བོད་ནང་གི་རྩོམ་པ་པོ་བདུན་ལ་སྐབས་བདུན་པའི་<<སྦྲང་ཆར>> དུས་དེབ་ཀྱི་རྩོམ་རིག་དང་དཔྱད་བརྗོད། སྨྱུག་གསར་བཅས་ཀྱི་བྱ་དགའ་ཐོབ་འདུག
མཚོ་སྔོན་མི་རིགས་དཔེ་སྐྲུན་ཁང་གི་རྩོམ་རིག་དུས་དེབ་ཆེ་གྲས་ <<སྦྲང་ཆར>> རྩོམ་སྒྲིག་ཁང་གིས་ལོ་གསུམ་རེའི་ནང་བོད་མདོ་དབུས་ཁམས་གསུམ་གྱི་བརྩམ་སྒྲུང་དང་དཔྱད་རྩོམ། སྙན་ངག ལྷུག་རྩོམ་བཅས་འབྲི་མཁན་གྱི་བོད་རིགས་རྩོམ་པ་པོ་རྣམས་ཀྱི་ཕུལ་བྱུང་བརྩམས་ཆོས་ཁག་དྲག་འདེམས་བྱས་ཏེ་བྱ་དགའ་སྤྲོད་ཀྱིན་པ་ལྟར། ཉེ་ཆར་སྦྲང་ཆར་རྩོམ་རིག་བྱ་དགའ་དཔྱད་འདེམ་ཚོགས་ཆུང་གིས་དཔྱད་འདེམ་དང་། བསྐྱར་འདེམ་རིམ་པ་བརྒྱུད། ༢༠༠༩ ལོ་ནས་ ༢༠༡༡ ལོའི་བར་གྱི་ <<སྦྲང་ཆར>> དུས་དེབ་ལས་སྦྲང་ཆར་རྩོམ་རིག་བྱ་དགའ་ཐོབ་མཁན་གྱི་རྩོམ་པ་པོ་གསུམ་དང་། སྦྲང་ཆར་སྨྱུག་གསར་བྱ་དགའ་ཐོབ་མཁན་གྱི་རྩོམ་པ་པོ་གཉིས། སྦྲང་ཆར་དཔྱད་བརྗོད་བྱ་དགའ་ཐོབ་མཁན་རྩོམ་པ་པོ་གཅིག་བཅས་འདེམས་ཐོན་བྱུང་འདུག
ཐེངས་འདིའི་སྦྲང་ཆར་རྩོམ་རིག་བྱ་དགའ་དཔྱད་འདེམ་ཚོགས་ཆུང་གི་ཁྱབ་བསྒྲགས་བྱས་པའི་བརྩམས་ཆོས་ཁྲོད། རྩོམ་པ་པོ་བཀྲ་བྷ་ལགས་ཀྱིས་བརྩམས་པའི་སྒྲུང་འབྲིང་ ༼ནས༽ དང་། རྩོམ་པ་པོ་ལྷ་བྱམས་རྒྱལ་གྱིས་བརྩམས་པའི་སྒྲུང་ཐུང་༼ལམ་གྱི་ཉི་འོད༽ རྩོམ་པ་པོ་སྒོ་མེ་ཚེ་རིང་བཀྲ་ཤིས་ཀྱིས་བརྩམས་པའི་སྒྲུང་ཐུང་ ༼མིས་ཁྱི་ལ་རྨུགས་པ་ལྟ་བུའི་གསར་འགྱུར༽ བཅས་ལ་སྦྲང་ཆར་རྩོམ་རིག་བྱ་དགའ་ཐོབ་ཡོད་པ་དང་
ནུབ་བྱང་མི་རིགས་སློབ་ཆེན་གྱི་དགེ་རྒན་ཆེ་མོ་དང་རྩོམ་པ་པོ་བདུད་ལྷ་རྒྱལ་ལགས་ཀྱིས་བརྩམས་པའི་ ༼དོན་གྲུབ་རྒྱལ་གྱི་མི་གཞིའི་གས་ཁ་དང་དེས་དེང་རབས་ལ་བྱིན་པའི་བློ་བསྐྱེད>> ཅེས་པར་སྦྲང་ཆར་དཔྱད་བརྗོད་བྱ་དགའ། རྩོམ་པ་པོ་འབྲོང་ཕྲུག་ལྷ་ཆེན་རྒྱལ་གྱིས་བརྩམས་པའི་སྙན་ངག་ ༼ངའི་ཕ་ཡུལ་བདའ་ཚང་༽ དང་། རྩོམ་པ་པོ་ཀླུ་བྱམས་རྒྱལ་ལམ་ཁུ་བྱུག་སྔོན་མོ་ལགས་ཀྱིས་བརྩམས་པའི་སྙན་ངག་༼ འུག་པ་གླེང་བ༽ ཅེས་པ་གཉིས་ལ་སྦྲང་ཆར་སྨྱུག་གསར་བྱ་དགའ་བཅས་ཐོབ་ཡོད་འདུག
གསར་འགོད་པ། དོན་གོ
<<སྦྲང་ཆར>>ནི་གངས་ལྗོངས་ཀྱི་རྩོམ་པ་པོ་དང་ཀློག་པ་པོའི་ལྗང་མྱུག་གསོ་སྐྱོང་གི་སྦྲང་ཆར་བསིལ་མ་དངོས་ཡིན། ལྷག་པར་ཐེངས་འདིར་བདམས་པའི་བྱ་དགའ་དག་ནི་ཅི་འདྲའི་ཐོབ་འོས་པ་དག་ལ་ཐོབ་འདུག་ཨང། ང་རང་སྒེར་ངོས་ནས་སྙིང་ཐག་པ་ནས་དགའ་བསུ་ཞུ་རྒྱུར་མ་ཟ། ངས་ང་ཚོའི་པེན་བོད་ཀྱི་མཐུན་ཚོགས་ཀྱི་ཚབ་བྱས་ཏེ་ཡང་ཡི་རང་བསྔགས་བརྗོད་དང་མུ་མཐུད་དམིགས་འབེན་མི་ཡོ་བར་མདུན་དུ་སྐྱོད་པའི་གཞེན་སྐུལ་ཞུས་པ་ཡིན།
མཚོ་སྔོན་སྦྲང་ཆར་རྩོམ་སྒྲིག་ཁང་གིས་གོང་གི་རྩོམ་པ་པོ་དེ་དག་ལ་བྱ་དགའ་གནང་བར་རྟེན་འབྲེལ་ཞུ།