ང་ཚོས་རྒྱ་ནག་གི་མགོ་ཁྲིད་ཚོ་ཁྲིམས་གཏུག་བྱ་དགོས།

གཟའ་པ་སངས་ཉིན་གཞུང་འབྲེལ་མིན་པའི་ཚོགས་པ་གསུམ་གྱིས་བོད་ནང་གི་ཛ་དྲག་གནས་སྟངས་ཐད་མི་མང་ལ་བསམ་ཚུལ་བསྡུ་རུབ་སྐབས། གཞུང་དང་གཞུང་འབྲེལ་མིན་པའི་ཚོགས་པ་ཁག་གིས་སྣེ་འཁྲིད་དེ་གཞི་རྒྱ་ཆེ་བའི་ལས་འགུལ་སྤེལ་དགོས་པའི་བསམ་ཚུལ་བརྗོད་ཡོད།   

ཟླ་འདིའི་ཕྱི་ཚེས་ ༡༠ ཉིན་གྱི་ཕྱི་དྲོ་བཞུགས་སྒར་ཉིན་མོ་སློབ་གྲྭའི་ནང་ས་གནས་གཞོན་ནུ་དང་ས་གནས་བུད་མེད། བོད་རང་བཙན་སློབ་ཕྲུག་ཚོགས་པ་བཅས་གྱིས། བོད་ནང་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་སྐད་འབོད་བྱས་པའི་རྒྱལ་གཅེས་དཔའ་བོ་དཔའ་མོ་རྣམ་པའི་སྐུ་པར་འགྲེམས་སྟོན་དང་བསམ་ཚུལ་བསྡུ་རུབ་ཀྱི་ལས་འགུལ་ཞིག་སྤེལ་ཡོད་ཅིང་། དེ་ནི། གཞུང་འབྲེལ་མིན་པའི་ཚོགས་པ་གསུམ་གྱིས་འདས་པའི་ལས་འགུལ་རིམ་པའི་ཐོག་མི་མང་ལ་བསམ་འཆར་བསྡུ་རུབ་དང་། བོད་ནང་གི་ཛ་དྲག་པའི་གནས་སྟངས་ལ་གཞིག་ཏེ་མ་འོངས་ལས་འགུལ་སྤེལ་ཕྱོགས་ཐད་མི་མང་ནང་བསམ་ཚུལ་གང་འདྲ་ཡོད་མེད་ཤེས་རྟོགས་བྱ་ཆེད་ལ་དམིགས་པ་ཞིག་ཡིན་འདུག   

ཐེངས་འདིའི་ལས་འགུལ་ཐོག་བཞུགས་སྒར་ཁུལ་གྱི་སེར་སྐྱ་མི་མང་ ༢༠ ལྷག་འདུ་འཛོམས་གནང་ཡོད་པ་དང་། སྐབས་དེར་མི་ ༡༠ ལྷག་གི་བསམ་ཚུལ་བརྗོད་པའི་ནང་། ཕྱི་ལོ་ ༢༠༠༨ ལོར་བོད་ནང་བོད་མི་ཚོས་ཞི་བའི་ངོ་རྒོལ་རིམ་པའི་སྐབས་བཙན་བྱོལ་ནང་མར་མེ་ཁྲོམ་སྐོར་དང་གདུང་སེམས་མཉམ་སྐྱེད་ཀྱི་ལས་འགུལ་ཙམ་ལས། མཉམ་འབྲེལ་རྒྱལ་ཚོགས་དང་རྒྱལ་སྤྱིིའི་གྲོས་ཚོགས་ཁག གཞུང་དང་གཞུང་འབྲེལ་མིན་པའི་ཚོགས་པ་ཁག་ལ་བོད་ནང་གི་བོད་མིའི་བློས་གཏོང་བྱས་པའི་གནས་ཚུལ་ཁྱབ་བསྒྲགས་ཀྱི་ནུས་པ་བཏོན་ཐུབ་མེད་སྟབས། ད་ལྟའི་བོད་ནང་གི་ཛ་དྲག་གནས་སྟངས་ལ་གཞིགས་ཏེ། གཞུང་དང་གཞུང་འབྲེལ་མིན་པའི་ཚོགས་པ་ཁག་གིས་མི་མང་གི་སྣེ་འཁྲིད་དེ་རྒྱལ་སྤྱིའི་ནང་ཡོད་པའི་རྒྱ་ནག་གཞུང་ཚབ་ཁང་ཚང་མའི་མདུན་དུ་ཟས་བཅད་ངོ་རྒོལ་དང་སྐད་འབོད་ཁྲོམ་སྐོར་བྱ་རྒྱུ་དང་། རྒྱལ་སྤྱིའི་གཞུང་དང་ཚོགས་པ་ཁག་ཡོངས་ལ་བོད་ནང་གི་དངོས་ཡོད་གནས་ཚུལ་ཡིག་ངག་གཉིས་ཐོག་ནས་ཕུལ་དགོས་པའི་བསམ་ཚུལ་བཏོན་སོང་།   

དགེ་འདུན་ལགས་ཀྱིས་བརྗོད་དོན། “ ལོ་སྔ་ཕྱིར་བོད་ནང་བོད་མི་ ༢༢ ཡིས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་གྱི་ལས་འགུལ་སྤེལ་ཡོད་པ་ཚང་མས་མཁྱེན་གསལ་ལྟར་རེད། ང་རང་བོད་ནས་ཡོང་མཁན་ཞིག་ཡིན་པའི་ཆ་ནས་ད་ལྟའི་བོད་ནང་གི་ཛ་དྲག་གི་གནས་སྟངས་ལ་བསམ་བློ་གཏོང་གི་ཡོད་པ་མ་ཟད། གནས་ཚུལ་རིམ་པ་བྱུང་སྐབས་སེམས་ནང་བཟོད་དཀའ་བའི་ན་ཟུག་དང་མིག་ཆུ་ཤོར་ཡོང་གི་འདུག  ད་ལྟའི་གནས་སྟངས་ང་ཚོ་བོད་ནང་འཚར་ལོངས་དང་འཚོ་བ་རོལ་མྱོང་མཁན་ཚོ་ལས་གཞན་རྣམས་ལ་ཚོར་སྣང་གང་ཡང་མེད་པའི་སྣང་བ་ཤར་འོང་གི་འདུག གནས་སྟངས་འདི་འདྲའི་སྐབས་སུ་གཞུང་དང་གཞུང་འབྲེལ་མིན་པའི་ཚོགས་པ་ཁག་གིས་ནམ་རྒྱུན་མེར་མེ་ཁྲོམ་སྐོར་དང་གདུང་སེམས་མཉམ་སྐྱེད་གཅིག་པུས་ཕན་གྱི་མ་རེད།ང་ཚོས་ངེས་པར་དུ་མགོ་བཀའ་ཁྲི་ནས་དྲུང་ཆེ་བར་གྱི་གནད་ཡོད་ཚང་མས་རྒྱལ་སྤྱིའི་ཐོག་ཧ་གོ་ཐུབ་པའི་ལས་འགུལ་ཞིག་གི་སྣེ་འཁྲིད་དགོས་པ་རེད།མི་མང་ལ་མཚོན་ནའང་།བོད་པ་མི་རེ་ངོ་རེར་འགན་ཡོད་སྟབས། ཚང་མས་མཉམ་རུབ་བྱ་དགོས་པ་རེད།བོད་ཀྱི་འཐབ་རྩོད་དེ་བོད་ནང་གི་བོད་མི་ཁོ་ནའི་ལས་འགན་མ་རེད།ང་ཚོ་རང་དབང་ལུང་པར་ཡོད་པའི་བོད་མི་ཚོར་ད་ལྟའི་བར་བོད་ནང་ནས་བརྡ་ལན་མང་པོ་སྤྲད་ཡོད་པ་རེད།ང་ཚོའི་ངོས་ནས་ཁོང་ཚོའི་རེ་བ་མཁྱེན་པའི་ཐོག་ངེས་པར་དུ་ཚ་ཚ་འུར་འུར་གྱི་ལས་འགུལ་སྤེལ་རྒྱུ་དང་ལས་འགུལ་དེ་ཡང་ཉིན་གཅིག་རེ་ཙམ་མིན་པར་རྒྱུན་མཐུད་ཐུབ་པ་ཞིག་གནང་དགོས།“ ཞེས་བརྗོད་བྱུང་།

ཨམ་རྗེ་ཐོགས་མེད་ལགས་ཀྱིས། “ ང་རང་གི་ངོས་ནས་བོད་ནང་བོད་མི་ཚོས་ལས་འགུལ་རིམ་པར་སྤེལ་བཞིན་པར་རྗེས་སུ་ཡི་རངས་དང་ཐུགས་རྗེ་ཆེ་ཞུ་རྒྱུ་ཡིན་ལ། དེ་དང་ཆབས་ཅིག་བཙན་བྱོལ་རང་དབང་ལུང་པའི་ནང་ཡོད་པའི་བོད་མི་ཚོར་ཞུ་འདོད་པ་ནི། ང་ཚོས་ག་དུས་ཡིན་ཡང་བོད་ནང་གི་ལས་འགུལ་རིམ་བྱུང་སྐབས་གཙུག་ལག་ཁང་བར་མར་མེ་ཁྲོམ་སྐོར་བྱེད་ཀྱི་ཡོད་པ་རེད། ང་ཚོའི་ས་གནས་ཆུང་ཆུང་འདིར་ལས་འགུལ་སྣ་གཅིག་སྤེལ་བསྡད་པ་ཡིན་ན་འགྲིག་གི་མ་རེད། ལྡི་ལི་དང་ས་གནས་གཞན་ལ་འགྲོ་དགོས་པ་རེད། ངས་ནམ་རྒྱུན་བཙན་བྱོལ་ནང་ཡོད་པའི་ཚོགས་པ་ཁག་གིས་རླབས་ཆེན་གྱི་ལས་ཀ་བསྒྲུབ་ཐུབ་ཀྱི་མ་རེད་ཅེས་བཤད་བཞིན་ཡོད། རྒྱུ་མཚན་ཅི་ཡིན་ཞེ་ན། རླབས་ཆེན་གྱི་ལས་འགུལ་སྤེལ་བ་ལ་མི་བློ་སྟོབས་ཅན་རྒྱལ་ཁབ་དང་མི་རིགས་ཆེད་དུ་རང་སྲོག་བློས་གཏོང་ཐུབ་མཁན། ཡོད་ཚད་ཕུལ་ཐུབ་མཁན་དགོས་པ་རེད། ད་ལྟའི་དུས་འདིར་ཆོལ་གསུམ་ཆིག་སྒྲིལ་ཚོགས་པ་སོགས་ཚོགས་པ་གཞན་དག་ཀྱང་ཉལ་བསྡད་རྒྱུ་ཡོད་པ་མ་རེད། ཚང་མས་ལྟ་བ་གཅིག་དང་ལངས་ཕྱོགས་གཅིག  དམིགས་ཡུལ་གཅིག་གི་ཐོག་ནས་འཆར་གཞི་ལྡན་པའི་ལས་འགུལ་ཐོག་མཉམ་རུབ་བྱ་དགོས་པ་རེད། དེ་མིན་ང་འཚེ་མེད་ཞི་བ་ཡིན་དང་རང་ཐག་རང་གཅོད་ཡིན་སོགས་བཤད་བསྡད་ན་དུས་ནམ་ཡང་འགྲུབ་ཐབས་ཡོད་པ་མ་རེད། ང་ཚོས་ནམ་ཡིན་ཡང་འཚེ་མེད་ཞི་བ་དང་གདུང་སེམས་མཉམ་སྐྱེད་ཙམ་གྱིས་ཡོང་གི་མ་རེད། གདུང་སེམས་མཉམ་སྐྱེད་ཅེས་པ་དེ་བོད་པ་ཚོ་ཕྱི་རྒྱལ་གྱི་མི་སེར་ཆགས་རྗེས་གཞན་གྱི་མི་སེར་གྱི་ཐོབ་ཐང་བཟུང་སྟེ་བོད་པའི་ལས་འགུལ་ནང་ཞུགས་ཐུབ་ཀྱི་མེད་པའི་དབང་གིས་གདུང་སེམས་མཉམ་སྐྱེད་བྱེད་ཀྱིན་ཡོད་པ་རེད། མ་འོངས་པར་ང་ཚོས་འདས་པའི་ལས་འགུལ་ཁག་གི་གྲུབ་འབྲས་ལ་ཕྱིར་ལྟོས་དང་ཆིག་སྒྲིག་མཉམ་རུབ་ཀྱི་ཐོག་ནས་ལས་འགུལ་སྤེལ་དགོས། ”ཞེས་བརྗོད་བྱུང་།

ཆབ་སྲིད་བཙོན་ཟུར་གྲྭ་བག་གྲོ་ལགས་ཀྱིས། “ ང་ཚོས་ནམ་རྒྱུན་བོད་ནས་མེ་བཏོན་ཐུབ་པ་ཡིན་ན་བཙན་བྱོལ་ནང་དུ་བ་ཐོན་ཐུབ་དགོས། ཞེས་བཤད་ཀྱིན་པ་ལྟར། ད་ལྟ་ང་ཚོ་རང་དབང་ལུང་པའི་ནང་ཡོད་པའི་བོད་མི་ཚོས་ལྟད་མོ་བལྟ་བའི་དུས་མིན་པར་དབྱིན་ཇི་ཤེས་ཀྱི་ཡོད་ཟེར་མཁན་དང་དེང་དུས་ཀྱི་ཤེས་ཡོན་ཟེར་མཁན། རྒྱ་ཡིག་ཤེས་གྱི་ཡོད་ཟེར་མཁན་ཚོས་བེད་སྤྱོད་གཏོང་བའི་དུས་ལ་བསླེབས་འདུག ང་ཚོའི་ངེས་པར་དུ་བོད་ནང་གི་རང་ལུས་མེར་བསྲེགས་བྱས་པ་དག་དང་། གུང་ཁྲན་ཏང་གིས་མེ་མདའི་འོག་བགྲོངས་ཟིན་པ་དག་དཔང་རྟགས་བྱས་ཏེ། རྒྱལ་སྤྱིའི་ཁྲིམས་ཁང་དུ་ཧུའུ་ཅིན་ཐའོ་སོགས་དམར་ཤོག་གི་དཔོན་རིགས་ཚོ་ཞུ་གཏུག་རྒྱག་དགོས་པ་རེད། དེ་མིན་པར་ལག་ལ་རྒྱལ་དར་བཟུང་བ་དང་མར་མེ་ཁྲོམ་སྐོར་བྱས་པ་སོགས་ཀྱིས་ཁུངས་འཁྱོལ་ཐུབ་ཀྱི་མ་རེད། ང་ཚོས་ཚོར་སྣང་ཡོད་པའི་ཐོག་ཚ་ཚ་འུར་འུར་གྱིས་ལས་ཀ་བྱ་དགོས་ཀྱི་འདུག ཉེ་ཆར་བཀའ་ཁྲི་མཆོག་ཡོབ་རུབ་ཁག་ཏུ་ཁྱབ་བསྒྲགས་ཧ་ཅང་ཡག་པོ་བྱུང་ཡོད་པ་ལྟར། མུ་མཐུད་ཨ་རའི་གྲོས་ཚོགས་དང་ཡུ་རོབ་གྲོས་ཚོགས། མཉམ་འབྲེལ་རྒྱལ་ཚོགས་བཅས་ལ་ཡིག་ངག་གཉིས་ཐོག་ནས་གནས་ཚུལ་སྙན་སེང་ཞུས་དགོས་པ་རེད། བོད་ནང་ལས་འགུལ་རིམ་པ་སྤེལ་ཡང་། ང་ཚོ་འདི་ནས་སྐབས་རེར་ལས་འགུལ་སྤེལ། སྐབས་རེར་ལས་འགུལ་སྤེལ་མཚམས་བཞག་པ་དེ་ཡག་པོ་མ་རེད། ང་ཚོས་ངེས་པར་དུ་ང་ཚོ་བཙན་བྱོལ་ནང་ཡོང་དགོས་པའི་རྒྱུ་མཚན་ཤེས་པའི་ཐོག བོད་པ་མི་རེ་ངོ་རེས་འཆི་གསོན་གྱི་འཐབ་རྩོད་བྱ་དགོས་པའི་དུས་ལ་བསླེབས་ཡོད་པ་རེད། གལ་སྲིད། ང་ཚོ་འདི་ལྟར་བསྡད་པ་ཡིན་ན་ནམ་ཞིག་བཙན་བྱོལ་བོད་མི་ཚོ་ཉེས་ཅན་པ་མི་ཆགས་པའི་ངེས་པ་མི་འདུག ” ཅེས་བརྗོད་བྱུང་།

བཀྲ་ཤིས་ལམ་བཟང་ལགས་ཀྱིས། “ ཉེ་ཆར་བོད་ཀྱི་གཞོན་ནུ་ལྷན་ཚོགས་ཀྱིས་འདི་ལོའི་ལོ་སར་མི་གཏོང་བའི་གསལ་བསྒྲགས་གནང་ཡོད་ཀྱང་། བོད་ནང་གི་གནས་སྟངས་ཛ་དྲག་པོའི་སྐབས་སུ་ང་ཚོ་མང་པོ་ཞིག་གི་ལོ་སར་གཏོང་མི་གཏོང་གི་སྐད་ཆ་མང་པོ་ཞིག་བཤད་ཡོང་གི་འདུག ཕྱོགས་གཅིག་ནས་མི་མང་ནང་དཀྲུགས་ཤིང་རྒྱག་མཁན་ཡོང་མི་སྲིད་པ་མིན་ཡང་། ང་རང་ངོས་ནས་ང་ཚོས་ངེས་པར་དུ་སོ་སོའི་ཕ་མ་གྲོངས་པ་ཡིན་ན་ལོ་སར་གཏོང་གི་རེད་དམ་མ་རེད། ཅེས་རང་ཉིད་ལ་དྲི་བ་ཞིག་བཏོན་རྗེས་བསམ་བློ་གཏོང་དགོས་པ་རེད་བསམ་གྱི་འདུག ལོ་སར་མ་བཏང་བ་ཡིན་ན། གཞུང་དང་གཞུང་འབྲེལ་མིན་པའི་ཚོགས་པ་ཁག་གིས་སྣེ་འཁྲིད་འོག ས་གནས་ཁག་གི་མི་མང་དགོན་སྡེ་ཁག་ཏུ་འདུ་འཛོམས་ཀྱིས། འདས་ཟིན་པའི་དཔའ་བོ་དཔའ་མོ་རྣམས་ལ་མྱ་ངན་དང་བསྔོ་སྨོན་བྱ་དགོས་པ་རེད། ” ཅེས་བརྗོད་བྱུང་།