རྒྱ་ནག་གཞུང་གིས་ཐེམ་ཆེན་རྫོང་བོང་སྟག་དགོན་པའི་གྲྭ་བ་ཁག་ཅིག་ལ་ཁྲིམས་ཐག་བཅད་ཡོད་པ་མ་ཟད། དགོན་པར་དམ་དྲག་ཤུགས་ཆེར་བྱེད་ཀྱི་ཡོད་འདུག
རྒྱ་གར་ལྷོ་ཕྱོགས་གནས་སྡོད་གྲྭ་དགེ་ལེགས་རྒྱ་མཚོ་ལགས་ཀྱིས་འདི་གར་གནས་ཚུལ་བཏང་འབྱོར་བྱུང་བ་ལྟར་ན། འདི་ལོའི་ཕྱི་ཟླ་ ༢ པའི་ཚེས་ ༡༧ ཉིན་མཆོ་སྔོན་ཞིང་ཆེན་མཚོ་ནུབ་ཁུལ་ཐེམ་ཆེན་རྫོང་བོང་སྟག་དགོན་དགེ་ལྡན་བཤད་སྒྲུབ་རྣམ་རྒྱལ་གླིང་གི་གྲྭ་དམ་ཆོས་བཟང་པོ་ལགས་ཀྱིས་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་སྐད་འབོད་བྱས་ཏེ་སྐུ་གྲོངས་རྗེས། རྒྱ་ནག་གཞུང་གིས་ཁུལ་དེར་དམག་མི་སྟོང་ཕྲག་མང་པོ་འགྲེམས་འཇོག་གིས་དམ་དྲག་བྱས་ཡོད་པ་མ་ཟད། སྐབས་དེར་བོང་སྟག་དགོན་པའི་དགེ་རྒན་མཁས་གྲུབ་རྒྱ་མཚོ་དང་སངས་རྒྱས།གྲྭ་དཀོན་མཆོག་དར་རྒྱས་དང༌སྐལ་བཟང་བྱང་སེམས། དམ་ཆོས་ཚུལ་ཁྲིམས། འཇམ་དབྱངས་འོད་ཟེར།སྐལ་བཟང་གྲགས་པ། དཀོན་མཆོག་རྒྱ་མཚོ།ཤེས་རབ་བཟང་པོ་བཅས་འཛིན་བཟུང་བྱས་ཡོད་འདུག་ལ། ཁོང་ཚོའི་ཁྲོད་ནས་དཀོན་མཆོག་རྒྱ་མཚོ་དང་ཤེས་རབ་བཟང་པོ་གཉིས་ལ་ལོ་གཅིག་དང་ཟླ་བ་གཉིས་ནས་དྲུག་གི་བཙོན་འཇུག་ཁྲིམས་ཐག་བཅད་དེ། དཀོན་མཆོག་རྒྱ་མཚོ་ན་གོར་མོའི་བཙོན་ཁང་དུ་བཙོན་འཇུག་བྱས་ཡོད་པ་དང་། ཤེས་རབ་བཟང་པོ་བཙོན་ཁང་གཞན་ཞིག་གི་ནང་འཁྲིད་དེ་བཙོན་འཇུག་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་དོན་ལྟར་ན། བོང་སྟག་དགོན་དུ་རང་ལུས་མེར་བསྲེགས་ཀྱི་གནས་ཚུལ་བྱུང་རྗེས་རྒྱ་གཞུང་གིས། སྲང་ལམ་དུ་འགྲོ་བཞིན་པའི་དགེ་འདུན་པ་ཚོ་ཉེན་རྟོགས་ལས་ཁུངས་དུ་སྐད་བཏང་སྟེ་གང་བྱུང་འདྲི་རྩད་བཀག་ཉར་དང་། ཁ་པར་གཞུང་བཞེས་སོགས་བཏང་སྟེ་ཟླ་གསུམ་གྱི་རྗེས་སུ་ཕྱིར་རང་ཁྱིམ་དུ་ལོག་བཅུག་ཡོད་འདུག་ལ། རང་ལུས་མེར་བསྲེགས་ཀྱིས་གནས་ཚུལ་བྱུང་བ་ནས་བཟུང་དགོན་པའི་ནང་ཆོས་ལུགས་ཀྱི་བྱེད་སྒོ་ཁག་གཅིག་ཀྱང་སྤེལ་མ་བཅུག་པ་མ་ཟད། ཉེ་ཆར་ཉིན་ ༡༥ རིང་གུང་གསེང་བཏང་སྟེ། ད་ལྟ་དགོན་པའི་ནང་དུ་གྲྭ་བ་གཅིག་ཀྱང་བསྡད་མེད་པར་རང་ཁྱིམ་དུ་ལོག་དགོས་བྱུང་ཡོད་འདུག
ཟླ་སྔོན་མའི་ཕྱི་ཚེས་ ༢༩ ཉིན་རྒྱ་གཞུང་གིས་བོང་སྟག་དགོན་པའི་གྲྭ་མཁས་གྲུབ་རྒྱ་མཚོ་སོགས་བོད་མི་ ༧ ལ་ཁྲིམས་ཐག་གཅོད་རྒྱུའི་ཚོགས་འདུ་ཞིག་གོ་སྒྲིག་བྱས་སྐབས། གྲྭ་མཁས་གྲུབ་ཀྱིས་རྒྱ་ནག་ཉེན་རྟོག་པར་ཁོང་ཚོར་ནག་ཉེས་གང་ཡང་མེད་པར་ཉིན་ ༡༠༠ ལྷག་ལ་བཙོན་འཇུག་བྱས་སྟབས། དེང་ཕྱིན་ཉིན་གཅིག་གི་ཁྲིམས་ཐག་བཅད་ཀྱང་ངོས་ལེན་བྱ་རྒྱུ་མེད་ཅེས་བཤད་དེ། ཁྲིམས་ཆད་ངོས་ལེན་མེད་པའི་རྣམ་འགྱུར་བསྟན་པར་བརྟེན་ཉིན་དེའི་ཚོགས་འདུ་གྲོལ་དགོས་བྱུང་ཡོད་འདུག ས་གནས་མི་མང་གི་ངོས་ནས་གནས་ཚུལ་དེ་ནི་རྒྱ་གཞུང་གིས་རང་སྣང་གང་དྲན་གྱིས་ཉེས་འཛུགས་སྣ་ཚོགས་བྱས་ཏེ། བོད་མི་ཚོར་གང་བྱུང་ཁྲིམས་ཐག་གཅོད་ཀྱིན་པའི་མཚོན་རྟགས་གསལ་བོ་ཞིག་ཡིན་པར་ངོས་འཛིན་བྱེད་ཀྱི་ཡོད་འདུག
