ཁེ་ཎ་ཌའི་གྲོས་ཚོགས་སུ་ཆབ་སྲིད་ཚོགས་པ་ཁག་བཞིའི་འཐུས་མིས། བོད་དོན་རྒྱབ་སྐྱོར་གྱི་གཏམ་བཤད་དང་ཁེ་ཎ་ཌ་གཞུང་གིས་བོད་དོན་ཐོིག་རྒྱབ་སྐྱོར་དགོས་པའི་འབོད་སྐུལ་ཞུས་འདུག
བོད་ནང་གི་བོད་མི་ཚོས་ཨུ་ཐུག་ཐབས་ཟད་ཀྱིས་རང་ལུས་མེར་བསྲེགས་གཏོང་བཞིན་པའི་ཐད། ཟླ་འདིའི་ཕྱི་ཚེས་ ༣ ཉིན་ཁེ་ཎ་ཌའི་གྲོས་ཚོགས་སུ་ཆབ་སྲིད་ཚོགས་པ་བཞིའི་གྲོས་ཚོགས་འཐུས་མི་ལྕམ་ཨེ་ལི་ཛེ་བྷེ་ཐི་མེའི་ (Elizabeth May)ལགས་དང་། སྐུ་ཞབས་ཨར་ཝིན་ཀོ་ལིར་ (Irwin Cotler)། ཝེ་ནེ་མར་སི་ཊོན་ (Wayne Marston)། གྷོར་ཌོན་བྷི་རོན། (Gordon Brown) བཅས་ཀྱིས་བོད་དོན་རྒྱབ་སྐྱོར་གྱི་གཏམ་བཤད་དང་། ཁེ་ཎ་ཌ་གཞུང་གིས་བོད་ནང་གི་ད་ལྟའི་ཛ་དྲག་གནས་སྟངས་ཐོག་རྒྱབ་སྐྱོར་དགོས་པའི་དུས་ལ་བབས་ཡོད་སྐོར་བརྗོད་འདུག
ཚོགས་འདུའི་སྟེང་ལྕམ་ཨེ་ལི་ཛེ་བྷེ་ཐི་མེའི་ལགས་ཀྱིས་ཁེ་ཎ་ཌར་གནས་སྡོད་བོད་མི་ཚོས་བོད་ནང་རང་ལུས་མེར་བསྲེགས་བཏང་བའི་བོད་མི་ཚོར་གདུང་སེམས་མཉམ་སྐྱེད་བྱེད་བཞིན་པ་དང་། བྱེད་སྟངས་དེ་ནི་བོད་མི་ཚོ་ཧ་ཅང་ཨུ་ཐུག་པའི་བྱ་སྤྱོད་ཡིན་སྐོར་བརྗོད་དེ། ཁེ་ཎ་ཌ་གཞུང་གིས་ཡུ་རོབ་གྲོས་ཚོགས་ལྟར། བོད་ནང་གི་གནས་སྟངས་ཐོག་རྒྱབ་སྐྱོར་བྱ་དགོས་སྐོར་བརྗོད་ཡོད་ལ། སྐུ་ཞབས་ཝེ་ནེ་མར་སི་ཊོན་མཆོག་གིས་བོད་མི་ ༡༠ ཙམ་གྱིས་རང་ལུས་མེར་བསྲེགས་བཏང་བར་གདུང་སེམས་མཉམ་སྐྱེད་དང་། རྒྱ་གཞུང་གིས་རྔ་པ་གཙོས་པའི་བོད་ཀྱི་ས་ཁུལ་ཁག་ཏུ་དམ་བསྒྲགས་དང་། དགོན་སྡེ་ཁག་ཏུ་གྲྭ་བ་གང་བྱུང་འཛིན་བཟུང་དང་ཁྲིམས་ཐག་གཅོད་པའི་རིགས་ལ། ཁེ་ཎ་ཌ་གཞུང་གིས་རྣམ་འགྱུར་སྟོན་རྒྱུའི་དུས་ལ་བབས་ཡོད་པ་མ་ཟད། གཞུང་ངོས་ནས་རྒྱལ་ཚོགས་བརྒྱུད་རྒྱ་གཞུང་ལ་བོད་ནང་རྟོག་ཞིབ་ཚོགས་པ་ཞིག་གཏོང་རྒྱུར་འབད་བརྩོན་གནང་དགོས་སྐོར་བཅས་བརྗོད་འདུག
སྐུ་ཞབས་ཨིར་ཝིན་ཀོ་ཊི་ལིར་ལགས་ཀྱིས། བོད་མི་ ༡༠ ཙམ་རང་ལུས་མེར་བསྲེགས་བཏང་བའི་ལོ་རྒྱུས་ད་བར་བྱུང་མྱོང་མེད་པ་དང་། ང་ཚོའི་ངོས་ནས་རྒྱ་གཞུང་གིས་འཛིན་བཟུང་བྱས་པའི་བོད་མི་ཚོ་འཕྲལ་དུ་ཀློད་གྲོལ་དང་། བོད་མིར་ཆོས་དད་དང་སྨྲ་བརྗོད་རང་དབང་སྤྲོད་དགོས་རྒྱུ། ཁེ་ཎ་ཌ་གཞུང་གིས་རྒྱལ་སྤྱིའི་བོད་དོན་ལས་འགུལ་ཉིན་མོར་རྒྱ་གཞུང་ལ་སྐྱོན་བརྗོད་དང་། བོད་ཀྱི་ཆོས་དང་རིག་གཞུང་སྲུང་སྐྱོབ་ཆེད་རྒྱ་གཞུང་གིས་བོད་མིའི་དབུ་ཁྲིད་དང་གྲོས་མོལ་མགོ་འཛུགས་རྒྱུར་སྐུལ་མ་གནང་དགོས་སྐོར་བརྗོད་ཡོད། དེ་བཞིན་སྐུ་ཞབས་གོར་ཌོན་བྷ་རོན་ལགས་ཀྱིས་ཁེ་ཎ་ཌ་གཞུང་གིས་བོད་ནང་བོད་མིའི་ཆོས་དད་རང་དབང་དང་། སྨྲ་བརྗོད་དང་འདུ་འཛོམས་རང་དབང་ཐོག་དམ་དྲག་དང་། འཛིན་བཟུང་བཀག་ཉར། ཁྲིམས་ཐག་གཅོད་པ་སོགས་ཀྱི་ཐོག་སེམས་འཚབ་ཆེན་པོ་ཡོད་སྐོར་དང་། ཁེ་ཎ་ཌ་གཞུང་གིས་རྒྱ་གཞུང་གིས་བོད་ནང་རྡོག་རོལ་གཏོང་བཞིན་པའི་ཆོས་དད་རང་དབང་ཐོག་དོ་སྣང་བྱ་དགོས་སྐོར་སོགས་བརྗོད་ཡོད་འདུག
གསར་འགོད་པ། དཔལ་ལྡན།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ད་རེས་ང་ཚོས་གོ་སྐབས་འདི་དང་བསྟུན་ཏེ་ཕྱོགས་གང་ས་ནས་ཤུགས་རྒྱབ་ན་བོད་དོན་ལ་འགྱུར་བ་འགྲོ་རྒྱུའི་རེ་བ་འདུག སྤུན་ཟླ་ཚོ།
རྒྱལ་ཁབ་གཞན་གྱི་གྲོས་ཚོགས་འཐུས་མི་དང་། ཚོགས་པ་ཁག མི་སྣ་ཁག་བཅས་ཀྱིས་ཤུགས་ཆེའི་བརྒྱབ་བསྐྱོར་གནང་བའི་སྐབས་དེར་ང་ཚོ་ཕྱི་ནང་བོད་རིགས་སྤུན་ཟླ་ཡོངས་ཀྱི་ཆིག་བསྒྲིལ་བྱས་ཏེ་རང་གི་རྩ་དོན་རང་གིས་བསྒྲུབ་དགོས།
བོད་དོན་ལ་བརྒྱབ་བསྐྱོར་བྱེད་མཁན་ཚང་མར་ཐུགས་རྗེ་ཞུ་དགོས་ལ་དུས་ནས་དུས་སུ་མཉམ་འབྲེལ་གྱིས་ཕྱོགས་གང་ས་ནས་ནུས་ཤུགས་རྒྱ་བསྐྱེད་གཏོང་ཐུབ་པ་བྱེད་དགོས།
༸ གོང་ས་མཆོག་སྐུ་འཚོ་བཞུགས་ཀྱི་སྐབས་འདིར་འདི་ནས་བརྩིས་པའི་མི་ ༢༠ ནང་ཚུད་དུ་འགྱུར་བ་ཞིག་འགྲོ་རྒྱུར་ཚང་མས་བསམ་བློ་གཏོང་དགོས། ལས་འགུལ་སྤེལ་དགོས། རྩ་དོན་རྩོད་དགོས། ཆིག་བསྒྲིལ་བྱེད་དགོས། ཐབས་ཇུས་བཏོན་དགོས། མཉམ་རུབ་བྱེད་དགོས། ངོ་རྒོལ་བྱེད་དགོས། ཐོབ་ཐང་རྩོད་དགོས།
བོད་མི་རིགས་འདི་ལོ་ངོ་སྟོང་ཕྲག་གི་ཆོས་དང་། རིག་གཞུང་། སྐད་ཡིག གཤིས་སྤྱོད། དྲང་བདེན། ཡ་རབས་བཟང་པོའི་གོམས་གཟིས་ལྡན་པའི་མི་རིགས་ཤིག་ཡིན་སྟབས་བོད་མི་རིགས་སྐྱ་དར་གྱི་མདུན་ལམ་ཆེད་ཚང་མས་འགན་འཁྲི་ཕྲག་ཏུ་བླངས་དགོས།
བོད་ཀྱི་བླ་ན་མེད་དབུ་འཁྲིད་༸ རྒྱལ་བ་ཡིད་བ།ིན་ནོར་སྐུ་ཚེ་ཁྲི་ལོར་བརྟན་པར་ཤོག རླབས་ཆེན་བོད་མི་རིགས་ཁྲི་ལོར་བརྟན་པར་ཤོག
ཁྱེད་ཅག་གིས་བདེན་པའི་རྒྱབ་ལངས་གནང་བར་བཀའ་དྲིན་ཆེ་ཞུ། འདི་ལྟར་བདེན་པའི་རྒྱབ་ལངས་ཀྱི་རྟེན་འབྲེལ་གྱིས་བདེན་དོན་ལ་རྒྱལ་ཁ་འཐོབ་རྒྱུར་ཐག་མི་རིང། བདེན་པའི་འོད་སྣང་ཀུན་ཏུ་མཆེད་གྱུར་ནས་རྫུན་པའི་མུན་པ་མ་ལུས་སེལ་བར་བརྩོན།
ཆབ་སྲིད་ཚོགས་པ་བཞིའི་གྲོས་ཚོགས་འཐུས་མི་ལྕམ་ཨེ་ལི་ཛེ་བྷེ་ཐི་མེའི་ (Elizabeth May)ལགས་དང་། སྐུ་ཞབས་ཨར་ཝིན་ཀོ་ལིར་ (Irwin Cotler)། ཝེ་ནེ་མར་སི་ཊོན་ (Wayne Marston)། གྷོར་ཌོན་བྷི་རོན། (Gordon Brown) བཅས་ལ་དྲ་ལམ་འདི་བརྒྱུད་ནས་ཁྱེད་ཅག་གིས་བོད་དོན་ཐོག་ཐུགས་ཁུར་དང་རྒྱབ་སྐྱོར་གནང་བར་སེམས་གཏིང་ནས་གུས་འདུད་དང་ཐུགས་རྗེ་བླ་ལྷག་ཏུ་ཆེ།