ཟླ་རྗེས་མའི་ཕྱི་ཚེས་ ༡༤ ནས་ ༢༠ བར་ཉི་ཧོང་རྒྱལ་ས་ཌོ་ཁའོ་ནང་འཛམ་གླིང་ཡུ་གུར་འཐུས་ཚབ་ཚོགས་པའི་ཚོགས་ཆེན་ཐེངས་བཞི་པ་འཚོགས་རྒྱུ་ཡིན་འདུག
འདི་ལོའི་ཕྱི་ཟླ་ ༥ ཚེས་ ༡༤ ནས་ ༢༠ བར་ཉི་ཧོང་རྒྱལ་ས་ཌོ་ཁའོ་ནང་འཛམ་གླིང་ཡུ་གུར་འཐུས་ཚབ་ཚོགས་པའི་ཚོགས་ཆེན་ཐེངས་བཞི་པ་ཚོགས་གཏན་ཁེལ་ཡོད་པ་དང་། ཚོགས་འདུའི་སྟེང་ཨ་རི་དང་འཇར་མན། ཨོ་སི་ཌོ་ལི་ཡ། བྷེལ་ཇམ། ཁ་ན་ཌ། ཌན་མཱར་ཁི། ཧྥ་རན་སི། ཧོ་ལན་ཌི། ནོར་ཝེ། སི་ཝེ་ཌེན། ཋོར་ཁའེ་སོགས་འཛམ་གླིང་རྒྱལ་ཁབ་སོ་སོའི་ནང་ཡོད་པའི་འཛམ་གླིང་ཡུ་གུར་མཐུན་ཚོགས་ཀྱི་འཐུས་མི་བརྒྱ་ལྷག་མཉམ་ཞུགས་གནང་བཞིན་པ་མ་ཟད། ཡུ་གུར་མི་རིགས་ཀྱི་འཐབ་རྩོད་ལ་རྒྱབ་སྐྱོར་གནང་མཁན་གྱི་འཛམ་གླིང་རྒྱལ་ཁབ་དག་གི་གྲོས་ཚོགས་འཐུས་མི་དང་། ཉམས་ཞིབ་པ་རྣམས་ཀྱང་གདན་ཞུ་གནང་ཡོད་པ་རེད། ཚོགས་འདུའི་སྐབས་སུ་ཡུ་གུར་མི་རིགས་ཀྱི་སྲོལ་རྒྱུན་སྒྱུ་རྩལ་བྱ་འགུལ་དང་། གསར་འགོད་ལྷན་ཚོགས། གླེང་མོལ་འབྲེལ་འདྲིས་བྱ་འགུལ་སོགས་རྣམ་གྲངས་སྣ་ཚོགས་སྤེལ་འཆར་ཡོད་འདུག
ཟླ་འདིའི་ཕྱི་ཚེས་ ༢ ཉིན་ཉི་ཧོང་གནས་སྡོད་འཛམ་གླིང་ཡུ་གུར་མཐུན་ཚོགས་ཀྱི་ཚོགས་གཙོ་དང་འཛམ་གླིང་ཡུ་གུར་འཐུས་ཚབ་ཚོགས་པའི་མགྲིན་ཚབ་པ་ཡུས་ལིས་ཧཱ་མའུ་ལགས་ཀྱིས་གསར་ལམ་ཁག་ཏུ། “ཐེངས་འདིའི་ཚོགས་ཆེན་གྱི་གོ་སྒྲིག་ལས་དོན་ཐད་ཉི་ཧོང་འབྲེལ་ཡོད་སྡེ་ཁག་དང་ཉི་ཧོང་གྲོས་ཚོགས་འཐུས་མི་མང་པོས་རྒྱབ་སྐྱོར་ཤུགས་ཆེན་པོ་གནང་སོང་། ཚོགས་འདིའི་སྟེང་གཙོ་བོ་ཡུ་གུར་མི་རིགས་ཀྱི་མ་འོངས་པའི་རང་དབང་འཐབ་རྩོད་ལས་འགུལ་གྱི་ཁ་ཕྱོགས་དང་དམིགས་ཡུལ་གཏན་འབེབས་དང་། ཚོགས་འདུ་བརྒྱུད་ཡུ་གུར་མི་རིགས་ཀྱི་ལས་འགུལ་ལ་གོམས་ཁ་གསར་བ་དབུ་འཛུགས་ཐུབ་པའི་རེ་བ་བཅངས་ཀྱི་ཡོད་ལ། འཛམ་གླིང་ཡུ་གུར་འཐུས་ཚབ་ཚོགས་པའི་ཚོགས་ཆེན་ཐེངས་བཞིར་མཇུག་འབྲས་ལེགས་པོ་ཞིག་ཐོབ་རྒྱུར་ང་ཚོར་ཡིད་ཆེས་ཡོད།” ཅེས་བརྗོད་འདུག
ཕྱི་ཚེས་ ༣ ཉིན་ཉི་ཧོང་གྲོས་ཚོགས་ཀྱི་ཁྲིམས་སྲིད་རྗེས་དྲན་ཚོགས་ཁང་ནང་། བཙན་བྱོལ་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་ཐོག་མར་ཉི་ཧོང་ནང་སླེབས་པའི་མགྲོན་བསུ་དང་གཏམ་གླེང་ཚོགས་འདུ་ཞིག་གོ་སྒྲིག་གནང་ཡོད་པ་ལྟར། འཛམ་གླིང་ཡུ་གུར་འཐུས་ཚབ་ཚོགས་པའི་དྲུང་ཆེ་ཏའོ་ལིས་ཁོན་ཝེ་ཧྲ་ལགས་ཀྱང་སྐུ་མགྲོན་པོའི་ཁྲོད་མཉམ་ཞུགས་གནང་ཡོད་པ་རེད།
འཛམ་གླིང་ཡུ་གུར་འཐུས་ཚབ་ཚོགས་པ་ནི་ཕྱི་ལོ་ ༢༠༠༤ ལོར་འཇར་མན་དུ་གསར་འཛུགས་གནང་པ་དང་། ༢༠༠༦ ལོར་འཇར་མན་དུ་ཚོགས་པའི་ཚོགས་ཆེན་ཐེངས་གཉིས་པ་དང་། ༢༠༠༩ ལོར་ཨ་རིའི་རྒྱལ་ས་ཝ་ཤིན་ཊོན་དུ་ཚོགས་པའི་ཚོགས་ཆེན་ཐེངས་གསུམ་པ་བཅས་སོ་སོར་ཡུ་གུར་རང་དབང་འཐབ་རྩོད་པ་ལྕམ་རེ་བྷེ་ཡ་ལགས་ཚོགས་པའི་ཚོགས་གཙོར་བདམས་ཐོན་བྱུང་ཡོད་པ་རེད།
འཛམ་གླིང་ཡུ་གུར་འཐུས་ཚབ་ཚོགས་པའི་རྟེན་གཞི་གཙོ་བོ་འཇར་མན་དུ་ཡོད་པ་དང་། འཛམ་གླིང་རྒྱལ་ཁབ་ ༢༢ ནང་ཡན་ལག་མཐུན་ཚོགས་བཙུགས་ཡོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཡུ་བོད་སོག་གསུམ་གྱི་ཚོགས་ཆེན་འཚོགས་ཡ་དུས་ཚོད་རན་མི་འདུག་གམ། ཡུ་བོད་སོག་གསུམ་མཐུན་ལམ་ཡུན་བརྟན་ཤོག །
ཟླ་བས་རྒྱལ་བོ་དང་། སྐར་མས་འབངས་མི་མཚོན་གྱི་ཡོད་དང་། ད་དུང་སྤྲིན་གྱི་སྒྲིབ་གཡོག་མེད་པར་ནམ་མཁའ་སྔོ་བསང་དུ་རྒྱུ་བ་ནི། ཕུགས་རྒྱང་རིང་བོའི་མདུན་ལམ་དང་། དྭངས་ཤིང་གཙང་བའི་བསམ་བློ་མཚོན་གྱི་ཡོད་འདྲ།