ཉེ་ཆར་ཧྥ་རན་སིའི་རྒྱལ་སའི་སྟོབས་ལྡན་རྒྱལ་ཁབ་ཉི་ཤུའི་ལྷན་ཚོགས་སྟེང་། གྷི་རེ་སིའི་བུ་ལོན་གྱི་རྙོག་གླེང་ཞིག་གིས་ལྷན་ཚོགས་ཀྱི་དམིཊ་ཡུལ་འགྲུབ་མེད།
ཟླ་འདིའི་ཕྱི་ཚེས་ ༣ ནས་ཚེས་ ༤ པར་ཉིན་གཉིས་རིང་། ཧྥ་རན་སིའི་ཁན་ནེ་སི (Cannes) ས་གནས་སུ་འབྱོར་ལྡན་རྒྱལ་ཁབ་ཉི་ཤུའི་ལྷན་ཚོགས་ཐེངས་དྲུག་པ་ཚོགས་སྐབས། གྷི་རེ་སིའི་ཆབ་སྲིད་དང་དཔལ་འབྱོར་གྱི་དཀའ་རྙོག་ལ་བརྟེན། འབྱོར་ལྡན་རྒྱལ་ཁབ་ ༢༠ ལྷན་ཚོགས་ཐོག་མའི་འཆར་གཞི་ལྟར་འགྲོ་ཐུབ་མེད།
ཉིན་གཉིས་རིང་གི་འབྱོར་ལྡན་རྒྱལ་ཁབ་༢༠ ལྷན་ཚོགས་(G-20 Summit) དེར་ཨ་རི་དང་ཧྥ་རན་སི། དབྱིན་ཇི། རྒྱ་ནག རྒྱ་གར་སོགས་འཛམ་གླིང་འབྱོར་ལྡན་རྒྱལ་ཁབ་ ༢༠ སྲིད་འཛིན་དང་སྲིད་བློན། དེ་བཞིན་ཡར་ཐོན་ཅན་གྱི་རྒྱལ་ཁབ་ཁག་ཅིག་དང་རྒྱལ་སྤྱིའི་ཚོགས་སྡེ་ཆེ་ཁག་བཅས་ཀྱི་མགོ་ཁྲིད་མགྲོན་འབོད་བྱས་ཏེ། རྒྱལ་སྤྱིའི་དཔལ་འབྱོར་དང་ཚོང་ལས་ཁྲོམ་ར། ཁོར་ཡུག་སྲུང་སྐྱོབ་སོགས་ཀྱི་ཐད་བགྲོ་གླེང་གྲོས་བསྡུར་བྱ་འཆར་ཡོད་ཀྱང་། དངོས་གཞིའི་ཚོགས་ཆེན་སྐབས་རྒྱལ་ཁབ་སོ་སོའི་གྲོས་འཆར་མང་དྲགས་པ་དང་། ལྷག་པར་དུ་གྷི་རེ་སུ་(Greece) དང་ཨེ་ཊ་ལེ་སོགས་ཡུ་རོབ་རྒྱལ་ཁབ་ཁག་ཅིག་གི་ཆབ་སྲིད་དང་དཔལ་འབྱོར་དཀའ་རྙོག་ལ་བརྟེན། ལྷན་ཚོགས་དེའི་དམིགས་ཡུལ་འགྲུབ་མེད།
གྷི་རེ་སི་ནི་ཡུ་རོབ་མཉམ་འབྲེལ་མཐུན་ཚོགས་(Eurozone)ཁོངས་ཀྱི་བུ་ལོན་མང་ཤོས་ཀྱི་རྒྱལ་ཁབ་ཅིག་ཆགས་ཡོད་ཅིང་། ༢༠༡༠ ཟླ་ ༥ ནང་རྒྱལ་སྤྱིའི་དངུལ་ཁང་བརྒྱུད་ཡུ་སྒོར་ཐེར་འབུམ་ ༡༡༠ བུ་ལོན་རོགས་སྐྱོར་དུ་བླངས་ཡོད་ཀྱང་། གྷི་རེ་སི་ཡིས་རྒྱལ་སྤྱིའི་ཚོང་ལས་ཁྲོམ་རའི་ནང་ནུས་པ་འདོན་མ་ཐུབ་པ་དང་། བུ་ལོན་གྱི་སྐྱེད་ཀ་འཕར་པ། ཐོན་སྐྱེད་ཀྱི་ནུས་པ་ཞན་པ་བཅས་ལ་བརྟེན་བསྐྱར་དུ་རྒྱལ་སྤྱིའི་བུ་ལོན་རོགས་དངུལ་ལེན་དགོས་པའི་གནས་སུ་གྱུར་སྟབས། འདི་ལོའི་ཕྱི་ཟླ་ ༡༠ ཚེས་ ༢༧ ཉིན་བསྐྱར་དུ་ཡུ་སྒོར་ཐེར་འབུམ་ ༡༣༠ བུ་ལོན་རོགས་སྐྱོར་ལེན་དགོས་བྱུང་ཡོད་ལ། སྐབས་དེར། གྷི་རེ་སི་དཔལ་འབྱོར་གྱི་ཉམ་ཉེས་ལས་སྐྱོབ་རྒྱུ་དང་མུ་མཐུད་བུ་ལོན་ལེན་མི་དགོས་པ་བཟོ་ཕྱིར། རྒྱལ་སྤྱིའི་དངུལ་ཁང་ནས་དེ་སྔའི་བུ་ལོན་གྱི་བརྒྱ་ཆ་ ༥༠ མེད་པ་བཟོས་ཡོད་འདུག
ད་སྔའི་གྷི་རེ་སིའི་བུ་ལོན་མང་ཤོས་ཧྥ་རན་སི་དང་ཇར་མན། དབྱིན་ཇི་བཅས་རྒྱལ་ཁབ་ ༨ ཙམ་ནས་ཁྱོན་བུ་ལོན་ཨ་སྒོར་ཐེར་འབུམ་ ༤༨༩ ཙམ་བླངས་ཡོད་འདུག ཧྥ་རན་སར་ཚོགས་པའི་རྒྱལ་སྤྱིའི་འབྱོར་ལྡན་རྒྱལ་ཁབ་ཉི་ཤུའི་ལྷན་ཚོགས་དང་བསྟུན་ཏེ། གྷི་རེ་སིའི་སྲིད་བློན་པཱ་པན་ཌིརེའོ་(George Papandreou)ཡིས་གྲོས་ཚོགས་ནང་། གྷི་རེ་སི་ཡུ་རོབ་མཉམ་འབྲེལ་མཐུན་ཚོགས་ནས་ཕྱིར་འཐོན་རྒྱུའི་མང་མོས་བསམ་ཚུལ་བསྡུ་རྒྱུའུ་གྲོས་གཞི་བཏོན་པར། གྲོས་ཚོགས་ནང་ངོ་རྒོལ་ཤུགས་ཆེན་བྱུང་ཡོད་པ་མ་ཟད། ཁོང་ལ་སྲིད་སྐྱོང་པའི་གདེང་ཚོད་མེད་པའི་འོས་ཤོག་བླུགས་ཡོད་པ་རེད། གལ་སྲིད་ཁོང་ལ་སྲིད་སྐྱོང་གི་གདེང་ཚོད་མེད་པར་སྐྱོན་བརྗོད་བྱེད་མཁན་ཚོར་མང་མོས་ཐོབ་ཚེ། སྲིད་བློན་གོ་གནས་རང་བཞིན་གྱིས་ཤོར་འགྲོ་བཞིན་ཡོད་འདུག གྲོས་ཚོགས་འཐུས་མི་བརྒྱ་ཆ་ ༥༠ ལྷག་གིས་ཁོང་ལ་རྒྱབ་སྐྱོར་ཐོབ་ཡོད་འདུག དེ་ནི་འཐུས་མི་མང་པོ་ཞིག་གིས་གནས་བབ་འདི་འདྲ་ཞིག་གི་འོག་བསྐྱར་དུ་གཞུང་འཛིན་བརྗེ་བོ་རྒྱག་རྒྱུ་ནི་ཕྱོགས་ཡོངས་ནས་དཀའ་ངལ་ཅན་དུ་འགྱུར་རྒྱུ་ཡིན་སྟབས། དེ་ལས་གཡོལ་ཐབས་སུ་སྲིད་བློན་ལ་རྒྱབ་སྐྱོར་བྱས་པ་ཞིག་ཡིན་འདུག
དེ་བཞིན་གྷི་རེ་སིའི་གྲོས་ཚོགས་ནང་སྲིད་བློན་གྱིས་ཡུ་རོབ་མཐུན་ཚོགས་ནས་འབུད་རྒྱུ་དང་ཡུ་སྒོར་ངོས་ལེན་བྱ་རྒྱུ་མིན་པར་མང་མོས་བསམ་ཤོག་བསྡུ་རྒྱུའི་གྲོས་གཞི་བཏོན་པ་དེས། ཡུ་རོབ་མཐུན་ཚོགས་ཀྱི་ཁོངས་གཏོགས་རྒྱལ་ཁབ་ཁག་གི་མགོ་ཁྲོད་ཚོར་ཁོང་ཁྲོ་བསླངས་ཡོད་པ་མ་ཟད། འབྱོར་ལྡན་རྒྱལ་ཁབ་ ༢༠ ཚོགས་ཞུགས་མགོ་ཁྲིད་ཚོའི་ཁྲོད་གླེང་གཞི་ཆེན་པོ་ཞིག་ཆགས་ཡོད་འདུག དེ་ནི་གྷི་རེ་སི་ཡུ་རོབ་མཐུན་ཚོགས་ནས་ཕྱིར་ཐོན་པ་དང་སྔར་གྱི་བུ་ལོན་རྣམས་མ་མཇལ་པའི་གནས་ཚུལ་བྱུང་ཚེ། ཡུ་རོབ་གླིང་དང་རྒྱལ་སྤྱིའི་དཔལ་འབྱོར་ཁྲོམ་རའི་འཁོར་རྒྱུག་ལ་གནོད་འཚབ་དང་གྱོང་གུད་ཆེན་པོ་ཐེབས་ངེས་ཡིན་པ་དང་། ལྷག་པར་དུ་སྲིད་བློན་ལ་སྲིད་སྐྱོང་གི་གདེང་ཚོད་མེད་པའི་འོས་ཤོག་འཕེན་རྒྱུ་བྱུང་པ་དེས་ད་ལྟའི་གཞུང་དང་དཔལ་འབྱོར་གྱི་འབྲེལ་ལམ་ཡོད་པའི་རྒྱལ་ཁབ་དག་གི་མགོ་ཁྲིད་ཚོར་བློ་འཚབ་ཆེན་པོ་བཟོས་ཡོད་པ་རེད། གལ་སྲིད་གྷི་རེ་སིའི་གཞུང་འཛིན་ལ་འགྱུར་པ་ཕྱིན་ཚེ་སྔར་ཡོད་བུ་ལོན་ཐད་གཞུང་འཛིན་གསར་པས་སྲིད་ཇུས་གང་འདྲ་འཛིན་མིན་དེ་ཆགས་ཡོད།
ཕྱི་ཚེས་ ༥ ཉིན་གྷི་རེ་སིའི་སྲིད་བློན་པཱ་པན་ཌིརེའོ་ལ་སྲིད་སྐྱོང་གི་གདེང་ཚོད་མེད་པའི་སྐྱོན་བརྗོད་ཐོག་གྲོས་ཚོགས་ནང་འོས་འཕེན་བྱུང་པར་རྒྱལ་ཁ་ཐོབ་ཡོད་རྗེས། སྲིད་བློན་པཱ་པན་ཌིརེའོ་ཡིས་ཕྱོགས་གཏོགས་ཆབ་སྲིད་ཚོགས་པ་དག་དང་མཉམ་རུབ་ཐོག་(Coalition government)གཞུང་སྐྱོང་རྒྱུའི་ཁྱབ་བསྒྲགས་བྱས་ཡོད་འདུག གྷི་རེ་སིའི་ཁ་གཏད་ཚོགས་པ་ཁག་གིས། གྷི་རེ་སིའི་དཀའ་རྙོག་སེལ་རྒྱུའི་ལམ་ཁ་ལེགས་ཤོས་ནི་འོས་བསྡུའི་ལམ་ནས་བསྐྱར་དུ་གཞུང་འཛིན་མི་སྣ་འདེམས་རྒྱུ་དེ་ཡིན་པར་བརྗོད་ཡོད་འདུག
གསར་འགོད་པ། བནྡེ་སྐྱབས།
ཡ་ཡ་ད་དེ་འདྲའི་བུ་ལོན་མང་པོ་གང་ཡིན་ནམ།