ཤིན་ཅང་ནང་འཁྲུག་འཛིང་དོན་རྐྱེན་བྱུང་འདུག

གཟའ་ལྷག་པའི་ཉིན་ཤིན་ཅང་ཧི་ཐེན་ས་ཁུལ་གྱི་ཆོས་ལུགས་སློབ་གཉེར་ཁང་ཞིག་ཏུ། རྒྱ་གཞུང་དྲག་ཆས་ཉེན་རྟོག་པ་དང་ཡུ་གུར་མི་རིགས་བར་འཁྲུག་འཛིང་དོན་རྐྱེན་བྱུང་འདུག

ཟླ་འདིའི་ཕྱི་ཚེས་ ༦ ཉིན་ཤིན་ཅང་ཧི་ཐེན་ས་ཁུལ་གྱི་སྒེར་གཅེར་ཆོས་ལུགས་སློབ་གཉེར་ཁང་ཞིག་ནང་། རྒྱ་གཞུང་དྲག་ཆས་ཉེན་རྟོག་པ་དང་ས་གནས་ཡུ་གུར་བའི་བར་འཁྲུག་འཛིང་དོན་རྐྱེན་བྱུང་འདུག  དོན་རྐྱེན་དེའི་བྱུང་རྐྱེན་ཐད་རྒྱ་གཞུང་དང་འཛམ་གླིང་ཡུ་གུར་མཐུན་ཚོགས་གཉིས་ཀྱི་བརྗོད་སྟངས་གཅིག་གྱུར་མིན་སྟབས། དོན་རྐྱེན་དེའི་རྒྱབ་ལྗོངས་ཀྱི་དངོས་ཡོད་གནས་སྟངས་གང་ཡིན་ད་དུང་གསལ་ཁ་བྱུང་མེད་པ་རེད། ས་གནས་ཡུ་གུར་བ་ཞིག་གིས་གསར་ལམ་ཁག་ཏུ།  “ཉིན་དེའི་སྔ་དྲོ་རྒྱ་གཞུང་ཉེན་རྟོག་པས་ཧི་ཐེན་ས་ཁུལ་གྱི་ཆོས་ལུགས་སློབ་གཉེར་ཁང་ཞིག་ལ་བཙན་ཤུགས་བཀག་སྡོམ་བྱས་པར་བརྟེན་འཁྲུག་འཛིང་གཏོར་རྒོལ་བྱུང་འདུག” ཅེས་བརྗོད་ཡོད་པ་རེད།

རྒྱ་ནག་གཞུང་འབྲེལ་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། ཤིན་ཅང་ཧི་ཐེན་ས་ཁུལ་ནང་ཁྲིམས་འགལ་ཐོག་ཨེ་སི་ལམ་གསུང་རབ་ཁའོ་རཱན་(Koran)འཆད་ཁྲིད་བྱེད་བཞིན་པའི་སློབ་གཉེར་ཁང་ཞིག་གིས། བཙན་ཤུགས་ཀྱིས་བྱིས་པ་བཀག་སྡོམ་བྱེད་བཞིན་པའི་གནས་ཚུལ་ས་གནས་ཉེན་རྟོག་པར་ཞུ་གཏུགས་བྱས་པ་ལྟར། ཉེན་རྟོག་པས་བྱིས་པ་རྣམས་གློད་ཀྲོལ་བྱས་པའི་བརྒྱུད་རིམ་ཁྲོད། ཉེས་ཅན་པས་གཏོར་རྒོལ་དོན་རྐྱེན་བཟོས་པར་བརྟེན། ཉེན་རྟོག་པས་ཉེས་ཅན་པ་ ༣ འཇུ་བཟུང་བྱས་ཡོད་ལ། དེའི་ཁྲོད་མི་ ༢ ལ་རྨས་སྐྱོན་ཕོག་ཡོད་སྐོར་བརྗོད་འདུག

འཛམ་གླིང་ཡུ་གུར་མཐུན་ཚོགས་ཀྱི་མགྲིན་ཚབ་པ་ཏིས་ལིས་ཞཱ་ཐིས་ཀྱིས་བརྗོད་པ་ལྟར་ན། རྒྱ་གཞུང་དྲག་ཆས་ཉེན་རྟོག་པས་ཡུ་གུར་བའི་ཆོས་ལུགས་སློབ་གཉེར་ཁང་ཞིག་གི་ཆོས་ལུགས་སློབ་གཉེར་གྱི་བྱེད་སྒོར་བཀག་སྡོམ་དྲག་གནོན་བྱས་ཏེ། ནར་སོན་མེད་པའི་སློབ་ཕྲུག་དང་དགེ་རྒན་ཚོའི་ཁྲོད་མིག་སྦྲིད་འགལ་རྫས་གཏོར་བར་བརྟེན། ས་གནས་ཡུ་གུར་མང་ཚོགས་དང་རྒྱ་གཞུང་དྲག་ཆས་ཉེན་རྟོག་པའི་བར་འཁྲུག་འཛིང་ཤོར་ཡོད་པ་བརྗོད་འདུག

རྒྱ་གཞུང་དྲ་རྒྱ་ཁག་གིས་དོན་རྐྱེན་དེའི་ཁྲོད་ཉེན་རྟོག་པས་བྱིས་པ་ ༥༤ ཉེན་ཁ་ལས་སྐྱབས་ཡོད་པ་དང་། དེའི་ཁྲོད་བྱིས་པ་ ༡༡ ལ་རྨས་སྐྱོན་ཕོག་སྟེ་སྨན་ཁང་དུ་བསྐྱལ་ཡོད་སྐོར་བརྗོད་ཡོད་ཀྱང་། བྱིས་པ་རྣམས་ལ་རྨས་སྐྱོན་ཅི་ཞིག་བྱུང་ཡོད་མེད་གསལ་ཁ་བཏོན་མེད་པ་རེད།

འཛམ་གླིང་ཡུ་གུར་མཐུན་ཚོགས་ཀྱིས་དོན་རྐྱེན་དེའི་ཁྲོད་རྒྱ་གཞུང་གིས་ཡུ་གུར་བ་མི་ ༤༧ འཇུ་བཟུང་བྱས་ཡོད་པ་དང་། དེའི་ཁྲོད་བུད་མེད་ ༡༡ ཡོད་པ་མ་ཟད། ཁོང་ཚོར་ཁྲིམས་འགལ་གྱི་ཆོས་དཔེ་དང་མཆོད་ཆའི་རིགས་ཉར་ཚགས་བྱས་པའི་ཉེས་མིང་བཏགས་ཡོད་པ་བརྗོད་འདུག

ཤིན་ཅང་ས་ཁུལ་ནི་ཁ་ཆེ་མི་རིགས་འདུས་སྡོད་ཀྱི་ས་ཁུལ་ཞིག་ཆགས་ཡོད་ལ། ཉེ་སྔོན་ནས་བཟུང་རྒྱ་གཞུང་གིས་ས་ཁུལ་དེའི་ནང་ཁྲིམས་མཐུན་མིན་པའི་ཆོས་ལུགས་སློབ་གཉེར་ཁང་བཀག་སྒོམ་གྱི་སྲིད་ཇུས་སྤེལ་ཤུགས་ཆེ་རུ་བཏང་ཡོད་པ་རེད།