ང་བོད་ཀྱི་དུས་བབ་ཟིན་བྲིས་སུ་མི་ཞུགས་དོན།

སྤོབས་པ་མཐའ་ཡས།

བོད་ཀྱི་དུས་བབ་ནི་ངས་འཛམ་གླིང་སྤྱི་དང་བྱེ་བྲག་བཙན་བྱོལ་བོད་མིའི་གནས་སྟངས་གསལ་བར་མཐོང་བའི་མིག་ལྟ་བུ་དེ་ཡིན། བོད་ཀྱི་དུས་བབ་ནི་ཆ་མེད་རྒྱུས་མེད་ཀྱི་ས་མཐའ་སྡེ་མཐའ་གང་ཞིག་ལ་འགྲིམ་རུང་རྟག་ཏུ་རང་སེམས་དབང་མེད་དུ་འཁོར་བའི་ཁྱིམ་ལྟ་བུ་དེ་ཡིན། བོད་ཀྱི་དུས་བབ་ལ་བརྟེན་ནས་ངས་ཀྱང་རང་གི་བསམ་ཚུལ་རྣམས་ཐད་ཀར་སྤུན་ཟླ་བརྒྱ་སྟོང་མང་པོའི་སྔོན་ལ་སྟོན་ཐུབ་པའི་གོ་སྐབས་རྙེད་བྱུང་། བོད་ཀྱི་དུས་བབ་ལ་བརྟེན་ནས་ང་དང་ང་འདྲ་བའི་སྤུན་ཟླ་བརྒྱ་སྟོང་མང་པོའི་ནང་སེམས་ཀྱི་རི་མོ་མཐོང་བྱུང་། བོད་ཀྱི་དུས་བབ་ཀྱི་རྩོམ་སྒྲིག་ལས་བྱེད་པ་སྔ་ཕྱི་ཚང་མའི་ངལ་བ་ཁྱད་བསད་ཀྱི་སྐུ་ཚེགས་དང་། མཁྱེན་དཔྱོད་བརྟན་བརླིང་གི་རང་གཤིས། དུས་རྟག་ཏུ་བདེན་དོན་ཁོ་ནའི་ཕྱོགས་སུ་འགྲེང་ཕོད་པའི་བཀའ་དྲིན་དེ་ནི་བརྗོད་ཀྱི་མི་ལངས་པ་ཞིག་ཡིན།

ཡིན་ན་ཡང་གནས་སྟངས་གང་ཡིན་མི་ཤེས། གཅིག་བྱས་ན་ངའི་སྐྱོན་ཡིན་སྲིད། གཅིག་བྱས་ན་གཞན་གྱི་སྐྱོན་ཡིན་སྲིད། ང་ཚོའི་སྤྱི་ཚོགས་ཁྲོད་དུ་བསམ་ཚུལ་འདོན་མཁན་ཞིག་བྱུང་ན་ཐོག་མར་མི་དེའི་ཆོལ་ཁ་ཆོས་ལུགས་གཉིས་པོ་གཙོ་བོར་གྱུར་པའི་ཚོ་ཁག་ཤོག་ཁག་རྩད་གཅོད་ཅིག་སྔོན་དུ་སོང་བའི་སྒོ་ནས་གཞི་དེ་ལ་དཔག་པའི་བསྟོད་སྨད་བྱེད་སྲོལ་ཞིག་ཡོད་པའི་སྣང་བ་བྱུང་། དེར་བརྟེན་ངས་ལོ་ཤས་རིང་མིང་རྫུན་ནམ་སྙུག་མིང་བེད་སྤྱད་པ་ཡིན། དེ་ལ་དགེ་སྐྱོན་གཉིས་ཡོད་པ་ངས་ཤེས་ཡོད། བཟང་ཕྱོགས་དེ་ནི་སྐད་ཆ་ལ་བརྟེན་ནས་སྐད་ཆ་ཤོད་པ་པོའི་ལེགས་ཉེས་དཔྱད་བསྡུར་བྱེད་པ་ལས་ཤོད་པ་པོ་ལ་བརྟེན་ནས་སྐད་ཆའི་ལེགས་ཉེས་སྔོན་ནས་ཐག་ཆོད་པ་ཞིག་མིན་པའི་དགེ་མཚན་ཡོད། སྡུག་ཕྱོགས་དང་ཁྲེལ་མེད་ཀྱི་མི་མང་པོ་ཞིག་གིས་དྲ་ལམ་གྱི་སུན་གཙེར་བྱེད་པ་ཁྱབ་འཕེལ་དུ་འགྲོ་བ་དེ་རེད།

དེ་བཞིན་སྐད་ཆ་ཤོད་པ་པོ་ངོ་ཤེས་མཁན་ག་ཚོད་ཉུང་ན་དེའི་སྐད་ཆར་དོ་སྣང་བྱེད་མཁན་དེ་ཙམ་གྱིས་ཉུང་། གང་ལྟར་ངས་མིང་རྫུན་ལྟ་བུ་ཞིག་བེད་སྤྱད་བྱས་ནས་དུས་བབ་ཏུ་ཟིན་བྲིས་ཁྱིམ་གཞིས་ཤིག་ཀྱང་བཟུང་། མི་གཞན་གྱི་བཤད་པའི་སྐད་ཆ་དག་ལ་ཡང་རིག་པའམ་བསམ་ཚུལ་ཡང་འདོན་ཅི་ཐུབ་བྱས། བསམ་ཚུལ་བཀོད་ས་དེར་ཡང་རྩོམ་ཡིག་ལྟ་བུ་ཁ་ཤས་རེ་ཡང་བཀོད་པ་རྒྱུན་མ་ཆད་ནས་ལོ་ཤས་སོང་། ངས་དེ་ལྟར་ལོ་ཁ་ཤས་ཀྱི་རིང་ལ་ལས་ཀ་དེ་མཇུག་སྐྱོང་བྱེད་པའི་རིང་མཚམས་མཚམས་སུ་རང་གི་སེམས་ན་ཡོད་པ་དེ་ཁ་རུ་འདོན་ཐུབ་པ་དང་མིས་ཀྱང་གོ་བ་དེ་བཞིན་དུ་བླངས་པའི་ལམ་ལྷོང་ཡག་པོ་ཐེངས་ཁ་ཤས་རེར་བྱུང་། མཚམས་རེར་རང་ཉིད་ཀྱིས་སེམས་ན་ཡོད་པ་ཁ་ནས་གསལ་བོར་བཤད་མ་ཤེས་པ་དང་། མིས་ཀྱང་གཅིག་ལ་གཉིས་འདོགས་ཀྱིས་ཐ་མ་ཆ་མེད་རྒྱུས་མེད་ཅིག་ཏུ་དྲུད་འགྲོ་དུས་ཀྱང་བྱུང་།

གང་ལྟར་ཡང་ལོ་ཁ་ཤས་དེའི་རིང་ལ་བོད་ཀྱི་དུས་བབ་ཀྱི་རྩོམ་སྒྲིག་ལས་བྱེད་པ་ཡོངས་ཀྱིས་ཆེས་གུ་ཡངས་དང་ཁོག་རྒྱ་བསྐྱེད་དེ། མ་ཞིག་གིས་རང་གི་བྱིས་པ་ཆུང་ངུ་ཞིག་ལ་གོམ་པ་སྤོ་སྟངས་བསླབ་པ་བཞིན་གོམ་སྟབས་རེ་རེ་ནས་གཉིས་རེ་བྱས་ཏེ་བསྐྱངས་ནས་འོངས་བ་འདི་ནི་ནམ་ཡང་བརྗེད་ཐབས་མེད་པའི་བཀའ་དྲིན་ཆེན་པོ་ཞིག་ཡིན།

གང་ལྟར་ཡང་ང་ཚོས་བོད་ཀྱི་དུས་བབ་ཏུ་འཛུལ་ཞུགས་རང་དབང་གི་གོ་སྐབས་རག་ནས་ཡུན་རིང་ཞིག་མ་འགོར་བར་དྲ་མིང་རྫུན་མ་ཅན་ཚོ་ལ་བརྟེན་ནས་དྲ་བདག་དང་དྲ་འབངས་ཚང་མར་དཀའ་ངལ་འཕྲད། དེར་བརྟེན་དྲ་བདག་ལུང་རིག་རྒྱལ་ལགས་ཀྱིས་ཀྱང་དྲ་འབུ་ཕྱིར་འབུད་བྱ་དགོས་པའི་དགོངས་ཚུལ་བཏོན། ངས་སྔོན་མར་ཁོང་གི་དགོངས་འཆར་དེར་ངོས་ལེན་བྱས་མེད། ཁོང་གི་དགོངས་ཚུལ་དེར་ཡང་ངས་རང་གི་སེམས་ལ་ཅི་དྲན་དང་ཁ་ལ་ཅི་ཐོན་གྱིས་བསམ་ཚུལ་མང་པོ་ཆད་མེད་དུ་ཞུས། ཡིན་ན་ཡང་ལོ་ནས་ཟླ་བ་འདས་ཀྱིན་ང་རང་ཉིད་ཀྱི་བསམ་ཚུལ་ལ་ཡང་དུས་བབ་ལྟ་བུའི་དྲ་ཚིགས་ཤིག་ལ་སྒྲིག་གཞི་དང་ཁ་ཕྱོགས་བརྟན་པོ་ཡོད་སྟབས་མིང་རྫུན་ཅན་ཚོས་རང་སྣང་གང་དྲན་གྱི་རྩེད་མོ་རྩེ་ས་དང་མིང་དངོས་ཅན་རྣམས་ལ་སུན་གཙེར་བྱ་ས་ཞིག་ཏུ་འགྱུར་མི་རུང་བ་དེ་ཡང་གལ་ཆེར་དོན་ཆེན་དུ་མཐོང་ཡོང་གིན་འདུག

དེར་བརྟེན་དུས་ནམ་ཡིན་ཡང་ང་རང་ཉིད་ཟིན་བྲིས་སུ་ཞུགས་ཐེངས་རེ་བཞིན་སེམས་ལ་གནོང་ཞིག་ཀྱང་རང་ཤུགས་ཀྱིས་སླེབས་ཡོང་གིན་འདུག དེར་ངས་བོད་ཀྱི་དུས་བབ་ཏུ་ཟིན་བྲིས་སྤེལ་བ་དང་བསམ་ཚུལ་འདོན་པ་ཉུང་དུ་བཏང་ཞིང་། རང་ཉིད་ནས་མགོ་བཙུགས་ཏེ་མིང་དངོས་མེད་པ་ཚོ་ཕྱིར་འབུད་པའི་གོམ་སྟབས་ཤིག་བསྒྱུར་བ་ཡིན། ལྷག་པར་ཡང་ཉེ་ཆར་བོད་ཀྱི་དུས་བབ་རྩོམ་སྒྲིག་པ་རྒན་གྲས་ལུང་རིག་རྒྱལ་ལགས་ཀྱིས་༼འགྱོད་པ་ཤྭ་ཁྱི་འདྲ་བོ།༽་ཞེས་པའི་རྩོམ་ཡིག་བསླེབས་པ་ནས་དངོས་མིང་མེད་པར་དུས་བབ་ཟིན་བྲིས་དང་རིག་པའམ་བསམ་ཚུལ་འདོན་སར་མི་ཞུགས་པའི་སེམས་ཐག་གཙང་བཅད་བྱས་པ་ཡིན།

ངའི་དྲ་གྲོགས་མང་པོ་ཞིག་གིས་ང་ལ་སྔོན་མར་སྙུག་མིང་གཏན་འཇགས་ཡོད་པ་དང་། རང་གི་ཚིག་ལ་རང་གིས་བདག་པོ་རྒྱག་མཁན་ཚོ་ནི་ དྲ་འབུ་མིན་པས་ཕྱིར་འབུད་མི་འོས་ཞེས་གསུངས་མཁན་བྱུང་། ཡིན་ན་ཡང་ཁྲིམས་དང་སྒྲིག་གཞི་ནི་རྒྱ་ཆེ་ས་དང་ཁྱབ་ཆེ་ས་ནས་ཐག་གཅོད་དགོས་པ་ཞིག་ལས་འདི་ལ་དམིགས་བསལ་དང་དེ་ལ་གུ་ཡངས་བཏང་ནས་ཁྲིམས་དང་སྒྲིག་གཞི་བཟོ་ཐབས་མེད་སྟབས་ང་རང་ཉིད་ནས་མགོ་བཙུགས་ཏེ། བོད་ཀྱི་དུས་བབ་ཟིན་བྲིས་ནང་གི་དངོས་མིང་མེད་མཁན་ཚང་མ་ཕྱིར་འབུད་ལ་ཕན་ཐོགས་ཤིག་ཡོང་བའི་རེ་བ་རྒྱག་གིན་ཡོད། གང་ལྟར་ཡང་ང་ནི་བོད་ཀྱི་དུས་བབ་དང་ཁ་འབྲལ་ཐབས་མེད་པས་རྒྱུན་དུ་བོད་ཀྱི་དུས་བབ་ཀྱི་ཉེ་ས་ཞིག་ཏུ་བཅར་ནས་འདུག་ངེས་ཡིན།
ཁ་དྲོ་བཀྲ་ཤིས།