དང་པོ། མེར་སྲེག་ལས་འགུལ་དེའི་དམིགས་ཡུལ་ལ་ལྟ་བ།
ཕྱི་ལོ་ ༡༩༩༨ ལོར་རྒྱལ་གཅེས་དཔའ་བོ་ཐུབ་བསྟན་དངོས་གྲུབ་དང། ཕྱི་ལོ་༢༠༠༩ ལོར་རྒྱལ་གཅེས་དཔའ་བོ་བཀྲ་བྷེ་གཉིས་ཀྱིས་རིམ་པས་མགོ་བརྩམས་ཏེ་རང་ལུས་མེ་སྲེག་བཏང་བ་ནས་དེ་རིང་གི་བར་བོད་ཕྱི་ནང་གཉིས་གར་རང་ལུས་མེ་སྲེག་གཏོང་མཁན་སུམ་ཅུ་སོ་བརྒྱད་ཙམ་བྱུང་ཡོད། རང་ལུས་མེ་སྲེག་གཏོང་མཁན་དེ་དག་རེ་རེའི་མི་ཚེའི་ལོ་རྒྱུས་ལ་ཞིབ་འཇུག་བྱོས་དང་རང་སྒེར་གྱི་གནད་དོན་ཆུང་ཙག་ཅིག་གི་ཆེད་དུ་རང་ལུས་མེ་སྲེག་བཏང་པ་མ་ཡིན་པར་བོད་མི་རིགས་རིག་གཞུང་དང་བཅས་པ་ཙམ་དུ་མ་ཟད། རྡུང་རྡེག་དྲག་གནོན་འོག་ན་ཡོད་པའི་ཉམ་ཆུང་ས་ཡ་མང་པོའི་བདེ་དོན་དང། རེ་འདུན་ལ་དམིགས་ནས་རང་ལུས་ཞུགས་འབུལ་གནང་ཡོད་པ། ཁོང་ཚོའི་རེ་འདུན་གྱི་འབོད་སྒྲ་དང་ཤུལ་བཞག་གི་ཞལ་ཆེམས་ལས་རྟོགས་ཐུབ། རང་ལུས་མེར་སྲེག་གཏོང་མཁན་ཕལ་མོ་ཆེར་རྒྱ་བོད་ཞི་འགྲིག་ཡོང་ཐབས་ཀྱི་དམིགས་ཡུལ་ལས་ཁ་བྲལ་གཏོང་འདོད་ཀྱི་དམིགས་ཡུལ་གང་ཡང་མེད།
ཁོང་ཚོའི་རེ་འདུན་ནི། རྒྱལ་བསྟན་ཡོངས་ཀྱི་མངའ་བདག་བོད་རྒྱ་ཞི་འགྲིག་གི་གཞི་རྩ་༸གོང་ས་སྐྱབས་མགོན་རིན་པོ་ཆེ་བོད་ལ་ཞབས་ཟུང་གསེར་གྱི་འཁོར་ལོ་མངོན་པར་བསྒྱུར་གནང་ཡོང་པ་དང་། བདེ་སྐྱིད་ཀུན་གྱི་རྩ་བ་རང་དབང་དགོས་པ། མི་རིག་ཞིག་གི་བླ་སྲོག་ལྟ་བུའི་རིག་གཞུང་སྲུང་སྐྱོབས་དགོས་པ་བཅས་ཡིན་ཞིང་། དེ་ཡང་ཆགས་སྡང་རགས་པའི་དབང་གིས་ཚོར་བ་གློ་བུར་བའི་རྗེས་སུ་འབྲང་པ་མ་ཡིན་པར་རྣམ་དཔྱོད་དང་བྱམས་བརྩེ་ཟུང་དུ་འབྲེལ་པའི་འཐབ་རྩོད་ཅིག་ཡིན་པ་ཕྱི་ཟླ་ ༣ ཚེས་ ༡༤ ཉིན་མདོ་སྨད་རེབ་གོང་ནས་དགེ་འདུན་པ་ཞིག་གིས་རང་ལུས་ཞུགས་འབུལ་གྱི་འཐབ་རྩོད་གཅིག་བུའི་སྟེང་ནས་མཚོན་ཐུབ། དེ་ཡང་དམ་པ་དེས་ཞུགས་འབུལ་གནང་སྟེ་ལྔ་ལམ་དུ་ཕྱོགས་པའི་སྐབས་དེར། དེས་ན་རྗེ་བཙུན་བླ་མ་ཐུགས་རྗེ་ཅན།། མ་གྱུར་འགྲོ་བའི་སྡིག་སྒྲིབ་སྡུག་བསྔལ་ཀུན།། མ་ལུས་ད་ལྟ་བདག་ལ་སྨིན་པ་དང།། བདག་གི་བདེ་དགེ་གཞན་ལ་བཏང་བ་ཡིས།། འགྲོ་ཀུན་བདེ་དང་ལྡན་པར་བྱིན་གྱིས་རློབས།། ཞེས་གསུངས་ཏེ་དགོངས་པ་རྫོགས་ཡོད། དམ་པ་དེ་ལྟ་བུ་ལ་ཆབ་སྲིད་ཀྱི་དམིགས་ཡུལ་གང་ཡང་མེད། དམིགས་ཡུལ་གཅིག་ཡོད་པ་ནི། བོད་མི་ཤི་གསོན་ཚང་མའི་སེམས་ཁོངས་ན་ལྷན་སྐྱེས་སུ་གྲུབ་པའི་༸གོང་ས་མཆོག་གི་ཞལ་མཇལ་གསུང་ཐོས་ཀྱི་མིག་ཟུང་གྱེར་བཞིན་པའི་རེ་འདུན་མངོན་འགྱུར་ཡོང་ཐུབ་བྱ་རྒྱུ་དང་། འཛམ་གླིང་ཡོངས་ལ་ཕན་བདེ་བླ་ལྷག་སྟེར་ཐུབ་པའི་རྩ་ཆེའི་རིག་གཞུང་གི་བདག་པོར་གྱུར་བའི་བོད་མི་རིགས་དང། ཡ་ངའི་མནར་གཅོད་འོག་ན་ཡོད་པའི་སྐྱེ་འགྲོ་ཀུན་གྱི་བདེ་སྡུག་གི་ཆེད་དུ་རང་ལུས་མེར་བསྲེགས་བཏང་ཡོད་པ་གོང་འཁོད་ཀྱི་གསོལ་འདེབས་སྨོན་ཚིག་དེའི་སྟེང་ནས་ཤེས་ཐུབ།
གཉིས་པ། མེར་སྲེག་ལས་འགུལ་དེའི་ངོ་བོ་ལ་ལྟ་བ།
སྒེར་སེམས་སྤུ་ཙམ་མེད་པར་འཚེ་མེད་ཞི་བའི་སྒོ་ནས་རང་ལུས་ཞུགས་འབུལ་གནང་བ་དེ་དེང་སྐབས་རྒྱལ་སྤྱིའི་ཐོག་འཚེ་མེད་ཞི་བའི་འཐབ་རྩོད་ཚད་གཞི་མཐོ་ཤོས་ཤིག་ལ་ངོས་འཛིན་ཞུ་བཞིན་ཡོད། འོན་ཀྱང་རྒྱ་དམར་སྲིད་གཞུང་གི་མགོ་ཁྲིད་ཚོས་དོན་རྐྱེན་དེ་དག་གི་འབྱུང་རྩ་ལ་བསམ་གཞིགས་གཏོང་རྒྱུ་ཕར་བཞག ད་དུང་དོན་རྐྱེན་དེ་དག་གི་རྒྱུ་རྐྱེན་ལས་གཡོལ་ཐབས་སུ་བརྒྱུད་ལམ་འདྲ་མིན་ནང་བཅའ་ཁྲིམས་ཀྱི་རྡུང་རྡེག་གཏོང་ཡུལ་ཡིན་ཚུལ་བརྗོད་དེ་འཇིགས་སྐུལ་བྱེད་བཞིན་ཡོད་པ་མ་ཟད། ད་དུང་ཕྱི་ཕྱོགས་ནས་བརྒྱུད་སྐུལ་བྱས་ཚུལ་གྱི་ཧམ་རྫུན་ཆེན་པོ་མངོན་སུམ་འཛེམས་མེད་ཀྱིས་སྒྲོག་བཞིན་པ་དང། བོད་མི་རིགས་དང་བོད་བརྒྱུད་ནང་བསྟན་ལ་ཤ་ཞེན་ཡོད་མདོག་དང་ཡར་རྒྱས་བཏང་རབས་ཀྱི་ཟོལ་རྫུན་དྲིལ་བསྒྲགས་ཏེ་རྒྱལ་སྤྱིའི་མི་མང་མགོ་སྐོར་བསླུ་བྲིད་གཏོང་ཐབས་བྱེད་བཞིན་ཡོད། བྱ་སྤྱོད་དེ་དག་ནི་རྒྱལ་སྤྱིའི་མིག་མདུན་དུ་ནག་ཉེས་འགེབ་སྲུང་གི་རང་བཞིན་ལྡན་པ་དང་། ཟོལ་རྫུན་ཧམ་བཤད་ཀྱི་རང་བཞིན་ལྡན་པ། ངོ་ཚ་ཁྲེལ་མེད་གྱི་རང་བཞིན་ལྡན་པའི་རྒྱུན་ལྡན་གྱི་བྱ་སྤྱོད་ཅིག་ཡིན་པ་སྔ་མོ་ནས་ཤེས་ཡོད་པ་རེད། རྒྱ་གཞུང་གིས་དོན་དངོས་འགན་ཁུར་བའི་ཐོག་འགྲོ་བ་མིའི་ཚེ་སྲོག་ལ་རིན་ཐང་དང་བརྩི་མཐོང་ཡོད་ན་འགྲོ་བ་མིའི་གཞི་རྩའི་ཐོབ་ཐང་དང་རང་དབང། སྨྲ་བརྗོད་སོགས་འཛམ་གླིང་སྤྱི་མཐུན་ལྟར་ལག་བསྟར་བྱོས་དང་ད་གཟོད་ཞུགས་འབུལ་གྱི་དོན་རྐྱེན་ཆད་ངེས་ཡིན།
སྤྱིར་ཁོང་ཚོས་རང་དོན་དྲི་མས་མ་གོས་པར་གཞན་དོན་འབའ་ཞིག་གི་ཆེད་དུ་རང་སྲོག་བློས་བཏང་གནང་བ་དེ་རླབས་ཆེན་གྱི་རྒྱལ་སྲས་བྱང་ཆུབ་སེམས་དཔའི་སྤྱོད་པ་ཞིག་ཡིན་ཞེས་བཤད་ཆོག་པ་ལས་གཞན་གནོད་ཀྱི་འཚེ་བའི་བྱ་སྤྱོད་ཅིག་མིན་ལ། ནང་བསྟན་ལོག་ལམ་དུ་འདྲེན་པའི་ཐལ་དྲགས་ཀྱི་བྱ་སྤྱོད་ཅིག་དེ་བས་མིན། ཁོང་ཚོའི་མཛད་སྤྱོད་དེ་ནི་ནང་པའི་གཞུང་ནས་གསུང་བའི་ལུས་ངག་ཡིད་གསུམ་གྱི་འཚེ་བ་དང་མི་དགེ་བའི་ལས་གང་ཡང་མ་ཡིན་པ་རྩོམ་ཡིག་འདིར་གླེང་འདོད་པའི་བརྗོད་སྙིང་གཙོ་བོ་ཡིན།
དེ་ཡང་ལུས་ཀྱི་སྒོ་ནས་རྩ་ཉག་གཅིག་གིས་གཞན་གྱི་ལུས་ལ་རྡེག་པའམ་རྡེག་ཏུ་འཇུག་ཙམ་ཡང་གནང་མྱོང་མེད་པ་དང། ངག་གི་སྒོ་ནས་དྲང་བདེན་གྱི་འབོད་ཚིག་བསྒྲགས་པ་ཙམ་ལས་རྫུན་ཕྲ་མ་ཚིག་རྩུབ་གང་ཡང་བཤད་མེད་པ། ཡིད་ཀྱི་སྒོ་ནས་གཞན་ཕན་འབའ་ཞིག་ལས་གཞན་ལ་གནོད་སེམས་དང་བརྣབ་སེམས་སོགས་གང་ཡང་བཟུང་མེད་པས་འཚེ་བ་དང་མི་དགེ་བའི་ལས་གང་ཡང་མིན་པ་ཁ་ཚོན་ཆོད་པའི་སྒོ་ནས་བཤད་ཐུབ་པ་ཞིག་རེད། ནང་པའི་གཞུང་ནས་གསུང་བའི་སྲོག་གཅོད་ཀྱི་ལས་ལམ་འབྱུང་བ་ལ། གཞི་ཕ་རོལ་བོ་ལ་སེམས་ཆགས་སོགས་ཉོན་མོངས་དུག་གསུམ་གྱིས་ཀུན་བསླངས་ཏེ། སྦྱོར་བ་མདའ་མཚོན་སོགས་ཀྱིས་ཕ་རོལ་བའི་སྲོག་དབང་འགག་པར་བྱས་ན་སྲོག་གཅོད་ཀྱི་ལས་ལམ་ཡོངས་སུ་རྫོགས་ཀྱི། ཆགས་སོགས་ཉོན་མོངས་དབང་གིས་རང་སྲོག་བཅད་ན་གཞི་ཕ་རོལ་བོ་དང་མཐར་ཐུག་གྲུབ་པ་མེད་པས་སྦྱོར་བའི་སྡིག་པ་ཙམ་ལས་སྲོག་གཅོད་ཀྱི་ལས་ལམ་མི་རྫོགས་པར་གསུངས་ཤིང་། དེ་ཡང་རྗེའི་ལམ་རིམ་ཆེན་མོ་ལས། གསོད་པ་པོ་རང་ཉིད་གསོད་ན་སྦྱོར་བའི་སྡིག་པ་ཡོད་ཀྱི། མཐར་ཐུག་མེད་པ་ལ་དགོངས་ནས་རྣལ་འབྱོར་སྤྱོད་པའི་ས་ལས་སྲོག་ཆགས་ཕ་རོལ་པོ་ཞེས་གསུངས་སོ། ། ཞེས་གསུངས། བཅོས་ལྡན་གྱི་དགེ་སློང་ཞིག་ཆགས་སོགས་ཉོན་མོངས་ཀྱི་གཞན་དབང་དུ་གྱུར་ཏེ་རང་སྲོག་བཅད་ནའང་ཕམ་པར་མི་འགྱུར་བའི་རྒྱུ་མཚན་དེ་ཡིན་ནོ།།
དེ་ཡང་འདུལ་བའི་གཞུང་ལས་སྲོག་གཅོད་ཕམ་པའི་གཞི་ལ། རང་ལས་རྒྱུད་ཐ་དད་པའི་མིའམ་མིར་ཆགས་པ་དགོས་ཏེ། རང་ལས་གཞན་མིའམ་མིར་ཆགས་པ་བསད་ན་ཕམ་པ་དང། རང་བསད་ན་སྦྱོར་སྦོམ། ཞེས་གསུངས། དེས་ན་རང་དོན་དྲི་མས་མ་གོས་པར་གཞན་དོན་འབའ་ཞིག་གི་ཆེད་དུ་གཅེས་པའི་ལུས་སྲོག་ལོངས་སྤྱོད་དང་བཅས་པ་མཆོད་སྦྱིན་གནང་བ་དེ་ནི་སྦྱོར་པ་རྩུབ་ཀྱང་།དགེ་སྡིག་གཉིས་ལས་དགེ་བ་དང་དཀར་བའི་ལས་ཁོ་ན་ཡིན་ཏེ། དེད་དཔོན་སྙིང་རྗེ་ཅན་གྱིས་སྙིང་རྗེས་ཀུན་ནས་བསླངས་ཏེ། མི་ནག་མདུང་ཐུང་ཅན་བསད་པའི་ལས་དེ་ངོ་བོ་ནག་པོའི་ལས་ཡིན་ཡང་དགེ་བ་དང་དཀར་བོའི་ལས་ཡིན་པར་གསུངས་པ་བཞིན་ནོ།། འཚེ་བ་དང་དགེ་བ་ཡིན་མིན་ནི། དགེ་རྩས་བསྐྱེད་མ་བསྐྱེད་རེག་ལས་ཤིང་། དེ་ཡང་ཇི་སྐད་དུ་རིན་ཆེན་ཕྲེང་བ་ལས། འདོད་ཆགས་ཞེ་སྡང་གཏི་མུག་མེད།། དེས་བསྐྱེད་ལས་ནི་དགེ་བའོ།། ཞེས་གསུངས།
དེ་ལས་ལྡོག་པ་རྒྱུའི་ཀུན་སློང་ཆགས་སོགས་ཅི་རིགས་ཀྱིས་ཀུན་ནས་བསླངས་ཏེ་དངོས་གཞིའི་སྦྱོར་བ་དཀར་པོ་ཅན་གྱི་མི་དགེ་བའི་ལས་ནི། དཔེར་ན། གཞན་ཕ་རོལ་བོ་བསླུ་འདོད་ཀྱི་བསམ་པས་ཀུན་ནས་བསླངས་ཏེ་སྦྱིན་པ་གཏོང་བ་སོགས་ཀྱི་ལས་ནི། རྒྱུའི་ཀུན་སློང་ནག་པོ་ཡིན་པས་མི་དགེ་བ་དང་འཚེ་བའི་ལས་ཡིན་ཞིང། སྦྱིན་པ་བཏང་བའི་ལས་ཡིན་པས་ངོ་བོ་དཀར་བའི་ལས་ཡིན་ནོ། ། མདོར་ན་དགེ་མི་དགེའི་ལས་ཞེས་པ་རྒྱུའི་ཀུན་སློང་དཀར་ནག་གང་ཡིན་ལ་ལྟ་དགོས་པ་ཡིན་པས། ངོ་བོ་དཀར་ནག་གི་ཆ་ནས་དགེ་མི་དགེའི་ལས་སུ་མི་འཇོག་པ་ཤེས་དགོས་སོ།། དེའི་ཕྱིར་གཞན་དོན་འབའ་ཞིག་གི་ཀུན་སློང་མེད་པར་ཆགས་སོགས་ཉོན་མོངས་ཀྱི་གཞན་དབང་དུ་གྱུར་ཏེ་རང་གཞན་གྱི་ཚེ་སྲོག་ལ་གནོད་བྱེད་མི་རུང་བ་ནི་ཤུགས་ལས་རྟོགས་དགོས་པའི་གནད་ཀྱི་དམ་པའོ།།
དེས་ན་རྒྱ་དམར་མགོ་ཁྲིད་ཚོས་བོད་བསླུ་འདོད་གྱི་བསམ་པའི་ཀུན་ནས་བསླངས་ཏེ་ལུས་ངག་གི་སྦྱོར་བ་གང་བརྩམས་ཐམས་ཅད་མི་དགེ་བ་ཡིན་པ་དོན་ཐོབ་ཀྱིས་རྟོགས་ནུས་སོ།།
རྒྱ་གཞུང་གིས་དོན་དངོས་མིའི་ཚེ་སྲོག་དང་བདེ་འཇགས། ད་དུང་བོད་མི་རིགས་རིག་གཞུང་དང་བཅས་པར་འགན་སྲུང་བྱེད་འདོད་ཡོད་ན། དེ་དག་གི་འབྱུང་རྐྱེན་དུ་གྱུར་བའི་དོན་གནད་ཁག་མཚམས་འཇོག་དགོས་པ་ཡིན།
༡༽རྒྱལ་གཅེས་ཆོས་གཅེས་སློབ་གསོ་ཞེས་པའི་འབོད་སྒྲའི་འོག་༸གོང་ས་མཆོག་ལ་ཚབས་ཆེའི་མཚན་སྨད་བྱེད་བཞིན་པ་དེས་བོད་མི་ཡོངས་ཀྱི་སེམས་ཁམས་ལ་ཚབས་ཆེའི་རྨ་ཁ་བཟོ་བཞིན་ཡོད་པས་འཕྲལ་དུ་མཚམས་འཇོག་བྱ་དགོས་པ་མ་ཟད། ༸གོང་ས་མཆོག་མྱུར་བ་མྱུར་དུ་བོད་ནང་དུ་གདན་ཞུ་བྱ་དགོས།
༢༽འཆམ་མཐུན་ལྷིང་འཇགས་ཞེས་པའི་འབོད་སྒྲའི་འོག་གི་འཇིགས་སྐུལ་དྲག་སྤྱོད་མཚམས་འཇོག་བྱ་དགོས།
༣༽བོད་ཡིག་སློབ་ཁྲིད་བཀག་སྡོམ་གྱི་སྲིད་ཇུས་མཚམས་འཇོག་བྱ་དགོས།
༤༽དཔལ་འབྱོར་བསླུ་བྲིད་དང་ཞིང་འབྲོག་གནས་སྤོར་གྱི་ལས་འགུལ་འོག་རིག་གཞུང་རྩ་གཏོར་མཚམས་འཇོག་བྱ་དགོས།
༥༽ཡར་རྒྱས་འགྱུར་ལྡོག་ཅེས་པའི་འབོད་སྒྲའི་འོག་ཧམ་བཤད་རྫུན་སྒྲིག་གི་ཁྱབ་བསྒྲགས་མཚམས་འཇོག་བྱ་དགོས།
༦༽པཎ་ཆེན་ཆུང་སྲིད་རིན་པོ་ཆེ་སོགས་ཉེས་མེད་བཙོན་འཇུག་མཚམས་འཇོག་བྱ་དགོས།
༧༽བོད་མིར་རོགས་སྐྱོབ་འཛུགས་སྐྲུན་ཞེས་པའི་འབོད་སྒྲའི་འོག་མི་སེར་སྤེལ་ཡུལ་དང་ཁོར་ཡུག་གཏོར་སྐྱོན་བྱེད་བཞིན་པ་མཚམས་འཇོག་བྱ་དགོས།
༨༽སྲིད་དབང་སྒེར་འཛིན་གྱི་ལམ་ལུགས་མཚམས་འཇོག་བྱ་དགོས།
༩༽འགྲོ་བ་མིའི་གཞི་རྩའི་ཐོབ་ཐང་དང་སྨྲ་བརྗོད་བཀག་སྡོམ་མཚམས་འཇོག་བྱ་དགོས།
༡༠༽ལྐོག་ཟ་རུལ་སུངས་ཀྱི་ལྟག་སྒོ་ནས་གྲངས་ཉུང་མི་རིགས་ལ་ཚབས་ཆེའི་གྱོང་གུད་སྤྲོད་བཞིན་པ་མཚམས་འཇོག་བྱ་དགོས་པ་བཅས་སོ།།
བཞི་པ། རང་ལུས་མེ་སྲེག་གི་རྒྱུ་རྐྱེན་མཚམས་འཇོག་ཐབས་ལ་ལྟ་བ།
དེང་སྐབས་འཛམ་གླིང་རྒྱལ་སྤྱིའི་ཐོག་བོད་ནང་གི་རང་ལུས་མེ་སྲེག་གི་འབྱུང་རྐྱེན་ཙམ་མ་ཡིན་པར། ལོ་ངོ་ལྔ་བཅུའི་རིང་རྒྱ་དམར་སྲིད་གཞུང་གིས་བོད་ཐོག་ལ་འཛིན་པའི་སྲིད་དང་བོད་ལ་བརླང་སྤྱོད་ཚད་མེད་ཇི་ལྟར་བཏང་ཡོད་མེད། བྱ་སྤྱོད་དེ་དག་རྒྱལ་སྤྱིའི་ཁྲིམས་དོན་དང་འགལ་ཡོད་མེད་མ་རྟོགས་པ་མིན་ཡང་། རྒྱལ་ཁབ་སོ་སོའི་འཕྲལ་སེལ་གྱི་ཁེ་ཕན་གཙོ་བོར་བཟུང་སྟེ་ད་ལྟའི་བར་བཏང་སྙོམས་སུ་ལྷག་ཡོད། ལོ་ཤས་སྔོན་ནས་ཨ་མི་ར་ཀ་དང་ཡོ་རུབ་རྒྱལ་ཁབ་ཁག་གིས་གཙོས་རྒྱལ་ཁབ་མང་པོས་ལི་བྷི་ཡ་དང་སི་རཱ་ཡ་སོགས། དྲག་སྤྱོད་ཁོ་ནས་སྲིད་དབང་སྒར་འཛིན་བྱེད་མཁན་རྣམས་ལ་དམིགས་སུ་བཀར་ནས་རྒྱལ་སྤྱིའི་ཁྲིམས་མཐུན་མིན་པའི་ཁ་རྡུང་ནན་མོ་བཏང་དང་གཏོང་བཞིན་པ་མ་ཟད། ཕྱོགས་འགལ་མང་གཙོ་དོན་གཉེར་ཅན་རྣམས་ལ་རྒྱབ་སྐྱོར་གནང་བཞིན་ཡོད་པ་ནི་སྤྱིའི་ཁྲིམས་ལུགས་དང་མཐུན་པའི་མཛད་སྤྱོད་བཟང་པོ་ཞིག་ཡིན། དེས་ན་རང་རེ་བོད་མི་ཚོ་ཡང་རྒྱ་དམར་སྲིད་གཞུང་གི་འོག་དཀའ་ངལ་ཅི་འཕྲད་ཀྱི་གནད་དོན་ཡོད་ཚད་ཉིན་རེ་བཞིན་རྒྱལ་སྤྱིའི་གར་སྟེགས་ཐོག་བརྒྱུད་ལམ་ནས་འཇོག་རྒྱུ་ནི་ང་ཚོ་ཕྱི་སྡོད་བོད་མི་ཚོའི་ཕྲག་ཏུ་བབ་པའི་ལས་འགན་ཞིག་ཡིན་ལ། རྒྱལ་སྤྱིའི་ངོས་ནས་ཀྱང་སེམས་ཚབ་ཡོད་པ་དང་གདུང་སེམས་མཉམ་སྐྱེད་ཡོད་ཟེར་བ་ཙམ་མ་ཡིན་པར། དོན་དངོས་རྒྱ་གཞུང་གི་བྱ་སྤྱོད་རྣམས་མཚམས་འཇོག་ཡོང་ཐབས་སུ་རྒྱལ་སྤྱིའི་ཁྲིམས་ཀྱི་ནུས་པ་ལྡན་པའི་འགན་བཞེས་ཡོང་ཐབས་ལ། འཛམ་གླིང་རྒྱལ་ཁབ་སོ་སོའི་རྒྱ་ཆེའི་གཞི་རིམ་མང་ཚོགས་དང་། སློབ་གྲྭ་ཁག་གི་ནང་བོད་གནས་དྲིལ་བསྒྲགས་དང་རྒྱབ་སྐྱོར་ཡོང་ཐུབ་བྱ་རྒྱུ་སྐབས་བབ་ཀྱི་ལས་འགན་དུ་མཐོང་བ་བཅས་སོ།།
ཟླ་བ་བསོད་ནམས་ཀྱི་རྒྱུ་མཚན་གསུམ་པོའི་གང་ཡང་འབྲེལ་མེད་རེད།།
མ་གཞི་ནས་དཔྱད་རྩོམ་འདི་ལ་བོད་མིའི་གཤིས་བཟང་གི་ལྟ་སྤྱོད་ཀྱིས་རྒྱན་སྤྲོས་ནས་འགྲེལ་བརྗོད་སྙིང་རྗེ་མོ་ཞིག་གྲུབ་འདུག་སྟེ། དངོས་ཡོད་གནས་སྟངས་ཚུལ་ཅི་བཞིན་འགྲེལ་བརྗོད་བྱེད་རྒྱུ་ནི་རྒྱལ་གཅེས་དཔའ་བོ་དཔའ་མོ་དག་གི་དམིགས་བྱ་རང་སོར་འབབ་རྒྱུ་ཁོ་ནའི་ཆེད་དུ་ཡིན་དགོས་བ་རེད། དེར་བརྟེན་དགེ་བསྟན་ལགས་ཀྱི་ལྟ་ཚུལ་འདི་དངོས་ཡོད་གནས་སྟངས་དང་རང་ལུས་མེ་སྲེག་གི་དོན་རྐྱེན་གང་ཐད་ནས་མཐའ་རིང་དུ་གྱེས་འདུག
དང་པོ། དམིགས་ཡུལ་གྱི་ཆ་ནས་བོད་རྒྱ་ཞུ་འགྲིག་ཡོང་ཐབས་རང་ལ་འབད་བརྩོན་གྱིས་དོན་རྐྱེན་འདི་འབྱུང་བར་འདོད་ན། ཁོ་བས་ཅིས་ཀྱང་ཁས་ལེན་མི་འདོད་པའི་ཁར། དཔའ་བོ་ཐུབ་བསྟན་དངོས་གྲུབ་ནས་བཟུང་འདས་གསོན་གཉིས་ཀྱི་ཚེ་སྲོག་གི་རིན་ཐང་ལ་གོང་ཚད་བརྒྱབ་འདུག་བསམ་ཀྱིན་ཡོད།
གཉིས་བ། མེས་བོ་རྒྱུད་པའི་རང་མི་རིགས་ཀྱི་ཆེད་དུ་རང་སྲོག་བློས་གཏོང་བྱེད་པའི་སྙིང་སྟོབས་ཀྱི་རིན་ཐང་གཞལ་དུ་མེད་ལ། ཞུམ་པ་མེད་པའི་ལྷག་བསམ་ལ་མི་རིགས་དང་རྒྱལ་ཁབ་གང་གིས་ཀྱང་དུས་ནས་དུས་སུ་བཀའ་དྲིན་རྗེས་དྲན་དང་གདུང་སེམས་མཉམ་བསྐྱེད་བྱེད་པ་ལས། བསྡོམས་ཚིག་འཇོག་སྲོལ་ཅིག་ཡོད་ཚོད་མི་འདུག་ན། རང་ལུས་མེར་བསྲེགས་ཀྱི་དམིགས་བྱ་འདི་དང་དེའོ་ ཞེས་བ་འདི་ཅི་འདྲིའི་རྣ་བར་གཟན་པ་ལའང་།
གསུམ་པ། བསམ་ཀྱིན་བསམ་ཀྱིན་འདས་བའི་དུས་ཚོད་ནང་བོད་སྤྱི་བའི་དོན་དུ་མེ་མདའི་ཁ་ནས་རང་སྲོག་ཤོར་མཁན་འདས་བོ་དག་གི་ཚེ་སྲོག་གི་རིན་དོན་དང་དམིགས་བྱ། དཀའ་སྡུག་སོགས་ཀྱང་སྣང་ཆུང་ངམ་རྩིས་མེད་དུ་བཏང་བའི་བཟོ་ཞིག་ཀྱང་མི་འདུག་གམ། བསམ་ཕྱོགས་འདི་ཡང་མཐའ་ལ་དེད་ན་བོད་རྒྱ་ཞི་འགྲིག་ལ་རེ་བཞག་ས་ནས་ལུང་རྡིབས་སོང་བའི་ལྟ་ཚུལ་གྱིས་དབང་གིས་ཡིན། བོད་གཞུང་འབངས་འདིས་བོད་རྒྱ་ཞི་འགྲིག་གི་ཐབས་ལམ་འདི་གལ་ཆེན་དོན་ཆེན་ལ་བལྟས་བ་ནས་བཟུང་།༼རྒྱ་ནག་པེ་ཅིན་གཞུང་གིས་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་༧གོང་ས་ཏྰ་ལའི་བླ་མ་མཆོག་དང་ལྷན་དུ་བཀའ་མོལ་བྱུང་ན་ཡག་ཤེས་རེད།གོ་སྐབས་འདི་ཤོར་བ་ཡིན་ན་བོད་མི་ཡོངས་ཀྱིས་བཀུར་བཞིན་པའི་༧ཏྰ་ལའི་བླ་མ་ནང་བཞིན་གྱི་མི་ཞིག་འབྱུང་རྒྱུ་ཐེ་ཚོམ་རེད།དེའི་སྐབས་དེར་བོད་དམངས་ཚོགས་འུ་ཐུག་ནས་རྙོག་དྲ་ཆེ་རུ་མ་གཏོགས་ཆུང་རུ་འགྲོ་རྒྱུ་མ་རེད།༽ཞེས་བའི་ལྟ་ཚུལ་འདི་གནམ་ས་བར་དུ་བསྒྲགས་ནས་བོད་རྒྱ་ཞི་འགྲིག་གི་དབུ་ཁྲིད་དེ་མཇུག་བསྡུས་ཟིན་པ་རེད།
མདོ་དོན། རང་ལུས་མེར་བསྲེགས་ཀྱི་དོན་རྐྱེན་འདི་རྒྱ་ནག་གཞུང་གི་དབང་ཡོད། བཙན་མནོན། གདུག་རྩུབ་ཀྱི་འོག་ནས་བྱུང་ཞིང་། ཡ་ང་བའི་གནས་སྟངས་འདི་ལ་གདོང་གཏད་པའི་ཉམས་འགྱུར་དེ་ཡིན་འོས།
ཡིག་ནོར་རེ་གཉིས་ཤིག་མངོན་འདུག ཡིན་ན་ཡང་རྩོམ་གཞིའི་ནང་དོན་དང་དངོས་ཡོད་མཐུན་འདུག་ལ་སྦྱོར་ཐབས་ཀྱང་ཡག་པོ་འདུག
ཐུགས་རྗེ་ཆེ། རྗེས་སུ་ཞིབ་ལྟ་ཞིག་བྱ་ངེས་ཡིན།།