རྡོ་སྦིས་ཟླ་བ་ཚེ་རིང།
ཕྱི་ཟླ་བཅུ་བའི་ཚེས་བཅུ་དགུ་ཉིན་མི་རིགས་འདིའི་ཡུལ་ཆུ་ལ་དུང་ཞིང་ཡུལ་སྐད་ལ་དགའ་བའི་ངེས་དོན་གྱི་རྩོམ་པ་པོ་མེ་ལྕེ་ལགས་རང་ཁྱིམ་ནས་བཙན་བཟུང་བྱེད་འདུག་ལ། འཛིན་སྟངས་དེ་ཡང་རྩོམ་པ་པོས་མི་རིགས་འདིའི་སྐབས་བབ་ཀྱི་བདེན་གཏམ་མམ་རྒྱ་ནག་གིས་གདུག་རྩུབ་ལ་རྒོལ་བའི་སེམས་གཏམ་ཁ་ཤས་ཡིན་འདུག མདང་དགོང་ངས་ཡུལ་གྱི་གྲོགས་པོ་ཞིག་དང་མཉམ་དུ་ཁུ་ཁུ་( qq )ནས་རྩོམ་པ་པོ་ཁོ་རང་གླེང་བ་ཡིན་ལ། རྩོམ་པ་པོ་ཁོང་ནི་གང་ནས་ཐུག་ན་གང་དུ་བསྡད་ནའང་ཁོང་གི་ཁ་ནས་ཐོན་པ་དག་ནི་མི་རིགས་འདྲ་མཉམ་དང་སྐད་ཡིག་འདྲ་མཉམ། ཐོབ་ཐང་འདྲ་མཉམ་(བྱེས་འབྱོར་བའི་ཁ་ནས་ཐོན་པའི་མི་རིགས་འདྲ་མཉམ་གྱི་སྐད་ཆ་སྐམ་པོ་དང་གཞིས་ལུས་བའི་རང་སྲོག་གཏའ་མར་བཞག་ནས་སྨོས་བའི་འདྲ་མཉམ་གཉིས་ལ་རིན་ཐང་མི་འདྲ་བ་ཡོད་པ་ཀློག་པ་པོས་ཤེས་དགོས་)གྱི་སེམས་ཚོར་དམར་དམར་འདི་སུ་ལ་ཐུག་རུང་སྒྲོག་རྐྱང་བྱས་པས་རེད་འདུག
ཁོང་གི་བརྩམས་ཆོས་དག་ལས་ཀྱང་མི་བུ་ཞིག་གི་ཐོབ་ཐང་ངམ་མི་བུ་ཞིག་གི་བསམ་བློའི་རིན་ཐང་དེ་བཙན་པོའི་རྐང་འོག་ནས་མི་ཤི་བའི་བསམ་བློའི་རྒྱགས་ཕྱེ་ཡོད་ལ། གཉོན་པོའི་བག་གྲོང་ནས་མི་བརླག་པའི་ཀུན་གཞིའི་འདུ་ཤེས་ཡོད་པ་སྨོས་མ་དགོས་སོ། ཁོང་ཚོ་དང་ཁོང་ཚོའི་ཚེ་སྲོག་གིས་འབྲི་བཞེངས་བྱེད་པའི་བརྩམས་ཆོས་དག་གིས་འབོད་སྐུལ་ལས་མཆེད་པའི་རིགས་ཞེན་གྱི་འབར་ཞུན་འདི་ད་ཆར་བོད་མི་བྱིངས་ཀྱི་རིགས་ཞེན་གྱི་ཚེ་སྲོག་གླེང་བའི་ས་བོན་དུ་གྲུབ་འདུག ཁོང་ཚོས་ང་གཙོ་བཟུང་གི་ང་དང་ངའི་གཉེན་ཉེ་ཡི་སྐྱིད་སྡུག་གི་སེམས་ཚོར་ཅེར་ནས་ན་གཞོན་སྟོང་ཕྲག་ཅིག་གི་ཚོར་འདུ་ཡི་བསམ་བློའི་སྒོ་མོ་ཕྱེས་ཡོད་ལ། མི་བུའི་འདུ་ཤེས་དང་མི་རིགས་ཀྱི་འདུ་ཤེས་སྒྲོག་རྒྱང་ལས་སེར་སྐྱ་ཁྲི་འབུམ་གཉིད་ལས་བསླངས་ཡོད། མདོར་ན་སྟོང་ལོ་བརྒྱད་པའི་རིགས་ཞེན་གྱི་ཕྱི་རྒོལ་ཆེན་མོའི་ཚེ་སྲོག་གི་མེ་ལྕེ་དང་སྟོང་ལོ་དགུ་བ་དང་སྟོང་ལོ་བཅུ་གཅིག་པའི་དཔའ་བོ་དཔའ་མོ་དག་གིས་རིགས་ཞེན་གྱི་རང་ལུས་མེ་བསྲེགས་སྦྱོར་དངོས་ཀྱི་ རླབས་ཆེན་འབོད་སྐུལ་འདི་ཡང་མཐར་གཏུགས་ན་ཁོང་ཚོས་སྦར་བའི་བདེན་གཏམ་གྱི་འབར་ཞུན་རྐང་གཅིག་གི་ཉེར་ལེན་ནོ། །
ཁོང་ཚོས་འདི་ལྟར་ལྕགས་སྒྲོག་སྒོར་སྒོར་དང་མེ་མདའ་རྣོན་པོ་ཁ་ནས་གཅེས་སྲོག་ཕྲ་མོ་གཏའ་མར་བཞག་སྟེ་རྒྱ་ནག་པོའི་གདུག་རྩུབ་རེ་རེ་སྙུག་ཁར་དྲངས་ནས་ན་གཞོན་རྡོག་འདུས་དང་རིགས་ཞེན་གྱི་མེ་འབར་བའི་བྱ་བཞག་འདི་ནི་ཅི་འདྲའི་རླབས་ཆེན་ཨང་། ང་ཚོར་ཁོང་ཚོ་དང་ཁོང་ཚོ་འདྲ་བའི་དཔའ་བོ་དཔའ་མོ་དག་ཡོད་པས་བོད་ཁམས་གཅིག་འདུས་དང་སྐྱིད་སྡུག་མཉམ་ལེན་གྱི་སེམས་བྱུང་འདི་བྱུང་བ་རེད་མོད། ཡིན་ནའང་། བློ་ཡུལ་ལས་འདས་པ་ཞིག་ལ་བག་མེད་བྱེས་འབྱོར་གྲོང་ན་རང་ཁ་འབུ་ཁུང་གི་ཆེད་དུ་རིགས་ཞེན་དང་སྐད་ཡིག་ལྕེ་མགོ་ཀླན་ནས་མཐུན་སྒྲིལ་དང་ལར་ཞེན་རྡོག་རྫུས་ཀྱིས་བག་མེད་བྱ་སྤྱོད་འདི་ལ་ངོ་རེ་གནོངས་ཨང་།
མ་ཟད་མི་གཤིས་དང་རྒྱུན་ཤེས་ཀྱིས་སྟོང་བའི་རྩོམ་མཁན་དག་དང་དྲ་འབུ་དབྱེན་དཀྲུགས་མཁན་ཚོས་བག་མེད་ཀྱི་སྐད་ཆ་སྣ་མགོ་བསླངས་ཏེ་ཚིག་རྩུབ་ཀྱི་མདའ་མདུང་སྙུག་ཁར་ཕྱར་ནས་བསམ་བློ་དམར་གསོད་ཀྱི་ཇག་ས་འདི་ལ་སོམས་དང་། འདི་ལས་ང་ཚོར་ཐོབ་པ་ནི་གཞིས་ལུས་དཔའ་རྒོད་ཚོའི་སེམས་སྡུག་གི་རྨ་ཁ་དང་རྒྱ་དཀར་ནག་གཉིས་ཀྱི་ངོ་གདོང་ལས་བྱུང་བའི་འཚོ་བ་ཉི་ཚེ་བ་དེ་མ་ཡིན་ནམ། དེ་ལས་ཁྱོད་དང་ང་ལྟ་བུའི་སྡར་མའི་ཚོགས་རྣམས་ཀྱིས་རང་ལུས་མེ་བསྲེགས་དང་རང་སྐྱིད་རྒྱབ་དོར་གྱི་རླབས་ཆེན་བྱ་བཞག་གི་རྗེས་འབྲང་དཀོན་རུང་། ངེས་དོན་གྱི་རྩོམ་པ་པོ་མེ་ལྕེ་ལྟ་བུའི་རྩོམ་མཁན་རྣམས་དང་རིགས་ཞེན་གྱི་ཆེད་དུ་རང་ལུས་སྦྱིན་མཁན་གྱི་དཔའ་བོ་དཔའ་མོ་རྣམས་ཀྱི་མཆོད་སེམས་ལ་དད་མོས་ཀྱི་ཚིག་འབྲི་རེ་གཉིས་སྨོས་ནས་རྡོག་སེམས་གཅིག་ཏུ་སྒྲིལ་ན་མི་བཟང་ངམ།
མདོར་རྩ་བཤད་ན་མཉམ་འབྲེལ་རྒྱལ་ཚོགས་ཀྱིས་ལག་ཟུང་བརྐྱངས་ཏེ་འུ་ཚོར་བདེ་སྐྱིད་བསྟེར་མི་སྲིད་ལ། རྒྱ་ནག་དམར་བའི་མཚོན་མདའི་ཁ་ནས་བོད་བཙན་པོའི་སྙིང་སྟོབས་གཅོད་མི་ཐུབ་པས་ན། ཡོད་ཚད་ཀྱི་ཡོད་ཚད་ང་ཚོ་རང་ཉིད་ལ་རག་ལས་འདུག་ཟེར་བ་དེ་ཡིན། གལ་སྲིད་བྱེས་འབྱོར་བའི་མི་འདི་ཚོ་གཞིས་ལུས་ཀྱི་རྩོམ་པ་པོ་ལྟར་རང་སྐྱིད་རྒྱབ་དོར་གྱི་རིགས་ཞེན་ཞིག་ཡོད་ན། གལ་སྲིད་བྱེས་འབྱོར་བའི་མི་འདི་ཚོར་གཞིས་ལུས་དཔའ་བོ་དཔའ་མོ་ལྟར་རིགས་ཞེན་གྱི་སྙིང་སྟོབས་ཁོལ་མ་ཞིག་ཡོད་ཚེ་བོད་ཀྱི་བདེན་མཐའ་ནི་སང་ཉིན་གནངས་ཉིན་རེད་ཟེར་བ་དེའོ།།
གྲོགས་པོ་ལགས། སྐུ་ཞབས་མེ་ལྕེ་ལགས་སུ་ཆེད་་དུ་རྩོམ་ཡིག་འདི་འདྲ་ཞིག་བྲིས་པ་ལ་ཡི་རང་ཞུ། ནམ་ཡང་བོད་ལ་ཤ་ཞེན་ཆེ་བའི་མི་བུ་རླབས་ཆེན་འདི་འདྲ་ཞིག་ལ་གདུང་སེམས་མཉམ་བསྐྱེད་བྱེད་རྒྱུ་ནི། ཁ་ཚ་དགོས་གཏུགས་ཤིག་རེད། མི་རིགས་གནམ་འོག་འདེགས་པའི་ཀ་ཆེན་ཞིག་ཡོད་ན། བོད་ཀྱི་གཞོན་སྐྱེས་འདི་ལྟ་བུ་ཚོ་ནི། ངེས་པར་གནམ་འདེགས་ཀྱི་ཀ་བ་ཡིན་པ་རེད། དེའི་ཕྱིར་ན་ཡག་པོ་འདུག མེ་ལྕེ་རྒྱལ་ལོ།
གཞིས་བཞུགས་ཚད་ཐུབ་རྩོམ་པ་པོ་སྐུ་ཞབས་མེ་ལྕེ་ལགས་རྒྱ་གཞུང་གིས་བཙན་བཟུང་བྱས་པ་ནི། བོད་ཀྱི་སྒལ་ཚིགས་གཏོར་བསམ་པའི་ངན་བྱུས་ཉག་ཅིག་རེད། དེ་འདྲ་ཡིན་དུས། བྱུས་ངན་དེའི་རིགས་ལ་ཁ་གཏད་གང་འདྲ་གཅོག་རྒྱུ་ཡིན་མིན་གྱི་ཕྱོགས་སུ་བསམ་ཚུལ་རེ་སྤུངས་རོགས་ཞུ། ལྷག་པར་དུ། རྒྱལ་སྤྱིའི་སློབ་ཕྲུག་ཚོགས་པ་དང་རྒྱལ་སྤྱིའི་བོད་དོན་ལས་འགུལ་ཁང་སོགས་ཀྱིས་ངོས་ནས། རྩོམ་པ་པོ་ཁོང་གི་ལོ་རྒྱུས་སོགས་འཚོལ་ཞིབ་བྱས་ཏེ་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ཁག་དང་ཉེས་པ་ཚོགས་པ་སོགས་བརྒྱུད་ནས་རྒྱ་གཞུང་ལ་གནོད་ཤུགས་སྤྲད་ཀི་འཇུག་དགོས་པ་གལ་ཆེན་དོན་ཞིག་རེད། དེ་ཡང་འཕྲལ་དུ་འཇུག་དགོས་པ་ཤིན་ཏུ་ནས་ཀྱང་གལ་ཆེའོ།།
སྤྱིར་ན། རྩོམ་པ་པོ་མེ་ལྕེ་ལགས་ཀྱིས་བརྩམས་གནང་བའི་《མི་གཞིའི་སྙིང་སྟོབས་》དང་《ཁུ་སིམ་ཁད་ཀྱིས་དཀྲོགས་》སོགས་ལ་སློབ་སྦྱོང་བྱས་ཡོད་པ་མ་ཟད། ཞིབ་འཇུག་བྱས་པའི་གྲུབ་དོན་དེའི་རིགས་ལ་རང་ཤུགས་ཀྱིས་དགའ་ཕྱོགས་ཤིག་ཡོད་པས་ན། བློ་བསྐྱེད་ཅིག་མི་ཆུང་བ་ཞིག་རག་སོང་། ད་རུང་ཁོང་གིས་རྩོམ་སྒྲིག་གནང་བའི་《རང་གྲོལ་ཞིབ་འཇུག་》སོགས་ལ་མཇལ་མྱོང་ཡོད། དེའི་སྟོབས་ཀྱིས། ཁོང་ནི་ཆེས་ཐག་ཉེ་བའི་རྩོམ་པ་པོ་ཞིག་ཡིན་པའི་ཆ་ནས། དེ་རིང་གི་ཁོང་གི་གནས་ཚུལ་སྐྱོ་བོ་འདི་མཐོང་མ་ཐག་ཅི་ཡིན་འདི་ཡིན་མེད་པའི་ཕྱོགས་སུ་ལྷུང་གྲབས་བྱེད་ཀྱིན་འདུག
གང་ལྟར། ད་ནི། གནས་ཚུལ་འདི་བྱུང་ཚར་བ་རེད། དེ་འདྲ་ཡིན་དུས། ཁོང་གིས་མཛད་རྗེས་དང་ཤེས་རྟོགས་ལ་ངོས་འཛིན་ཡོད་པའི་ཐོག་ནས། ད་ཡིན་ན། རྩོམ་པ་པོ་ཁོང་དང་ཁོང་ལྟ་བུ་རྒྱ་གཞུང་གི་བཙོན་ཁང་ནང་ནས་གློད་གྲོལ་ཡོང་ཐབས་སུ། ནུས་ཤུགས་རྩལ་དགུ་འདོན་རན་པའི་དུས་ཚོད་ཛ་དྲག་ཅིག་རེད། དེ་ཡང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རྒྱལ་སྤྱིའི་མང་གཙོི་དང་རང་དབང་གི་ཐོབ་ཐང་བདག་སྐྱོང་བྱེད་ཀྱིན་པའི་ཚོགས་སྡེ་ཁག་ལ་ཁོང་གི་གནས་ཚུལ་འདི་ར་སྤྲོད་དང་འབྲེལ། རྒྱ་གཞུང་མི་ལྷོད་རང་ལྷོད་ཀྱིས་གནོད་ཤུགས་སྤྲད་ཐབས་ལ་གང་ཡོང་ཅི་ཡང་གནང་རོགས་ཞུ།
དེ་བཞིན་བོད་ཀྱི་རྩོམ་པ་པོ་མཐུན་ཚོགས་ཀྱི་ངོས་ནས་ཁོང་གི་ལོ་རྒྱུས་དང་ཁོང་གི་བརྩམས་ཆོས་རྣམས་ཡིག་རིགས་འདྲ་མིན་ལ་བསྒྱུར་ནས་ཁོང་གི་གནས་ཚུལ་འདི་འཛམ་གླིང་ལ་བརྒྱུད་སྤེལ་བྱེད་དགོས་པ་གལ་ཆེན་ཞིག་ཏུ་འཁུམས་སོ།། མ་གཏོགས་གནའ་ནས་བཟུང་ད་ལྟའི་བར་དུ། བོད་ཀྱི་སྒལ་ཚིགས་དང་བླ་སྲོག་ཆེས་མང་པོ་ཞིག་རྒྱ་གཞུང་འདི་ལྟར་ནག་མེད་སེ་བཏང་བ་མ་ཡིན་ནམ། ད་ནི། རྒྱ་གཞུང་འདི་སྲིད་བྱུས་འདིའི་རིགས་ལ་ལངས་ཤོར་ལ་ཕྱོགས་ཡོད་པ་མ་ཟད། བྱུས་ངན་འདི་སྟབས་བདེ་ཤོས་སུ་བརྩི་བཞིན་པའི་ཁུལ་ཡིན་རུང་། དེ་རིང་འཛམ་གླིང་ནི། འདི་འདྲ་མིན་པར་ར་འཕྲོད་བྱེད་རན་པའི་དུས་ཚོད་ཅིག་རེད།
མེ་ལྕེ་མ་རླག་རོགས་. མེ་ལྕེས་རྡོ་ཟླའི་རྩོམ་འདི་མཐོན་ན་སྐྱུག་ངེས་རེད་སྙམ། འདིས་རང་ཡང་དྲ་འབུ་ཆགས་ཟིན་པ་ཤེས་པར་བགྱིས. སང་གནངས་བོད་བདེན་མཐའ་སེལ་བའི་ཐབས་ལམ་གང་ཡོད་དམ་ དེར་བྱེས་པ་ཚོས་སྙིང་སྟོབས. ལྷག་བསམ་. འཇོན་ཐང་གི་ངོས་ནས་གློད་གཞག་པ་གང་ཡོད་དམ
དཔྱད་བརྗོད་ལ་རིན་ཐང་འདུག མེ་ལྕེ་ལགས་ཀྱི་སྐོར་གྱི་གཏམ་བཟང་ཞིག་འདིར་ཡོད།
http://www.chapdaklhamokyab.fr/%E0%BD%91-%E0%BD%A2-%E0%BD%84-%E0%BD%82-%E0%BD%A6-%E0%BD%96-%E0%BD%84/%E0%BD%95-%E0%BD%A1-%E0%BD%A3-%E0%BD%A3-%E0%BD%A3-%E0%BD%96/%E0%BD%A2-%E0%BD%98-%E0%BD%94-%E0%BD%94-%E0%BD%98-%E0%BD%A3-%E0%BD%A3%E0%BD%82%E0%BD%A6/