༸གོང་ས་མཆོག་གིས་ཅེག་སྤྱི་མཐུན་རྒྱལ་ཁབ་ཀྱི་མཛད་འཕྲིན་ཡོངས་སུ་གྲུབ་སྟེ་དེ་རིང་ཞོགས་པར་ཕྱིར་བཞུགས་སྒར་དུ་ཞབས་སོར་བདེ་བར་བཀོད་ཡོད།
ཟླ་འདིའི་ཕྱི་ཚེས་ ༡༠ ཉིན་༸གོང་ས་མཆོག་གིས་རྒྱལ་ས་ལྡི་ལི་དང་ཀ་ལི་ཀ་ཏ། ཧོན་སུར་རྒྱུད་སྨད་གྲྭ་ཚང་བཅས་ཀྱི་ཆོས་ཕྱོགས་ཀྱི་མཛད་འཕྲིན་ལེགས་པར་གྲུབ་སྟེ་ཅེག་སྤྱི་མཐུན་རྒྱལ་ཁབ་དུ་ཆིབས་བསྒྱུར་བསྐྱངས་ཡོད་པ་ལྟར། ཕྱི་ཚེས་ ༡༡ ནས་ ༡༢ ཉིན་བར་གྱི་ཉིན་གཉིས་རིང་༸གོང་ས་མཆོག་གིས་ཅེག་སྤྱི་མཐུན་རྒྱལ་ཁབ་དུ་ ༼ཨེ་ཤ་ཡའི་མང་གཙོ་དང་འགྲོ་བ་མིའི་ཐོབ་ཐང་།༽ ཞེས་པའི་བགྲོ་གླེང་ལྷན་ཚོགས་ཐོག་མཉམ་ཞུགས་དང་། དེར་ཡོད་མང་ཚོགས་ལ་ ༼དཀའ་ཚེགས་ཆེ་བའི་དུས་སྐབས་སུ་བདེ་སྐྱིད་འཚོལ་ཐབས།༽ ཞེས་པའི་བརྗོད་གཞིའི་ཐོག་བཀའ་སློབ་རིམ་པར་བསྩལ་ཡོད་པ་མ་ཟད། ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་དང་ཕྱི་སྲིད་བློན་ཆེན་རྣམ་གཉིས་ལ་མཇལ་འཕྲད་ཀྱིས་བོད་དོན་སྐོར་ལ་བཀའ་བསྡུར་གནང་ཡོད་པ་དང་། མཐའ་མའི་ཉིན་གསར་འགོད་པའི་དྲི་བར་བཀའ་ལན་བཅས་གནང་སྟེ་འཛད་འཕྲིན་ལེགས་པར་གྲུབ་སྟེ། དེ་རིང་ཞོགས་པའི་ཆུ་ཚོད་ ༡༠ ཡས་མས་སུ་བོད་མིའི་སྒྲིག་འཛུགས་ཀྱི་བཀའ་བློན་དང་སྤྱི་འཐུས་ཚོགས་གཞོན་གཙོས། ལྷན་ཁང་ཁག་གི་བཀའ་བློན་དང་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ། ས་གནས་མང་ཚོགས་བཅས་ཀྱི་ཕེབས་བསུའི་ཁྲོད་ཕྱིར་བཞུགས་སྒར་དུ་ཞབས་སོར་བདེ་བར་འཁོད་ཡོད།
ཟླ་འདིའི་ཕྱི་ཚེས་ ༡༩ ནས་ ༢༡ ཉིན་བར་གྱི་ཉིན་གསུམ་རིང་༸གོང་ས་མཆོག་གིས་ཨུ་རུ་སུའི་དད་ལྡན་ཆོས་ཞུ་བ་ཁག་ཅིག་གིས་གསོལ་འདེབས་གནང་བ་ལྟར། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་རྗེ་ཙོང་ཁ་པས་མཛད་པའི་ ༼རྟོགས་བརྗོད་མདུན་ལེགས་མ༽ དང་དགེ་བཤེས་གླང་རིང་ཐང་པ་རྡོ་རྗེ་སེངྒེས་མཛད་པའི་ ༼བློ་སྦྱོང་ཚིག་བརྒྱད་མ༽། བདེ་མཆོག་གི་རྗེས་གནང་བཅས་ཀྱི་བཀའ་ཁྲིད་གནང་རྒྱུ་ཡིན་འདུག
གསར་འགོད་པ། དོན་གོ
སྐུ་ལ་ངལ་གསོ་བྲལ། གསུང་ལ་ངལ་གསོ་བྲལ། ཐུགས་ལ་ངལ་གསོ་བྲལ། ངལ་གསོ་མེད་པའི་མི་ཚེ་འདི། བདག་གི་བླ་མའི་མཛད་པ་ཡིན། བྱང་ཆུབ་སེམས་དཔའི་སྤྱོད་པ་ཡིན།
༡མཁར་དམར་པོའི་དབུ་རྩེ་མཐོང་དུས་ན།། ངའི་སེམས་ཀྱི་རྒྱང་རིང་བླ་མ་དྲན།། མགོན་དྲན་ཐེངས་རེ་ལ་སྐྱོ་གདུང་རེ།། སེམས་སྐྱོ་གདུང་མནན་ཀྱང་མི་ནོན་གི།
༢དབུས་རྒྱ་ཕིབས་སེར་པོ་མཐོང་དུས་ན།། སྐུ་གསེར་མདོག་འཕྲོ་བའི་བླ་མ་དྲན།། རྗེ་བླ་མའི་གསེར་ཞལ་མཇལ་ན་བསམས།། སང་ད་ནངས་དོ་དགོང་མཇལ་ན་བསམས།།
༣གངས་རི་རྒྱལ་ལྷུན་པོ་མཐོང་དུས་ན།། ཐུགས་མཁྱེན་རྒྱ་ཡངས་པའི་བླ་མ་དྲན།། ངའི་བླ་མ་བྱང་ཆུབ་སེམས་དཔའ་དེ།། སྐུ་གཟི་འོད་ལམ་མེར་མཇལ་ན་བསམས།།
འདི་ནི་གཞིས་བཞུགས་ན་གཞོན་རྡུང་ལེན་པ་ཚེ་རིང་དོན་གྲུབ་ཀྱིས་བླངས་པ་རེད། ཚིག་འབྲི་མཁན་གསེར་ལག་བློ་བཟང་ཡིན་པ་ཡོད།
མི་ནུབ་གསེར་གྱི་ཁྲི་འཕང་མཐོན་པོར་ཞབས་རིས་འོད་ཕུང་མངོན་པར་བཞད།།
ལེགས་གསུང་བདེན་པའི་ང་རོ་འབུམ་གྱིས་ས་ཆེན་ཁེངས་བའི་རླབས་དཀར་འཕྲོ།།
རིགས་དྲུག་དད་པའི་འོད་ཞགས་རྩེ་རུ་དགའ་མགུ་མངར་མོའི་འགྱུར་བག་ཅན།།
མགོན་པོ་ཁྱོད་ནི་སྲིད་པ་འདི་རུ་བྱོན་པའི་མཛད་འཕྲིན་བླ་ན་འགོངས།།