ཨབ་རྒན་ནང་གཏོར་རྒོལ་བྱུང་འདུག

ཁ་སང་ཨབ་རྒན་ནང་རང་སྲོག་འབེན་བཙུགས་ཀྱི་གཏོར་རྒོལ་དོན་རྐྱེན་གཉིས་བྱུང་སྟེ། མི་ ༥༩ རྐྱེན་འདས་དང་མི་ ༡༤༣ ལ་རྨས་སྐྱོན་ཕོག་ཡོད་འདུག

ཁ་སང་ཕྱི་ཚེས་ ༦ ཉིན་ཁ་ཆེ་ཆོས་ལུགས་པའི་ནང་གསེས་ཞའེ་ཁྲའེ་(Shiite Muslim)ཆོས་རྒྱུད་བ་རྣམས་ཀྱི་ཨཱ་ཞའོ་ར་(Ashura)ཞེས་པའི་དུས་ཆེན་གྱི་སྐབས་དང་བསྟུན་ནས། ཨབ་རྒན་(Afghanistan)རྒྱལ་སའི་ཁ་ཆེ་ལྷ་ཁང་ཞིག་ནང་རང་སྲོག་འབེན་བཙུགས་ཀྱི་གཏོར་རྒོལ་དོན་རྐྱེན་ཞིག་བྱུང་སྟེ། ཉུང་མཐའ་མི་ ༥༥  རྐྱེན་འདས་དང་མི་ ༡༣༤  ལ་རྨས་སྐྱོན་ཕོག་ཡོད་པ་དང་།  གཞན་ཡང་།  ཉིན་དེར་ཨབ་རྒན་བྱང་ཕྱོགས་གྲོང་ཁྱེར་མཱ་རྫར་ཨུས་ཞའེ་རའེ་ཧྥི་ (Mazar-e Sharif) ནང་དུའང་དེར་མཚུངས་ཀྱི་གཏོར་རྒོལ་དོན་རྐྱེན་ཞིག་བྱུང་སྟེ།  མི་ ༤ འདས་གྲོངས་དང་མི་ ༩ ལ་རྨས་སྐྱོན་ཕོག་ཡོད་འདུག དོན་རྐྱེན་ཁྲོད་འདས་གྲོངས་སུ་གྱུར་མཁན་མང་ཆེ་བ་ནི་དུས་ཆེན་སྐབས་ལྷ་ཁང་ནང་མཆོད་མཇལ་དུ་ཡོང་མཁན་མང་ཚོགས་རྐྱང་ཡིན་པ་དང་། རྐྱེན་འདས་སུ་གྱུར་བ་དག་གི་ཁྲོད་བྱིས་པ་འགའ་ཤས་ཀྱང་ཡོད་འདུག  

དོན་རྐྱེན་དེ་བྱུང་རྗེས་མཆོད་མཇལ་དུ་ཡོང་མཁན་ཁ་ཆེ་མང་ཚོགས་རྣམས་ཀྱིས་དྲག་སྤྱོད་པ་དང་ཐ་ལེ་བྷན་འཇིགས་སྐུལ་བར་སྐྱོན་བརྗོད་ཁ་རྡུང་བཏང་ཡོད་པར་མ་ཟད།  ཨབ་རྒན་ནང་སྲིད་མགྲིན་ཚབ་པས་ཀྱང་གཏོར་རྒོལ་དོན་རྐྱེན་དེ་ནི་ཐ་ལེ་བྷན་དྲག་སྤྱོད་པར་འབྲེལ་བ་ཡོད་སྐོར་བརྗོད་འདུག་ལ།   ཉིན་དེར་དབྱིན་ཇི་རྒྱལ་ཁབ་ནང་འཚམས་གཟིགས་བྱེད་བཞིན་པའི་ཨབ་རྒན་སྲིད་འཛིན་ཧེ་མའེ་ཌི་ཁར་རྫེ་(Hamid Karzai) ཡིས་ཀྱང་གཟིགས་སྐོར་མཚམས་འཇོག་བྱས་ཏེ་ཕྱིར་ཨབ་རྒན་དུ་ལོག་ཡོད་འདུག

ད་ལྟའི་ཆར་གཏོར་རྒོལ་དོན་རྐྱེན་དེ་ངོས་ལེན་བྱེད་མཁན་གྱི་འཇིགས་སྐུལ་ཚོགས་པ་སུ་གང་ཡང་བྱུང་མེད་པ་རེད། དེ་སྔོན་ཨབ་རྒན་ནང་ཆོས་ལུགས་བར་གྱི་འགལ་བས་རྐྱེན་གྱིས་གཏོར་རྒོལ་དོན་རྐྱེན་བྱུང་བ་ཧ་ཅང་ཉུང་ཉུང་ཡིན་འདུག  ཡིན་ནའང་། ཕྱི་ལོ་ ༡༩༩༠ ལོར་ས་ནའེ་ཁ་ཆེ་བ་(Sunni Muslim)དང་ཐ་ལི་བྷན་ཤོག་ཁག་གིས་སྲིད་དབང་སྒེར་གཅོད་སྐབས། ཞའེ་ཁྲའེ་ཁ་ཆེ་བ་(Shiite Muslim)རྣམས་ལ་གནོད་འཚེ་བཟོས་མྱོང་ཡོད་འདུག 

ཧྥ་རན་སིའི་གསར་སྤེལ་ཁང་གིས་གནས་ཚུལ་སྤེལ་བའི་ནང་། ཨབ་རྒན་ནང་ཉེ་བའི་ལོ་ ༡༠ ལྷག་རིང་རང་སྲོག་འབེན་བཙུགས་ཀྱིས་གཏོར་གཏོར་རྒོལ་དོན་རྐྱེན་བཟོ་མཁན་མང་ཆེ་བ་ནི། ཐ་ལི་བྷན་དང་ས་ནའེ་ཁ་ཆེ་བ་ཡིན་པར་བརྗོད་འདུག

གསར་འགོད་པ། ཚེ་རིང་རྒྱལ།