ངྷ་རམ་ས་ལའི་༼ བོད་མི་མང་ཆབ་སྲིད་ཚོགས་པ ༽

བོད་རིགས་གཞོན་སྐྱེས་ཤིག་གིས་མ་སྐུལ་དང་བླང་ཐོག་བཞུགས་སྒར་ངྷ་རམ་ས་ལར་བོད་མི་མང་ཆབ་སྲིད་ཚོགས་པ་ཞེས་པ་ཞིག་གསར་འཛུགས་གནང་ཡོད་འདུག་ལ། ཚོགས་པ་དེའི་ལངས་ཕྱོགས་ནི་དབུ་མའི་ལམ་ཡིན་ཞིང་། མ་འོངས་པར་བོད་པའི་སྤྱི་ཚོགས་ནང་དམངས་གཙོའི་གོ་རྟོག་སྤེལ་རྒྱུ་དང་། བཀའ་སྤྱིའི་འོས་བསྡུའི་ལས་རིམ་གྱི་ཆ་ཤས་ལེན་རྒྱུ་ནི་ཚོགས་པ་དེའི་དམིགས་ཡུལ་ཡིན་ཟེར།

བཙན་བྱོལ་བོད་མིའི་ལོ་ངོ་ལྔ་བཅུའི་དམངས་གཙོའི་འཕེལ་རིམ་ཁྲོད་ཀྱག་ཀྱོག་དང་དཀའ་ཚེགས་མང་པོ་བརྒྱུད་དེ། ད་ཆར་ཚད་གཞི་ངེས་ཅན་ཞིག་ཏུ་བསླེབས་ཡོད་ལ། ད་ལོའི་རྒྱལ་ཡོངས་འོས་བསྡུ་ཆེན་མོའི་སྐབས་སུ་གཞི་རིམ་མང་ཚོགས་ཁྱོན་ཡོངས་སུ་སྔར་བྱུང་མ་མྱོང་བའི་འགན་ལེན་ཆེན་པོ་ཞིག་བྱུང་སྟེ། བཙན་བྱོལ་བོད་མིའི་དམངས་གཙོ་ལ་གཟི་བརྗིད་བསྣན་ཡོད། འོན་ཀྱང་སྒེར་བཙན་ཅན་གྱི་རྒྱལ་ཁབ་གཞན་དག་དང་བསྡུར་ན། ད་དུང་ཞན་ཆ་དང་སྐྱོན་གནས་མི་ཉུང་བ་ཞིག་ཡོད་ངེས་ལ། རྒྱལ་ཡོངས་འོས་བསྡུ་ཆེན་མོའི་སྐབས་སུའང་ཆབ་སྲིད་ཚོགས་པ་ལོགས་སུ་མེད་པའི་དཀའ་ངལ་འོག འོས་བསྡུའི་ལས་རིམ་དེ་ཙམ་སྤུས་དག་པོ་ཞིག་ཡོང་ཐུབ་མེད།    

    བཞུགས་སྒར་དུ་རྒྱལ་ཡོངས་མང་གཙོ་ཚོགས་པ་སོགས་གཞུང་འབྲེལ་མིན་པའི་ཚོགས་པ་རེ་ཟུང་ཡོད་ཀྱང་། དམངས་གཙོའི་འཕེལ་རིམ་ཐོག་དོན་ཕན་ལྡན་པའི་ནུས་པ་འདོན་ཐུབ་པའི་ཆབ་སྲིད་ཚོགས་པ་རང་རྐྱ་འཕེར་བ་གཅིག་ཀྱང་མེད་སྟབས། དམངས་གཙོའི་འདི་ཤེས་དང་ཆབ་སྲིད་ཐོག་ཐུགས་སྣང་ཡོད་རིགས་མང་པོ་ཞིག་གིས་སྐོམ་པ་ཆུ་འདོད་བཞིན་ཆབ་སྲིད་ཚོགས་པ་ཞིག་ལ་རེ་སྒུག་བྱས་ཡོད་པའི་སྐབས་འདིར་ངྷ་ས་ཁུལ་དུ་ཆབ་སྲིད་ཚོགས་པ་ཞིག་གསར་འཛུགས་བྱས་ཡོད་པའི་གླེང་སློང་རིམ་གྱིས་བྱུང་། འོན་ཀྱང་། ངྷ་ས་ཁུལ་དུ་ལས་ཁུངས་དང་ཚོགས་པ་འདྲ་མིན་མགོ་འཛུགས་བྱེད་མཁན་མང་ལ་མཇུག་སྐྱོང་བྱེད་མཁན་ཉུང་བའི་སྣང་ཚུལ་དེའི་འོག་ནས་འདི་གའི་གསར་འགོད་པས་ཆེད་དུ་རྩད་གཅོད་བྱས་ཏེ་ཆབ་སྲིད་ཚོགས་པ་གསར་པ་དེའི་སྐོར་ལ་རྒྱུས་ལོན་རགས་ཙམ་བྱས།

དེ་ནི་གངས་སྐྱིད་སྒོ་ཆེན་འགྲམ་དུ་ནུབ་ལུགས་ཀྱི་སྨན་ཚོང་ཁང་ཆུང་ཆུང་ཞིག་གཉེར་ཡོད་པའི་ན་གཞོན་ཞིག་གི་རྨི་ལམ་ཡིན་པ་གཞི་ནས་ཤེས། ལ་དྭགས་གཞིས་ཆགས་སུ་སྐྱེས་ཤིང་འཚར་བའི་ན་གཞོན་སྐུ་ཞབས་བསྟན་འཛིན་རབ་རྒྱལ་ལགས་ནི། ༼ བོད་མི་མང་ཆབ་སྲིད་ཚོགས་པ་ ༽( People party of Tibet) ཟེར་བའི་ཚོགས་པ་གསར་འཛུགས་གནང་མཁན་ཡིན་ཞིང་། ཁོང་གིས་སྒེར་གཉེར་སྨན་ཚོང་གི་ཞོར་དུ་ཡིག་འབྲེལ་གྱི་ལམ་ནས་ཨིན་ཎ་མ་ཎལ་གཙུག་ལག་སློབ་གྲྭ་ (Annamala University) ཞེས་པའི་ནང་རྒྱལ་སྤྱིའི་ཁྲིམས་ལུགས་དང་ཆབ་སྲིད་ཐོག་སློབ་དཔོན་ལོ་རིམ་གཉིས་པའི་སློབ་སྦྱོང་བྱེད་བཞིན་ཡོད་འདུག གསར་འགོད་པས་ཁོང་ལ་ཆབ་སྲིད་ཚོགས་པ་དེའི་སྐོར་ལ་གླེང་མོལ་བྱེད་སྐབས། ཁོས་འདི་ལྟར་ངོ་སྤྲོད་གནང་བྱུང་། ང་ཚོའི་ཚོགས་པའི་མིང་ལ་༼ བོད་མི་མང་ཆབ་སྲིད་ཚོགས་པ ༽ཟེར་གྱི་ཡོད་ཅིང་། གཞིས་བྱེས་མང་ཚོགས་ཀྱི་དགོས་འདུན་བསྒྲུབ་རྒྱུའི་ཆེད་བཙུགས་པ་ཞིག་ཡིན་སྟབས་མི་མང་ཆབ་སྲིད་ཚོགས་པ་ཞེས་བཏགས་པ་ཡིན། ཕྱི་རྒྱལ་ཁག་ཏུ་ལི་བྷིར་ཕར་ཊེ་(Labour party )ཚོགས་པ་དང་སྤྱི་མཐུན་ཚོགས་པ་སོགས་ཆབ་སྲིད་ཚོགས་འདྲ་མིན་ཡོད་ཀྱང་། ཁོང་ཚོའི་ལངས་ཕྱོགས་དེ་ཕྱོགས་གཅིག་ཁོ་ནར་འགྲོ་བཞིན་ཡོད་པ་རེད། ང་ཚོའི་མི་མང་ཆབ་སྲིད་ཚོགས་པར་མཚོན་ན་བོད་རིགས་མང་ཚོགས་རྡོག་རྩ་གཅིག་སྒྲིལ་བཟོ་རྒྱུའི་དོན་དུ་རེད། ཅེས་བརྗོད་བྱུང་།

    ཁོང་གིས་མུ་མཐུད་དུ། བཙན་བྱོལ་བོད་མིའི་འོས་བསྡུ་ཆེན་མོའི་སྐབས། བོད་རྒྱལ་ཡོངས་མང་གཙོ་ཚོགས་དང་གཞུང་འབྲེལ་མིན་པའི་ཚོགས་པ་དེ་དག་ཆབ་སྲིད་ཚོགས་པའི་འགྲོ་ལུགས་ཐོག་ཏག་ཏག་ཅིག་འགྲོ་ཐུབ་ཀྱི་མི་འདུག ཆབ་སྲིད་ཚོགས་པ་གང་འདྲ་ཞིག་ཡིན་ཡང་ཚོགས་པའི་མགོ་འཁྲིད་དེ་རྒྱལ་ཡོངས་འོས་འདེམས་ནང་ཞུགས་སྲོལ་ཡོད་པ་མ་རེད། བོད་རྒྱལ་ཡོངས་མང་གཙོ་ཚོགས་པ་དེ་ཆབ་སྲིད་ཚོགས་པ་ཞིག་ཡིན་ཟེར་གྱི་ཡོད་ཀྱང་། འདི་ལོའི་འོས་འདེམས་སྐབས་ཚོགས་པའི་མགོ་འཁྲིད་འོས་གཞིར་ཞུགས་པ་རེད། གཉིས་པ། ཆབ་སྲིད་ཚོགས་པ་ཞིག་ཡིན་ན། རྒྱལ་ཡོངས་འོས་བསྡུ་ཆེན་མོའི་ལས་རིམ་ཁྲོད་སྲིད་འཛིན་དང་གྲོས་ཚོགས་འཐུས་མི་སུ་ཞིག་མིང་འདོན་བྱེད་སྐབས། ངེས་པར་དུ་ཚོགས་པ་རང་གི་ཚོགས་མི་ཡིན་དགོས་པ་རེད། མང་གཙོ་ཚོགས་པས་ད་ལོ་བཀའ་སྤྱི་གཉིས་ཀྱི་འོས་མི་མང་པོ་ཞིག་བཏོན་ཡོད་ཀྱང་། ཚོགས་གཙོ་ཁོ་རང་མ་གཏོགས་གཞན་ཚང་མ་མང་གཙོ་ཚོགས་པའི་ཚོགས་མི་མ་རེད། བོད་རྒྱལ་ཡོངས་མང་གཙོ་ཚོགས་པར་ལངས་ཕྱོགས་གསལ་པོ་མེད་པ་ཞིག་ཏུ་མཐོང་སོང་། ཞེས་བརྗོད་བྱུང་།

    རབ་རྒྱས་ལགས་སུ་ཆབ་སྲིད་ཚོགས་པ་དེའི་དམིགས་ཡུལ་དང་ཚོགས་མིའི་ཆ་རྐྱེན་སྐོར་དྲིས་སྐབས་ཁོས་བརྗོད་དོན། ཆབ་སྲིད་ཚོགས་པའི་དམིགས་ཡུལ་གཙོ་བོ་བཙན་བྱོལ་སྤྱི་ཚོགས་ཁྱོན་ཡོངས་སུ་དམངས་གཙོའི་གོ་དོན་དང་འགྲོ་ལུགས། ལས་འགན། ཐོབ་ཐང་སོགས་ཀྱི་སྐོར་གོ་རྟོགས་སྤེལ་རྒྱུ་དེ་རེད། ང་ཚོས་མི་འགྱང་བར་ངྷ་ས་མེག་གྷན་དུ་ཚོགས་མི་ ༥ ལས་གྲུབ་པའི་རྨང་གཞིའི་ལས་ཁུངས་ཤིག་འཛུགས་རྒྱུ་ཡིན། ཚོགས་པ་དེར་ཤེས་ཡོན་དང་ཆབ་སྲིད། ལྷག་བསམ། མི་མང་འཛིན་སྐྱོང་ཐོག་དམིགས་བསལ་ཉམས་མྱོང་མཁན་དེ་འདྲ་དགོས་ཀྱི་འདུག དེ་ནས་རིམ་བཞིན་སྦེལ་ཀོབ་དང་མོན་གྷོ། ལ་དྭགས། ཁེ་ན་ཌའི་རྒྱལ་ས་ཊོ་རོན་ཊོ། ཨ་རིའི་ནེའུ་ཡོག མེ་ནི་སོ་ཊ། སུད་སི་བཅས་སུ་ཡན་ལག་ལས་ཁུངས་འཛུགས་གཏན་འཁེལ་ཡོད། ལས་བྱེད་ཀྱང་གོ་སྒྲིག་བྱེད་ཐུབ་པ་བྱུང་ཡོད། ལས་ཁུངས་ཨ་མ་དབུ་འབྱེད་དང་སྦྲགས་ཡན་ལག་ཁག་ཀྱང་རིམ་པས་དབུ་འབྱེད་བྱ་འཆར་ཡོད། གཙོ་ཆེ་ཤོས་དེ་དབུས་ལས་ཁུངས་ལ་མི་སྣ་གལ་ཆེན་འགའ་རག་དགོས་ཀྱི་ཡོད་སྟབས། ད་དུང་མི་གཉིས་གཏན་འཁེལ་ཐུབ་མ་སོང་། ཞེས་བརྗོད་བྱུང་།

    ཚོགས་པའི་མ་དངུལ་དང་། ཚོགས་པ་རྒྱ་གར་གཞུང་ལ་ཁྲིམས་མཐུན་དེབ་སྐྱེལ་ཡོད་མེད་དྲིས་སྐབས། ཆབ་སྲིད་ཚོགས་པ་འདི་ཆབ་སྲིད་ཀྱི་ལས་ཀ་བྱེད་མཁན་ཚོགས་པ་ཞིག་ཆགས་ཡོད་སྟབས། རྒྱ་གར་གཞུང་ལ་ཁྲིམས་མཐུན་དེབ་སྐྱེལ་བྱ་རྒྱུ་ཁག་པོ་རེད། གཞོན་ནུ་ལྷན་ཚོགས་ཀྱིས་སྲིད་དོན་ལས་ཀ་བྱས་ཏེ་མི་ལོ་ ༣༠ ལྷག་ཕྱིན་ཡོད་ཀྱང་། ད་དུང་རྒྱ་གར་གཞུང་ལ་དེབ་སྐྱེལ་བྱས་ཡོད་པ་མ་རེད། ང་ཚོས་དེབ་སྐྱེལ་བྱ་ཐུབ་ཀྱི་མེད་ཀྱང་། ཚོགས་པ་འདིས་རྒྱ་ནག་ལ་ཐད་ཀར་གནོད་གཞིའི་ལས་ཀ་དེ་འདྲ་བྱེད་ཀྱི་མེད་སྟབས། རྒྱ་གར་གཞུང་གིས་དཀའ་ངལ་སྤྲོད་ཀྱི་མ་རེད་བསམ་ཡོད། དཔལ་འབྱོར་གྱི་ཐད་ནས་བཙན་བྱོལ་བོད་མིའི་ཚོགས་པ་སྤྱི་མཚུངས་ལྟར་དཀའ་ངལ་ཡོད་པ་རེད། འོན་ཀྱང་སེམས་ཤུགས་མ་ཆག་པར་ལས་དོན་ཐོག་འབད་པ་བྱས་ན། རིམ་བཞིན་བོད་པའི་སྤྱི་ཚོགས་ནང་ལས་གཞི་དེར་རྒྱབ་སྐྱོར་བྱེད་མཁན་མང་དུ་འགྲོ་བ་རེད་བསམ་གྱི་འདུག ཅེས་བརྗོད་བྱུང་།

    ཚོགས་པའི་ལངས་ཕྱོགས་དང་ལས་འགན་སྐོར་ལ། ང་ཚོའི་བོད་མི་མང་ཆབ་སྲིད་ཚོགས་པའི་ལངས་ཕྱོགས་ལམ་དབུ་མ་ཡིན་སྟབས་བོད་གཞུང་དང་ལངས་ཕྱོགས་གཅིག་པ་ཆགས་ཀྱི་ཡོད། མ་འོངས་པར་བོད་མི་མང་སྤྱི་འཐུས་དང་བཀའ་བློན་ཁྲི་པ་སོགས་ང་ཚོའི་ཚོགས་མིའི་ཁོངས་ནས་འདོན་རྒྱུ་མ་ཟད། ས་གནས་འཐུས་མི་དང་བདེ་དོན་འགན་འཛིན་སོགས་ཀྱི་འོས་གཞི་ཡང་ང་ཚོའི་ཚོགས་པས་གདམ་རྒྱུ་ཡིན། བོད་རྒྱལ་ཡོངས་མང་གཙོ་ཚོགས་པས་ས་གནས་ཁག་གི་འོས་གཞིར་ལག་པ་འཆང་མྱོང་ཡོད་པ་མ་རེད། འོས་བསྡུའི་རྐང་མཚམས་ལ་ང་ཚོས་སྤྱི་ཚོགས་ནང་སྐད་ཆ་དྲིས་ཏེ། འོས་གཞིར་ལངས་འདོད་ཡོད་ན་ཆབ་སྲིད་ཚོགས་པར་འཛུལ་ཞུགས་བྱ་དགོས་པ་རེད། འཛུལ་ཞུགས་བྱས་ན་འོས་མི་རྣམས་ང་ཚོའི་ཚོགས་པས་ཁྱབ་བསྒྲགས་གནང་གི་རེད། བོད་མི་མང་ཆབ་སྲིད་ཚོགས་པ་ནི་ལམ་དབུ་མའི་ཐོག་འགྲོ་བཞིན་ཡོད་སྟབས། ཚོགས་པའི་ནང་བོད་རང་བཙན་གྱི་ལྟ་བ་འཛིན་པའི་གཞོན་ནུ་དང་ཆུ་སྒང་ཚོགས་མི་རྩ་བ་ནས་ཞུགས་ཆོག་གི་ཡོད་པ་མ་རེད། ཅེས་བརྗོད་བྱུང་།

གསར་འགོད་པ། དཔལ་ལྡན།