རྒྱ་མི་དེ་དག་ཐའེ་ཝན་ནས་རེད།

ཕྱི་ཚེས་ ༡༢ ཉིན་ཅཱོན་ཊི་རཱ་ས་གནས་རྫོང་གསར་བཤད་གྲྭའི་ཉེ་འཁྲིས་ཀྱི་བཀའ་བརྒྱུད་པའི་སྤྲུལ་སྐུ་ཞིག་གི་བླ་བྲང་དུ་རྒྱ་རིགས་ལས་བཟོ་བ་ ༨ ཙམ་རྒྱ་གར་གྱི་ཉེན་རྟོག་པས་གསང་ཉུལ་བའི་དོགས་གཞིའི་འོག་འཛིན་བཟུང་བྱས་ཡོད་ཀྱང་། རྗེས་སུ་ཉེན་རྟོག་ལས་ཁུངས་དང་གསང་པའི་ལས་ཁུངས་གཉིས་ཀྱིས་ཞིབ་བཤེར་སྐབས། རྒྱ་མི་དེ་དག་ཐའེ་ཝན་ནས་ཡོང་བའི་ལས་བཟོ་བ་སྐོར་ཞིག་ཡིན་པ་ར་འཕྲོད་ཡོད་འདུག

རྒྱ་གར་ཉེན་རྟོག་པས་ཕྱི་མི་དེ་དག་གིས་ཐོངས་མཆན་ཞུས་ཏེ་ཡོང་ཡོད་ཀྱང་། རྒྱ་གར་ནང་བསླེབས་རྗེས་བདུན་ཕྲག་གཉིས་ནང་ཚུན་འབྲེལ་ཡོད་ས་གནས་ཉེན་རྟོག་ལས་ཁུངས་སུ་སྙན་གསེང་ཞུས་མེད་པ་དང་། ཁོང་ཅག་ལ་ཡུལ་སྐོར་སྤྲོ་འཆམ་པའི་ཐོངས་མཆན་ལས་ལས་ཀ་བྱེད་པའི་ཡིག་ཆ་མེད་པར་ཁྲིམས་འགལ་ཡིན་ཚུལ་གྱིས་འཇུ་བཟུང་དང་། རྒྱ་ནག་གི་གསང་ཉུལ་བ་ཡིན་པའི་དོགས་གཞིའི་འོག་མངའ་སྡེ་ཉེན་རྟོག་པ་དང་རྒྱ་གར་གསང་པའི་ལས་ཁུངས་ཀྱིས་འདྲི་ཞིབ་བྱས་ཡོད་འདུག

ལས་བཟོ་བ་དེ་དག་གི་ཐོངས་མཆན་སྟེང་(Republic of China) ཞེས་བྲིས་ཡོད་སྟབས་རྒྱ་གར་ཉེན་རྟོག་པས་ཁོང་ཚོ་རྒྱ་མི་ཡིན་པའི་ངོས་འཛིན་འོག་གསང་ཉུལ་བའི་དོགས་གཞི་བྱུང་ཡོད་ཀྱང་། རྗེས་སུ་ཐའེ་ཝན་ཕྱི་སྐྱོད་ཐོངས་མཆན་སྟེང་(Republic of China) ཞེས་འགོད་ཀྱི་ཡོད་པ་དང་། རྒྱ་ནག་སྐམ་ས་ནས་ཡིན་ཚེ་ (People’s Republic of China) ཞེས་འགོད་ཀྱི་ཡོད་པ་ཤེས་རྟོགས་བྱུང་འཕྲུལ་ཁོང་ཚོ་ཐའེ་ཝན་ནས་ཡིན་པ་ཁ་གསལ་ཆགས་ཡོད།

ཧི་མ་ཅཱལ་སྤྱི་ཁྱབ་བློན་ཆེན་ཌུ་མལ་(PK Dhumal) མཆོག་གིས་འཛིན་བཟུང་བཀག་ཉར་བྱས་པའི་རྒྱ་རིགས་དེ་དག་ཐའེ་ཝན་བརྒྱུད་དེ་ཡོང་མཁན་རྒྱ་ནག་སྐམ་སའི་མི་ཡིན་སྲིད་པ་དང་། རྒྱ་གར་དབུས་གཞུང་གིས་ཧི་མ་ཅཱལ་ནང་དང་ས་མཚམས་ཁག་ཏུ་རྒྱ་ནག་གི་འགུལ་སྐྱོད་ལ་དོགས་ཟོན་བྱ་དགོས་པའི་ལམ་སྟོན་ཡོད་པ་ལྟར་གཟབ་ནན་བྱེད་ཀྱི་ཡོད་སྐོར། ཉེ་སྔོན་རྒྱ་ནག་གཞུང་གིས་༧གོང་ས་མཆོག་གི་སྐུ་ཕྱྭར་གནོད་འཚེ་བྱ་འཆར་གྱི་གནས་ཚུལ་ཐོན་པ་ནས་རྒྱ་གར་གཞུང་གིས་རྒྱ་ནག་གི་འགུལ་སྐྱོད་ཐད་དམིགས་བསལ་དོ་སྣང་བྱེད་མགོ་ཚུགས་ཡོད་ཚུལ་སོགས་བརྗོད་འདུག

གསར་འགོད་པས་དབུས་བོད་མིའི་སྒྲིག་འཛུགས་བདེ་སྲུང་དྲུང་ཆེ་དངོས་གྲུབ་རྡོ་རྗེ་ལགས་སུ་གོང་གསལ་གནས་ཚུལ་སྐོར་མཁྱེན་རྟོགས་ཡོད་མེད་བཀའ་འདྲི་ཞུས་པར། ཁོང་གིས་ “གནས་ཚུལ་དེ་འདྲ་ཞིག་གོ་ཐོས་བྱུང་། ཡིན་ནའང་མི་དེ་དག་གིས་ཐའེ་ཝན་གྱི་ཐོངས་མཆན་ཞུས་ཏེ་ཡོང་ཡོད་སྟབས། ང་ཚོས་ཐའེ་ཝན་རང་ནས་ཡིན་པ་ཞིག་ལ་ངོས་འཛིན་བྱ་དགོས་པ་ཞིག་ཆགས་ཡོད། གནད་དོན་དེའི་སྐོར་འདིར་དམིགས་བསལ་འབྲེལ་བ་ཞུ་མཁན་དེ་འདྲ་བྱུང་མ་སོང”ཞེས་བརྗོད་བྱུང་།

ད་ཆར་མི་དེ་དག་ཧི་མ་ཅཱལ་མངའ་སྡེའི་མན་ཌེ་(Mandi) རྫོང་ཁོངས་ཀྱི་ཇོ་གྷེན་ཌར་ནཱ་གྷར་(Jogindernagar) ཁྲིམས་ཁང་དུ་ཡོད་ཅིང་། མི་དེ་དག་གིས་ཅཱོན་ཊི་རཱ་ས་གནས་ཀྱི་བཀའ་བརྒྱུད་པའི་སྤྲུལ་སྐུ་ཞིག་བླ་བྲང་འཛུགས་སྐྲུན་ཐད་ལས་ཀ་བྱེད་ཀྱི་ཡོད་པ་དང་། དགོན་པ་འཛུགས་སྐྲུན་གྱི་ས་ཆ་དེ་ཚེ་བརྟན་ཕུན་ཚོགས་ཞེས་པའི་བོད་མི་ཞིག་གི་མིང་ཐོག་ན་ཡོད་སྟབས། ཚེ་བརྟན་ཕུན་ཚོགས་ཟེར་བ་དེ་ཡང་ཉེན་རྟོག་པས་འབོད་འགུག་གིས་ཁྲིམས་ཁང་དུ་འདྲི་རྩད་བྱེད་ཀྱི་ཡོད་འདུག  

ཅཱོན་ཊི་རཱ་ས་གནས་ལས་ཁུངས་ལ་ཁ་པར་བརྒྱུད་གནས་ཚུལ་དྲིས་སྐབས། མིང་ལ་ཚེ་བརྟན་ཕུན་ཚོགས་ཟེར་བའི་མི་ཞིག་གི་མིང་ཐོག་ཏུ་ཡོད་པའི་ས་ཆའི་སྟེང་ཁང་པ་རྒྱག་གི་ཡོད་པ་དེའི་ལས་བཟོ་བ་མི་ ༨ ལ་ཉེན་རྟོག་པས་དོགས་གཞིའི་འོག་འཇུ་བཟུང་བྱས་ཡོད་ཀྱང་། རྗེས་སུ་ཁོ་ཚོ་ཐའེ་ཝན་ནས་ཡིན་པ་ར་འཕྲོད་བྱུང་ཡོད་པ་དང་། ད་ཆར་ས་གནས་ཁྲིམས་ཁང་དུ་ཡོད་ཀྱང་གནས་ཚུལ་ཚབས་ཆེན་དེ་འདྲ་མིན་པར་ཉིན་གཅིག་གཉིས་ནང་ཐག་གཅོད་གཙང་མ་ཆགས་རྒྱུ་ཡིན་ཚུལ་བརྗོད་བྱུང་།

གསར་འགོད་པ། བནྡེ་སྐྱབས།