གཟའ་མིག་དམར་ཉིན་ཞི་ཅིན་ཕེན་བོད་རྒྱ་ཡུ་གུར་གཙོས་མི་མང་བརྒྱ་ཕྲག་མང་པོའི་ངོ་རྒོལ་ཁྲོད། ཨ་རིའི་ཕོ་བྲང་དཀར་པའི་ནང་སྲིད་འཛིན་ཨོ་བྷ་མར་ཐུག་འཕྲད་སྐབས། ཨ་རིའི་སྲིད་འཛིན་གྱིས་འགྲོ་བ་མིའི་ཐོབ་ཐང་གནད་དོན་གླེང་སློང་བྱས་ཡོད་པ་རེད།
ཟླ་འདིའི་ཕྱི་ཚེས་ ༡༣ ཉིན་ནས་རྒྱ་ནག་གི་སྲིད་འཛིན་གཞོན་པ་ཞིས་ཅིན་ཕེན་ཨ་རིར་རྒྱལ་དོན་གཟིགས་སྐོར་དུ་སྐྱོད་ཀྱི་ཡོད་པ་ལྟར། ཨ་རིའི་ཕྱི་ཚེས་ ༡༤ ཉིན་སྔ་དྲོར་ཨ་རིའི་ཕོ་བྲང་དཀར་པོ་རུ་སྲིད་འཛིན་ཨོ་བྷ་མས་ཞིས་ཅིན་ཕིན་ལ་སྣེ་ལེན་མཇལ་འཕྲད་གནང་ཡོད་ཅིང་། སྐབས་དེར་ཨོ་བྷ་མས་ཆུ་ཚོད་སྐར་མ་ ༨ རིང་འཚམས་འདྲིའི་གཏམ་བཤད་སྤེལ་ཏེ། “ང་ཚོས་རྒྱ་ནག་དང་མཉམ་དུ་འབད་བརྩོན་བྱས་ཏེ། འཛམ་གླིང་དཔལ་འབྱོར་སྒྲོམ་གཞིའི་འོག་ཚང་མས་གཅིག་མཚུངས་ཀྱི་སྒྲིག་གཞི་ཞིག་བརྩི་སྲུང་བྱ་རྒྱུའི་རེ་བ་ཡོད། འབྲེལ་བ་དེ་བརྒྱུད་དེ་ཨ་རྒྱ་གཉིས་བར་གྱི་ཉོ་ཚོང་དོ་མཉམ་དང་འགན་སྲུང་བྱ་ཐུབ་ལ། འཛམ་གླིང་སྤྱིའི་ཉོ་ཚོང་དོ་མཉམ་ཡོང་རྒྱུར་ཡང་འགན་སྲུང་བྱ་ཐུབ། དེ་བཞིན། འགྲོ་བ་མིའི་ཐོབ་ཐང་སོགས་གལ་ཆེའི་གནད་དོན་ཐད། ང་ཚོས་མུ་མཐུད་རང་ཉིད་ཀྱི་ལངས་ཕྱོགས་གསལ་འདོན་བྱས་ཏེ། འགྲོ་བ་མི་ཚང་མའི་རེ་འདོད་དང་ཁེ་དབང་མངོན་འགྱུར་གྱི་ལས་དོན་དེ་གལ་ཆེན་དུ་འཛིན་རྒྱུ་ཡིན” ཞེས་བརྗོད་དེ། ལོ་སྔོན་མར་ཁོས་ཤར་ཨེ་ཤ་ཡའི་ཚོགས་ཆེན་ཐོག་བརྗོད་པ་ཟིན་པ་ལྟར། ཨ་རི་ནི་ཞི་བདེ་རྒྱ་མཚོ་ཆེན་པོའི་མངའ་ཁུལ་ལ་བདག་དབང་ཡོད་པའི་རྒྱལ་ཁབ་ཅིག་ཡིན་པར་མ་ཟད། ཞི་བདེ་རྒྱ་མཚོའི་མངའ་ཁུལ་ཞི་བདེ་བརྟན་ལྷིང་ཡོང་བར་མཉམ་འབྲེལ་ཐོག་ཤུགས་རྒྱག་རྒྱུ་ཡིན་སྐོར། དེ་བཞིན། འདས་པའི་ལོ་ ༢༠ ནང་རྒྱ་ནག་མགྱོགས་མྱུར་ངང་འཕེལ་རྒྱས་བྱུང་བ་དེ་ཡིས། ཉིན་རེ་བཞིན་རྒྱ་ནག་སྟོབས་ལྡན་དང་དར་རྒྱས་འགྲོ་བཞིན་པའི་རྣམ་པ་མཚོན་ཡོད་ལ། དེ་དང་མཉམ་དུ་རྒྱ་ནག་ལ་སྔར་ལས་ལྷག་པའི་འོས་འགན་ཞིག་སླེབས་ཀྱི་ཡོད་པའང་བསྟན་ཡོད་ཚུལ་བརྗོད་འདུག
སྐབས་དེར་ཞིས་ཅིན་ཕེན་གྱིས་སྐར་མ་ ༡ ཙམ་ལས་གཏམ་བཤད་བྱས་མེད་ལ། ཁོས་ཁ་སང་སྲིད་འཛིན་གཞོན་པ་པེ་ཏིན་དང་གླེང་མོལ་སྐབས་བསམ་ཚུལ་བརྗེ་རེས་བྱས་ཡོད་སྐོར་དང་། རྗེས་ཀྱི་གྲོས་མོལ་སྐབས་སྲིད་འཛིན་ཨོ་བྷ་མས་བསམ་ཚུལ་ལྷུག་པོ་བརྗོད་རྒྱུའི་རེ་བ་ཡོད་ཚུལ་ཙམ་ལས་བརྗོད་མེད། དེའི་རྗེས་ཀྱི་ཨ་རིའི་ཕྱི་སྲིད་དྲུང་ཆེ་ཧེ་ལེ་རིས་ཡི་སྣེ་ལེན་གསོལ་སྟོན་སྐབས། ཨ་རིའི་སྲིད་འཛིན་གཞོན་པ་པེ་ཏེན་གྱིས་རྒྱ་ནག་གི་འགྲོ་བ་མིའི་ཐོབ་ཐང་གི་གནད་དོན་གླེང་སྐབས། ཞིས་ཅིན་ཕེན་གྱིས་མ་གཞི་རྒྱ་ནག་གི་འགྲོ་བ་མིའི་ཐོབ་ཐང་གནད་དོན་ཐད་སྟོང་ཆ་ཡོད་ནའང་། རྒྱ་དམར་གུང་བྲན་ཏང་གི་དབང་སྒྱུར་འོག་འདས་པའི་ལོ་ ༣༠ ནང་འགྲོ་བ་མིའི་ཐོབ་ཐང་ཡར་རྒྱས་ཕྱིན་ཡོད་ཚུལ་བརྗོད་ཡོད་འདུག
ཨ་རིའི་ཕོ་བྲང་དཀར་པོར་ཨོ་བྷ་མ་དང་ཞིས་ཅིན་ཕེན་ཐུག་འཕྲད་སྐབས། ཕོ་བྲང་དཀར་པོའི་མདུན་ཐང་དུ་ཨ་རིའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་དང་། རྒྱལ་མཚམས་མེད་པའི་གསར་འགོད་མཐུན་ཚོགས། བོད་རང་བཙན་སློབ་ཕྲུག་ཚོགས་པ་དང་བོད་ཀྱི་གཞོན་ནུ། ཐེ་ཝན་སྤྱི་མཐུན་ལས་དོན་ཚོགས་པ། རྒྱ་ནག་དམངས་གཙོ་ཚོགས་པ། རྒྱ་རིགས་བུད་མེད་ཁེ་དབང་སྲུང་སྐྱོབ་ཚོགས་པ། ཆོས་འཁོར་རྩ་རླུང་ཚོགས་པ་སོགས་བོད་རྒྱ་ཡུ་གུར་གཙོས་མི་གྲངས་བརྒྱ་ཕྲག་མང་པོ་འདུ་འཛོམས་ཀྱིས་ཨ་རྒྱ་གཉིས་ཀྱི་མགོ་འཁྲིད་ཚོས་རྒྱ་གཞུང་གིས་འགྲོ་བ་མིའི་ཐོབ་ཐང་དང་། རང་དབང་ལ་རྡོག་རལ་གཏོང་བཞིན་པའི་གནས་སྟངས་ཐད་གླེང་མོལ་བྱ་དགོས་པའི་ངོ་རྒོལ་སྐད་འབོད་བྱས་ཡོད་པ་རེད། སྐབས་དེར་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་བསྟན་རྡོར་ལགས་ཀྱིས་ “ང་ཚོའི་ཚོགས་པའི་ངོས་ནས་རེ་བ་དང་འཆར་གཞི་ཆེ་ཤོས་ནི། ད་ལྟ་ཡོད་པའི་ཞི་བའི་འཐབ་རྩོད་འདི། ད་དུང་ཡིན་ནའང་རྒྱ་ཆེ་རུ་དང་གཏིང་ཟབ་ཏུ་འགྲོ་ཐུབ་རྒྱུའི་རེ་བ་བྱེད་བཞིན་ཡོད།” ཅེས་བརྗོད་འདུག
རྒྱ་རིགས་དམངས་གཙོ་དོན་གཉེར་བ་ཡཱང་ཅན་ལིས་ཡིས། “ལོ་སྔོན་མའི་ཕྱི་ཟླ་ ༧ ནང་ཞིས་ཅིན་ཕེན་གྱིས་བོད་ཀྱི་ལས་དོན་འགན་བླངས་པ་ནས་བཟུང་། བོད་ནང་དུ་སྔ་ཕྱིར་གནད་དོན་མང་པོ་བྱུང་ཡོད་ལ། ལྷག་པར་དུ་ཉེ་སྔོན་རྒྱ་གཞུང་གིས་དམར་ཤོག་དཔོན་རིགས་ཀྱི་པར་རིས་ཁྲི་ཕྲག་མང་པོ་བོད་ཀྱི་དགོན་སྡེ་དང་ཁྱིམ་ཚང་ཁག་ནང་འགེལ་དགོས་པའི་ལས་འགུལ་སྤེལ་ཡོད། གནས་སྟངས་དེས་ཞི་ཅིན་ཕེན་ནི་འགྲོ་བ་མིའི་ཐོབ་ཐང་ལ་བཀག་སྡོམ་བྱེད་མཁན་ཞིག་ཡིན་པ་མངོན་ཡོད།” ཅེས་བརྗོད་དེ། ཐེངས་འདིའི་ངོ་རྒོལ་ལས་འགུལ་དེ་ནི། རྒྱལ་སྤྱིའི་སྤྱི་ཚོགས་ལ་རྒྱ་ནག་གི་དཔོན་རིགས་ཚོར་ཡིད་ཆེས་དེ་རེ་བ་བྱ་རྒྱུ་གང་ཡང་མེད་པ་དང་། རྒྱ་ནག་དམངས་གཙོར་བཅོས་བསྒྱུར་ཡོང་ཐབས་ལེགས་ཤོས་ནི་གཞི་རིམ་མང་ཚོགས་ཀྱི་དམངས་གཙོའི་སྟོབས་ཤུགས་གོང་སྤེལ་ཏུ་གཏོང་ཐབས་བྱ་རྒྱུ་དེ་ཡིན་སྐོར་བརྗོད་འདུག
རྒྱ་ནག་གི་ཁྲིམས་རྩོད་ཀོ་ཀྲི་ཧྲན་གྱི་ཆུང་མ་ཀིན་ཧི་ལགས་ཀྱིས་ཀྱང་། མི་མང་གི་ངོ་རྒོལ་སྐད་སྒྲ་འདི་དག་ཞིས་ཅིན་ཕེན་གྱི་ཐོས་ཐུབ་པའི་རེ་བ་བྱེད་ཀྱི་ཡོད་ཅིང་། ཨ་རིའི་སྲིད་འཛིན་གྱིས་ཞི་ཅིན་ཕེན་ལ་ཐུག་འཕྲད་སྐབས། འགྲོ་བ་མིའི་ཐོབ་ཐང་སྤྱི་ཡོངས་ཙམ་གླེང་སློང་བྱ་རྒྱུ་མ་ཡིན་པར། ཁོང་མོའི་ཁྱོ་ག་ཀོ་ཀྲི་ཧྲིན་གྱིས་མཚོན་པའི་རྒྱ་གཞུང་གིས་འགྲོ་བ་མིའི་ཐོབ་ཐང་ལ་རྡོག་རྫུས་གཏོང་བཞིན་པའི་གནད་དོན་བྱེ་བྲག་པ་རེ་རེ་བཞིན་ཅོག་ཙེ་སྟེང་དུ་བཞག་སྟེ་གྲོས་མོལ་བྱ་རྒྱུར་རེ་འབོད་བྱེད་ཀྱིན་ཡོད་སྐོར་བརྗོད་འདུག གཞན། རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ཞི་ཅིན་ཕེན་ཨ་རིར་ཕྱོགས་སྐྱོད་དང་བསྟུན་ཏེ། འཛམ་གླིང་གི་དྲ་དམངས་ཡོངས་ལ་རྒྱ་ནག་གིས་གནས་འཕྲིན་དྲ་རྒྱ་བཀག་སྡོམ་ཐད་བསམ་ཚུལ་བསྡུ་རུབ་བྱས་ཏེ། ཨ་རྒྱ་གཉིས་ཀྱི་དཔོན་རིགས་ཚོར་སྙན་ཐོའི་ཚུལ་དུ་སྤྲོད་རྒྱུའི་ལས་འགུལ་ཞིག་སྤེལ་བཞིན་ཡོད་འདུག
ཐེངས་འདིར་ཞིས་ཅིན་ཕེན་གྱིས་ཨ་རིར་ཉིན་ ༥ རིང་གི་རྒྱལ་དོན་གཟིགས་སྐོར་གྱི་དུས་ཡུན་ནང་། ཕྱི་ཚེས་ ༡༤ དང་ ༡༥ ཉིན་གཉིས་རིང་རྒྱལ་ས་ཝ་ཤིན་ཊོན་དུ་ཨ་རིའི་མཐོ་རིམ་དཔོན་རིགས་ཁག་ལ་ཐུག་འཕྲད་གླེང་མོལ་བྱ་རྒྱུ་ཡིན་འདུག
གསར་འགོད་པ། ཚེ་རིང་རྒྱལ།
ཞི་ཅིན་ཕེན་ཡང་རྒྱ་ནག་གི་འདྲེ་རྒན་ཞིག་གི་ནང་ནས་གཅིག་རེད། ཁོས་ཨ་རི་ལ་ཡང་བཀོད་འདོད་འགར་བཞག་འདུག་ཀ
ཨ་རྒྱ་གཉིས་ཀྱི་འབྲེལ་བ་འདི་འགྲོ་བ་མིའི་ཐོབ་ཐངགོང་མཐོར་གཏོང་བའི་རེ་བ་རྩ་བ་ཉིད་ནས་མེད་པ་ཞིག་ཡིན། ཨ་རིས་གླེང་བཞིན་པའི་འགྲོ་བ་མིའི་ཐོབ་ཐང་དེ་ནི་གཞན་ལ་འཇིགས་སྐུལ་དང་དྲག་རྒོལ་བྱེད་པའི་ལག་ཆ་ཞིག་ལས་དོན་དངོས་རྒྱལ་སྤྱིའི་བདེ་འཇགས་དང་ཞི་བདེ་རྨེག་མེད་དུ་གཏོང་གི་ཡོད་ལ། རང་ཉིད་ཀྱི་ཁེ་ཕན་རྩ་བར་བཟུང་བའི་སྲིད་བྱུས་འདིས་གླེང་ཨེ་ཤ་ཡའི་ཞི་བདེ་ལ་ཚབས་ཆེའི་གཏོར་བརློག་བྱེད་ཀྱི་ཡོད་པ་ཨ་རིའི་གཞུང་གིས་རྟོགས་ཡོད་མོད། འགྲོ་བ་མིའི་ཐོབ་ཐང་ཁ་ལ་འཁྱེར་ཏེ་རྒྱ་དམར་དྲག་སྤྱོད་པའི་སྟོབས་ཤུགས་རྒྱ་བསྐྱེད་གཏོང་སྟེ་མཐའ་མར་རང་ཉིད་ཀྱི་སྐེ་ལ་གཅེབ་ཐག་སྐོན་རྒྱུ་ཉག་ཅིག་ལས་འཛམ་གླིང་ཞི་བདེ་དང་འགྲོ་བ་མིའི་ཐོབ་ཐང་ཟེར་བ་མི་མང་དུང་ཕྱུར་མང་པོས་མྱོང་སྤྱོད་ཀྱི་སྐལ་བ་དེ་ཡོད་མི་སྲིད་པ་ཞིག་ཡིན། རྒྱ་དམར་སྲིད་གཞུང་ནི་འཛམ་གླིང་མི་མང་གི་རང་དབང་དང་ཞི་བདེ་མངོན་འཕྲོག་བྱེད་མཁན་གྱི་རྒྱལ་ཁབ་གཏེ་བོ་དེ་ཡིན་ལ། དེ་བཞིན་ཨ་རིའི་གཞུང་ནི་དེ་ལ་རམ་འདེགས་བྱེད་མཁན་གྱི་འཇིགས་སྐུལ་དྲག་སྤྱོད་པ་ཞིག་ཏུ་འགྱུར་བཞིན་ཡོད་པས། འཛམ་གླིང་མི་མང་གི་རེ་བ་དང་རྨི་ལམ་ནི་འཇིགས་སྐྲག་དང་དངངས་འཚབ་ཅིག་ཏུ་འགྱུར་གྱི་ཡོད་པ་གསལ་པོ་ཡིན།
ང་ཚོའི་མེས་པོ་ལྟར་བོད་རང་གིས་མ་འཇོན་ན། བོད་དོན་མུ་མཐུད་ནས་ཕྱིས་དྲགས་བགྱིད་ཡོད་རེད། འགྲོ་བ་མིའི་ཐོབ་ཐང་གླེང་ཐུབ་པ་ཙམ་ཡང་ཞི་བདེར་ཕན་བགྱི་རེད། ཨ་རི་ལ་ཐུགས་རྗེ་ཆེ་ཞུ་བ་དང་སྦྲགས་ཞིས་ཅིན་ཕིན་སོགས་ཀྱིས་ཀྱང་དྲང་པོའི་ལམ་དུ་བསྐྱོད་ཐུབ་པའི་སྨོན་ལམ་ཞུ་རགྱུ་ལས་མ་འདས་ལགས། བོད་ཀྱི་བདེན་མཐའ་རྒྱལ་འགྱུར་ཅིག །
གང་ལྟར་རྒྱ་ནག་གི་སྲིད་བློན་གཞོན་པ་ཞིས་ཅིན་ཕེན་ཨ་རི་ཡོང་བ་མ་ཟད་ཨ་རིའི་ཨོ་བྷ་མ་དང་མཇལ་འཕྲིན་གནང་ཟིན། ཁོ་རང་གི་འདོད་པ་ཚིམས་སོང་བ་རེད།
ཐེ་ཝན་དང་བོད་ཀྱི་ཚོགས་སྡེ་ཁག དེ་བཞིན་རྒྱ་རིགས་དམངས་གཙོ་དོན་གཉེར་བ་དག་གིས་ཀྱང་རང་སེམས་ཀྱི་སྡུག་བསྔལ་སེལ་ཕྱིར་སྐད་འབོད་གང་འཚམས་ཤིག་བྱས་ཡོད་པ་རེད། དེ་ལ་དེའི་ཚོད་ཀྱི་གྲུབ་འབྲས་ཤིག་ཐོན་པ་རེད། ཕྱོགས་གཉིས་ཀྱི་འདོད་པ་ཆུང་ཚེག་རེ་གྲུབ་ཟིན། ཡིན་ནའང་། ཨོ་བྷ་མས་བོད་པ་གཙོས་སྐད་འབོད་རྒྱག་མཁན་ཚོའི་སླད་དུ་རང་དབང་དང་མང་གཙོའི་སྐོར་གྱི་སྐད་ཆ་ཐུང་ངུ་ཞིག་ཕོག་ཐུག་མེད་པའི་སྒོ་ནས་བཤད་པ་རེད། རྒྱ་ནག་གི་སྲིད་བློན་གཞོན་པ་ཞིས་ཅིན་ཕེན་གྱིས་ལོ་ངོ་ཉི་ཤུའི་རིང་ལ་རྒྱ་ནག་གི་རང་དབང་དང་ཐོབ་ཐང་ཡར་རྒྱས་འགྲོ་གི་ཡོད་སྐོར་བཤད། ད་དུང་ནོར་འཁྲུལ་རེ་ཡོད་སྲིད་ཅེས་ཁ་འགོག་ཐུབ་བྱས་ཡོད།
མདོར་ན་རང་རང་ས་ནས་རྩ་དོན་རྩོད་རྒྱུ་ལས་རྒྱལ་ཁབ་གཞན་གྱིས་རང་གི་ཁེ་བཟང་ལ་ལྟ་རྒྱུ་ལས་གཞན་དོན་གླེང་ནས་རང་ལ་གྱོང་ནམ་ཡང་རག་གི་འཇུག་མི་སྲིད་པ་མཁྱེན་པར་མཛོད།
སྤྱིར་འཛམ་གླིང་འདི་འགྲོ་བ་མི་ཡི་རིགས་ལ་བདག་པ་ལྟ་བུར་ཡོད་པས། དངོས་གནས་བྱས་ན་མི་རིགས་ཚང་མར་ཐོབ་ཐང་འདྲ་མཉམ་དགོས་པ་རེད། དེ་མ་གཏོགས་སུ་ལ་དབང་ཡོད་མེད་དང་། དམག་ཡོད་མེད། དཔལ་འབྱོར་ཡོད་མེད་ལ་ལྟོས་ཚེ། རྒྱ་ནག་གི་ཧམ་པ་ངེས་པར་དུ་འགོག་དགོས་ཀྱི་རེད་མ་གཏོགས། རྗེས་སུ་མྱང་མཁན་རྒྱལ་ཁབ་ཚང་མ་ཡིན་རྒྱུ་རེད།