རྡོ་རྗེ་རིན་ཆེན།
འདས་པའི་མི་ལོ་ལྔ་བཅུའི་རིང་མི་རབས་གསར་རྙིང་གཉིས་ཀྱི་བོད་མི་ཚོས་རེ་བ་དང་ཡིད་ཆེས་ཁོ་ན་བསྣམས་ནས། འཐབ་རྩོད་ཀྱི་ངོ་བོ་ཡོངས་སུ་རྫོགས་པ་འཚེ་མེད་ཞི་བའི་ལས་ཁོ་ནར་གཞོལ་འཐབ་བྱས། ཡིན་ནའང་ཕ་རོལ་ནས་གཉའ་གནོན་དང་ཐུབ་ཚོད། དྲང་བདེན་མེད་པ་སོགས་མཐར་གཏུགས་ན་མི་ལོ་ལྔ་བཅུ་ལྷག་གི་ནང་གོམ་པ་རིམ་སྤོས་ཀྱིས་མི་རིགས་འདི་ཆག་འཇིག་གི་གཡང་ས་ཞིག་ལ་འདེད་བཞིན་པའི་གནས་སྟངས་དེར། དུས་ད་གཟོད་བོད་མི་ཚོ་ཡང་གཉིད་སད་པ་ལྟར་གྱུར་པ་མ་ཟད། རང་ཉིད་ཀྱིས་རང་ཉིད་སྐྱོབ་དགོས་པ་ཡང་ཤེས་ཏེ་འཕག་འཚག་ཆེན་པོ་ཞིག་གི་མགོ་འཛུགས་བྱེད་རྒྱུར་ངང་སྒུག་བྱེད་བཞིན་པ་འདྲ།
རེད་ཡ། མང་པོ་གཅིག་ཏུ་བློ་མཐུན་ན། ཉམ་ཆུང་གིས་ཀྱང་དོན་ཆེན་འགྲུབ་ཅེས་པ་ལྟར། སྔོན་ཆད་ཀྱང་བོད་མི་རིགས་འདིས་རྒོད་ཀྱི་སྟོང་སྡེས་མཐའ་ཡི་སོ་ཁ་སྲུང་ཞིང་། སྙིང་སྟོབས་བཙན་པོས་རྒྱལ་ས་ཞི་ཨན་བརྟོལ་ཏེ་ཏེའུ་ཙང་གོང་མ་ཁྲི་ལས་ཕེབས་མྱོང་བ་མ་ཟད། མགར་གྱི་སྟོང་སྡེ་གཅིག་གིས་ཐང་དམག་བརྒྱད་ཁྲི་ཕམ་དུ་བཅུག་པ་ཡང་རྒྱ་བོད་ཡིག་རིགས་ཚང་མའི་ཁྲོད་ལྷམ་མེར་ལྷང་ངེར་མཆིས་ཤིང་། ཆོས་རྒྱལ་མེས་དབོན་རྣམ་གསུམ་སྐབས་སུམ་གཉིས་ས་ཡི་དཀྱིལ་འཁོར་ལ་མངའ་དབང་བསྒྱུར་བའི་ལོ་རྒྱུས་ཀྱི་བདེན་པ་རྣམས་ཀྱང་བོད་མི་རིགས་འདིའི་མི་རེ་ངོ་རེས་སྙིང་སྟོབས་དང་ཆིག་སྒྲིལ་བཅས་ལ་བརྟེན་ནས་བྱུང་ཡོད།
ངས་འདི་ལྟར་ཤོད་དགོས་པ་ནི་ད་གཟོད་ང་ཚོ་དམག་འཁྲུག་ཅིག་གི་འཐབ་རྩོད་ལ་འཇུག་པར་སྟ་གོན་བྱེད་བཞིན་མེད་ལ། དེ་བས་ཀྱང་འཚེ་བའི་ལམ་དུ་མདུན་སྐྱོད་དགོས་པའི་གྲོས་མགོ་ཡང་འདོན་ཀྱིན་མེད་མོད། དུས་ད་ལྟ་ཕ་རོལ་ནས་བྱ་བའི་གོ་རིམ་ཡོད་ཚད་ལམ་ཁ་གཅིག་སྟེ། མདོར་བསྡུས་ན་ཁྱོད་ཤི་ང་གསོན་གྱི་གནས་སྟངས་ཤིག་ལ་ཉིན་རེ་ནས་ཉིན་རེར་སྐྱེལ་ཡོང་དུས། འདེམས་ཀ་མེད་པའི་ལམ་བུ་འདིའི་ཁྲོད་ནས། བོད་མི་ཚོས་རྒྱ་ནག་གི་གཙོ་འཛིན་མའོ་ཡིས་བཤད་པ་ལྟར། སྐྱེས་པ་ནི་རླབས་ཆེ་ཞིང་ཤི་བའང་གཟི་བརྗིད་ཡིན་ཞེས་པའི་སློབ་གསོ་ལ་དང་འདོད་བྱེད་མཁན་ཇེ་མང་ཡིན་པ་ཉེ་རབས་ཀྱི་བྱུང་བ་དག་གིས་མཚོན་པ་མིན་ནམ།
དེས་ན་སྐབས་འདིར་ང་ཚོ་ཡུལ་གྱར་པའི་ཁྲོད་དབུ་མའི་ལམ་དང་རང་བཙན་གྱི་འགལ་འདུ་སོགས་སྲིད་བྱུས་གླེང་བའི་ཚོད་མིན་པར། མིག་སྔར་གཞིས་ལུས་བོད་མི་ཚོ་ཤ་ཚིག་རུས་ཚིག་གི་འབོད་སྒྲའི་རྗེས་འདེད་བྱེད་དགོས་ལ། མ་འོངས་ང་ཚོའི་སྲིད་བྱུས་ཀྱི་ཁ་ཕྱོགས་ཇི་ཡིན་དེ་ཡང་གཞིས་ལུས་བོད་རྒྱ་ཆེའི་མི་མང་ཐུན་མོང་གི་འབོད་སྒྲ་དང་མངོན་འདོད་ལ་གཞི་བཅོལ་དགོས། དེ་གང་ཡིན་ཞེ་ན་བོད་ཀྱི་གནད་དོན་མཐའ་མའི་ཐག་གཅོད་དེ་བོད་གཞིས་ལུས་མི་མང་ལ་ཡོད་ཚུལ་༸གོང་ས་མཆོག་གིས་ཡང་ཡང་གསུངས་ཟིན་ལ། དོན་དམ་དུ་ཡང་བོད་རྒྱ་ཆེ་མི་མང་བོད་དུ་ཡོད་ཅིང་། རྒྱལ་སྤྱིའི་སྤྱི་ཚོགས་ཀྱིས་ཀྱང་ད་ལྟའི་གཞིས་ལུས་བོད་མི་མང་ཐུན་མོང་གི་རེ་འདུན་དང་འབོད་སྒྲ་དེར་ཚད་འཛིན་བྱེད་ངེས། ལར་ནས་བོད་རྒྱ་གཉིས་ཞི་མོལ་གྱི་གླེང་སློང་བྱུང་སྐབས་ཀྱང་། དང་པོ་བོད་ནང་གི་གཞིས་ལུས་བོད་མི་ཚོའི་མངོན་འདོད་ནས་མགོ་འཛུགས་དགོས་པས་ཡིན།
གཞིས་ལུས་བོད་མི་རྣམས་ཤིན་ཏུ་ཐབས་ཟད་ཨུ་ཐུག་ཏུ་གྱུར་པའི་དུས་འདིར། ང་ཚོའི་ལས་འགུལ་དང་འཐབ་རྩོད་ཀྱི་གོམ་རིམ་ཡོད་ཚད་ཐབས་ཇུས་ལྡན་ཞིང་། མཇུག་འབྲས་ཡོད་པ། སྲ་བརྟན་རང་བཞིན་ཅན་དུ་འགྱུར་བར་ཆིག་སྒྲིལ་དགོས་ཤིང་ཆིག་སྒྲིལ་ནི་རྒྱལ་ཁའི་རྨང་གཞི་ཡིན། སྔོན་ཆད་རྒྱ་ནག་གི་མའོ་ཡིས་བཤད་ཀྱང་འདི་འདྲ་ཞིག་བཤད་པ་མིན་ནམ། ཏང་ནང་མཐུན་སྒྲིལ་བྱུང་ན་གཞི་ནས་གྲལ་རིམ་ཧྲིལ་བོ་དང་མི་རིགས་ཧྲིལ་བོ་མཐུན་སྒྲིལ་ཡོང་ཐུབ། དེ་བཞིན་གྲལ་རིམ་ཧྲིལ་བོ་དང་མི་རིགས་ཧྲིལ་བོ་མཐུན་སྒྲིལ་བྱུང་ན། གཞི་ནས་དགྲ་བོ་ལས་རྒྱལ་ཐུབ་ཅེས་བཤད་ཡོད།
ང་ཚོའི་འཐབ་རྩོད་ནི་མི་རིགས་ཤིག་དང་སྐད་ཡིག་ཅིག་གི་ཆག་འཇིག་འཐབ་རྩོད་ཡིན་སྟབས། རྒྱལ་ཁོངས་སོ་སོར་ཡོད་པའི་བོད་ཀྱི་ཆོས་བརྒྱུད་ཁག་གི་མཁན་པོ་བླ་སྤྲུལ་རྣམས་ཀྱིས་ཀྱང་རང་རང་ཐད་སོ་ནས་ནུས་ཤུགས་གང་ཡོད་འདོན་པ་དང་། དེ་བཞིན་ཆབ་སྲིད་ཐོག་ཉམས་མྱོང་ཆེ་བའི་བཀའ་ཟུར་རྣམ་པ་དང་སྤྱི་ཟུར་རྣམ་པས་ད་ལྟའི་བཀའ་ཤག་གསར་བར་དངོས་ཤུགས་བརྒྱུད་གསུམ་ནས་ཐབས་ཇུས་གཞོགས་འདེགས་གནང་དགོས། མདོར་ན་གཞིས་བྱེས་གཉིས་ཀྱི་བོད་མི་རྒན་གཞོན་ཡོད་དོ་ཅོག་གིས་རང་དོན་རང་གཅེས་ཐོག་སོ་སོའི་ནུས་ཚོད་དང་འཇོན་ཚོད་ལ་དཔག་པའི་ལས་འགུལ་སྣ་རེ་རྩོམ་པའམ་ཡང་ན་མཉམ་ཞུགས་བྱེད་པ། ཐ་ན་མཆོད་མེ་རྐང་གཅིག་དང་མ་ཎི་ཚར་གཅིག་ལས་བགྲང་སྤར་མ་ཐུབ་ཀྱང་བོད་ཀྱི་རྩ་དོན་ཐོག་སྨན་པ་ཞིག་ལ་ཚང་མས་འབད་འབུངས་བྱས་ན་ཏན་ཏན་ང་ཚོར་རེ་བ་ཞིག་ཡོང་སྲིད།
སྔ་མོ་དབྱིན་ཇིའི་སྲིད་གཞུང་རྒྱ་གར་ནས་ཕྱིར་འབུད་བྱེད་པར་རྒྱ་གར་མི་དམངས་རྣམས་ཆིག་སྒྲིལ་བྱས་ཡོད་ལ། དེ་བཞིན་འཇར་པན་གྱི་དབང་སྒྱུར་སྟོབས་ཤུགས་རྒྱ་ནག་སྐམ་ས་ནས་ཕྱིར་འབུད་གཏོང་བར་གོ་མིན་ཏང་དང་གུང་ཁྲན་ཏང་གཉིས་ཆིག་སྒྲིལ་བྱས་ཡོད། འདི་ལྟར་ང་ཚོ་བོད་མི་ཚོས་ཀྱང་ཕུགས་རྒྱང་རིང་བོར་བསམ་ཤེས་ཀྱིས་བོད་མིའི་རྩ་དོན་ཐད་སྒོ་ཀུན་ནས་ཆིག་སྒྲིལ་ཀྱི་ནུས་པ་ཞིག་འདོན་ཐུབ་བྱུང་ན། ད་གཟོད་བོད་ཀྱི་གནད་དོན་འདི་ཡང་ཉི་ཤར་གྱི་སྐྱ་རེངས་ལྟ་བུའི་དུས་ཤིག་ལ་སླེབས་ཡོད་པར་སྙམ་མོ།།
ང་ཚོས་མཐུན་སྒྲིལ་ཇི་ལྟར་བྱེད་དགོས་པའི་སྐོར་ལ་བགྲོ་གླེང་དགོས་གལ་ཆེ། དཔེར་ན་རང་གཞུང་གི་བཀོད་འདོམས་འོག་ལ་ཤར་སྐྱོད་ཐུབ་བམ། ལྟ་བུར་ལན་འདེབས་དགོས། མི་ཐུབ་ན་མི་ཐུབ་ཚུལ་དང་ཐུབ་ན་ཐུབ་ཚུལ་སོགས། ངས་བལྟས་ན་ཅུང་དཀའ་སེ་འདུག་ག
མཐུན་སྒྲིལ་གྱི་དགོས་པ་ནི་ཚང་མའི་ནུས་པ་ཁ་འཐོར་ལ་མི་འགྲོ་བར་ཁུ་ཚུར་གཅིག་བཅངས་དགོས་པ་དེ་ལོས་ཡིན།
ཆིག་སྒྲིལ་གླེང་གི་ཡོད་དུས། དགྱ་ནག་དམངས་གཙོ་དོན་གཉེར་བ་དང་། ཡུར་གུར་རང་དབང་རྩོད་ལེན་པ། ནང་སོག་ཐོབ་ཐང་རྩོད་ལེན་པ་ཚང་མ་དམིགས་ཡུལ་གཅིག་གི་ཐོག་ཆིག་སྒྲིལ་ཡོང་ཐབས་བྱས་ན་བཟང་།འདི་མཉམ་རྒྱལ་སྤྱིའི་ཐོག་གི་བོད་དོན་རྒྱབ་སྐྱོར་བ་ཁག་སོ་སོ། བོད་བརྒྱུད་ནང་བསྟན་ཁྱབ་ཡུལ་གྱི་ཧི་མཱ་ལ་ཡ་རི་རྒྱུད་ཁག་ཚང་མ་ནས་གཅིག་གྱུར་གྱི་རྒྱབ་སྐྱོར་ཤུགས་ཆེར་བྱེད་ཐུབ་ན་ལེགས། དགྱ་གཙོག་འདི་ཚང་གིས་བོད་ལ་དབང་བསྒྱུར་བྱས་ནས། ད་བར་བོད་མིའི་སེམས་པ་བསད་པ་དང་རྨས་པ་བགྲང་གིས་མི་ལངས། ས་ཕྱི་ཞི་རྒོལ་ཆེན་མོའི་སྐབས་སླར་ཡང་བོད་མིའི་སེམས་པ་དམར་གསོད་བྱས། ད་དུང་ཅི་ཙམ་ཞིག་གསོད་རྒྱུ་ཡིན་ནམ།
བོད་ནང་གི་འབོད་སྒྲ་འདི་མཉམ་དུ་ལོང་ཤོག བོད་གཞིས་བྱེས་གཉིས་ཀྱི་མཐོ་དཔོན་པོ་རྣམས་ལོང་ཤོག སྐྱབས་བླ་སྤྲུ་རྣམས་ལོང་ཤོག དམའ་མང་ཚོགས་ལོང་ཤོག གཞིས་བྱེས་གཉིས་ནས་ལོང་ཤོག བོད་མི་ཚང་མ་ལོང་ཤོག
ཆིག་སྒྲིལ་ནི་རྒྱལ་ཁའི་རྨང་གཞི་ཡིན་གསུངས་པ་དེ་ཁས་ལེན་འོས་པ་ལོས་ཡིན། མཐོ་རིམ་ནས་ཆིག་སྒྲིལ་བྱུང་ན་གཞི་རིམ་ནས་ཆིག་སྒྲིལ་རང་བཞིན་དུ་ཡོང་བ་བདེན་ན། ང་ཚོ་ངེས་པར་དུ་དང་པོར་སྤྱི་མཐུས་ནང་འགྱུར་བ་ཆེ་པོ་ཞིག་གཏང་ཐུབ་པ་དགོས་ཀྱང་། དེ་ཡང་ཁག་པོ་ཆགས་ཡོད། གང་ཡིན་ཟེར་ན།མི་དམངས་ཀྱིས་འོས་བླུག་སྐབས་སུ་སྤྱི་མཐུས་རང་འཇགས་འཇོགས་པ་མ་ཚད། སོ་སོའི་ཆོལ་ཁག་ལ་ཕྱོགས་ཞེན་ཅན་ཤ་སྟག་འདེམས་ཀྱིས་འདུག རང་རེའི་སྤྱི་ཚོགས་ཁྲོད་ཀྱི་ཕྱོགས་རེས་འདི་མགོ་ནས་དམངས་བར་དུ་ཁྱབ་ཡོད་པ་མཐོང་དུས། ད་དུང་ཡང་ཕྱོགས་ལྷུང་གི་རྨོངས་གཉིད་ལས་གྲོལ་བར་ལོ་ཤས་སྒུག་དགོས་ཀྱི་འདུག སྐབས་དེར་བོད་འདི་ཁ་ཕྱོགས་དང་གནས་སྟངས་ཅི་འདྲ་ཞིག་ཆགས་ཡོང་ན། དཀོན་མཆོག་མཁྱེན།། རང་རེས་སྤུན་ཟླ་ནང་ཁུལ་གྱི་ཞེ་འཁོན་ལ་བལྟས་ཡོང་དུས་རྒྱ་གཞུང་དང་དེའི་མི་མང་གིས་མི་རིགས་ཆེན་པོའི་རིང་ལུགས་འཛིན་པར་ཁག་ཞེ་དྲག་མེད་བ་མཐོང་སོང་། རྒྱུ་མཚན་ནི་ཁོང་ཚོར་དམར་ཤོག་གིས་གཏོང་བའི་སློ་གསོ་ལས་ཡ་རབས་སྤྱོད་བཟང་གི་སློབ་གསོ་རག་མེད། དེ་ཙམ་མ་ཚད་གྲངས་ཉུང་མི་རིགས་དང་རིག་གཞུང་གོམ་གཤེས་ཚང་མ་རྦད་དེ་ཐ་དད་རེད་ལ། མི་དམངས་ཁྱོན་ཡོངས་ལ་ཤེས་ཡོན་ཀྱི་གནས་ཚད་ཡང་ཧ་ཀྱང་སྐྱོ་པོ་ཡིན་པསོ།།
སྤྱིར་རྒྱལ་སྤྱིའི་གནས་སྟངས་སོགས་གང་ལ་ལྟས་ན་རྒྱ་ནག་དམར་གཞུང་ཚང་རྟག་བརྟན་ཐེར་གཟུགས་ངང་གནས་མི་ཐུབ་པ་གསལ་བོ་རེད། སྤུན་ཟླ་ཚོས་དུས་ནམ་ཡང་ཞི་བའི་ལས་འགུལ་སྤེལ་བ་ལས་དྲག་པོས་དབང་དུ་མི་འགྲོ་བ་བྱེད་དགོས་དེ་ལྟར་གནང་པ་ཡིན་ན་བདེན་པ་ལ་མཐའ་གསལ་རྒྱུ་བས་ཡིད་ཆས་ཡོད། ཁྱེད་ཚོས་སྙིང་སྟོབས་ལ་གུས་བཀུར་དང་ཡི་རིག་ཡོད་མྱུར་དུ་དམར་ཕྱོགས་ཀྱི་བཙན་འོག་ནས་གྲོལ་བའི་སྨོན་འདུག་ཞུ།