ཉེ་ཆར་འཚོགས་བཞིན་པའི་མཚོ་སྔོན་ཞིང་ཆེན་གྱི་ལོ་འཁོར་ཚོགས་ཆེན་གྱི་སྐབས་དང་བསྟུན་ནས། བོད་ཁུལ་གྱི་དགེ་རྒན་ ༥༠༠ དང་སློབ་ཕྲུག་ ༥༠༠༠ ལྷག་གིས་མཚན་རྟགས་བཀོད་དེ། མི་རིགས་རང་སྐྱོང་ས་ཁུལ་དུ་རྒྱ་སྒྱུར་སློབ་གསོ་སྤེལ་མཚམས་བཞག་སྟེ་མི་རིགས་སློབ་གསོའི་སྲིད་ཇུས་བསྐྱར་གསོ་དགོས་པའི་སྙན་ཞུ་ཕུལ་འདུག
ཕྱི་ཟླ་ ༡༢ ཚེས་ ༢༦ ནས་ ༢༨ ཉིན་གསུམ་རིང་ཟི་ལིང་གྲོང་ཁྱེར་དུ་མཚོ་སྔོན་ཞིང་ཆེན་གྱི་སྐབས་བཅུ་གཅིག་པའི་ཞིང་ཡོངས་ཀྱི་རྒྱུན་ལས་ཚོགས་འདུ་ཐེངས་བཅུ་གཅིག་པ་ཚོགས་བཞིན་པའི་སྐབས་དང་བསྟུན་ནས། རེབ་གོང་དང་། གཅན་ཚ། རྨ་ལྷོ་སོག་རྫོང་། མགོ་ལོག ཡུལ་ཤུལ། མཚོ་ལྷོ་སོགས་ཁུལ་དང་རྫོང་ཁག་མང་པོའི་དགེ་རྒན་ ༥༠༠ དང་སློབ་ཕྲུག་ ༥༠༠༠ ལྷག་གིས་མཚན་རྟགས་བཀོད་པའི་སྙན་ཞུ་ཕུལ་ཏེ། ད་ལོའི་དགུན་ཚིགས་སློབ་སྐབས་ནས་བཟུང་རྒྱ་སྒྱུར་སློབ་གསོ་ལག་བསྟར་བྱེད་བཞིན་པ་དེ་མཚམས་འཇོགས་བྱས་ཏེེ། མི་རིགས་རང་སྐྱོང་ས་ཁུལ་དུ་མི་རིགས་རང་གི་སྐད་ཡིག་གཙོ་བོར་འཛིན་པའི་མི་རིགས་སློབ་གསོའི་བཅའ་ཁྲིམས་ལག་བསྟར་བྱེད་དགོས་པའི་འབོད་སྐུལ་ཞུས་ཡོད་འདུག
ཕྱི་ཚེས་ ༢༩ ཉིན་བོད་ནས་འདི་ག་གསར་འགོད་པར་ཁ་པར་བརྒྱུད་གནས་ཚུལ་བརྗོད་དོན། ཉེ་ཆར་ཟི་ལིང་གྲོང་ཁྱེར་དུ་མཚོ་སྔོན་ཞིང་ཆེན་གྱི་ལོ་འཁོར་བྱ་བའི་མཇུག་སྡོམ་གྱི་ཚོགས་ཆེན་འཚོགས་བཞིན་པའི་སྐབས་དང་བསྟུན་ནས། ཕྱི་ཚེས་ ༢༦ ཉིན་རེབ་གོང་དང་གཅན་ཚ། སོག་རྫོང་། མགོ་ལོག ཡུལ་ཤུལ། མཚོ་ལྷོ་སོགས་མི་རིགས་རང་སྐྱོང་ཁུལ་དང་རྫོང་བཅས་ཀྱི་མི་རིགས་སློབ་གྲྭ་ཁག་གི་དགེ་སློབ་རྣམས་ཀྱིས་ས་ཁུལ་སོ་སོ་ནས་དུས་གཅིག་ཏུ། མི་རིགས་རང་སྐྱོང་ཁུལ་དུ་མི་རིགས་སློབ་གསོའི་སྲིད་ཇུས་བསྐྱར་གསོ་དང་ལག་བསྟར་བྱེད་དགོས་པའི་སྙན་ཞུ་བྲིས་ཏེ། དགེ་སློབ་ཚང་མས་མོས་མཐུན་མཚན་རྟགས་བཀོད་དེ་འཐུས་མི་ཆེད་གཏོང་གིས་ཚོགས་ཐོག་ཏུ་འབུལ་བར་ཕྱིན་ཡོད་འདུག སྙན་ཞུ་ཡི་གེ་ཁག་གི་ནང་དོན་གཙོ་བོ་ནི་མི་རིགས་འབྲིང་རིམ་སློབ་གྲྭ་ཁག་ནང་རྒྱ་ཡིག་གཙོ་བོར་འཛིན་པའི་རྒྱ་སྒྱུར་སློབ་གསོའི་སྲིད་ཇུས་སྤེལ་བཞིན་པ་དེ་མཚམས་འཇོག་དང་། མི་རིགས་རང་སྐྱོང་བཅའ་ཁྲིམས་ཀྱི་དགོངས་དོན་ལྟར། མི་རིགས་རང་སྐྱོང་ས་ཁུལ་ཏུ་མི་རིགས་རང་གི་སྐད་ཡིག་གཙོ་བོར་འཛིན་པའི་སློབ་གསོའི་སྲིད་ཇུས་ལག་བསྟར་དང་ཡར་རྒྱས་མཐོར་འདེགས་གཏོང་དགོས་པའི་སྐོར་ཡིན་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། འདི་ལོའི་དགུན་ཚིགས་སློབ་སྐབས་དང་པོ་ནས་བཟུང་མཚོ་སྔོན་ཞིང་ཆེན་མངའ་ཁུལ་གྱི་མི་རིགས་འབྲིང་རིམ་སློབ་གྲྭ་ཁག་ནང་། མི་རིགས་ཀྱི་སྐད་ཡིག་གཙོ་བོར་འཛིན་པའི་དེ་སྔའི་མི་རིགས་སློབ་གསོའི་སྲིད་ཇུས་མཚམས་འཇོག་བྱས་ཏེ། བོོད་ཡིག་བསླབ་ཚན་ཁོ་ན་མ་གཏོགས་བསླབ་ཚན་ཚང་མ་རྒྱ་ཡིག་ཐོག་བསྒྱུར་ཏེ། རྒྱ་སྐད་རྒྱ་ཡིག་གིས་སློབ་ཁྲིད་བྱེད་པའི་རྒྱ་སྒྱུར་སློབ་གསོའི་སྲིད་ཇུས་ལག་བསྟར་བྱས་ཡོད་པ་ལྟར། འདས་པའི་སློབ་སྐབས་གཅིག་ཙམ་གྱི་རིང་འདིར་སློབ་མ་རྣམས་ཀྱི་སློབ་སྦྱོང་གི་རྒྱུགས་འབྲས་ཉམ་ཆག་ཏུ་གྱུར་ཏེ། འདི་ལོའི་དཀྱིལ་རྒྱུགས་སྐབས་སློབ་གྲྭ་ཁག་སོ་སོའི་སློབ་མའི་རྒྱུགས་འབྲས་བརྒྱ་ཆ་ ༣༠ ནས་ ༣༥ མར་ཆག་ཡོད་པར་བརྟེན། ས་ཁུལ་སོ་སོའི་ཁྱིམ་བདག་དང་སློབ་མ། དགེ་རྒན་ཚང་མའི་ངོས་ནས་རྒྱ་སྒྱུར་སློབ་གསོའི་སྲིད་ཇུས་དེ་ནི། མི་རིགས་རང་སྐྱོང་ས་ཁུལ་གྱི་དངོས་ཡོད་གནས་བབ་དང་མི་འཚམ་ལ། སློབ་གསོའི་སྤུས་ཚད་ཡར་རྒྱས་དང་། མི་རིགས་རིག་གནས་རྒྱུན་འཛིན་བཅས་ལ་གནོད་པའི་བསམ་ཚུལ་ཤུགས་ཆེན་པོ་བྱུང་ཡོད་པ་མ་ཟད། དེ་ནི་རྒྱལ་ཁབ་ཀྱི་བཅའ་ཁྲིམས་ནང་གཏན་ལ་ཕབ་པའི་མི་རིགས་སློབ་གསོའི་སྲིད་ཇུས་ཀྱི་དགོངས་དོན་དང་ཡང་འགལ་ཡོད་པའི་ངོས་འཛིན་བྱེད་བཞིན་ཡོད་འདུག
ད་དུང་གནས་ཚུལ་མཁོ་སྤྲོད་པས། ཁོ་ཚོས་ངོས་ནས་རྒྱལ་ཁབ་ཀྱི་གྲངས་ཉུང་མི་རིགས་བཅའ་ཁྲིམས་ཀྱི་དགོངས་དོན་གཞིར་བཟུང་། མི་རིགས་རང་སྐྱོང་ས་ཁུལ་དུ་མི་རིགས་རང་གི་སྐད་ཡིག་གཙོ་བོར་འཛིན་པའི་མི་རིགས་སློབ་གསོའི་སྲིད་ཇུས་དོན་འཁྱོལ་ཡོང་བར་ཤུགས་བརྒྱབ་སྟེ་མུ་མཐུད་གོང་རིམ་འབྲེལ་ཡོད་སྡེ་ཁག་ལ་སྙན་ཞུ་འབུལ་རྒྱུ་ཡིན་ལ། དེ་བཞིན། མི་རིགས་རང་སྐྱོང་ས་ཁུལ་གྱི་འབྲེལ་ཡོད་སྡེ་ཁག་གི་དཔོན་རིགས་དང་ལས་བྱེད་རྣམས་གཙོས། མི་རིགས་རང་སྐྱོང་ས་ཁུལ་གྱི་དགེ་རྒན་དང་སློབ་མ། ཁྱིམ་བདག དེ་བཞིན་རྒྱལ་ཁབ་ཕྱི་ནང་གཉིས་ཀར་ཡོད་པའི་གྲངས་ཉུང་མི་རིགས་ཚང་མའི་ངོས་ནས་མི་རིགས་རང་སྐྱོང་གི་སློབ་གསོའི་སྲིད་ཇུས་ལག་བསྟར་ཡོང་ཐབས་ཐད་རྒྱབ་སྐྱོར་དང་འབོད་སྐུལ་ཡོང་བའི་རེ་འདུན་ཡང་ཞུས་སོང་།
དེ་མིན་གནས་ཚུལ་གཞན་ཞིག་ལ། ལོ་སྔོན་མ་ནས་བཟུང་མདོ་སྨད་གཅན་ཚ་དང་རེབ་གོང་ཁུལ་དུ། བོད་ལུགས་སྐར་རྩིས་གཞིར་བཟུང་བོད་ཐུན་མོང་གི་གཅིག་གྱུར་ལོ་གསར་ལ་རོལ་མགོ་བརྩམས་ཡོད་པ་ལྟར། འདི་ལོ་ཡང་ས་ཁུལ་དེ་གཉིས་གཙོས་པའི་མགོ་ལོག་དང་མཚོ་ལྷོ། ཡུལ་ཤུལ་སོགས་ས་ཁུལ་མང་པོས་གཅིག་གྱུར་ཐོག ད་ལོ་ནས་བཟུང་སྟེ་བོད་ལུགས་ལོ་གསར་ལ་རོལ་རྒྱུའི་མགོ་བརྩམས་ཡོད་འདུག་ལ། འདི་ལོ་བོད་ནང་དུ་བོད་མི་མང་པོས་རང་ལུས་མེར་བསྲེགས་ཀྱིས་ཚེ་སྲོག་ཕུལ་ཡོད་སྟབས། གླུ་ལེན་གར་འཆམ་དང་རྟ་རྒྱུགས་མདའ་རྩེད་སོགས་བྱ་རྒྱུ་མིན་པར། ལོ་གསར་སྐབས་མར་མེ་མཆོད་འབུལ་སོགས་ཆོས་ཕྱོགས་ཀྱི་བྱེད་སྒོ་ཁོ་ན་བྱ་འཆར་ཡོད་འདུག ཡིན་ནའང་། ས་གནས་རྒྱ་གཞུང་གིས་འབྲེལ་ཡོད་བོད་རིགས་ལས་བྱེད་དང་། དགོན་སྡེ་ཁག་གི་བླ་སྤྲུལ། སྡེ་བ་སོ་སོའི་སྡེ་དཔོན་སོགས་བཀོད་མངགས་བྱས་ཏེ་ས་གནས་མང་ཚོགས་ལ། སྔར་སྲོལ་ལྟར་རྒྱ་ལོའི་ལོ་གསར་ལ་རོལ་དགོས་པའི་སྐུལ་མ་གཏོང་བཅུགས་པ་མ་ཟད། རྒྱ་ལོའི་ལོ་གསར་སྐབས་མང་ཚོགས་ལ་རོགས་དངུལ་དང་བྱ་དགའ་སོགས་སྤྲོད་རྒྱུ་ཡིན་སྐོར་བརྗོད་ཡོད་འདུག
གསར་འགོད་པ། ཚེ་རིང་རྒྱལ།
འདི་ལྟར་སློབ་གསོའི་ལས་དོན་ཐད་ཀྱི་དགེ་སློབ་རྣམ་པས་རང་གི་འོས་འགན་ཕྲག་ཏུ་བཞེས་ནས་ཁྲིམས་མཐུན་གྱི་ཞུ་གཏུགས་ངོ་རྒོལ་བྱས་དང་བྱེད་བཞིན་པ་རྗེས་སུ་ཡི་རང་མངོན་པར་བསྟོད་འོས་ཏེ། འདི་རིགས་ནི་ང་ཚོའི་འཚེ་མེད་ཞི་རྒོལ་དང་བདེན་པའི་འཐབ་རྩོད་ཀྱི་ཁ་ཕྱོགས་དང་ལག་ལེན་ཡང་དག་དེ་ཡིན་པས་སོ། སྙིང་ནས་ཐུགས་རྗེ་ཆེ་ཞུ་བཞིན་ཡོད། ཁྱེད་ཚོའི་བྱ་བཞག་ལྷུན་གྱིས་འགྲུབས་པའི་ངའི་དུས་འཁོར་དབང་ཆེན་འདི་དང་བསྟུན་ནས་གནས་མཆོག་རྡོར་རྗེ་གདན་ནས་སྨོན་ལམ་འདེབས་བཞིན་ཡོད་ལགས།
དགེ་སློབ་རྣམས་ཀྱི་བོད་མི་རིགས་ཀྱི་ཆེད་དུ་ལས་དེ་ལམ་ལོང་ཡོང་པས་སྨོན་འདུན་ལན་བརྒྱར་ཞུ།
༥༠༠དང་༥༠༠གིས་རང་ཐོབ་ཐང་ལེན་པའི་ལས་འགུལ་འདི་ནི་འོས་ཤིང་མཚམ་པ་རེད་ལ། ད་དུང་མུ་མཐུད་གནོངས་རོགས། ལོ་གསར་པ་ལ་ཆོས་ཕྱོགས་མ་གཏོགས་བག་མེད་ཀྱི་རིགས་མི་བྱ་རྒྱུའི་ཁས་བླངས་བ་ནི། མི་ལུས་རིན་ཆེན་ཐོབ་ནས་བདུད་རྩི་འཐུང་དང་འདྲ་་སྟེ། བག་ཡོད་བདུད་རྩི་གནས་ཡིན་ཏེ། །བག་མེད་པ་ནི་འཆི་བའི་གནས། །ཞེས་པའི་དོན་མཐུན་པས་རྗེས་སུ་ཡི་རང་དང་། ཐུགས་རྗེ་ཆེ་ཞུའོ། །
ཁྱེད་རྣམས་ཀྱིས་ལས་འགུལ་འདི་འདྲ་སྤེལ་བར། གུས་པས་རྗེས་སུ་ཡི་རང་ཞུ། ཁྱེད་རྣམས་ཀྱི་རླབས་ཆེན་རེ་འདུན་ཡིད་བཞིན་གྲུབ་པའི་སྨོན་འདུན་ཞུ་བ་དང་ཆབས་ཅིག རང་རང་སར། བདེ་འཇགས་ལ་སྲུང་སྐྱོབ་བྱེད་རྒྱུ་འབོད་སྐུལ་ཞུའོ།།
འདི་ལྟར་སློབ་གསོའི་ལས་དོན་ཐད་ཀྱི་དགེ་སློབ་རྣམ་པས་རང་གི་འོས་འགན་ཕྲག་ཏུ་བཞེས་ནས་ཁྲིམས་མཐུན་གྱི་ཞུ་གཏུགས་ངོ་རྒོལ་བྱས་དང་བྱེད་བཞིན་པར་རaེས་སུ་ཡི་རང་མངོན་པར་བསྟོད་འོས་ཏེ། འདི་རིགས་ནི་ང་ཚོའི་འཚེ་མེད་ཞི་རྒོལ་དང་བདེན་པའི་འཐབ་རྩོད་ཀྱི་ཁ་ཕྱོགས་དང་ལག་ལེན་ཡང་དག་དེ་ཡིན་པས་སོ།
ཏག་ཏག་རེད. མི་ལོ་ཉི་ཤུའི་ཡར་སྔོན་དུ་ང་ཚོས་རོང་བོ་དགོན་ཆེན་གྱི་སྨོན་ལམ་ཆེ་མོ་དེ. བོད་ལུགས་ལོ་གསར་ལ་ཚོགས་དགོས་པའི་བསམ་ཚུལ་བཏོན. དེ་སྔ་འགྲིམ་འགྲུལ་དཀའ་ངལ་གྱིས་སྟབས་མི་བདེ་ཡང. ད་ཆ་བོད་རྩིས་ལོ་ཐོ་རག་སླ. མ་ཟད་རྗེ་ཙོང་ཁ་བས་བོད་ལོའི་སྟེང་ནས་སྨོན་ལམ་བཙུག་པ་ལས་རྒྱ་ལོའི་སྟེང་ནས་བཙུགས་མེད་པ་རེད བྱས་ཙང་དགོན་པ་སོ་སོས་བོད་ལོའི་སྟེང་ནས་སྨོན་ལམ་འཚོག་དགོས་སྙམས་སོ།།
བོད་ཡིག་ལ་རྒྱལ་ཁབ་ཀྱིས་རོགས་ལས་གནོད་བྱེད་པ་ནི་མི་རིགས་གང་གིས་ཀྱང་བཟོད་སྒོམ་གཏན་ནས་བྱེད་མི་ཆོག་པ་ཞིག་ཡིན་ཙང. ང་ཚོ་ཕྱི་ནང་གི་བོད་ཡིག་ལ་འདོད་པ་ཡོད་མཁན་དང. བོད་རིགས་ཚོ་སྨྲས་ཅི. འགྲོ་མིའི་ཐོབ་ཐང་ལ་བརྩི་སྲུང་ཡོད་པ་ཚང་མས་འབད་དགོས་སོ།།
གཞན་བོད་ཡིག་སྤྱོད་ཡུལ་ལ་གནོད་པ་བྱེད་མི་ཆོག་པས. ང་ཚོས་བོད་གཅིག་ཏུ་སྡུས་པའི་འམ. ཐ་ན་གསུམ་ལ་དགོས་པའི་བོད་རིགས་རང་སྐྱོང་ལྗོངས་ཤིག་ངེས་པར་འཛུགས་ཐུབ་ལ་འབད་དགོས་སོ།།
ཁྱེད་རྣམས་ཀྱིས་ལས་འགུལ་འདི་འདྲ་སྤེལ་བར། གུས་པས་རྗེས་སུ་ཡི་རང་ཞུ། ཁྱེད་རྣམས་ཀྱི་རླབས་ཆེན་རེ་འདུན་ཡིད་བཞིན་གྲུབ་པའི་སྨོན་འདུན་ཞུ་བ་དང་ཆབས་ཅིག རང་རང་སར། བདེ་འཇགས་ལ་སྲུང་སྐྱོབ་བྱེད་རྒྱུ་འབོད་སྐུལ་ཞུའོ།།
་་་་་ཁག་གི་དགེ་སློབ་རྣམས་ཀྱིས་ས་ཁུལ་སོ་སོ་ནས་དུས་གཅིག་ཏུ། མི་རིགས་རང་སྐྱོང་ཁུལ་དུ་མི་རིགས་སློབ་གསོའི་སྲིད་ཇུས་བསྐྱར་གསོ་དང་ལག་བསྟར་བྱེད་དགོས་པའི་སྙན་ཞུ་བྲིས་ཏེ། དགེ་སློབ་ཚང་མས་མོས་མཐུན་མཚན་རྟགས་བཀོད་དེ་འཐུས་མི་ཆེད་གཏོང་གིས་ཚོགས་ཐོག་ཏུ་འབུལ་བར་ཕྱིན་ཡོད་འདུག ་་་་་་
་་་་འདི་ལོ་བོད་ནང་དུ་བོད་མི་མང་པོས་རང་ལུས་མེར་བསྲེགས་ཀྱིས་ཚེ་སྲོག་ཕུལ་ཡོད་སྟབས། གླུ་ལེན་གར་འཆམ་དང་རྟ་རྒྱུགས་མདའ་རྩེད་སོགས་བྱ་རྒྱུ་མིན་པར། ལོ་གསར་སྐབས་མར་མེ་མཆོད་འབུལ་སོགས་ཆོས་ཕྱོགས་ཀྱི་བྱེད་སྒོ་ཁོ་ན་བྱ་འཆར་ཡོད་འདུག ཡིན་ནའང་། ས་གནས་རྒྱ་གཞུང་གིས་་་་
ཀྱེ་མ། སྐད་དང་ཡི་གེ
ཉེ་ལམ་བོད་ནང་དུ་སློབ་ཕྲུག་སྟོང་ཕྲག་མང་བོས་བོད་ཀྱི་སྐད་ཡིག་གི་ཚེ་སྲོག་སྐྱོབ་ཆེད་ཞི་བའི་ངོ་རྒོལ་བྱས་པར་བྲིས།
མི་རིགས་ཤིག་འཆི་གསོན་གྱི་འབྲེལ་ཐག་འཛིན་པའི་རང་གི་ཕ་སྐད་དྭངས་མོ། ཡར་ཀླུང་རིག་གཞུང་གི་དབུགས་རྔ་ཕྲ་མོ་ལ་དང་བ་འདྲེན་པའི་ཡུམ་སྐད་གཙང་མ། ཁྱེད་ཉིད་ལ་འདི་ལྟ་བུའི། བཙན་ཤུགས་དང་། དབང་ཤུགས་ཀྱི་རྒྱ་སྒོ་ནས་གནོན་བཙུར་སྡམ་གསུམ་གྱིས་སྲོག་རྩ་ལ་བརྙབ་ཡོང་དུས། ངའི་མགོ་ལུས་སྲོག་གསུམ་ལ་ཁྱབ་པའི་ཁྱེད་ཀྱི་མ་བཅོས་པའི་ཉམས་འགྱུར་གྱི་ཁུགས་སོ་རེ་རེར་སྐྱོ་བ་དང་རྒུད་པའི་ལམ་འཕྲང་གཅོང་ཞིང་རོང་།
ཤར་གླིང་གི་བོད་བཙན་པོའི་ང་རྒྱལ་དང་། ཁྲག་རྒྱུན་ལས་བཞུར་བའི་ཁྱེད་ཀྱི་དབྱངས་གསལ་གྱི་ཚིག་སྦྱོར་དེ་དག་གིས་ང་ལ་ཕྱི་མིག་ཐེངས་གཅིག་གིས་གཟིགས་སྐྱོང་ཙམ་ཡང་མི་གནང་བར་འགྲོ་རན་པ་ཡིན་ནམ།
ངོ་མ། དྲག་དཔུང་དང་ངན་གཡོའི་ཁ་རྩ་ན་རྒྱུ་འབྲས་དང་ཁྲིམས་ཡིག་གིས་ཅི་བྱ་སྟེ། ཀུན་ཀྱང་སྒེར་གཅོད་པའི་བཀའ་ལས་འདའ་མི་ཆོག་པས་སོ།
འོན་ཀྱང་། ངེད་ཕ་རིང་བུ་རྒྱུད་ཀྱི་རྨོག་དཀར་གྱི་དར་འཕྲུ་བཞིན་དབུ་ལ་བཙུགས་ཤིང་། ཁྲབ་དཀར་གྱི་རྒྱུན་ཐག་བཞིན་ལུས་ལ་བསྡམས་ཏེ། བྱམས་ལྡན་གྱི་ཕ་མ་བཞིན་གཅེས་སྲོག་ལྡན་ལ། ཞེ་འདང་གི་ཆུང་མ་བཞིན་སྙིང་ལ་ཉར་བའང་ཁྱེད་ཁོ་ན་ལགས་ཕྱིར། འབྲེལ་འདྲིས་ཀྱི་ངོ་སྐལ། དམ་ཚིག་གི་མདུད་མཚམས། བསྐོས་ཐང་གི་རི་མོ། མཉམ་མྱོང་གི་སྡུག་བསྔལ། གང་ལ་འདང་བརྒྱབ་ཀྱང་ཁྱེད་སོང་ཤུལ་ན་ང་ལ་བསྡད་ས་དང་བརྟེན་ས་ཅི་ཡང་མེད།
རིག་གནས་མེད་པའི་མི་རིགས་ཤིག་དང་། ཕ་མ་མེད་པའི་དྭ་ཕྲུག་ཅིག ཁྱོ་ག་མེད་པའི་ཡུགས་མོ་ཞིག་གི་མྱ་ངན་གྱི་སྨག་རུམ་དང་དུ་བླངས་ནས་འཐོམ་ཞིང་ཞུམ་དགོས་པ་ལས། ངའི་ཚེ་སྲོག་རྟ་རྔ་འདྲ་བོ་ཡང་ཁྱོད་དང་མཉམ་དུ་སྟོང་དབྱིངས་སུ་སྤུར་བས་དགའ། ཅིའི་ཕྱིར་ཞེ་ན། ཁྱེད་ཀྱིས་བརྩེ་བརྩེ་དུངས་དུངས་ཀྱིས་ང་དང་ངའི་མི་རིགས་ཀྱི་མགོ་བཏེགས་ཤིང་འདབ་སྐྱོར་བའི་འགན་ལྕི་མོ་ཁུར་ཁུར་བའི་མཐའ་མར།
དེ་རིང་འདི་འདྲའི་བརྙས་བཅོས་དང་ན་ཟུག་ཅིག་མྱངས་ནས་འགྲོ་དགོས་བྱུང་ན། ང་ལ་ཁྱོད་ཀྱི་སྲོག་རྩ་གཅོད་མཁན་གྱི་ལག་དམར་དེར་ཤ་འཁོན་ལེན་པའི་ནུས་པ་མེད་སོང་ནའང་། ཁྱེད་དང་མཉམ་ཤི་རྒྱག་པ་དེ། ཁོག་དཔུང་དང་དྲིན་བཟོ་ཞིག་གི་ཆེད་ཡིན། ཀྱེ་མ། ངའི་སྐད་ཡིག
༢༠༡༠ ༡༠ ༢༢ ཉིན།གཙང་ཞོལ་བདེ་གསལ་གྱིས།
རྣམ་དཔྱོད་ཅན་གྱི་འཐབ་རྩོད་བྱེད་སྟངས་བྱ་སྟངས་ལ་བསྔགས་བརྗོད་ཡོད། རྩ་ཁྲིམས་དང་བཅའ་སྒྲིག་ཁག་གཞིར་བཟུང་རྒྱ་ནག་གཞུང་ནག་འདེད་བྱེད་ཐུབ་པ་ཡིན་ན། དེ་ནི་བླ་ན་མེད་པའི་ལམ་ཡག་ཤོས་དེ་རེད། ༧གོང་ས་མཆོག་གི་སྐུ་ཚབ་ཀྱིས་རྒྱ་ནག་གཞུང་ལ་སྤྲད་པའི་༼ རང་སྐྱོང་ཡོང་ཐབས་ཀྱི་བསམ་འཆར་༽ གྱི་དགོངས་དོན་ཡང་འཐབ་རྩོད་བྱེད་སྟངས་དེ་འདྲས་སྒྲུབ་ཐུབ་པ་ཞིག་རེད་ལ། ལྷག་པར་ཏུ་བོད་ནང་ནས་བསམ་འཆར་ཐད་ཀྱི་ནང་དོན་དོན་དངོས་དང་དུས་དང་འཚམས་པོ་ཡིན་པར་འདི་ལྟར་ར་སྤྲོད་བྱས་ཡོང་ཚེ། བོད་ལ་དོན་དམ་གྱི་རང་སྐྱོང་བྱུང་ནས་གཞིས་བྱེས་མཉམ་འཛོམས་བྱུང་རྒྱུར་དུས་ཚོད་མང་པོ་མི་དགོས་པ་གསལ་བོ་རེད། དེ་བས། ང་ཚོས་འཐབ་རྩོད་བྱ་ཕྱོགས་ལ་གཞུང་ལུགས་དང་རྣམ་དཔྱོད་ཡོད་པ། བོད་ཕྱི་ནང་གཉིས་ཀྱི་ཁ་ཕྱོགས་གཞི་ཐིག་གཅིག་གི་སྒང་འདི་ལྟར་འགྲོ་རྒྱུ་ནི་ཤིན་ཏུ་ནས་གལ་ཆེ་རེད། དེ་བས་ལས་འགུལ་འདི་རིགས་ནི་ཡི་རངས་བྱ་དགོས་པ་ཡིན་པས། དགེ་སློབ་ཡོངས་ལ་ཐུགས་རྗེ་ཆེ་ཞུ་འདོད་བྱུང་ལ། ཁྱེད་ཚོའི་མཉམ་དུ་བོད་སྐད་ཡིག་གི་ལས་དབང་ལ་ཆུ་ལ་ཆུ་བཞག་ལྟར་གྱི་གནས་ལུགས་དང་བརྩེ་དུངས་ཀྱིས་བསྡམས་ནས་ཡོད་བཅས།