སྙན་ངག་གྱེར་འདོན་འགྲན་བསྡུར་གྱི་གསལ་བརྡ།
རླབས་ཆེ་ཞིང་གཞུང་བརྟན་པའི་ཡབ་མེས་རྣམ་པས་ཚེ་སྲོག་དང་རྔུལ་ཁྲག་གིས་བསྐྲུན་པའི་དབྱངས་གསལ་སོ་བཞིའི་རྨུ་ཐག་འདི་ཉིད་མགོ་ནག་བོད་པ་ཡོངས་ཀྱི་ཚེ་སྲོག་གི་རྩ་བར་སྦྲེལ་ཡོད་ན། འདི་ཉིད་དར་སྤེལ་དང་རྒྱུན་འཛིན་བྱེད་རྒྱུ་ནི་ང་ཚོ་མི་རབས་གསར་བའི་གཞོན་རབས་པ་རྣམས་ཀྱི་ཕྲག་ཏུ་བབས་པའི་ལས་འགན་ཞིག་ཆགས་ཡོད། བོད་ནང་ལ་མཚོན་ན་རྒྱ་ཆེའི་བོད་དམངས་ཡོངས་ཀྱིས་སྐད་ཡིག་དང་རིག་གཞུང་ལ་བཅངས་པའི་བརྩེ་ཞེན་སྔ་ཕྱི་བར་གསུམ་དུ་ལྷོད་པ་མེད་ལ། ལྷག་དོན་ཕྱི་ལོ་ ༢༠༡༠ ལོར་སློབ་མའི་སྐད་ཡིག་རིག་གཞུང་གི་རིན་ཐང་ལ་བཟུང་བའི་ཡར་ལངས་རྣམ་འགྱུར་ལས་བོད་གཞིས་བྱེས་གཉིས་ཀྱི་མི་རྣམས་གཉིད་ལས་སད་དུ་བཅུག་ཡོད། དེ་དང་དེ་ལྟའི་ལས་མཐུན་ལམ་ལྷུང་གིས་བོད་ཕྱི་ནང་གཉིས་ཀྱི་གཞོན་སྐྱེས་དག་ལ་སྐད་ཡིག་གི་གོ་རྟོགས་གསར་བའི་ཚ་རླབས་ཤིག་འཕྱུར་བཞིན་ཡོད་། སྐབས་འདིར་ངེད་དྲ་ཚིགས་ཀྱིས་སྐད་ཡིག་རྒྱུན་འཛིན་ནམ་གོང་འཕེལ་གྱི་ཐབས་ལམ་ལ་དམིགས་ཏེ། རང་རེའི་བཙན་བྱོལ་སྤྱི་ཚོགས་ཁྲོད་སྙན་ངག་གྱེར་འདོན་འགྲན་ཚོགས་དང་། སྙན་ངག་རྩོམ་རིག་གི་ཚོགས་ཆེན་བསྡུ་སྐོང་། བཙན་བྱོལ་ནང་དུས་རབས་གསར་པའི་གཞོན་སྐྱེས་སྙན་ངག་པ་དང་སྙན་རྩོམ་གཅིག་ལ་ཕུལ་བྱུང་བྱ་དགའ་འབུལ་བའི་ལས་རིམ་ཞིག་སྤེལ་རྒྱུ་ཡིན། ལས་རིམ་འདི་ནི་གཅིག་ནས་བོད་ཡིག་གི་རྩོམ་པ་པོ་དང་ནང་སྒོས་སྙན་ངག་པ་རྣམས་ཀྱི་ཉམ་ང་བའི་འཚོ་ཐབས་ལ་ཤུགས་རྐྱེན་ཞིག་ཡོང་ཆེད་དང་། གཉིས་སུ་སྙན་ངག་ལ་བརྟེན་ནས་སྐད་ཡིག་ལ་ངོས་འཛིན་ཡང་དག་དང་སྙན་ངག་སྒྱུ་རྩལ་གྱི་སྤུས་ཚད་གོང་མཐོར་ཡོང་བའི་ཐབས་སུ་དམིགས་པ་ཞིག་ཡིན།
བྱ་འགུལ་གྱི་ལས་རིམ་ནི།
དང་བོ། བོད་མི་འདུས་སྡོད་ཀྱི་ས་གནས་ཁག་ཏུ་སྐོར་བསྐྱོད་ཀྱིས་སྙན་ངག་གྱེར་འདོན་གྱི་འགྲན་བསྡུར་རིམ་པ་གཅིག་ནས་གཉིས་བར་སྤེལ་རྒྱུ་དང་། མཐའ་མའི་རྟིང་རྩོད་འགྲན་བསྡུར་ནི་སྙན་ངག་ཚོགས་ཆེན་དང་ལྷན་དུ་བསྡུ་རྒྱུ་ཡིན། སྙན་ངག་གྱེར་འདོན་འགྲན་ཚོགས་སུ་ཞུགས་མཁན་རྣམས་ཀྱིས་རང་ཉིད་ཀྱི་སྙན་ངག་གྱེར་འདོན་བྱས་ཆོག་ལ་སྔོན་དང་ད་ལྟའི་སྙན་ངག་བདམ་གསེས་ཀྱིས་གྱེར་འདོན་བྱས་ཀྱང་ཆོག གྱེར་འདོན་འགྲན་བསྡུར་གྱི་ཨང་དང་བོར་ཧིན་སྒོར་གསུམ་ཁྲི་ལྷག ཨང་གཉིས་པར་ཧིན་སྒོར་གཅིག་ཁྲི་ལྷག ཨང་གསུམ་པར་ཧིན་སྒོར་ལྔ་སྟོང་ལྷག གཞན་ལེགས་གསོལ་འཚམས་རྟགས་ཀྱི་རིམ་པ་ཁ་ཤས་བཅས་ཡོད། རང་ཉིད་ཀྱི་རྩོམ་ཡིག་རང་ཉིད་ཀྱིས་གྱེར་འདོན་བྱས་པ་ལ་དམིགས་བསལ་ཡོད།
གཉིས་པ། བཙན་བྱོལ་ནང་གི་དུས་རབས་གསར་བའི་གཞོན་སྐྱེས་སྙན་ངག་པ་གཅིག་དང་སྙན་ ངག་གཅིག་ལ་སྙན་ངག་རྩོམ་རིག་གི་བྱ་དགའ་ཧིན་སྒོར་ཆིག་ཁྲི་རེ་དང་གཟེངས་བསྟོད་ ལག་འཁྱེར་འབུལ་རྒྱུ།
གསུམ་པ། བོད་ཕྱི་ནང་གཉིས་ཀྱི་སྙན་ངག་པ་ལྔ་དང་། རྩོམ་པ་པོ་ལྔ་ལ་གཟེངས་རྟགས་འབུལ་རྒྱུ། བདམ་གསེས་བྱེད་སྟངས་ནི་སྤྱི་ཚོགས་ཁྲོད་ཀྱི་རྩོམ་པ་པོ་དང་ཀློག་པ་པོ་གཙོས་པའི་ཤེས་ཡོན་ཅན་རྣམས་ཀྱི་དགོངས་འཆར་གཞི་ལ་འཇོག་རྒྱུ་ཡིན། དེ་བས་སྤྱི་ཚོགས་ཁྲོད་ཀྱི་རྩོམ་པ་པོ་དང་ཀློག་པ་པོ་གཙོས་མཁྱེན་ལྡན་རྣམས་ཀྱིས་བློ་གཟུ་བོའི་སྒོ་ནས་སྙན་ངག་པ་དང་རྩོམ་པ་པོ་འདེམས་གསེས་དང་མཚམས་སྦྱོར་གྱིས་ངེད་ཅག་ལ་རམ་འདེགས་གནང་རྒྱུ་མཁྱེན།
ང་ཚོར་འབྲེལ་བ་བྱེད་ས་ནི།
གློག་འཕྲིན་ཁ་བྱང་།
wokar2010@gmail.com, wokar.net ཡང་ནdawakarpo.com
ཁ་པར་ཨང་གྲངས། རྒྱ་གར་ལྷོ་ཕྱོགས། +91- 8095050518 རྒྱ་གར་བྱང་ཕྱོགས། +91-8679329164
