བཙུན་མའི་ནུས་སྟོབས་གོང་སྤེལ་དུ་གཏོང་དགོས་ཀྱི་འདུག

དེ་རིང་གཟའ་མིག་དམར་ཉིན་ངྷ་སྟེང་བོད་ཁྱིམ་སློབ་གྲྭའི་ཞི་བདེ་གླེང་མོལ་ཁང་དུ་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག བདུན་གཅིག་རིང་བཙུན་མའི་ནུས་སྟོབས་གོང་སྤེལ་གྱི་ཟབ་སྦྱོང་མཇུག་སྡོམ་དང་འབྲེལ། གདན་ཞུའི་སྐུ་མགྲོན་ཁག་ཅིག་གིས་གཏམ་བཤད་དང་དྲི་བ་དྲིས་ལན་གནང་སོང་།

དེ་རིང་སྔ་དྲོའི་ཆུ་ཆོས་ ༡༠།༣༠ སྟེང་ངྷ་སྟེང་བོད་ཁྱིམ་སློབ་གྲྭའི་ཞི་བདེ་གླེང་མོལ་ཁང་དུ་དབུས་བོད་ཀྱི་དབུ་མེད་ལྷན་ཚོགས་ཀྱི་གོ་སྒྲིག་འོག བདུན་ཕྲག་གཅིག་རིང་གི་༼བཙུན་མའི་ནུས་སྟོབས་གོང་སྤེལ་གྱི་ལོ་འཁོར་ཟབ་སྦྱོང་ཐེངས་བཞི་བ། ༽ཞེས་ཟབ་སྦྱོང་མཇུག་སྡོམ་གྱི་མཛད་སྒོ་བསྟུན་ཏེ་བགྲོ་གླེང་ཞིག་ཚོགས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་དང་། ཆོས་རིག་དྲུང་ཆེ་ངག་དབང་ཆོས་འབྱོར། བོད་ཀྱི་བཙུན་མའི་ལས་འཆར་གྱི་འགན་འཛིན་གཞོན་པ་ཨ་ནེ་བློ་བཟང་བདེ་ཆེན་བཅས་ཕེབས་འདུག གཞན། བོད་ཁྱིམ་སློབ་གྲྭའི་སྤྱི་ཁྱབ་འགན་འཛིན་ཚེ་དབང་ཡེ་ཤེས་གཙོས་པའི་ལས་བྱེད་ཁག་གཅིག་དང་། བཞུགས་སྒར་ཁུལ་གྱི་གཞུང་འབྲེལ་མིན་པའི་ཚོགས་པ་ཁག་ཅིག་གི་སྐུ་ཚབ་བཅས་ཀྱང་མཉམ་ཞུགས་གནང་འདུག  

མཛད་སྒོའི་ཐོག་མར་དབུས་བུད་མེད་ལྷན་ཚོགས་ཀྱི་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་ཀྱིས་ཟབ་སྦྱོང་གི་དགོས་པ་དམིགས་ཡུལ་ངོ་སྤྲོད་བྱས་པ་ལྟར་ན། བོད་ཀྱི་བུད་མེད་ལྷན་ཚོགས་ཀྱིས་ལོ་ལྟར་བཙན་བྱོལ་ནང་གི་བུད་མེད་ཀྱི་ནུས་སྟོབས་གོང་འཕེལ་གཏོང་ཕྱོགས་ཐད་ཟབ་སྦྱོང་སྤྲོད་བཞིན་ཡོད་པ་དང་། ལོ་འགའི་གོང་ནས་བཙུན་མ་ཚོར་ཡང་ནུས་སྟོབས་གོང་འཕེལ་གཏོང་ཕྱོགས་ཀྱི་ཟབ་སྦྱོང་ཞིག་མགོ་འཛུགས་ཀྱིས་ད་ལོ་བཙུན་མའི་ནུས་སྟོབས་གོང་སྤེལ་གྱི་ཟབ་སྦྱོང་ཐེངས་ ༤ དེ་ཆགས་ཡོད་འདུག ཁོང་གིས་ཟབ་སྦྱོང་སྤྲོད་དགོས་པའི་རྒྱུ་མཚན་སྐོར་ནས་ “བོད་རིགས་བུད་མེད་ཚོར་ལས་དོན་གང་ཡང་བསྒྲུབ་ཐུབ་པའི་ནུས་པ་ཡོད་ཀྱང་། གདེང་སྤོབས་མེད་པ་མ་ཟད། ཁྱིམ་ལས་ཙག་ཙིག་རིགས་ནི་བུད་མེད་ཀྱི་འགན་འཁྲི་ཡིན་ཤག་ཅིག་ལ་བུད་མེད་ཚོ་རང་ངོས་ནས་ཀྱང་ངོས་འཛིན་བྱེད་ཀྱི་ཡོད་སྟབས། ཟབ་སྦྱོང་གང་མང་སྤྲད་དེ་ཁོང་ཚོར་སོ་སོའི་འཇོན་ཐང་ངོས་འཛིན་ཐུབ་པ་དང་། ལས་དོན་གང་ལ་ཡང་འཇུག་ཐུབ་པའི་བློ་སྟོབས་བསྐྲུན་དགོས་ཀྱི་འདུག ” ཅེས་དང་། ཟབ་སྦྱོང་ནང་ཞུགས་མཁན་དག་གིས་ཐུབ་ན་མ་འོངས་པར་ཟབ་སྦྱོང་གི་ལེགས་ཆ་བླངས་ཏེ་ཁྱོན་ཡོངས་ནས་སྤྱི་ཚོགས་ཀྱི་འགན་འཁུར་ཐུབ་རྒྱུ་དང་། དེ་ལྟར་མ་བྱུང་ཡང་ཟབ་སྦྱོང་དུ་ཡོང་མཁན་ཚོས་རྗེས་ཕྱོགས་ཕན་ཚུན་ལ་འབྲེལ་བ་བཟུང་སྟེ། ཁ་འཐོར་དུ་ཡོད་པའི་བཙུན་མ་རྣམས་ཀྱི་འབྲེལ་ལམ་ཇེ་ལེགས་སུ་གཏོང་དགོས་པའི་འབོད་སྐུལ་བཅས་གནང་སོང་།

དེའི་རྗེས་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་བོད་མི་ཞིག་ཏུ་སྐྱེས་པའི་རྗེས་ནས་ཆོས་སྲིད་ཟུང་འབྲེལ་གྱི་ངོ་བོར་རང་བཞིན་གྱིས་གྲུབ་ཡོད་པ་ཞིག་དང་། ཁོང་རང་ཉིད་ལ་མཚོན་ན་གྲྭ་བ་ཞིག་ཡིན་ཡང་། དེང་སྐབས་བོད་ནང་གི་ཛ་དྲག་གནས་བབ་འདི་འདྲའི་འོག ཞོགས་པ་སྔ་པོ་ཡར་ལངས་པ་དང་མཉམ་དུ་དྲ་ཚིགས་སོགས་སྔོག་གི་ཡོད་པ་ལས་ཞལ་འདོན་དགེ་སྦྱོར་གང་ཡང་བྱེད་ཀྱི་མེད་པ་དང་། དེ་ནི་བོད་ནང་དང་རྒྱལ་སྤྱིའི་ནང་བཅས་ཀྱི་གནས་ཚུལ་ཤེས་རྟོགས་བྱ་ཆེད་ཡིན་སྐོར་བརྗོད་སོང་། བོད་དོན་ལ་འགན་འཁུར་ཕྱོགས་ཐད་ནས་གཞན་ལ་འཛུབ་མོ་འཛུགས་རྒྱུ་དང་། སྐད་ཆ་ཤོད་སྡོད་རྒྱུ་ཙམ་མིན་པར་སྤྱི་ཚོགས་ཀྱི་ཕྱོགས་ངོས་གང་ཞིག་ནས་སོ་སོའི་འཇོན་ཐང་ལ་དཔག་པའི་ཁ་ཡོད་ལག་ཡོད་ཀྱི་ནུས་པ་འདོན་རྒྱུ་དང་། ནུས་པ་དེ་ཡང་ལག་ལེན་སྟེང་འགྲོ་ཐུབ་པ་ཞིག་བྱ་དགོས་པ། ད་སྔ་བོད་ཕྱི་ནང་གཉིས་སུ་བཙུན་མ་ཚོས་རང་ཚོད་ལ་དཔག་པའི་ཆབ་སྲིད་ཐད་འགན་གང་འཚམ་འཁུར་ཡོད་པ་དང་། ད་དུང་མུ་མཐུད་འགན་འཁུར་གྱི་ནུས་པ་རྒྱ་ཆེ་རུ་གཏོང་དགོས་པའི་སྐུལ་མ་གནང་སོང་།

བཙུན་མ་ཚོས་སོ་སོའི་ནུས་པ་བོད་དང་འཛམ་གླིང་སྤྱི་ཚོགས་ནང་གདེང་འཇོག་སླེབས་ཐུབ་པ་ཞིག་བྱ་དགོས་པའི་ཐད་ཆོས་རིག་དྲུང་ཆེ་ངག་དབང་ཆོས་འབྱོར་ལགས་ཀྱིས་གསུངས་པ་ལྟར་ན། བུད་མེད་ནི་ཕྲུ་གུ་སྐྱེས་པ་ཙམ་མ་ཟད་བུ་ཕྲུག་གསོ་སྐྱོང་། དེ་བཞིན་ཁྱིམ་ཚང་སྐྱོང་རྒྱུ་དང་ཁྱིམ་མཚེས་བར་གྱི་འགྲིག་མཐུན་སོགས་ཀྱི་ཐད་སྐྱེས་པ་ཕོ་ལས་ནུས་པ་ཆེར་འདོན་ཀྱི་ཡོད་པ་དང་། བུད་མེད་ནི་འཛམ་གླེང་ལ་ཁ་ལོ་སྒྱུར་མཁན་ཞིག་ཡིན་པ་ལྟར། བཙུན་མ་ཚོར་བུ་སྐྱེས་ཁྱིམ་གསོ་བྱ་བའི་འགན་དེ་མེད་ཀྱང་། བུད་མེད་ཀྱི་ནུས་པ་དེ་དག་གཅིག་མཚུངས་སུ་ཡོད་སྟབས། དེང་ཕྱིན་བཙུན་དགོན་དག་གིས་རྒྱ་གར་དང་རྒྱལ་སྤྱིའི་བུད་མེད་ཚོགས་པ་དག་ལ་འབྲེལ་ལམ་བཟུང་སྟེ། བོད་དང་འཛམ་གླིང་གི་བུད་མེད་ཚོར་ཕན་ནུས་ལྡན་པའི་ཞབས་འདེགས་བསྒྲུབ་རྒྱུར་བསམ་བློ་གཏོང་དགོས་སྐོར་དང་། བོད་མིའི་སྤྱི་ཚོགས་ནང་ཨ་མ་མང་པོ་ཞིག་གིས་སོ་སོའི་འགན་ནི། ཕྲུ་གུ་སྐྱེས་རྒྱུ་དང་ཁོང་ཚོར་ཟ་འཐུང་སྤྲོད་རྒྱུ་ཙམ་ལས་བདག་པོ་ཡག་པོ་རྒྱག་གི་མེད་པའི་གནས་ཚུལ་བྱུང་དང་འབྱུང་མུས་ཡིན་སྟབས། བཙུན་མ་ཚོས་བོད་པའི་སྤྱི་ཚོགས་ཁྲོད་དུ་ཨ་མ་ཞིག་ཡིན་ན་ཕྲུ་གུ་སྐྱེས་རྒྱུ་ལས་ལྷག་པའི་འགན་ཞིག་ཡོད་པ་ནི། ཕྲུ་གུའི་ཕྱི་ནང་གི་འཚར་ལོངས་དང་འབྲེལ་བའི་གསོ་སྐྱོང་སློབ་གསོ་སྤྲོད་རྒྱུར་ནུས་པ་འདོན་དགོས་པའི་རེ་སྐུལ་དང་སྦྲགས། ཁོང་གིས་ “ང་རང་ཉིད་ལའང་མཐོང་ཐོས་ཀྱི་ཉམས་མྱོང་ཡོད། བོད་པའི་ཨ་ནེ་རེ་ཟུང་གིས་ཞབས་འདྲེན་གྱི་བྱ་སྤྱོད་དེ་འདྲ་ཡོང་གི་འདུག དེ་འདྲ་མ་གནང་རོགས། བྱུང་ན་ཨ་ནེ་གཙང་མ་ཞིག་དང་མི་ཡོང་ན། གྲྭ་ཆས་ཕུད་རོགས། སྐྱ་མིན་སེར་མིན་གྱིས་ཞབས་འདྲེན་མ་ཞུ་རོགས་ ”ཞེས་ཀྱང་བརྗོད་སོང་།

མཐར་བོད་ཀྱི་བཙུན་མའི་ལས་འཆར་འགན་འཛིན་གཞོན་པ་ཨ་ནེ་བློ་བཟང་བདེ་ཆེན་ལགས་ཀྱིས་བོད་སྤྱི་ཚོགས་ནི་སྐྱེས་པ་དང་སྐྱེས་མ། གྲྭ་བ་དང་བཙུན་མ་བཅས་སྡེ་ཚན་བཞི་ཡིས་གྲུབ་ཡོད་སྟབས། ཁྱོན་ཡོངས་ནས་ཡར་རྒྱས་སུ་འགྲོ་དགོས་པར་ཟུར་བཞིའི་ནང་གི་ཟུར་གཅིག་སྟེ། བཙུན་མའི་ཟུར་ངོས་དེ་ཡར་འགྲོ་ཆོག་པ་ལ་ཨང་བསམ་པ་ཞིག་ད་ལྟའི་ཆར་ཆགས་ཡོད་པ་དང་། དེ་ལ་སྤྱི་ཚོགས་ཕྱོགས་ཡོངས་ནས་གོ་སྐབས་སྐྲུན་བཞིན་པའི་སྐབས། བཙུན་མ་ཚོས་གོ་སྐབས་དམ་འཛིན་ཐོག་ཡར་རྒྱས་འགྲོ་ཐུབ་པ་བྱ་རྒྱུ་དང་། ད་ལྟའི་མི་རབས་འདིས་ལས་ཀ་ཡག་པོ་ཞིག་བྱ་མ་ཐུབ་ན་རྗེས་མ་ད་ལྟའི་བཙུན་མ་ཚོས་མ་འཇོག་པའི་ལོ་རྒྱུས་ཀྱི་ནག་ཉེས་ཕོག་ཡོང་གི་ཡོད་སྐོར་བརྗོད་སོང་། དེ་བཞིན་ད་ལྟའི་ཆར་བཙུན་མའི་བཀའ་བློན་དང་སྤྱི་འཐུས་མེད་པ་དེར་གོ་སྐབས་མེད་པས་ལན་པ་ཞིག་མིན་པར་ནུས་པས་མ་འདང་བ་ཞིག་ཡིན་ཚུལ་བརྗོད་བྱུང་།

མཇུག་ཏུ་གསར་འགོད་པས་ཟབ་ལ་ཞུགས་མཁན་བཙུན་དགོན་འཇམ་དབྱངས་ཆོས་གླིང་གི་བཙུན་མ་ཉི་མ་ལྷ་མོར་ཐེངས་འདིའི་ཟབ་སྦྱོང་གི་དགེ་སྐྱོན་སྐོར་དྲིས་པར། ཁོང་མོས། གཅིག་ནས་ཟབ་སྦྱོང་སྤྲོད་མཁན་ཚོར་ཉམས་མྱོང་གཏིང་ཟབ་ཡོད་མཁན་རྐྱང་ཡིན་པ་དང་། གཉིས་ནས་ཟབ་སྦྱོང་སྐབས་སོ་སོའི་ནུས་པ་མངོན་འགྱུར་ཡོང་ཐབས་དང་། མང་ཚོགས་མདུན་དུ་སྐད་ཆ་བཤད་ཐུབ་པ། དེ་བཞིན་ལུས་རྩལ་སྦྱོང་བརྡར་སོགས་ཕྱོགས་ཡོངས་ནས་སྦྱོང་བརྡར་ཡག་པོ་སྤྲད་ཐོབ་ཡོད་པ་དང་། གོ་སྐབས་འདི་རྒྱུད་བཙུན་དགོན་གཞན་དག་ནས་ཕེབས་པའི་བཙུན་མ་མང་པོ་ཞིག་ཕན་ཚུན་ངོ་ཤེས་དང་འབྲེལ་ལམ་ལེགས་པོ་བྱུང་སྐོར་བརྗོད་སོང་།

ཐེངས་འདིའི་བཙུན་མའི་ཟབ་སྦྱོང་དེར་རྒྱ་གར་དང་བལ་ཡུལ་གྱི་བཙུན་དགོན་ ༨ ནས་བཙུན་མ་ ༡༧ ཙམ་མཉམ་ཞུགས་གནང་ཡོད་འདུག

གསར་འགོད་པ། བནྡེ་སྐྱབས།