ལུང་རྟོགས།
གོང་གི་ཚིག་དེ་ནི་ཉེ་ཆར་རྒྱ་དམར་འཐབ་ཕྱོགས་གཅིག་གྱུར་ལས་ཁུངས་ཀྱི་མགོ་ཁྲིད་ཀྲུའུ་ཝེ་ཆོན་གྱིས་བྲིས་པའི་མི་རིགས་ས་ཁུལ་གྱི་གནད་དོན་ལས་བྱུང་བའི་བསམ་ཚུལ་དེའི་ནང་ཐོན་ཡོད་ལ། དངངས་སྐྲག་གི་ཚིག་དེ་ཐོན་པར་ང་ཚོ་བོད་རིགས་རྣམས་ཀྱི་ངོས་ནས་རྒྱལ་ཁ་ཆེན་པོ་ཞིག་ཡིན་པ་དང་ལྷན་དུ་ང་ཚོས་རྒྱ་དམར་གྱི་གཡོ་ཇུས་ལ་གདོང་ལེན་གྱི་གྲ་སྒྲིག་ཀྱང་བྱེད་དགོས་པ་སྨོས་མེད་རེད། རྒྱ་དམར་གྱི་དཔོན་རིགས་མཐོ་གྲས་ཀྱིས་ད་ལྟའི་བར་རྒྱ་དམར་གྱི་སྲིད་ཇུས་ནང་ནོར་འཁྲུལ་མང་པོ་ཞིག་བྱུང་བ་ཁས་ལེན་བྱས་འདུག་པ་འདི་ང་ཚོས་རྒྱལ་སྤྱིའི་ཐོག་ཁྱབ་བསྒྲགས་བྱེད་རྒྱུ་ཡང་གལ་ཆེ་བར་མཐོང་། རྩོམ་ཡིག་འདི་རྒྱ་ནག་དམར་གཞུང་གི་སྲིད་བྱུས་ཞིག་ཡིན་པ་རྒྱ་གཞུང་ལ་ཞིབ་འཇུག་གནང་མཁན་ཚང་མའི་མཁྱེན་གསལ་ཡིན་པས་འདིར་འགྲེལ་བརྗོད་འཕར་མ་ཞུ་དགོས་མི་འདུག
ཀྲུའུ་ཝེ་ཆོན་གྱི་རྩོམ་ཡིག་ནང་ནོར་འཁྲུལ་ཁས་ལེན་བྱས་པ་ཁག་ངས་འདི་ཐོ་འགོད་བྱས་ཡོད་པ་དག་ནི། ༡༽ མི་རིགས་དང་ཆོས་ལུགས་ལས་དོན་ཐད་དཀའ་ངལ་མི་ཉུང་བ་ཞིག་ཡོད་པ་དང་། ༢༽ མི་རིགས་ནང་ཁུལ་དུ་འགལ་ཟླ་ཡོད་པ། ༣༽ སྤྱི་ཚོགས་ཀྱི་འཕོ་འགྱུར་དང་འཛིན་སྐྱོང་གི་དཀའ་ངལ། ༤༽ནུབ་ཕྱོགས་དགྲ་འཛིན་སྟོབས་ཤུགས། དེ་ལས་ལྷག་པར་དུ་ཀྲུའུ་ཝེ་ཆོན་ནས་འཛེམས་ཟོན་ཅི་ཡང་མེད་པར་༼གུང་ཁྲན་ཏང་དང་ནུས་ལྡན་ཚན་ཁག་ཚོས་མཉམ་རུབ་ཀྱི་རྐྱེན་པས། རྩ་ཁྲིམས་ནང་འཁོད་པའི་མི་རིགས་རང་སྐྱོང་གི་དབང་ཚད་འདི་ཉིད་ལག་བསྟར་དང་མངོན་འགྱུར་བྱུང་མེད༽་ཅེས་ཡོངས་བསྒྲགས་བྱས་ཡོད།
ང་ཚོའི་བཙན་བྱོལ་བོད་གཞུང་གིས་རྩོད་ལེན་བྱེད་བཞིན་པའི་རྒྱ་ནག་གི་རྩ་ཁྲིམས་དབང་ཚད་དེ་ལ་གུང་ཁྲན་ཏང་དང་ནུས་ལྡན་ཚན་ཁག་ཚོས་༼ཚན་ཁག་འདིའི་འཐབ་ཕྱོགས་གཅིག་གྱུར་དང་གཞན་སུ་ཡོད་མེད་གསལ་མི་འདུག་༽ནས་འབད་བརྩོན་ལ་བརྟེན་ནས་མངོན་འགྱུར་བྱུང་མེད་པའི་རྒྱུ་མཚན་གསལ་སྟོན་བྱས་འདུག དབུ་མའི་ལམ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྒྲོམ་གཞིའི་ནང་ཁྲིམས་མཐུན་གྱི་ཐོབ་ཐང་ཡོད་པའི་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་གནས་བབ་ཚད་ལྡན་མིང་དོན་མཚུངས་པ་ཞིག་དགོས་པ་དེ་ཡིན་པས་ད་ལྟ་སྨྱོ་ཧམ་ཆེ་བའི་རྒྱ་དམར་གཞུང་གིས་མི་ལོ་དྲུག་ཅུ་ལྷག་རིང་རྩ་འཛིན་བྱས་པའི་རྩ་ཁྲིམས་ལ་སྐྱོན་ཆ་ཡོད་པར་ཁས་ལེན་དགོས་བྱུང་འདུག་ལ། ཁས་ལེན་དེ་ཡང་བཟང་ཕྱོགས་ཀྱི་ཁས་ལེན་ཞིག་མ་ཡིན་པར་མི་རིགས་ཀྱི་ཐོབ་ཐང་རྩོད་མཁན་ལ་ཆེད་དུ་ཁ་གཏད་གཅོག་ཆེད་རྩ་ཁྲིམས་ནང་འཁོད་པའི་ཐོབ་ཐང་ཚང་མ་ནག་གསུབ་གཏོང་འཆར་ཞིག་ཡིན།
ཀྲུའུ་ཝེ་ཆོན་ནས་བསམ་ཚུལ་དེ་འདྲ་ཞིག་འདོན་པའི་དམིགས་ཡུལ་གཙོ་བོ་མི་རིགས་མཐུན་སྒྲིལ་དང་བརྟན་བརླིང་སྲུང་སྐྱོབ། རྒྱལ་ཁབ་གཅིག་གྱུར་སྲ་བརྟན་ཆེད་ཡིན་པར་བརྗོདཡོད་མོད། གོང་དུ་དྲངས་པའི་༼གུང་ཁྲན་ཏང་དང་ནུས་ལྡན་ཚན་ཁག་ཚོས་མཉམ་རུབ་ཀྱི་རྐྱེན་པས། རྩ་ཁྲིམས་ནང་འཁོད་པའི་མི་རིགས་རང་སྐྱོང་གི་དབང་ཚད་འདི་ཉིད་ལག་བསྟར་དང་མངོན་འགྱུར་བྱུང་མེད།༽ཚིག་དེ་ལས་གུང་ཁྲན་ཏང་ནས་རྩ་ཁྲིམས་ནང་འཁོད་པའི་དབང་ཚད་དང་ཐོབ་ཐང་མངོན་འགྱུར་བྱུང་བཅུག་མེད་པ་ཁས་ལེན་བྱས་པ་འདི་ལ་ཀྲུའུ་ཝེན་ཆོན་གྱིས་ལན་འདེབས་ཇི་ལྟར་བྱ། ཚིག་དེ་ལས་གུང་ཁྲན་ཏང་དང་ཚན་ཁག་ཁ་ཤས་ཀྱིས་རྩ་ཁྲིམས་རྩིས་མེད་བྱས་པ་གསལ་བོར་བརྗོད་འདུག་སྟབས། རྒྱལ་ཁབ་ཀྱི་རྩ་ཁྲིམས་རྩིས་མེད་གཏོང་མཁན་ཞིག་ལ་མི་རིགས་མཐུན་སྒྲིལ་དང་བརྟན་རླིང་སྲུང་སྐྱོབ་སོགས་བརྗོད་པའི་དབང་ཆ་ག་ལ་ཡོད། མདོར་བསྡུས་ན། ཀྲུའུ་ཝེ་ཆོན་གྱི་རྩོམ་ཡིག་ནང་བརྗོད་པའི་གུང་ཁྲན་ཏང་དང་ཚན་ཁག་དེ་ཚོ་རྒྱ་ནག་མི་དམངས་ཀྱི་དགྲ་བོ་ངོ་མ་དེ་རེད། གང་ཡིན་ཟེར་ན་ཁོ་ཚོས་རྩ་ཁྲིམས་རྩིས་མེད་གཏོང་བ་དང་། རྩ་ཁྲིམས་ཀྱི་ཞན་ཆ་དེས་ཁོང་ཚོའི་འདོད་དོན་འགྲུབ་མི་སྲིད་པའི་སེམས་འཁྲལ་བྱེད་ཀྱི་ཡོད་པ་དེ་རེད།
ཕྱི་ལོ་ ༢༠༡༢ ཟླ་ ༣ ཚེས་ ༥ ཉིན་ཨོ་སི་ཊི་ལི་ཡ་ནས་སྤེལ།
