག་གི་བོད་མི་ཚོའི་མཁས་མཛངས་ནི་རྒྱ་མི་ལས་ལྡབ་འགྱུར་གྱིས་རྣོ་བས། ཡང་ཁོང་ཚོ་དག་གིས་འདི་ལྟར་སྨྲ་སྟེ། ” ༼ ངོ་ལོག་ལོ་རྒྱུས ༽་སུ་བཀོད་པའི་བོད་རིགས་རུ་ཚོགས་དེ་ནི་སྒྲིག་འཛུགས་ཆུང་ཆུང་ཞིག་མིན་པར། དེ་ནི་གཞུང་ཞིག་རེད་ལ། གཞུང་དེའི་མིང་ལ༼ བོད་གཞུང་༽་ཟེར་གྱི་འདུག ཕྱི་གླིང་པའི་དཔེ་མཛོད་དག་ཏུ་འདིའི་རིགས་ཀྱི་ལོ་རྒྱུས་མང་ཙམ་མཐོང་གི་འདུག ང་ཚོས་ལོ་རྒྱུས་འདིར་ངེས་པར་དུ་ཞིབ་འཇུག་བྱེད་དགོས་ཀྱི་འདུག་ “ཅེས་བརྗོད་སྐབས།
རྒྱ་ནག་གི་བོད་མི་ཞིག་ཨ་མ་རི་ཁར་སློབ་སྦྱོང་དུ་ཕྱིན་ནས་སླེབས་པ་དེས། ད་ཐེངས་ཀྱི་ཚོགས་འདུ་འདིའི་སྐོར་གྱི་གནས་ཚུལ་ཞིབ་ཏུ་གཟིགས། དེས་མ་ཚད་བཙན་བྱོལ་བོད་གཞུང་ཅི་ལྟར་རྒྱ་ནག་གི་བོད་མིའི་སྒྲིག་འཛུགས་སུ་གྱུར་ཚུལ་གཟིགས་ནས། ཁོང་གིས་རྒྱ་ནག་གི་བོད་མི་ཁ་ཤས་དང་མཉམ་ཏུ། ” སྐབས་དེར་གྲོས་ཚོགས་སྐབས་བཅུ་བཞི་པ་རེད། ཁོང་ཚོས་ཚོགས་ཆེན་སྐབས་ཀྱི་མི་མང་གི་མངོན་འདོད་དང་། སྟོན་པ་ཆེན་པོ་༧རྒྱལ་བ་རིན་པོ་ཆེས་ལམ་སྟོན་གནང་བའི་༼ གངས་ལྗོངས་རང་དབང་མང་གཙོའི་སྒྲིག་འཛུགས་༽གསུངས་བ་དེ་ལའང་ལྟོས་མེད་ཀྱིས། ༼ བོད་མིའི་སྒྲིག་འཛུགས་༽སུ་འགྱུར་བ་བཏང་འདུག སྐབས་དེ་ནས་བོད་མི་མི་ཉུང་བ་ཞིག་གི་སེམས་ཤུགས་ཆགས། ལས་དོན་གྲ་མ་འགྲིག་པས་ང་ཚོ་དེ་རིང་གི་ཀྲུང་གོ་བ་ཡིན་ཤག་གི་བོད་རིགས་སུ་གྱུར་བ་རེད་ཅེས” བརྗོད།
ཁོང་ཚོས་སྐབས་བཅུ་བཞི་པའི་གྲོས་ཚོགས་ཟེར་བ་དེ་གཅིག་པུ་མ་གཏོགས་སྐབས་དེའི་གནས་ཚུལ་གང་དག་ནས་འགྱུར་རིམ་ལ་ཞིབ་འཇུག་བྱེད་ས་མ་རྙེད་པར་ལུས། དོན་དངོས་ཤེས་འདོད་ཀྱི་འདུན་པ་འཕྱུར་བཞིན་སྡོད་བཞིན་པ་རེད།
ཡིན་ནའང་། སྟབས་ཡག་པོ་ཞིག་ལ་རྒྱ་གར་ནེ་རུ་གཙུག་ལག་སློབ་གཉེར་ཁང་དང་རྒྱ་ནག་ལྷ་སའི་སློབ་གྲྭ་ཆེན་མོ་གཉིས་ཀྱིས་སློབ་ཕྲུག་བརྗེ་རེས་བྱེད་སྐབས། ནེ་རུ་གཙུག་ལག་སློབ་གཉེར་ཁང་གི་དཔེ་མཛོད་དུ་ལྷ་སའི་སློབ་གྲྭ་ཆེན་མོའི་སློབ་ཕྲུག་གཉིས་ཀྱིས་བཙུན་པ་ཟམ་གདོང་ཟེར་བའི་བོད་ཀྱི་བླ་མ་ཞིག་གི་ལོ་རྒྱུས་མཐོང་། ད་དུང་ཁོང་ཉིད་༼ བོད་གཞུང་༽ གི་ཆབ་སྲིད་ཀྱི་དབུ་ཁྲིད་ལ་བསྡད་ཚུལ་ཀྱང་མཐོང་ཁར། ༼ བོད་གཞུང༽་དང་༼ བོད་མིའི་སྒྲིག་འཛུགས༽་བར་གྱི་ཐ་སྙད་དང་ནང་དོན་བར་གྱི་འབྲེལ་བ་གསལ་བཤད་ཞུས་ནས་ཨུ་ཚུགས་དང་སྤོབས་པ་ཉམས་བསྟན་བྱས་ཞིག་ཀྱང་མཇལ་འདུག
རྒྱ་གར་གཞུང་གི་གསང་བའི་ཡིག་རིགས་དེ་དག་གི་བརྗོད་བྱ་སྒྲུང་གཏམ་བཞིན་ཆགས་ནས་ག་ལེར་ཕྱིན་ཐོན་པས། རྒྱ་ནག་གི་བོད་མི་དེ་ཚོས་རྒྱ་གར་གྱིས་སྐབས་དེའི་གནས་ཚུལ་ཞིབ་ཕྲ་ཉར་ཚགས་བྱས་སྟངས་ལ་ཧ་ལས་ཧོན་འཐོར། རང་དབང་མེད་པར་༼ བོད་གཞུང་༽ཞེས་པའི་འཚོལ་བྱ་ཞིག་ཡོད་པར་འདུན་པ་འགོག་མེད་དུ་སྐྱེས། ཁོ་ཚོས་རིམ་བཞིན་ཡིག་རྙིང་དེ་དག་སྔོགས་སྐབས་བོད་གཞུང་གི་གཞུང་ཞབས་ཞིག་གིས་སྐབས་དེར་རྩོམ་ཡིག་ཅིག་བྲིས་པ་ལག་སོན་བྱུང་། ཁོང་གི་རྩོམ་ཡིག་དེར ” ་མིང་བསྒྱུར་དེ་མི་མང་དང་༧གོང་ས་མཆོག་གཉིས་ཀའི་དགོངས་བཞེས་ལ་མ་བསྟུན་པར་ཟམ་གདོང་བླ་མའི་མཁྲེགས་ཤུགས་ཀྱིས་ཁྱེར་མིན་དོགས་པ་བྱུང་ཚུལ་” བྲིས་འདུག་པ་མཐོང་བ་དང་། ད་དུང་གཞུང་ཞབས་རྩོམ་པ་པོ་དེ་མཐའ་མར་གནས་དབྱུང་བཏང་ཚུལ་གྱི་ཟུར་མཆན་དེའང་མཐོང་། རིམ་བཞིན་སྐབས་བཅུ་བཞི་པའི་གྲོས་ཚོགས་ཀྱི་ཚོགས་གཙོ་བཙུན་པ་ཟམ་གདོང་གི་མཛུབ་མོ་གར་བསྟན་ལ་འཆོང་རྐྱང་ཡིན་པའི་གནས་ཚུལ་རྣམས་ཞིབ་ཏུ་ཤེས།
ཁོང་ཚོས་རྒྱལ་ཡོངས་ཚོགས་ཆེན་ཐེངས་གཉིས་པ་ཟེར་བ་དེའི་མཐའ་མའི་སྙན་ཞུའི་ནང་ལས་ཐམ་དང་རྒྱལ་རྟགས། བོད་གཞུང་གི་མིང་ཚབ་སོགས་གང་འདོགས་བཀའ་འདྲི་ཞུས་པ་འཁོད་མེད་ཀྱང་། སྐབས་དེར་༧ཏཱ་ལའི་བླ་མས་༼ གངས་ལྗོངས་རང་དབང་མང་གཙོའི་སྒྲིག་འཛུགས༽གསུངས་འདུག་པ་མཇལ་རྗེས། ཚོགས་འདུ་གྲུབ་མཚམས་ཡང་བསྐྱར་མིང་ཅི་འདོགས་ཀྱི་སྙན་ཞུ་ཕུལ་བའི་གཤམ་འོག་གི་དགོས་དམིགས་མ་ཤེས་པར་ཧད་ནས་ལུས་ཤིང་། ཁོང་ཚོས་དེ་མ་ཐག་དོགས་སློང་བྱས་པ་ནི་བཙུན་པ་ཟམ་གདོང་གི་སྔ་མོ་ནས་ཟིན་བྲིས་བཏབ་བཞག་པའི་༼ བདེན་པ་ཉིད་རྒྱལ་གྱུར་ཅིག་༽་ཅེས་པའང་རང་འཇགས་དང་། ༼ བོད་མིའི་སྒྲིག་འཛུགས་ཀྱང་༽བཙུན་པ་ཟམ་གདོང་གི་ཡིག་ཆ་ཁག་དང་གཅིག་མཚུངས་ཆགས་ཡོད་སྟབས། ཁོང་ཚོས་དོན་དམ་༧ཏཱ་ལའི་བླ་མ་དང་བཙུན་པ་ཟམ་གདོང་གཉིས་ཀྱི་འགོ་ཁྲིད་མཐོ་ཤོས་སུ་ཡིན་མིན་ལ་དོགས་པ་སྐྱེས། ད་དུང་ཁག་ཅིག་གིས་༧ཏཱ་ལའི་བླ་མ་གཞན་གྱི་ཨུ་ཚུགས་ལ་སུན་སྣང་སྐྱེས་ནས་བཙུན་པ་ཟམ་གདོང་གི་འདོད་པ་ལྟར་བཞག་པ་ཨེ་ཡིན་ཞེས་ཀྱང་བཀའ་མོལ་གནང་།
མཐར་ཁོང་ཚོས་ཀྱང་ཁོ་བོ་ཅག་ཀྲུང་གོ་བ་རྣལ་མ་ཞིག་ཡིན་ས་མི་འགྲོ་བ་ཤེས་ཤིང་། རིགས་རུས་ཀྱི་ཁུངས་ལུང་ཡོད་པ་ཞིག་ཡིན་པའི་ཐེ་ཚོམ་གྱིས་ཕ་མེས་ཡང་མེས་འཚོལ་རྒྱུའི་ཞེ་བློ་གཏིང་ནས་འཁྲུངས་བར་གྱུར།
༢༠༡༡། ༦། ༢། ཉིན།
བོད་དང་ནང་ཆོས་གཉིས་སོ་སོར་འགྲོ་རྒྱུར་ད་དུང་དུས་ཚོད་ངེས་ཅན་རེད། དེ་བདེན་པ་རེད། ཡིན་ནའང་། ཆོས་ཀྱི་སྒྲིག་འཛུགས་ཀྱི་སྔར་སྲོལ་རིམ་བཞིན་ཉམས་ལབ་ན་འདྲ། ཡར་རྒྱས་འགྲོ་ལབ་ན་འདྲ། གང་ལྟར་རབ་བྱུང་གི་སྡེ་ཉུང་དུ་མ་གཏོགས་མང་དུ་འགྲོ་རེ་མེད་པ་གསལ་བོ་རེད། དེས་བསྟན་པ་འཛིན་སྟངས་ཀྱི་ལམ་སྲོལ་འགྱུར་བཞིན་པའང་གསལ་བཤད་བྱེད་ཀྱི་ཡོད་པ་རེད། དེ་དག་དངོས་ཡོད་གནས་ཚུལ་དང་རྒྱབ་ལྗོངས་རེད།
ངས་ག་རེ་ལབ་ཀྱི་ཡོད་པ་རེད་དམ་ཟེར་ན། ༧རྒྱལ་བ་ཐམས་ཅད་མཁྱེན་པ་འདིའི་སྐུ་དུས་སུ་མ་གཏོགས། ང་ཚོའི་བོད་གངས་ལྗོངས་སུ་སྐྱ་སེར་རིས་མེད་ཀྱིས་ནང་དོན་རིག་གནས་སློབ་སྦྱོང་བྱེད་པའི་ཤིང་རྟའི་སྲོལ་ཕྱེས་ཐུབ་མེད་པ་གསལ་བོ་རེད། ཡིན་ནའང་ཁོང་གི་སྐུ་དུས་འདིར་ད་དུང་སྤྱི་ཡོངས་ནས་རིག་གནས་དེར་སྦྱངས་ཚད་ཀྱི་བརྒྱ་ཆ་དམའ་མོ་རེད། བརྒྱ་ཆ་ངེས་ཅན་དུ་མ་སླེབས་པའི་སྐབས་འདིར། ༧གོང་ས་མཆོག་དང་བོད་མི་མང་གི་འབྲེལ་བར་ད་ཐེངས་ཀྱི་བཅའ་ཁྲིམས་བསྐྱར་བཅོས་ཀྱིས་ལོ་རྒྱུས་ལ་འགན་ཁུར་ཐུབ་པའི་གདེང་ཚོད་བྱེད་ཐུབ་ཀི་ཡོད་པ་མ་རེད། དེས་རྐྱེན་ཁོང་གི་དགོངས་གཞི་དང་ལྷག་ཏུ་འགན་ཁུར་ཆེན་པོ་གསུམ་གྱི་ཤེད་ཤུགས་ཁྱབ་བརྡལ་སོང་ན་སྙམ་པའི་འཛམ་གླིང་དང་ཡང་སྒོས་བོད་སྤྱི་ཚོགས་ཀྱི་མ་འོངས་པར་ལོ་རྒྱུས་ལྡན་པའི་༧རྒྱལ་བ་རིན་པོ་ཆེ་ཞེས་གྲགས་པ་དང་ཁ་ཐག་རིང་དུ་འགྲོ་རྒྱུ་ནི་ངའི་རྨོངས་འཆར་ཡིན་ལ་དངོས་ཡོད་གནས་ཚུལ་ཡང་རེད།
དེའི་ཕྱིར་སྡོམ་རྒྱབ་ནས་ཞུས་ན། ༧རྒྱལ་བ་རིན་པོ་ཆེས་རིང་ནས་ཡིད་ལ་བརྣག་ཅིང་གསུངས་པའི་༼ མི་སྡེའི་སྤྱི་ཚོགས་གྲངས་ཀ་ལྷག་མ་ཞིག་གི་ཆེད་དུ་ངོས་བོད་ཀྱི་རང་དབང་འཐབ་རྩོད་བྱེད་ཀྱི་མེད། བོད་གནས་པས་འཛམ་གླིང་ལ་སྨན་དུ་འགྲོ་བ་ཞིག་བྱུང་ན་བསམ་ནས་ངོས་ལྷག་བསམ་ཁུར་ཁྱེར་གྱི་ཡོད་༽ཅེས་པའི་དགོངས་གཞི་འདི་ཏག་ཏག་ཅིག་འགྲུབ་ཀི་ཡོད་མེད་ང་ལ་དོགས་པ་ཧ་ཅང་ཆེན་པོ་ཡིན། དེས་ན་རྒྱ་ནག་ལབ་ན་འདྲ། ཆབ་སྲིད་ལབ་ན་འདྲ། གང་ལྟར་དེང་སང་གསུངས་བཞིན་པ་ལྟར། ཐ་སྙད་ཙམ་ལ་མགོ་འཁོར་ནས་ང་ཚོས་ནོར་བུ་བརླག་པ་ཡིན་ན་མི་རབས་རྗེས་མར་འགན་ཁུར་ཅི་ལྟར་བྱེད་ཀྱི་ཡོད་དམ་བསམ་བསམ་ཞིག ཡར་ལངས་ན་མར་བསྡད་ན་སེམས་ལ་འཁོར་སྡོད་ཀྱི་འདུག
དྲ་གྲོགས་ཚོས་ངན་ཁག་ཚང་མ་བཀའ་སྤྱི་གཉིས་ཀྱི་མགོ་ཐོག་ཏུ་གཡོག་མ་གནང་རོགས།དེང་གི་མཁས་དབང་ཟམ་གདོང་རིན་པོ་ཆེའི་བོད་སྤྱི་པའི་རྩ་དོན་ཆེད་དུ་ཕྱག་ལས་གནང་བཞག་པ་དེ་ལས་ལྷག་ཅིག་དེ་སྔོན་གྱི་བཀའ་ཁྲི་དང་བཀའ་བློན་སུ་གང་གི་གནང་མྱོངས་མེད་པ་དེ་ནི་ཀུན་གྱིས་ཤེས་གསལ་རེད།ལྷག་དོན་དུ་༸གོང་ས་མཆོག་གི་ཐུགས་འདུན་བཞིན་རིན་པོ་ཆེའི་ལས་དོན་སྒྲུབ་བཞག་པ་ཞིག་ལས།གཞན་ཚད་ལས་འདས་པའི་ལས་དོན་ཞིག་གཏན་ནས་བྱ་མྱོངས་མེད་པ་དེ་ཡང་ཤེས་པར་བྱ་དགོས།ད་དུང་ཞུ་འདོད་པ་ཞིག་ལ།རྒྱ་སྤྱི་དང་རྒྱ་གར་གཞུང་གི་ཁྲིམས་མཐུན་གྱི་ངོས་ལེན་བྱ་མྱོངས་མེད་པའི་བཙན་བྱོལ་བོད་གཞུང་དེ།༸གོང་ས་མཆོག་དང་བཀའ་སྤྱི་གཉིས་ཀྱྱིས་ལྷག་བསམ་ཟོལ་མེད་ཐོག་ནས།བོད་མི་རིགས་ཀྱི་ཕུགས་འདུན་དང་ཁེ་ཕན་ཁོ་ནར་དམིགས་ནས་བཙན་བྱོལ་དུ་ཡོད་པའི་བོད་མི་རྣམས།མ་འོངས་ཕུགས་རྒྱང་རིང་པོར་ཞིག་གནས་ཐུབ་པའི་ཆེད་དུ་རྒྱལ་སྤྱི་དང་གནས་ཡུལ་རྒྱ་གར་གཞུང་གི་ཁྲིམས་དང་མཐུན་པ་ཞིག་དང་ལུགས་མཐུན་གྱི་སྒོ་ནས་བཙན་བྱོལ་མིའི་སྒྲིག་འཛུགས་སུ་བསྒྱུར་བ་དེ་ནི་ལོ་རྒྱུས་ཀྱི་ནག་ཉེས་ཅིག་ཡིན་ན།ད་འོ་ན།རྒྱ་སྤྱི་དང་གནས་ཡུལ་རྒྱ་གར་གཞུང་གིས་ཁྲིམས་ཐོག་ནས་ངོས་ལེན་མེད་པའི་བཙན་བྱོལ་བོད་གཞུང་ཞེས་པ་དེའི་འཛིན་སྐྱོང་བཀའ་ཤག་དང་སྤྱི་འཐུས་ལྷན་ཚོགས་ཕྱིར་བསྡུ་གནང་སོང་བ་ཡིན་ན།ཉིན་མོ་དེ་ནས་བཟུང་བཙན་བྱོལ་དུ་ཡོད་པའི་བོད་མི་རྣམས་ཁ་འཐོར་དགུ་འཐོར་དུ་གྱུར་ནས་རྩ་དོན་བསྒྲུབ་བྱེད་ལ་འགོག་རྐྱེན་ཞིག་འབྱུང་སོང་བ་ཡིན་ན།དེའང་ལོ་རྒྱུས་ཀྱི་ནག་ཉེས་ཆེ་ཤོས་སུ་བགྲང་འོས་པ་ཞིག་མ་ཡིན་ན་ཅི་ཡིན།
ད་མང་པོ་མ་ཤོད། བོད་རྒྱལ་ཁབ་ཟེར་བའི་མིང་དེ་ཚར་བ་རེད། ཟམ་གདོང་བླ་མ་བཀའ་ཤག་ནང་དུ་སླེབས་པའི་ལོ་གསར་ཚེས་གཅིག་ཉིན་མོ་བཀའ་ཤག་གི་ཡང་ཐོག་ལ་བོད་གཞུང་གི་རྒྱལ་དར་ཞིག་དང་རྒྱ་གར་གཞུང་གི་རྒྱ་དར་ཞིག་གཉིས་ཡོད་པའི་ནང་ནས་བོད་ཀྱི་རྒྱ་དར་དེའི་སྒང་ལ་ཐོག་ཞིག་རྒྱབ་ནས་རྒྱ་དར་དེ་ས་ལ་རིལ་བ་རེད། དེ་ཡག་པོ་རེད་དམ་སྡུག་པོ་རེད། ད་ཁྱོད་ཁ་དང་ངས་སྣ་ལབ་ན་ཕན་ཐོག་མེད་པ་རེད། བོད་མི་རྣམས་ལ་བསོད་ནམ་མེད་ན་བྱ་ཐབས་བྲལ།།
ད་ལྟ་ང་ཚོས་ནག་འདེད་བྱེད་དམ་དཀར་འདེད་བྱེད། ནག་འདེད་བྱས་ན་བཙན་བྱོལ་བ་ཚང་མ་ནག་ཉེས་ཅན་རྐྱང་རྐྱང་ཡིན་པ་བརྗེད་དུ་འཇུག་མི་རུང་།
དངོས་གནས་རྩོམ་ཡིག་ཡག་པོ་ཞིག་བྲིས་འདུག རྗེས་སུ་ཡིད་རང་ཡོད། ད་ཡིན་ན་ང་ཧ་ལས་ཧང་སངས་སོང་། རྒྱུ་མཚན་ཅི་ཕྱིར། ད་ལྟ་བར་དུ་གཞིས་ལུས་བོད་རིགས་སྤུན་ཟླས་རྩ་ཆེའི་རང་སྲོག་ཡན་ཀློད་བཏང་ཏེ་ཐོབ་རྒྱུ་བོད་མིའི་སྒྲིག་འཛུགས་དེ་ལས་མེད་པ་འདྲ་ འཕངས་ང་ལ་རྒྱལ་གཅེས་གཞིས་ལུས་བོད་མི་རྣམས་ཀྱི་སྲོག་ཏེ་ཕངས་བ་ལ། ད་གཞིས་ལུས་སྤུན་ཟླས་རང་སྲོག་བོད་མིའི་སྒྲིག་འཛུགས་དེའི་ཆེད་དུ་མ་གཏོང་རོགས། སྤྱང་གྲུང་དང་ལྡན་པའི་ང་ཚོ་བཙན་འབྱོལ་བ་ཚོས་སྔོན་མ་ནས་ཐོབ་རྒྱུ་བོད་མིའི་སྒྲིག་འཛུགས་དེ་ལས་མེད་པ་ཤེས་ཀྱི་ཡོད།
གངས་པྲུག་ཚོ་ལགས། ང་ཚོས་འདི་ལྟར་མང་པོ་བཤད་ནས་ཅི་བྱ་སྙམ་ཞིང་། ད་ནངས་ཡང་ཀྲུང་གོའི་བོད་ལྗོངས་དྲ་བ་ཟེར་བར་བཀྲ་ཤིས་ཟེར་བས་༼སུ་ཞིག་གིས་ཡུལ་གྱར་བ་བསྐྱེད་བཞིན་ཡོད་༽་ཅེས་པའི་དཔྱད་ཐུང་ཞེས་འདུག་པ་དེར་གཟིགས་དང་། ཡང་ཁ་རྡུང་ག་ཚོད་བཏང་འདུག། བཀྲ་ཤིས་ཟེར་བ་རྟུག་རེ་ཁ་ནས་ཤོར་དགོས་རྒྱུ་འདི་ཡང་སྙིང་བོད་མི་ཞིག་ཡིན་ནམ། བོད་མི་ཞིག་ཡིན་ན་བོད་གངས་ཅན་པར་དེང་སང་ངོམ་དུ་ཡོད་པའི་རིག་གཞུང་གང་ཡོད་པ་མི་ཤེས་པ་ཅི་རེད། ང་ཚོས་དེང་སང་ཚན་རིག་སྲོལ་གཏོད་པའི་ཕ་ས་ཆེན་མོ་ནུབ་ཕྱོགས་མགོ་སེར་ཡུལ་དུའངས་མགོ་བཀྱག་བཀྱག་བྱས་ནས་འགྲོ་རྒྱུ་ཡོད་པ་དེར་གཙིགས་མཐོང་མེད་པ་གང་རེད། བཀྲ་ཤིས་ཟེར་བ་འདིར་རང་ཉིད་བོད་རིགས་ཡིན་པ་དང་བོད་ཀྱི་མེས་པོ་གོང་མར་ཤ་ཞེན་མེད་པར་རང་གི་མེས་པོ་རྣམས་ལྐུགས་པ་དང་བརྗེ་ལུས་སོགས་ཡིན་པ་དང་། རྒྱ་ཡི་མེས་པོ་རྣམས་མཁས་པ་དང་ཡར་ཐོན་སོགས་ཡག་ཡག་ཀུན་ཡིན་པར་སྨྱོ་སྒྲོག་བྱེད་བཞིན་འདུག །ཁོས་ད་དུང་ཀྲུང་གོ་ལགས་ང་ཡི་མེས་རྒྱལ། ང་ཁྱེད་ལ་དགའ། གུང་ཁྲན་ཏང། ང་ཁྱེད་ལ་དགའ། ང་ཁྱེད་ལ་དུངས། ཞེས་སོགས་ཕོ་འཆལ་ཞིག་གིས་མོ་འཁྱམས་ཞིག་ལ་ལབ་བརྡོལ་སྨྲ་བ་ལྟར་ལབ་འདུག །
རྔ་བ་ཚེ་སྐྱིད་ཅེས་པ་དང་འདི་རྣམས་ཀྱིས་གང་ཟེར་བཞིན་ཡོད་དམ། བཙན་བྱོལ་བོད་གཞུང་ནས་མིང་སྒྱུར་བྱས་པ་དེ་ཆེ་ས་ནས་ཆུང་སར་བསྐྱལ་བ་དང་ཡངས་ས་ནས་དོག་སར་བསྐྱལ་བ་སོགས་ག་ལ་ཡིན། དེ་ལས་ལྡོག་སྟེ་རྒྱ་ཆུང་ས་ནས་ཆེ་སར་བསམ་པ་དང་། ཐུང་ས་ལས་རིང་སར་གཟིགས་པ་དང་། སླ་ས་ལས་བརྟན་སར་གཟིགས་པ་དང་། རྒྱ་གཞུང་ལ་འཐབ་རྩོད་བྱས་པའི་ཐབས་འཕྲུལ་གཏིང་ཡངས་ས་ནས་ཟབ་སར་ཕྱིན་པ་ཡིན་པས་བཙན་བྱོལ་སྒྲིག་འཛུགས་ལ་རྒྱབ་སྐྱོར་མཐའ་གཅིག་ཏུ་ཞུའོ། མ་འོངས་པར་སྔར་ཡོད་ཙམ་ལ་ཆགས་ཞེན་མ་བྱས་པར་དུས་བབས་ཀྱི་འགྱུར་བ་གཏོང་དགོས་རྣམས་དུས་ཐོག་ཏུ་འགྱུར་བ་གཏོང་བར་རེ་བསྐུལ་དང་རྒྱབ་སྐྱོར་ཞུའོ། །མདོར་ན་ང་ཚོའི་འཐབ་རྩོད་གྲྭ་སྒྲིག་སྡུག་ས་ནས་བྱས་ཏེ་མི་རབས་ནས་མི་རབས་བར་གནས་དགོས་ཀྱང་བཙན་བྱོལ་བོད་མིའི་གོང་བུའི་ནུས་པ་གནས་དགོས་པ་སྲོག་རྩ་ཡིན་པ་ཤེས་པར་གྱིས་ཤིག། མིང་ལ་འདྲེ་གཞུང་ཞེས་བཏགས་དགོས་བྱུང་ཡང་གཙོ་བོ་གོང་བུའི་ནུས་པ་ཉམས་སུ་མ་འཇུག །གངས་རིའི་བུ་ཕྲུག་ཚོ། སེམས་ཤུགས་ཤིག ནང་ཁུལ་དུ་ཁ་དམག་མ་རྒྱག་ཅིག རྩོམ་ཡིག་གི་མདུང་ཁ་རྒྱ་གཞུང་དང་རྒྱ་ཡི་རྒྱུག་ཁྱི་མི་ངན་རེ་ཟུང་ཡོད་པ་རྣམས་ལ་གཏོད་ཅིག།
འདྲེ་མགོ་རྡོའི་བསམ་ཚུལ་དེ་གནད་ལ་སོང་པའི་བཤད་ཚུལ་ཞིག་རེད་བསམ་། ང་ཚོའི་འཐབ་རྩོད་འདི་དེ་ལྟར་མི་གྱུར་བའི་ངེས་པ་མེད་། མ་གཞི་བསམ་ཚུལ་ག་འདྲ་ཡིན་རུང་ཕྱི་ལ་སྟོན་ཐུབ་པ་དེ་ཡག་པོ་རེད་། མི་མང་པོས་མཐོང་ན་ཕན་ལས་གནོད་མེད་། དུས་དང་མཐུན་པའིབསམ་ཚུལ་གང་ཡིན་པ་དག་བསམ་ཚུལ་འདྲ་མིན་ནང་ནས་གདམས་དགོས་པ་དང་། བསམ་ཚུལ་འདྲ་མིན་བཤད་ས་ཡོད་པའི་སྤྱི་ཚོགས་ཞིག་ངེས་པར་དགོས་། མི་ག་གེ་མོ་སུའི་ལྟ་ཚུལ་ཡིན་རུང་། དེ་ལ་བཟང་ངན་ཆ་དུ་མ་ཡོད་པ་བཞིན་། ང་ཚོ་ལ་དེའི་ཐད་ལྟ་ཚུལ་གང་ཡོད་པ་རྣམས་བཤད་ས་ཡོད་དགོས་། སྲིད་གཞུང་གི་ལོངས་ཕྱོགས་ལས་གཞན་བཤད་ས་མེད་ན་རྒྱ་ནག་དམར་པོ་དང་ཨ་ན་མ་ན་གཅིག་རེད་། མདོར་ན་བསམ་ཚུལ་བཤད་པ་དེ་ཁ་བཙུམ་ནས་བསྡད་པ་ལས་ཁེ་བཟང་ཆེ་བ་རེད་།
དུས་བབ་ཀྱི་དྲྭ་རྒྱ་འདི་ང་ལ་མཚོན་ན་བཙན་བྱོལ་བའི་དྲྭ་རྒྱའི་ནང་ནས་ཕན་ཆེ་ཤོས་ཞིག་ཡིན་། ང་རང་གི་བསམ་ཚུལ་དྲ་རྒྱ་འདི་བརྒྱུད་ནས་ཕྱི་ལ་སྟོན་ས་བྱུང་། གཞན་གྱི་བསམ་ཚུལ་མང་པོ་ཞིག་དྲྭ་རྒྱ་འདིའི་ནང་ནས་མཐོང་གི་འདུག་། ངའི་ངོས་ནས་དྲ་རྒྱ་འདིའི་རང་དབང་དག་སྔར་ཡོད་པ་བཞིན་ཡུན་རིང་གནས་ན་སྙམ་པའི་རེ་བ་ཆེན་པོ་ཡོད་།
བོད་གཞུང་ཞེས་པ་བོད་མིའི་སྒྲིག་འཛུགས་སུ་མི་བསྒྱུར་བྱེད་དགོས་བྱུང་བ་ཡིན་ནའང་། བོད་གཞིས་བྱེས་གཉིས་ཀྱི་བདེ་དོན་བསྒྲུབ་རྒྱུར་འགྱུར་བ་གང་ཡང་མེད་པས། སེམས་པ་རྣལ་དུ་ཕབ་སྟེ། སྐད་ཆ་བསམ་ནས་ཤོད། །རྩམ་པ་བལྡད་ནས་མིད། །ཅེས་པའི་གཏམ་དཔེ་འདི་ཐུགས་ལ་ཆོངས། །
༄༅། །སྤྱིར་བཏང་གློ་བུར་བསམ་ན། གློ་བུར་ན་ཐོས་ན་བོད་གཞུང་ཞེས་པ་བོད་མིའི་སྒྲིག་འཛུགས་སུ་བཅོས་པར་སེམས་པ་སྐྱོ་ངེས། ཡིན་ན་ཡང་གལ་ཏེ་༧གོང་ས་མཆོག་གི་སྐུ་རིང་ལ་ང་ཚོ་བོད་ལ་ལོག་མ་ཐུབ་ན། མ་འོངས་པར་རྒྱ་ནག་གིས་དཔལ་འབྱོར་དང་དམག་ཤུགས་ལ་བརྟེན་ནས་རྒྱ་གར་ལ་གནོན་ཤུགས་སྤྲད་ན་སོགས་ཕྱོགས་མང་པོ་ཞིག་ནས་བསམ་གཞིགས་བྱས་ཚེ། ཕྱི་ཡུལ་དུ་གྱར་བའི་བོད་མིའི་གནས་སྟངས་སྲུང་སྐྱོབ་བྱེད་རྒྱུར་ཧ་ཅང་འཚམ་པར་སྣང་། གང་ལྟར་ད་ནི་ཅི་ཞིག་ཡིན་ཀྱང་ལོ་རྒྱུས་སུ་གྱུར་ཟིན་པས། རང་གི་སྒྲིག་འཛུགས་དང་འགོ་ཁྲིད་ལ་དམད་དེ་སྡོད་པ་ལས། ཚང་མ་མཉམ་རུབ་ཀྱིས་བོད་མིའི་ལས་དབང་ལ་འགན་ལེན་བྱས་ན་མི་ལེགས་སམ།
སྨྱུག་མིང་བེད་སྤྱད་པར་སྐྱོན་ཆེར་མེད་ཀྱང་དུས་བབ་ཚང་ལ་མི་དེའི་ངོ་སྤྲོད་ལོ་རྒྱུས་གསལ་པོ་ཡོད་པའི་རེ་བ་ཆེ། འགན་མི་འཁྱེར་བའི་ཐོག་སྨྱུག་མིང་འོག་ནས་སྤྱི་ཚོགས་ཟང་ཟིང་བཟོ་བའི་རྕོམ་མྱོག་རྒྱ་ལ་མང་ནས་མང་དུ་སོང་ཚེ་རྩོམ་འབྲི་བ་པོ་ཁྲིམས་ལ་གཏུགས་དགོས་པ་ཡང་ཤར་སྲིད་པས་དེ་དུས་དུས་བབ་ཚང་ནས་མི་དེ་འདི་ཡིན་ཞེས་མཛུབ་མོ་འཛུགས་རྒྱུ་ཡོད་པ་ཤིག་དགོས། དེ་མིན་རྕོམ་ཉོག་གང་བྱུང་དུ་དྲྭ་རྒྱར་བཀོད་ན་དུས་བབ་ལ་ཡང་འགན་འཁྲི་ཡོད་པ་ཞིག་རེད།
ཆེན་པོ་ཆུང་ངུར་བསྒྱུར་རྒྱུ་སླ་མོ་ཡིན་རུང་། ཆེན་པོ་ཆེན་མོར་བསྒྱུར་རྒྱུ་དཀའ་མོ་རེད་མོད། འོན་ཏང་། ལོ་རྒྱུས་ཀྱི་རྒྱབ་རྟེན། བདེན་པའི་སྟོབས་ཤུགས། འགན་ལེན་གྱི་ཁ་ཕྱོགས། འཐབ་རྩོད་ཀྱི་རིམ་པ། མ་འོངས་པའི་མདུན་ལྗོངས་སོགས་གང་ལ་གཞིགས་ཀྱང་བསམས་རུང་། ཡོད་པ་སྐྱེད་སྲིང་དང་གཞི་རྒྱ་ཆེ་རུ་བསྐྱེད་དགོས་པའི་འགན་བབ་ནི། བཙན་བྱོལ་བའི་དམིགས་ཡུལ་གཙོ་བོ་ཞིག་དང་ལག་ལེན་ངོ་ཞིག་ཏུ་འཁུམས་མོད། དེང་སང་ལྟ་བུའི་འགན་ལེན་བྱེད་སྟངས་ནི། སྤྱིར་བཏང་ཕུགས་བསམ་ཞིག་གི་ཆེད་དུ་ཡིན་རུང་། ང་ཚོའི་སྟོབས་ཤུགས་དང་ཆིག་སྒྲིལ་གྱི་ནུས་པ། འཐབ་ཕྱོགས་དང་འགན་ལེན་བྱེད་སྟངས་དེ་གུ་དོག་དང་མི་གསལ་བ་ཞིག་ཏུ་བསྒྱུར་འདུག
མ་འོངས་སྔོན་དཔག་གི་སྒྲུང་ཞིག་བྲིས་འདུག རྒྱ་ནག་གི་སྲིད་དོན་ཤེས་མཁན་ཞིག་ཡིན་པ་གསལ་བོ་རེད་ལ། ཐུགས་རྗེ་ཆེ་ཞུ་འདུན་བྱུང་སོང་། མུ་མཐུད་དུ་སྒྲུང་འདི་རྨང་གཞིར་བཟུང་ནས་སྒྲུང་རིང་ཞིག་འབྲི་རོགས།
ང་ཚོས་གཞུང་ཞེས་པའི་མིང་འདིར་ཨུ་ཚུགས་རྒྱག་ནས་ཉིན་གཅིག་རྒྱ་གར་གཞུང་གིས་གངས་ཅན་སྐྱད་ཤོང་གི་བཀའ་ཤག་གི་ཚོགས་འདུ་དང་སྤྱི་འཐུས་ཀྱི་གྲོས་ཚོགས་ཚོགས་མི་ཆོག་པའི་བཀའ་གཏོང་ན་འགན་དེ་འདྲེ་མགོ་རྡོ་ཞེས་པ་ཁྱོད་ཀྱིས་འཁྱོག་གམ།
བོད་གཞུང་ཞེས་པའི་མིང་སྒྱུར་བྱས་པས་ལོ་རྒྱས་ཀྱི་ནག་ཐིག་ཏུ་འགྱུར་ག་ལ་དགོས། གཙོ་བོ་ང་ཚོའི་སྒྲིག་འཛུགས་ནི་ང་དགུ་གོང་གི་བོད་གཞུང་དེའི་རྒྱུན་ཡིན་པ་རྩོད་མེད་དེ་རྒྱུན་བཅངས་བྱས་ན་འགྲིགས་བསྡད་ཡོད། རང་དབང་བསྐྱར་གསོ་བྱ་རྒྱའི་གཞི་རྟེན་ས་སྦར་མོ་གང་མེད་ས་ཞིག་ནས་མི་རབས་རྗེས་མ་ཚོས་ཞིབ་འཇུག་མཐིལ་ཕྱིན་པར་མ་བྱས་པར་རང་གི་མེས་པོ་རྣམས་ལ་སྐྱོན་བརྗོད་བྱ་མི་སྲིད། དེ་བས་དུས་བབས་ལ་ལྟ་མ་ཤེས་པར་རང་གི་མི་རིགས་རིག་གནས་དང་བཅས་པ་བརླག་ཏུ་འཇུག་ན་དེའི་སྡིག་ཉེས་སུ་ཞིག་གིས་ཁུར་ནུས། དོན་གྱི་རྡོག་པོ་འགག་དོ་ས་ནི་ང་ཚོ་བོད་འདི་ལ་རང་དབང་ཆེ་ཙམ་ཞིག་མྱུར་དུ་འཐོབ་དགོས་པ་འདི་ཡིན། ད་རྩོམ་པ་པོ་རྣམས་ཀྱིས་རང་གི་མི་རིགས་ལ་ཞེན་ཡོད་ན་ནང་ཁུལ་ལ་བློ་མིག་གུ་དོག་གིས་སྐྱོན་བརྗོད་སྤེལ་རེས་བྱས་པ་ལས་རྒྱ་གཞུང་ནས་ཉིན་ཤས་སྔོན་བོད་ལྗོངས་དྲ་བ་ཞེས་པར་༼ཡང་སྙིང་སུ་ཞིག་གིས་བོད་ཀྱི་ཚབ་བྱེད་ཐུབ་བམ་༽ཞེས་་པའི་དཔྱད་རྩོམ་དང་ཡང་༼བོད་ཀྱི་ཁོར་ཡུག་གཏོར་བརླག་སྨྲ་བ་༽ཞེས་པའི་དཔྱད་གཉིས་བྲིས་པ་དེར་ལན་ཚ་ཐག་ཆོད་ཅིག་རྒྱག་དཱ། །
བཀའ་ཁྲི་མཆོག་གི་གསལ་བཤད་ལ་གཟིགས་པར་འཚལ། http://tibet.net/tb/2011/06/02/བཀའ་ཁྲི་མཆོག་གིས་བཅའ་ཁ/
དྲ་གྲོགས་འདྲེ་མགོ་རྡོ་ལ་ཕུལ།
ཉེ་རིང་བར་གསུམ་གཅིག་ཏུ་ལྟ་བའི་མིག
གཏམ་དང་སྙན་གྲགས་དགྲ་རུ་ལྟ་བའི་མིག
ནོར་དང་འབྱོར་བ་མི་མཁོ་ལྟ་བའི་མིག
མིག་གསུམ་མངའ་བའི་སྐྱེ་མཆོག་གང་ཉིད་མཆོད།
ཅེས་མཁས་དབང་ཟམ་གདོང་རིན་པོ་ཆེ་མཆོག་གིརླབས་ཆེན་གྱི་མཛད་རྗེས་དག་ལ་བཀའ་དྲིན་རྗེས་སུ་དྲན་པའི་སྒོ་ནས་གུས་ཕྱག་སྔོན་དུ་བཏང་ནས།འདྲེ་མགོ་རྡོའི་མིག་ལ་མི་མཛེས་པའི་བདེན་གཏམ་ཁོ་ན་སྨྲ་ལ་འདི་ན་བྲེལ།མིང་སྒྱུར་བྱས་པ་དེ་བཀའ་སྤྱིའི་ནག་ཉེས་གཏན་ནས་མིན་པ་མ་ཟད་བཀའ་སྤྱིའི་གཟི་རྗེས་རེད་ཅེས་བརྗོད་ཆོག།རྒྱལ་བའི་བཀའ་བཞིན་སྒྲུབ་པའི་བྱས་རྗེས་རེད་ཅེས་བརྗོད་ཆོག།
རིན་ཐང་བྲལ་བའི་རྒྱལ་ཡོང་ཚོགས་ཆེའི་ཐོག་རང་གི་མི་རིགས་ལ་ཤ་ཞེན་
དང་ལྷག་བསམ་ཡོད་ཀྱང་ཆབ་སྲིད་ཀྱི་གོ་རྟོགས་དམན་པ་དང་འགན་ཁུར་གྱི་
ཉམས་མྱོང་མེད་པ་ཕུགས་རྒྱང་ལྟ་བའི་མིག་ཆུང་དྲག་བའི་བཀའ་ཟུར་དང་སྤྱི་ཟུར་མཁས་དབང་དང་ཆབ་སྲིད་པའི་གྲས་སུ་མི་མང་པོ་ཞིག་གིས་ཨུ་ཚུགས་
མཐའ་རྐྱེལ་གྱིས་བཙན་བྱོལ་བོད་གཞུང་གི་མཚན་རང་སོར་བཞག་ཡོད་པ་མ་ཟད་བྱས་རྗེས་ཡིན་ཁུལ་གྱི་གསར་འགོད་པ་དག་ལ་སྤོབས་པ་ངང་ནས་
གསལ་བཤད་བྱས་ཡོད།
ད་དུང་དེ་དག་གི་རྗེས་འབྲང་པ་འདྲེ་མགོ་རྡོ་ཁྱོད་ལྟ་བུའི་མི་སྣ་གང་མང་ཞིག་གིས་ཟམ་གདོང་བླ་མ་གཙོ་པའི་ཟིན་བྲིས་ཚོགས་ཆུང་གིས་རྒྱལ་བའི་བཀའ་དགོངས་བཞིན་མིང་སྒྱུར་བྱས་པ་ལ་དོན་མེད་ཁང་ར་དང་ཞྭ་མོ་གསར་པ་ཞིག་གཡོག་ཐབས་བྱས་ཡོད།
བྱས་ལས་དེ་དག་ལ་བརྟེན་ནས་རྒྱལ་བའི་བཀའ་དགོངས་དཀྲུགས་བའི་ཉེན་ཁ་ཆེནཔོ་འདུག་གཟབ་གཟབ་བྱེད་ན་ཡག་པོ་འདུག་
རྗེས་སུ་དེའི་རིགས་མི་ཡོང་བར་ངེས་པར་དུ་བསམ་གཞིགས་བྱ་དགོས་འདུག
ཟམ་གདོང་བླ་མས་གང་གནང་༸་གོང་ས་མཆོག་གི་བཀའ་དགོངས་དང་མི་
འགལ་བ་དང་དགོན་པོ་གང་ཉིད་ཀྱི་དགོངས་པ་ཆ་ཚང་རྟོགས་ཐུབ་པའི་ནུས་ལྡན་གྱི་དམ་པ་ཞིག་ཡིན་པ་ནི་ཚོགས་མི་རྣམས་ཀྱིས་འཇམ་ཁ་ཞུ་སྐབས་ཀྱི་༸་གོང་ས་མཆོག་གི་་བཀའ་སློབ་ལས་ཡིད་ཆེས་དང་ངེས་རྙེད་ཡོང་བའི་རེ་བ་ཆེ།འདྲེ་མགོ་རྡོ་ཁྱོད་རིག་ཚོར་མེད་པ་དང་ཤེས་པ་རང་བཞིན་དུ་མི་གནས་པའི་མི་ཞིག་མ་ཡིན་པའི་རེ་བ་ཡོད། མིང་སྒྱུར་བྱས་དགོས་པའི་རྒྱུ་མཚན་རྣམས་ངེས་པར་དུ་ཤེས་དགོས་པ་ནི་
གལ་ཆེ་ལགས་ན་བཤད་པར་བྱ།
རྒྱལ་སྤྱིའི་རྩ་ཁྲིམས་ཀྱིས་རྒྱལ་སྤྱིའི་ལངས་ཕྱོགས་་དང་ངོ་བོ་མཚོན་དགོས་པ་དང་དེ་བཞིན་རྒྱལ་ཁབ་དེའི་རྩ་ཁྲིམས་དེས་རྒྱལ་ཁབ་དེའི་ངོ་བོ་དང་ལངས་ཕྱོགས་མཚོན་
དགོས།ཚོགས་པ་ཆུང་ཆུང་ཞིག་ཡིན་ཡང་ཚོགས་པ་དེའི་བཅའ་ཁྲིམས་ལ་བལྟས་དུས་ཚོགས་པ་དེའི་ལངས་ཕྱོགས་དང་ངོ་བོ་རྟོགས་ཐུབ་པ་ཞིག་དགོས།ཁྲིམས་ལུགས་ཀྱི་དགོས་པ་དང་དམིགས་ཡུལ་ཡང་དེ་རེད།་དེ་ལས་གཞན་གང་ཡང་ཡོད་མི་སྲིད།
རྒྱལ་ཁབ་དེའི་རྩ་ཁྲིམས་ནང་འཁོད་ཚར་བ་ཞིག་ཚེ་དེ་ལས་ཡོལ་དགོས་བསམ་ན་
ཡང་ཁྲིམས་ལུགས་ཐོག་ཡོལ་ས་གཏན་ནས་མེད།རྩ་ཁྲིམས་ནང་མི་གསལ་བའི་ཐོག་རྒྱལ་ཁབ་གཅིག་དང་གཞུང་གཅིག་གི་ལས་ཀ་བྱས་ན་ཁྲིམས་ལུགས་ཐོག་ནས་རྙོག་གྲ་བཤད་ས་མེད། ཁྲིམས་ནང་འཁོད་ཟིན་པའི་དོན་གནད་གཅིག་ལས་བྱུང་བའི་དཀའ་རྙོག་ཞིག་ཡིན་ན་ཁྲིམས་ལུགས་ཐོག་ནས་བསེལ་དགོས་པ་ལས་གཞན་འགྲོ་ས་མེད།
ཁྱོད་ཀྱི་བསམ་ཚུལ་དང་ཁྱོད་ཀྱིས་ལྟ་སྟངས་ལ་གཞིགས་ན་༸་གོང་ས་མཆོག་ལ་་ཡང་ཉེས་འཛུགས་བྱསཁུལ་བྱས་འདུག་མོད་འོན་ཀྱང་ངས་བལྟས་དུས་རང་མཚང་འབའ་ཞིག་བསྟན་པ་ལས་ཡོན་ཏན་གྱི
ལོ་རྒྱུས་ལ་དཀྱོག་བཤད་བྱས་པ་ཡིས་༧གོང་ས་མཆོག་ལ་བསྟོད་པར་མི་འགྱུར། ཁོང་གིས་བོད་གཞུང་གིས་མིང་བསྒྱུར་པ་དེ་མ་འགྲིག་པ་མཐོང་ཡོད་ཚོད་རེད་ལ། བོད་མི་ཡོངས་དེར་བློ་མ་བདེ་བ་ཞིག་བྱུང་ཡོད་པ་རེད། འོན་ཀྱང་འདི་ལྟར་དཀྱོག་བཤད་བྱས་ན་སུ་ལ་ཕན་གྱི་རེད། བསམ་ཚུལ་དེའི་འགྲོས་ལ་བལྟས་ན་ཟམ་གདོང་བླ་མར་སྐྱོན་བརྗོད་བྱེད་འདོད་ལས། བོད་གཞུང་གི་མིང་བསྒྱུར་པ་དེར་དངོས་ནས་ཚོར་སྣང་ཡོད་མེད་ཀྱང་ཐེ་ཚོམས་རེད་འདུག
༧གོང་ས་མཆོག་གིས་བོད་གཞུང་མང་ཚོགས་བཅར་བ་ཚང་མར་བོད་གཞུང་གི་མིང་བསྒྱུར་དགོས་པ་ནན་གྱིས་གསུངས་ཡོད་ལ། འདི་ན་མ་འོངས་པའི་བོད་པར་དམིགས་པ་ཞིག་ཡིན་པ་བཤད་མ་དགོས། གྲོས་ཚོགས་ནང་༧གོང་ས་མཆོག་གི་བཀའ་སློབ་ལམ་སྟོན་ལྟར་གཏན་འབེབས་བྱས་པ་དང་། དེའི་ཐོག་བཀའ་ཁྲི་ཟམ་གདོང་རིན་པོ་ཆེས་གསལ་བཤད་ཐེངས་མང་གནང་ཡོད། འགྲིག་མེད་ན་བཀའ་སྤྱི་གཉིས་ཀྱི་སྐྱོན་དང་། འགྲིག་ཡོད་ན་༧གོང་ས་མཆོག་གི་མཛད་འཕྲིན་ཡིན་པ་རྐྱང་རྐྱང་བཤད་ན། ལོ་རྒྱུས་བཤད་སྟངས་ཤིག་མ་རེད། དེ་མིན་༧གོང་ས་མཆོག་ལས་བཀའ་དྲིན་ཆེན་པོ་ཞིག་བོད་པར་སུ་གང་མེད་པ་ཡོངས་གྲགས་རེད།
སྒྲུང་འདི་འདྲ་བྲིས་ན་སེམས་པ་སྐྱོ་བ་ལ། རྟེན་འབྲེལ་ངན་པ་ལ།
ད་ཁྱོད་རང་གི་སྣང་ངོ་ལ་ཤ་ཚའི་གཏམ་ཞིག་དུ་རློམ་ཡང་གོ་རྒྱུ་དང་དགོས་བ་ཕན་ཐོགས་གང་ཡང་མེད་པས་ངལ་བ་རང་རྟེན་འདུག་ལོ།
དུས་རབས་ཉེར་གཅིག་པའི་ཤེས་ལྡན་འདི་དག་རྒྱུ་མཚན་དང་རིག་བ་གཙུགས་ཏུ་འཛིན་མཁན་ཤ་རྟག་ཡིན་པས་རྒྱུ་མཚན་མ་ཤེས་ན་༸མཁས་དབང་ཟམ་གདོངས་རིན་པོ་ཆེས་ཉེ་ཆར་གནང་པའི་བཀའ་སློབ་ལ་ཉན་ན་ལེགས།
དེའང་ཁོང་གིས་གསུངས་དོན་མིང་བསྒྱུར་འདི་ལ་རྒྱ་གར་ནག་གིས་གནོད་ཤུགས་ཐེབ་པའི་དོགས་ཡོད་ཚོ་ཕེབས་ན་ཞལ་འཛོམས་ནས་གསལ་བཤད་ཞུ་གི་ཡིན་ཞེས་གསུངས་འདུག་པས་རང་ཡང་ཕེབས་ན་སྙམ།
དེ་ལྟར་མི་འདོད་ན་༼བླུན་པོ་ཁ་བཙུམ་ན་བསྟན་པ་ལ་ཕན་ནོ༽
གསལ་བཤད།
འདས་པའི་ལོ་ཤས་གོང་ནས་བདག་གིས་འདྲེ་མགོ་རྡོ་ཞེས་པའི་སྨྱུག་མིང་འདིའི་འོག་ནས་《དུས་འགྱུར་》སོགས་སུ་”བླ་རྒན་ལ་དཔྱད་པ་”ཟེར་བ་ལྟ་བུའི་རྩོམ་ཡིག་གང་མང་ཞིག་བརྒྱུད་ལམ་ཁག་ལ་བཀོད་མྱོང་ནའང་། དེང་སང་ཁ་བརྡ་དྲ་དེབ་ངོས་སུ་ འདྲེ་མགོ་རྡོ་མིང་ཅན་ཞིག་གིས་མཆན་སྤེལ་བཞིན་པ་དང་། དེ་རིང་གི་རྩོམ་འདིའི་རྩོམ་བདག་འདྲེ་མགོ་རྡོ་ཞེས་པ་ནི་ཁོ་བོ་མིན་པར་གསལ་བཤད་བྱས་པ་ཡིན།
ལྷག་པར་ད་ནས་བཟུང་སྨྱུག་མིང་འདི་བདག་གིས་བེད་སྤྱོད་བྱ་རྒྱུ་མིན།