ཅཱོན་ཊི་རཱ་ནས་རྒྱ་མི་དོགས་ཡོད་ ༨ འཛིན་བཟུང་བྱས་འདུག

ཁ་སང་ཕྱི་ཚེས་ ༡༢ ཉིན་གྱི་ཕྱི་དྲོ་རྒྱ་གར་ཧི་མ་ཅཱལ་མངའ་སྡེའི་མན་ཌེ་(Mandi) རྫོང་ཁོངས་ཅཱོན་ཊི་རཱ་ནས། མངའ་སྡེ་ཉེན་རྟོག་པས་རྒྱ་མི་ ༨ གསང་ཉུལ་བའི་དོགས་གཞིའི་འོག་འཇུ་བཟུང་བྱས་འདུག

དེ་རིང་ཧི་མ་ཅཱལ་མངའ་སྡེ་ཉེན་རྟོག་ལས་ཁུངས་ནས་བརྗོད་པ་ལྟར་ན། རྒྱ་མི་དེ་དག་ཡུལ་སྐོར་སྤྲོ་འཆམ་པའི་མིང་ཐོག་ནས་རྒྱ་གར་ནང་འཛུལ་ཡོད་ཀྱང་། ད་ཆར་ཁོ་ཚོས་ཅཱོན་ཊི་རཱ་ས་གནས་སུ་ཤིང་བཟོ་དང་ལྷ་བྲིས། ཨར་ལས་སོགས་ཀྱི་ལས་ཀ་བྱེད་ཀྱི་ཡོད་པ་དང་། ཁོ་ཚོས་ལས་ཀ་བྱས་ཏེ་དུས་ཡུན་གང་འཚམ་ཕྱིན་ཡོད་པ་མ་ཟད། ཡུལ་སྐོར་སྤྲོ་འཆམ་པའི་ཐོངས་མཆན་དུས་ཡུན་ཀྱང་རྫོགས་ཡོད་འདུག

རྒྱ་མི་དེ་དག་འཛིན་བཟུང་སྐབས་ཁོ་ཚོའི་ལག་ནས་རྒྱ་སྒོར་ཕུད་པའི་ཧིན་སྒོར་འབུམ་ ༣༠ ཙམ་དང་། རྒྱ་ནག་གི་ཁ་པར་བྱང་བུ་(Sim Card)། རྒྱལ་སྤྱིའི་དངུལ་འདོན་ལག་བྱང་(International ATM cards) བཅས་རྙེད་གསོན་བྱུང་ཡོད་འདུག

རྒྱ་མི་དེ་དག་༸གོང་ས་མཆོག་གི་སྐུ་ཕྱཱར་གནོད་འཚེ་གཏོང་མཁན་གྱི་གསང་ཉུལ་བའི་དོགས་གཞིའི་འོག་འཇུ་བཟུང་བྱས་ཡོད་ཀྱང་། འབྲེལ་ཡོད་ཉེན་རྟོག་པས་ད་ལྟའི་ཆར་ཉེན་རྟོག་ལས་ཁུངས་དང་གསང་བའི་ལས་ཁུངས་གཉིས་ཀྱིས་རྒྱ་མི་ཚོར་འདྲི་གཅོད་ཞིབ་བཤེར་བྱེད་བཞིན་ཡོད་པ་དང་། ཞིབ་བཤེར་ཆ་ཚང་མ་ཚར་བར་དུ་ཁོ་ཚོའི་སྐོར་ལ་མཐའ་གཅིག་ཏུ་ཚིག་ཐག་བཅད་དེ་བཤད་རྒྱུ་སྔ་དྲག་ཡོད་ཚུལ་བརྗོད་འདུག

རྒྱ་གར་གསར་ལམ་ཁག་ཏུ་ཅཱོན་ཊི་རཱར་ཡོད་པའི་རྫོང་སར་བཤད་གྲྭ་ནས་འཇུ་བཟུང་བྱས་ཚུལ་ཐོན་པ་ལྟར། འདི་གའི་གསར་འགོད་པས་རྫོང་སར་བཤད་གྲྭའི་འབྲེལ་ཡོད་མི་སྣར་འབྲེལ་བ་བྱས་སྐབས། རྒྱ་མི་དེ་དག་རྫོང་སར་བཤད་གྲྭའི་ཉེ་འཁྲིས་ཤིག་ནས་འཇུ་བཟུང་བྱས་ཡོད་ཚུལ་གོ་ཐོས་བྱུང་ཡོད་སྐོར་ལས་རྫོང་སར་བཤད་གྲྭ་མིན་ཚུལ་བརྗོད་བྱུང་། དེ་བཞིན་ཅཱོན་ཊི་རཱ་བོད་མིའི་ས་གནས་མགོ་འཛིན་བསྟན་འཛིན་རབ་དགའ་ལགས་སུ་ཁ་པར་བརྒྱུད་འབྲེལ་བ་བྱས་སྐབས། རྒྱ་མི་ཁག་ཅིག་ཅཱོན་ཊི་རཱ་ནས་འཇུ་བཟུང་བྱས་ཡོད་པ་དངོས་ཡོད་ཡིན་ཡང་། འབྲེལ་ཡོད་ཉེན་རྟོག་པ་སོགས་ལ་འབྲེལ་བ་བྱས་ཀྱང་ད་སྔ་ཞིབ་ཕྲའི་གནས་ཚུལ་ཁ་གསལ་ཤེས་རྟོགས་ཐུབ་ཀྱི་མེད་སྐོར་བརྗོད་བྱུང་།

དེའི་རྗེས་རྫོང་གསར་བཤད་གྲྭའི་མཁན་པོ་ཀཿབྲག་དངོས་གྲུབ་བསོད་ནམས་ལགས་ཀྱིས་ཁ་པར་བརྒྱུད་གནས་ཚུལ་བརྗོད་པ་ལྟར་ན། རྒྱ་མི་དེ་དག་འཛིན་བཟུང་བྱེད་ཡུལ་རྫོང་གསར་བཤད་གྲྭ་མིན་པར། རྫོང་གསར་བཤད་གྲྭའི་ཉེ་འཁྲིས་སུ་ཡོད་པའི་བཀའ་བརྒྱུད་པའི་སྤྲུལ་སྐུ་ཞིག་གི་ནང་ཡིན་འདུག ཁོང་གིས་ངོ་སྤྲོད་གནང་དོན།  “ ཁ་སང་གནས་ཚུལ་དེ་འདྲ་ཞིག་བྱུང་བ་དངོས་ཡོད་རེད། ཡིན་ནའང་དོགས་གཞི་ཅན་དེ་དག་འཛིན་བཟུང་བྱེད་ཡུལ་རྫོང་གསར་བཤད་གྲྭ་མ་རེད། རྒྱ་གར་གསར་ལམ་ཁག་ནང་གང་འདྲ་ཞིག་བཀོད་ཡོད་པ་ངས་ཧ་གོ་མ་སོང་། གནས་ཚུལ་དེ་བྱུང་ཡུལ་རྫོང་གསར་བཤད་གྲྭའི་ཉེ་འཁྲིས་སུ་ཡོད་པའི་བཀའ་བརྒྱུད་པའི་སྤྲུལ་སྐུ་ཞིག་གི་བླ་བྲང་རེད་འདུག སྤྲུལ་སྐུ་ཁོང་གི་མཚན་ལ་གངས་དཀར་སྤྲུལ་སྐུ་ཞུ་བཞིན་འདུག ཁོང་གི་ནང་རྫོང་གསར་བཤད་གྲྭ་དང་ཧ་ཅང་ཐག་ཉེ་བོ་ཡོད་པ་རེད། སྐར་མ་ཁ་ཤས་ཀྱི་ས་རུ་ཡོད་པ་རེད” ཅེས་ངོ་སྤྲོད་གནང་སོང་།

ཡང་གནས་ཚུལ་ཡོང་ཁུངས་གཞན་ཞིག་གིས་བརྗོད་ན་རྒྱ་གར་གསར་ལམ་ཁག་ཅིག་གིས་གནས་ཚུལ་ཆུང་ཆུང་ཆེན་པོ་བཟོས་པ་ཙམ་ལས། རྒྱ་མི་དེ་དག་ཐེ་ཝན་ནས་ཡིན་ཞིང་། ས་གནས་བོད་མི་ཞིག་གིས་ཆེད་དུ་སྐད་བཏང་བའི་ལག་ཤེས་པ་རྐྱང་ཡིན་པ་དང་། ཁོང་ཅག་གི་ཐོངས་མཆན་དུས་ཚོད་རྫོགས་འདུག་ཟེར་བའང་བདེན་པ་མིན་ཚུལ་སོགས་བརྗོད་བྱུང་ལ། དེ་རིང་ཉིན་རྒྱབ་མན་ཌེ་རྫོང་ནས་རྒྱ་གར་ཉེན་རྟོག་པ་སྤྱི་སྤྱོད་རླངས་འཁོར་ཆེ་བ་གཅིག་ས་གནས་དེར་འབྱོར་ཏེ་རྟོག་ཞིབ་བྱེད་བཞིན་ཡོད་འདུག་ལ། ས་གནས་བོད་མི་དང་ཉེན་རྟོག་པའི་བར་ཉོག་དྲ་བྱུང་སྟེ་གནས་ཚུལ་ཅུང་ཛ་དྲག་ཆགས་ཡོད་འདུག

གསར་འགོད་པ། བནྡེ་སྐྱབས།