ཝེ་སི་ཀོན་སིན་དུ་གསུམ་དུས་སྲུང་གཙི།༼པར༽

གནས་ཚུལ་བཏང་འབྱོར་ལ། ཁ་སང་སྔ་དྲོའི་ཆུ་ཚོད་ ༡༠ སྟེང་ཝེ་སི་ཀོན་སིན་གྱི་བོད་རིགས་དང་བོད་དོན་རྒྱབ་སྐྱོར་བ་ ༣༠༠ ཙམ་མལ་ཌེ་སིན་གྲོང་ཁྱེར་སྤྱི་ཁྱབ་ཁང་གི་མདུན་དུ་འཛོམས་ཏེ། ཨ་རི་དང་བོད་རྒྱལ་ཁབ་ཆེན་པོའི་རྒྱལ་གླུ་གྱེར་འདོན་དང་རྒྱལ་དར་མཁའ་དབྱིངས་སུ་བསྒྲེངས་རྗེས། བོད་བསྟན་སྲིད་མི་རིགས་ཆེད་རང་སྲོག་ཤོར་མཁན་སྤྱི་དང་། ཉེ་ཆར་རང་ལུས་མེར་བསྲེགས་གནང་མཁན་དག་ལ་མྱ་ངན་གུས་འདུད་ཞུས་ཡོད་ཅིང་། དེའི་རྗེས་ས་གནས་སྤྱི་མཐུན་ཚོགས་པའི་ཚོགས་གཙོ་ཁམས་ལུང་རིན་པོ་ཆེ་མཆོག་གིས་དུས་དྲན་ངོ་སྤྲོད་དང་། མཐོ་སློབ་ཀྱི་སློབ་མ་བསྟན་འཛིན་ཚེ་རྒྱལ་དང་བཀྲ་ཤིས་ཚེ་རིང་གཉིས་ནས་བཀའ་ཤག་གི་གསུང་འཕྲིན་ལྗགས་ཀློག་གནང་ཡོད་འདུག

གྲོང་ཁྱེར་སྤྱི་ཁྱབ་ཇའོ་ཕེ་རི་སི་(Joe Parisi)མཆོག་ནས་ང་དེ་རིང་ཁྱེད་རང་ཚོ་མཉམ་དུ་བོད་ཀྱི་གསུམ་བཅུ་དུས་དྲན་སྲུང་གཙི་བྱེད་ཐུབ་པར་དགའ་བོ་བྱུང་བ་དང་། དེ་རིང་བོད་ཀྱི་རྒྱལ་དར་འདི་ག་ས་གནས་སུ་བསྒྲེངས་འཛུགས་བྱས་པ་རེད་དེ། མི་འགྱང་བར་བོད་ཀྱི་ས་ཐོག་ཏུ་འཛུགས་ཐུབ་པ་བྱེད་དགོས་པ་རེད། ང་ཚོས་ཁྱེད་རང་ཚོ་བོད་མི་རིགས་ཀྱི་ཆེད་རོགས་པ་མུ་མཐུད་དུ་བྱེད་རྒྱུ་ཡིན་སོགས་གསུངས་ཡོད་འདུག

བོད་དོན་རྒྱབ་སྐྱོར་བ་ལོའེ་སི་(Luis Maetino)མཆོག་གིས་ཨ་རིའི་གྲོས་ཚོགས་ཀྱི་མཐུས་མི་སྐུ་ཞབས་(Senator Harb Kohl)མཆོག་གི་གསུང་འཕྲིན་ལྗགས་ཀློག་གནང་བའི་ནང་། ང་དེ་རིང་དངོས་སུ་བཅར་མ་ཐུབ་ཀྱང་། ང་རང་བོད་ཀྱི་འགྲོ་བ་མིའི་ཐོབ་ཐང་ལ་གདུང་སེམས་མཉམ་སྐྱེད་དང་། རྒྱ་མི་ལ་སྐྱོན་བརྗོད་བྱེད་མཁན་ཞིག་ཡིན་ལ། ད་དུང་ཡང་མུ་མཐུད་དུ་བྱ་རྒྱུ་ཡིན་ཞེས་སོགས་གསུངས་ཡོད་འདུག

དེའི་རྗེས་ས་གནས་གཞོན་ནུ་དང་བོད་རང་བཙན་སློབ་ཕྲུག་ཚོགས་སྐུ་ཚབ་ནས་གཏམ་བཤད་དང་། བདེན་ཚིག་སྨོན་ལམ་སོགས་གྲུབ་རྗེས། ངོ་རྒོལ་སྐད་འབོད་དང་ཡིག་ཆ་བཀྲམས་པ་སོགས་གནང་ཡོད་འདུག མཐའ་མཇུག་རྒྱལ་ཚོགས་མདུན་དུ་ཟས་བཅད་ངོ་རྒོལ་ལ་བཞུགས་མཁན་ཤིང་བཟའ་རིན་པོ་ཆེ་སོགས་ལ་རྒྱབ་སྐྱོར་མཚོན་བྱེད་ཞལ་འདེབས་འསྡུ་རུབ་ཀྱིས་ཨ་སྒོར་༤༦༠་༠༠ བྱུང་བ་སོགས་ཀྱི་གནས་ཚུལ་ཡོད།