བོད་རིགས་མཐོ་རིམ་སློབ་མའི་ལྷན་ཚོགས་ཐེངས་དྲུག་པ།

གཟའ་ཟླ་བ་ནས་ཉིན་གསུམ་རིང་རྒྱ་གར་ལྷོ་ཕྱོགས་བྷེང་ལོ་བོད་ཁྱིམ་སྡོད་ཁང་དུ་རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ལྷན་ཚོགས་ཐེངས་དྲུག་པ་འཚོགས་བཞིན་ཡོད་འདུག

ཕྱི་ཚེས་ ༢༦ ཉིན་གྱི་ལྷན་ཚོགས་དབུ་འབྱེད་མཛད་སྒོའི་སྐུ་མགྲོན་དུ་ཀཱར་ནཱ་ཊ་ཀཱ་མངའ་སྡེའི་བློན་ཆེན་ཀུ་མར་ (S. Suresh Kumar) མཆོག་དང་། བོད་དོན་རྒྱབ་སྐྱོར་བ་ལྕམ་ཨ་ཤཱ་རེ་ཌེ་(Aasha Reddy) ལགས། དེ་བཞིན་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་བཅས་ཕེབས་ཡོད་ཅིང་། ཐེངས་འདིའི་ལྷན་ཚོགས་ནང་རྒྱ་གར་དང་བལ་ཡུལ་བཅས་ཀྱི་ས་གནས་ཁག་ ༡༤ ཙམ་གྱི་བོད་རིགས་མཐོ་རིམ་སློབ་མ་ ༦༨ མཉམ་ཞུགས་ཐོག  ཉིན་གསུམ་རིང་གི་ལྷན་ཚོགས་སྐབས་བོད་རིགས་མཐོ་རིམ་སློབ་མ་དག་གིས་སོ་སོའི་ས་གནས་ཡུལ་མི་དང་གྲོང་ཁྱེར་ཁག་གི་ནང་། ཉེ་ཆར་བོད་ནང་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་པའི་དངོས་ཡོད་གནས་ཚུལ་སྐོར་ཁྱབ་བསྒྲགས་དང་གོ་རྟོགས་ཇི་ལྟར་སྤེལ་རྒྱུའི་ཐད་གོ་བསྡུར་བྱེད་རྒྱུ་ཡིན་འདུག

ཉིན་དང་པོའི་མཛད་སྒོའི་སྟེང་བོད་རིགས་མཐོ་རིམ་སློབ་མ་ཚོས་རྒྱལ་གཅེས་དཔའ་བོ་ཐུབ་བསྟན་དངོས་གྲུབ་ལགས་ཀྱིས་མཚོན་པའི་བོད་ཀྱི་དཔའ་བོ་དཔའ་མོ་རྣམས་ཀྱི་རྗེས་དྲན་གཟེངས་རྟགས་ཤིག་བོད་དོན་རྒྱབ་སྐྱོར་པ་ལྕམ་ཨ་ཤཱ་རེ་ཌི་ལགས་ལ་ཕུལ་ཡོད་འདུག ལྕམ་ཨ་ཤཱ་རེ་ཌི་ལགས་ནི་ཅི་ནའེ་ (Chennai) ནས་ཡིན་ཞིང་། དུས་ཡུན་རིང་པོར་བོད་རིགས་མཐོ་རིམ་སློབ་མ་ཚོར་རོགས་སྐྱོར་དང་བོད་དོན་ལ་ལྷག་བསམ་རྣམ་དག་གིས་རྒྱབ་སྐྱོར་བྱེད་མཁན་ཞིག་ཆགས་ཡོད་པ་རེད།

རྒྱ་གར་རྒྱལ་ཡོངས་མཐོ་རིམ་སློབ་མའི་ལྷན་ཚོགས་འདི་མཐོ་སློབ་འགྲིམས་བཞིན་པའི་བོད་རིགས་སློབ་མ་དག་གིས་མགོ་བཙུགས་པ་ཞིག་དང་། ལོ་ལྟར་གཙོ་བོ་རྒྱ་གར་གྱི་མཐོ་སློབ་ཁག་ཏུ་སྐྱོད་བཞིན་པའི་བོད་རིགས་སློབ་མ་རྣམས་ལྷན་འཛོགས་ཐོག  རང་ངོ་རང་ཤེས་དང་རང་འགན་རང་འཁུར་གྱི་ལྟ་གྲུབ་འོག  བོད་རིགས་མཐོ་རིམ་སློབ་མའི་བར་གྱི་འབྲེལ་ལམ་གོང་འཕེལ་དང་། བོད་ཀྱི་རྩ་དོན་ཐད་མཐོ་རིམ་སློབ་མ་དག་གིས་འགན་ཇི་ལྟར་འཁུར་ཕྱོགས་སོགས་བརྗོད་གཞི་འདྲ་མིན་སྟེང་མཁས་པའི་གཏམ་བཤད་དང་སློབ་མ་ནང་ཁུལ་གྲོས་བསྡུར་བྱེད་ཀྱི་ཡོད་པ་རེད།

གསར་འགོད་པ། བནྡེ་སྐྱབས།