བདུན་ཕྲག་འདིའི་ནང་༸གོང་ས་མཆོག་གིས་ཨི་ཊ་ལི་དང་སི་ཁོ་ཊི་ལན་ཌི་གཉིས་ནང་གྲོས་ཚོཊ་འཐུས་མི་ཚོར་མཇལ་འཕྲད་དང་། ས་ཡོམ་གནོད་འཚེ་ཕོག་མཁན་ཚོར་ཐུགས་གསོ། དེ་བཞིན་ས་གནས་མང་ཚོགས་ལ་བཀའ་སློབ་བཅས་བསྩལ་འདུག
ཟླ་འདིའི་ཕྱི་ཚེས་ ༢༤ ཉིན་༸གོང་ས་མཆོག་གིས་ཨི་ཊ་ལིའི་མཱེ་རན་ཌོ་ལཱ་(Mirandola)ས་གནས་སུ་ཆིབས་བསྒྱུར་གྱིས་ཁུལ་དེའི་ས་ཡོམ་གནོད་འཚེ་ཕོག་མཁན་ཚོར། སེམས་ཤུགས་མི་ཆག་པར་དཀའ་ངལ་ལས་རྒྱལ་དགོས་པའི་བཀའ་སློབ་བསྩལ་ཡོད་པ་མ་ཟད། ས་ཡོམ་གཏོར་བཤིག་ཐེབས་པའི་ཤུལ་ལུས་ནང་མི་ཚོར་གཟིགས་སྐོར་དང་འབྲེལ་ཏེ་ཨ་སྒོར་ཁྲི་༥ ཞལ་འདེབས་སུ་གནང་འདུགདེའི་རྗེས་ཨི་ཊ་ལིའི་ལྷོ་ཕྱོགས་གྲོང་ཁྱེར་མཱ་ཊེ་རཱ་(Matera)ནང་། ནོ་སྦེལ་ཞི་བདེ་གཟེངས་རྟཊ་ཐོབ་མཁན་ལྕམ་བྷེ་ཊེ་ཝེ་ལིན་ (Betty Williams)མཆོག་གིས་གསར་རྒྱག་བྱས་པའི་ཞི་བདེ་གྲོང་ཞེས་པར་གཟིགས་སྐོར་གནང་འདུག
ཕྱི་ཚེས་༢༢ཉིན་༸གོང་ས་མཆོག་གིས་སི་ཁོ་ཊི་ལན་ཌིའི་སིག་ནེ་ཌི་དཔེ་མཛོད་ཁང་ (Signet Library)དུ། གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་ཁག་ཅིག་ལ་མཇལ་འཕྲད་གནང་སྟེ། ཕན་ཚུན་གཅིག་ལ་གཅིག་རྟེན་གྱི་དུས་རབས་འདིར་རང་གི་བདེ་དོན་བསྒྲུབ་ཆེད་གཞན་གྱི་བདེ་དོན་སྣང་མེད་དུ་འཇོག་མི་རུང་བ་དང་། ལོ་༣༠༠ ཙམ་གྱི་གོང་ཚན་རིག་ལག་རྩལ་ཡར་རྒྱས་ཕྱིན་སྟེ། ད་ཆར་འཕྲུལ་ཆས་ཡར་རྒྱས་ཚད་མཐོན་པོར་སོན་ཡོད་ཀྱང་། མི་མང་པོ་ཞིག་གིས་ཕྱིའི་དངོས་པོ་ཁོ་ན་ལས་ནང་སེམས་ཀྱི་རིན་ཐང་ལ་དོ་སྣང་དེ་ཙམ་སྤྲོད་ཀྱི་མེད་སྐོར་དང་། སེམས་འཇིགས་སྣང་དང་ཁོང་ཁྲོའི་གཞན་དབང་དུ་སོང་ན་བྱམས་བརྩེའི་བསམ་བློ་དེ་ཧ་ཅང་གལ་ཆེན་ཡིན་ཚུལ་གསུངས་འདུག
དེའི་རྗེས་སི་ཁོ་ཊི་ལན་ཌིའི་རྒྱལ་ཡོངས་དཔེ་མཛོད་ཁང་དུ་ཆིབས་བསྒྱུར་གྱིས་བོད་ཀྱི་རིག་གཞུང་དང་འབྲེལ་བའི་དཔེ་དེབ་དང་འདྲ་པར། དངོས་རྫས་ཁག་ཅིག་ལ་གཟིགས་ཞིབ་གནང་རྗེས། ཁུལ་དེའི་གསར་འགོད་པའི་བཅར་འདྲི་དང་ལེན་གནང་ཡོད་འདུག སྐབས་དེར་རྒྱལ་ས་ཨེ་ཌིན་བྷག་ཨུ་ཤར་ཚོགས་ཁང་ (Usher Hall)དུ། མི་མང་སྟོང་ཕྲག་བརྒལ་བར་ཆོས་དང་མ་འབྲེལ་བའི་འཛམ་གླིང་ཧྲིལ་པོའི་ཀུན་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་བསྩལ་ཡོད་པ་མ་ཟད། གསུང་ཆོས་གོ་སྒྲིག་ཚོཊ་པས་༸གོང་ས་མཆོག་ལ་ཊར་ཊན་ཞི་བདེའི་གཟེངས་རྟགས་ (Tartan for Peace)ཞེས་པ་ཞིག་འབུལ་ལམ་ཞུས་འདུག
ཕྱི་ཚེས་ ༢༣ཉིན་སི་ཁོ་ཊི་ལན་ཌིའི་གྲོང་ཁྱེར་ཨིན་ཝར་ནེ་སིར་ (Inverness)ནང་ཆིབས་སྒྱུར་བསྐྱངས་ཏེ། རྒྱལ་སྤྱིའི་གསར་ཤོག་འབྲེལ་མཐུད་ཚན་ཁག་གི་གསར་འགོད་པའི་དྲི་བར་བཀའ་ལན་བསྩལ་སྐབས། རྒྱ་ནག་དབང་ཆ་གཅིག་སྡུད་སྲིད་གཞུང་དེ་ནི་ད་ཆར་དྲག་ཤུགས་དང་གདུག་རྩུབ།འཇིཊ་སྣང་། ཕན་ཚུན་ཡིད་ཆེས་མེད་པའི་གནས་སྟངས་འོག་ལྷུང་ཡོད་སྟབས། རྒྱ་གཞུང་གིས་བདེན་པ་མིན་པའི་གནས་ཚུལ་གང་ཐུབ་ཀྱིས་སྦས་གསང་བྱེད་ཀྱིོ་ཡོད་སྐོར་གསུངས་ཏེ། “རྒྱ་ནག་མི་མང་དུང་ཕྱུར་༡༣ ལ་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཆ་ཚང་ཡོད། དངོས་ཡོད་གནས་ཚུལ་ཤེས་པའི་ཐོག་བདེན་རྫུན་འབྱེད་རྒྱུའི་རྣམ་དཔྱོད་ཡོད་སྟབས། རྒྱ༌གཞུང་གིས་རྒྱ་ནག་མི་དམངས་ཀྱི་འགྲོ་འདུག་རང་དབང་ལ་དམ་དྲག་བྱེད་པ་དེ། འགྲོ་བ་མིའི་བཟང་སྤྱོད་དང་ཡོངས་སུ་འགལ་ཡོད་ལ། དེ་ནི་མིག་རྒྱང་ཐུང་བའི་བྱེད་སྟངས་ཤིག་ཡིན ” ཞེས་གསུངས་ཡོད།
དེའི་རྗེས་༸གོང་ས་མཆོག་ཡུལ་དེའི་ཨི་ཌན་ཀོ་ཊའི་ཚོགས་ཁང་(Eden Court Theatre)དུ་ཆིབས་བསྒྱུར་བསྐྱངས་ཏེ་ཆོས་ལུགས་རིས་མེད་ཀྱི་དབུ་ཁྲིད་ཁག་གཅིག་དང་མཇལ་འཕྲད༌གནང་འདུག
ཨི་ཊ་ལིའི་མཛད་འཕྲིན་ཁག་ལེགས་པར་འགྲུབ་རྗེས་ཕྱི་ཚེས་ ༢༨ ཉིན་ཕྱིར་རྒྱ་གར་ནང་ཆིབས་བསྒྱུར་བསྐྱང་རྒྱུ་ཡིན་འདུག
སྔོན་བྱོན་མཁས་པས་རང་རྒྱུད་སྨིན་བྱེད་ཕར་ཕྱིན་དྲུག གཞན་རྒྱུད་སྨིན་བྱེད་འདུ་བའི་དངོས་པོ་བཞི་ཞེས་གསུངས་པ་ལྟར། ༸མགོན་པོ་མཆོག་གིས་ཆོས་དང་ཟང་ཟིང་གིས་ས་སྟེང་ཁྱབ་པར་མཛད་དོ།།
༸གོང་ས་༸སྐྱབས་མགོན་ཆེན་པོ་སྐུ་ཚེ་ཡུན་ནས་ཡུན་དུ་གནས་པའི་བཀྲ་ཤིས་སྨོན་འདུན་དང་བཅས།།