གྲངས་ཀའི་ཤུགས་རྐྱེན།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༤༣ སྟེང་གི་རྩོམ་སྒྲིག་པའི་གཏམ།

ང་ཚོས་ཤེས་གསལ་ལྟར། ༢༠༡༡ ལོ་ནི་འཛམ་གླིང་གི་གསར་བརྗེ་ཆེན་པོ་ཞིག་གི་སྟ་གོན་གྱི་ལོ་རེད། ལོ་དེར་དཀའ་རྙོག་མང་པོ་ཞིག་གླེང་ཞིང་དེར་ལག་པ་འཆང་བ་ཙམ་མ་གཏོགས་ཡོངས་སུ་སེལ་ཐུབ་ཡོད་པ་མ་རེད། བོད་ལ་མཚོན་ན་ཡང་། ཚད་མཐོ་ཤོས་ཀྱི་ཞི་བའི་ངོ་རྒོལ་དེ་བརྩམས་ཀྱང་། ནུས་པ་མ་ཐོན་སྟབས་ལས་འགུལ་དེ་ལོ་གསར་པ་འདིའི་མགོ་ནས་བསྐྱར་དུ་བརྩམས་ཤིང་།ད་ལོ་ནི་སླར་ཡང་ལོ་སྔོན་མ་ལྟར་ཛ་དྲག་ཡིན་པའི་གོ་བརྡ་སྤྲད་པ་རེད།ལོ་སྔོན་མའི་འཛམ་གླིང་གི་ཡུལ་ལུང་སོ་སོའི་མི་དམངས་ཀྱི་ཞི་བའི་ངོ་རྒོལ་དེ་དག་ནི་ད་ལྟའི་འཛམ་བུའི་གླིང་གི་ཆབ་སྲིད་དང་དཔལ་འབྱོར། རང་དབང་བཅས་ཀྱི་སྤྱིའི་གནས་སྟངས་ལ་འབྲེལ་ཡོད་པ་མ་གཏོགས། ཡུལ་སྡེ་རེ་ཟུང་གི་དཀའ་རྙོག་མ་རེད། ངོ་རྒོལ་དེ་དག་གིས་འཛམ་བུའི་གླིང་ཁྱོན་ཡོངས་ལ་གསར་བརྗེ་བྱ་དགོས་པའི་ཆ་རྐྱེན་བཏོན་ཡོད་ལ། ངོ་རྒོལ་གྱི་འབོད་ཚིག་དང་དགོས་འདུན་སྣ་ཚོགས་ཀྱི་སྒོ་ནས་གཞུང་དང་། ཁེ་ལས་སྡེ་ཁག་ཆེན་པོ་རྣམས་ལ་རེ་འབོད་ཞུས་པ་རེད།
ནུབ་ཕྱོགས་ཨ་རི་དང་། དབུས་ཤར་ཨེ་ཤ་ཡ། ཨབ་རི་ཁ། ཡུ་རོབ། རྒྱ་དཀར་ནག་གཉིས་བཅས་སུ་རིམ་པར་ངོ་རྒོལ་བྱུང་ཡོད། འོན་ཀྱང་། སྐབས་ཐོག་གི་རྣམ་འགྱུར་ཕྲན་བུ་རེར་འགྱུར་ལྡོག་བྱུང་བ་ཡོད་ཀྱང་། སྤྱིའི་ཆ་ནས་ལོ་སྔོན་མའི་ངོ་རྒོལ་དེ་དག་ལ་གྲུབ་འབྲས་རྒྱ་ཆེན་པོ་ཐོབ་མེད་པས། ལོ་དེ་ནི་གསར་བརྗེ་ཆེན་པོ་ཞིག་གི་སྟ་གོན་ཙམ་མ་གཏོགས། གསར་བརྗེ་ལ་རྒྱལ་ཁ་ཐོབ་པའི་ལོ་མ་རེད།དེ་བས་༢༠༡༢ལོར་མུ་མཐུད་ནས་ཡུལ་ལུང་གང་སར་ངོ་རྒོལ་གྱི་མཇུག་མཐུད་རྒྱུ་ཡིན་པ་ནི་ས་རིས་ཐང་གསལ་རེད།ལོ་སྔོན་མའི་ངོ་རྒོལ་སྤྱིའི་ཆ་ནས་བཤད་ན། ངོ་རྒོལ་གྱི་རྣམ་པ་ཚད་མཐོ་ཤོས་དེ་བོད་ནང་དུ་བྱུང་བ་རེད། ཡིན་ཡང་། ང་ཚོའི་ཁ་སྟབས་ཞན་དྲག་པའི་དབང་གིས་ངོ་རྒོལ་ལ་དཔག་པའི་དོ་སྣང་ཞིག་འཛམ་བུའི་གླིང་ལ་སྤྲོད་མ་ཐུབ་པ་རེད། མི་གཅིག་གི་རང་ལུས་མེར་བསྲེགས་དེས་དབུས་ཤར་ཨེ་ཤ་ཡ་ཡོངས་སྒུལ་ཐུབ་ཡོད་ཀྱང་། ང་ཚོའི་མི་བཅུ་གྲངས་ཤིག་གི་ངོ་རྒོལ་དེས་རྒྱ་ནག་གཞུང་དང་རྒྱལ་སྤྱིའི་སྲིད་གཞུང་དག་ཕར་ཞོག ཐ་ན་རང་དབང་གི་གསར་འགྱུར་བརྒྱུད་ལམ་ཁག་གི་དོ་སྣང་ཡང་འདྲེན་ཐུབ་ཡོད་པ་མ་རེད། དེ་མེད་པའི་གནས་ཚུལ་ནི་ཉེ་སྔོན་ཨ་རིའི་“ཊེམ་”བདུན་རེའི་དུས་དེབ་ཀྱིས་བསྒྲགས་པ་ལྟར་རེད།
ང་ཚོའི་སྲིད་དོན་པ་དག་གིས། རང་ལུས་མེར་བསྲེགས་ཀྱི་གྲངས་ཀ་མི་གཙོ་ངོ་བོ་གཙོ་ཞེས་གསུང་གིན་ཡོད། གསུང་བཤད་འདིའི་རིགས་ཀྱིས་མཚམས་རེར་ལྡོག་ཕྱོགས་ཀྱི་ཤུགས་རྐྱེན་རེ་ཡང་སྤྲོད་སྲིད། མི་གཅིག་བསྲེགས་པ་དང་མི་བཅུ་བསྲེགས་པའི་ནུས་པ་ལ་ཁྱད་པར་མེད་པའི་གོ་བ་ཞིག་ཀྱང་ངང་ངམ་ཤུགས་ཀྱིས་སྟེར་ལ། རྣམ་འགྱུར་འདི་ལྟ་བུ་ཞིག་གི་ཐོག་ནས་རྒྱལ་སྤྱིའི་སྟེང་ཕར་འགྲེལ་བཤད་བརྒྱབ་ཚེ་ཕྱིར་བསྟན་པའི་རྣམ་འགྱུར་ཡང་། མི་གཅིག་བསྲེགས་པའི་ཉེན་ཚབས་ཙམ་ལ་མ་གཏོགས་མི་ལྟ་ཡང་སྲིད་པ་རེད། གང་ལྟར། མེར་བསྲེགས་འདི་དག་གི་རྒྱབ་ཀྱི་དཀའ་རྙོག་ནི་འཛམ་བུའི་གླིང་གིས་ཤེས་ཡོད་རུང་། མི་མང་པོ་ཞིག་མེར་བསྲེགས་བཏང་བ་དེས་གནས་སྟངས་དེའི་ཛ་དྲག་གི་རང་བཞིན་གསལ་སྟོན་བྱེད་ཀྱི་ཡོད་སྟབས། ང་ཚོས་ཀྱང་གྲངས་ཀ་རེ་རེ་བཞིན་བགྲངས་ཏེ་འཛམ་བུའི་གླིང་ལ་ཞུ་གཏུགས་དང་རྒྱ་ནག་གཞུང་ལ་གྱོད་གཏུགས་བྱེད་དགོས་པར་འདོད།
ད་ནི་ལོ་གསར་པ་འདི་ཚེས་ཤིང་། བོད་ནང་གི་རང་ལུས་མེར་བསྲེགས་ཀྱི་མེ་ལྕེ་དེ་སླར་ཡང་འབར་མགོ་བརྩམས་ཡོད་སྟབས། ང་ཚོས་ཀྱང་རང་ཉིད་ལ་དེའི་ཐད་ངེས་ཤེས་དང་གྲ་སྒྲིག འཐབ་བྱུས། ཆོད་སེམས་ཡོད་པའི་སྒོ་ནས་ཞི་བའི་ལས་འགུལ་འདི་དག་གི་དགོས་འདུན་ཇེ་གསལ་དང་། དེ་ལ་དཔག་པའི་གྲུབ་འབྲས་ཤིག་ལ་བློ་ཐག་ཆོད་པའི་སྒོ་ནས་བརྩོན་དགོས་པར་འདོད།