བོད་མི་མང་སྤྱི་འཐུས་ལྷན་ཚོགས་ཀྱིས་འདི་ལོའི་༸གོང་ས་མཆོག་གི་འཁྲུངས་སྐར་ཉིན་ནས་བཟུང་ཟླ་གསུམ་རིང་རྒྱ་གར་རྒྱལ་ཡོངས་ཀྱི་གྲོང་ཁྱེར་ཁག་དང་ཕྱི་རྒྱལ་ཡུལ་གྲུ་ཁག་བཅས་སུ་བདེན་པའི་མེ་ལྕེ་སྐོར་སྐྱོད་དང་མཚན་རྟཊ་བསྡུ་རུབ་ཀྱི་ལས་འགུལ་ཞིག་སྤེལ་རྒྱུ་རེད།
དེ་རིང་ཕྱི་ཚེས་ ༢༧ ཉིན་གྱི་སྔ་དྲོའི་ཆུ་ཚོད་ ༡༡། ༣༠ བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་བོད་མི་མང་སྤྱི་འཐུས་ལྷན་ཚོགས་ཀྱིས་གསར་འགོད་གསལ་བསྒྲགས་བསྐྱངས་ཏེ། ད་ལྟའི་བོད་ནང་གི་ཛ་དྲག་གནས་བབ་ལ་གཟིགས་ཏེ་བོད་མི་མང་སྤྱི་འཐུས་ལྷན་ཚོགས་ཀྱིས་ལས་འགུལ་སྣ་མང་སྤེལ་ཆེད། འདི་ལོའི་ཕྱི་ཟླ་ ༣ པའི་ཚེས་ ༢༢ ཉིན་གྱི་སྤྱི་འཐུས་ནང་ཁུལ་བཞུགས་མོལ་ཚོགས་འདུའི་ཐོག་བཀའ་བསྡུར་དང་། ཕྱི་ཟླ་ ༣ པའི་ཚེས་ ༢༧ ཉིན་སྤྱི་འཐུས་རྒྱུན་ལས་ཀྱིས་ཐག་གཅོད་གནང་པ་ལྟར། ཕྱི་ཟླ་ ༧ ཚེས་ ༦ ཉིན་ནས་མགོ་འཛུགས་ཀྱིས་རྒྱ་གར་རྒྱལ་ཡོངས་དང་། ཕྱི་རྒྱལ་ཡུལ་གྲུ་ཁག་ཏུ་བདེན་པའི་མེ་ལྕེ་སྐོར་སྐྱོད་དང་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་རྒྱུ་ཡིན་པའི་གསལ་བསྒྲགས་གནང་སོང་།
གསར་འགོད་གསལ་བསྒྲགས་ཐོག་ཐེངས་འདིའི་བདེན་པའི་མེ་ལྕེ་སྐོར་སྐྱོད་ཚོགས་ཆུང་གི་ཚོགས་གཙོ་སྤྱི་འཐུས་པདྨ་འབྱུང་གནས་ལགས་དང་ཚོགས་དྲུང་སྤྱི་འཐུས་ཀརྨ་ཡེ་ཤེས་ལགས། ཚོགས་མི་སྤྱི་འཐུས་སྨོན་ལམ་མཐར་ཕྱིན་ལགས། སྤྱི་འཐུས་འཇམ་དབྱངས་བཟོད་པ་ལགས། སྤྱི་འཐུས་རྒྱ་རིགས་མཐར་ལགས་བཅས་ཕེབས་འདུག་ལ། སྐབས་དེར་སྤྱི་འཐུས་པདྨ་འབྱུང་གནས་ལགས་ཀྱིས་གསལ་བསྒྲགས་སྤེལ་བའི་ནང་། “ཕྱི་ལོ་ ༢༠༠༨ ལོ་ནས་བཟུང་བོད་ས་ཡོངས་སུ་རྒྱ་དམར་དྲག་དམག་གིས་དམར་གསོད་བཙོན་འཇུག་སོགས་ཀྱི་སྡུག་སྦྱོང་མནར་གཅོད་ཉིན་བཞིན་ཛ་དྲག་ཏུ་འགྲོ་བཞིན་པའི་ཉེན་ལེན་ལ་བརྟེན། བོད་མི་རྣམས་ཀྱིས་དམྱལ་བ་མི་ཡུལ་དུ་འཕོས་པ་ལྟ་བུའི་སྡུག་བསྔལ་བཟོད་མ་ཐུབ་པར་བོད་དོན་བདེན་མཐའ་གསལ་ཆེད་དང་། ༸གོང་ས་མཆོག་བོད་ལ་གདན་འདྲེན་ཞུ་ཐབས། མྱོང་བཞིན་པའི་སྡུག་བསྔལ་རྣམས་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་གཞུང་སྒེར་ཚོགས་སྡེ་ཁག་གཙོས་དུས་རབ་ཉེར་གཅིག་པའི་འགྲོ་བ་མིའི་རིགས་ལ་སྙན་གསན་དང་། སེམས་ཁོང་གི་སྡུག་བསྔལ་དང་མངོན་འདོད་ཕྱིར་བསྒྲགས་བྱེད་པའི་དན་རྟགས་སུ་རང་ལུས་མེར་བསྲེགས་གཏོང་མཁན་བར་མེད་དུ་བྱུང་དང་འབྱུང་བཞིན་པར། འདི་ནས་ཀྱང་ཁོང་རྣམ་པའི་ཀུན་ཕན་སེམས་བསྐྱེད་ཀྱི་སྙིང་སྟོབས་དང་མངོན་འདོད་ཇི་བཞིན་རྒྱལ་སྤྱིའི་སྤྱི་ཚོགས་ལ་བརྒྱུད་བསྒྲགས་བྱ་ཆེད། བདེན་པའི་མེ་ལྕེ་སྐོར་སྐྱོད་ཀྱི་གཞི་རྒྱ་ཆེ་བའི་ལས་འགུལ་འདི་བཞིན་ཕྱི་ལོ་ ༢༠༡༢ ལོའི་ཟླ་ ༧ པའི་ཚེས་ ༦ སྟེ་༸གོང་ས་མཆོག་གི་སྐུའི་འཁྲུངས་སྐར་ཉིན་མོ་དང་བསྟུན་ཏེ་མགོ་འཛུགས་བྱ་རྒྱུ་ཡིན། ཞེས་བཀོད་ཡོད་པ་དང་།
ཐེངས་འདིའི་ལས་འགུལ་གྱི་དགོས་འདུན་ཁག་ནི། དང་པོ། ཕྱི་ལོ་ ༡༩༥༩ དང་ ༡༩༦༡ ། ༡༩༦༥ སོ་སོར་འཛམ་གླིང་མཉམ་འབྲེལ་རྒྱལ་ཚོགས་ཀྱིས་བོད་དོན་ཐོག་བཞག་པའི་གྲོས་ཆོད་ཁག་སླར་ཡང་རྒྱལ་ཚོགས་ནས་གླེང་སློང་དང་ལག་བསྟར་མཇུག་གནོན་བྱ་རྒྱུ་དང་། གཉིས་པ། བོད་ནང་གི་ད་ལྟའི་ཛ་དྲག་གནས་སྟངས་རྟོག་ཞིབ་སླད་རང་དབང་ཅན་གྱི་རྒྱལ་སྤྱིའི་སྐུ་ཚབ་ཁག་ཅིག་འཕྲལ་གཏོང་གནང་རྒྱུ། གསུམ་པ། བོད་ནང་གི་བོད་མིའི་མངོན་འདོད་བསྒྲུབ་རྒྱུར་མཉམ་འབྲེལ་རྒྱལ་ཚོགས་ཀྱིས་དམིགས་བསལ་འགན་འཁུར་བཞེས་རྒྱུ་བཅས་རེད་ལ། དགོས་འདུན་དེ་དག་བསྒྲུབ་ཆེད་རྒྱ་གར་གཙོས་རྒྱལ་སྤྱིའི་ས་གནས་ཡུལ་གྲུ་སོ་སོར་བདེན་པའི་མེ་ལྕེ་སྐོར་སྐྱོད་ཀྱི་མཚན་རྟགས་བསྡུ་རུབ་ཀྱིས་ཕྱི་ལོ་ ༢༠༡༢ ཟླ་ ༡༢ ཚེས་ ༡༠ ཉིན་ཨ་རི་ནེའུ་ཡོག་རྒྱལ་ཚོགས་ལས་ཁུངས་དང་། སུད་སི་ཇི་ནི་ཝར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས། དེ་བཞིན། རྒྱ་གར་ནང་རྟེན་གཞི་བྱས་པའི་རྒྱལ་ཚོགས་ཀྱི་ཡན་ལག་ལས་ཁུངས་སོ་སོར་ ཉིན་བརྒྱ་དུས་གཅིག་ཏུ་ཞུ་སྙན་ཕུལ་ཏེ་མཇུག་བསྡོམས་ཞུ་རྒྱུ་ཡིན། ཞེས་བཀོད་འདུག
ཐེངས་འདིའི་ལས་འགུལ་དེ་འཆར་ཟླའི་ཚེས་ ༦ ཉིན་རྒྱ་གར་ལྷོ་ཕྱོགས་ཀོ་ཅི་གྲོང་ཁྱེར་ནས་མགོ་འཛུགས་ཀྱིས་གྲོང་ཁྱེར་དང་ས་གནས་ཁག་ ༡༦ དང་། རྒྱ་གར་བྱང་ཕྱོགས་ལ་དྭགས་སླེ་ནས་མགོ་འཛུགས་ཀྱིས་གྲོང་ཁྱེར་དང་ས་གནས་ ༡༨ ། རྒྱ་གར་བྱང་ཤར་ཁུལ་གྱི་ཤི་ལོང་ནས་ས་གནས་ ༡༨ བཅས་སུ་ས་གནས་མགོ་འཛིན་ཡོད་པའི་ས་གནས་ཁག་ཏུ་ས་གནས་མགོ་འཛིན་གྱི་སྣེ་འཁྲིད་རྒྱུ་དང་། དེ་བཞིན། གཞུང་འབྲེལ་མིན་པའི་ཚོགས་པ་ཁག་དང་བོད་དོན་རྒྱབ་སྐྱོར་ཚོགས་པ་བཅས་མཉམ་རུབ་ཀྱིས་སྣེ་འཁྲིད་དེ་ས་གནས་རིམ་པར་རྩིས་སྤྲོད་ཐོག་སྐོར་བསྐྱོད་བྱ་རྒྱུ་ཡིན་འདུག
ཕྱི་རྒྱལ་ཡུལ་གྲུ་ཁག་ཏུ་ཕྱི་ཟླ་ ༩ བའི་ཚེས་ ༢ ཉིན་ནས་བཟུང་མགོ་འཛུགས་བྱས་ཏེ། དོན་གཅོད་ཁག་དང་བོད་རིགས་སྤྱི་མཐུན་ཚོགས་པ་ཁག བོད་དོན་རྒྱབ་སྐྱོར་ཚོགས་པ་བཅས་མཉམ་རུབ་ཐོག་སྐོར་བསྐྱོད་ཀྱིས་ཕྱི་ཟླ་ ༡༢ པའི་ཚེས་ ༡༠ ཉིན་ས་གནས་ཁག་ཡོངས་ཀྱི་མཚན་རྟགས་གཞི་གཅིག་ཏུ་བསྡུས་རྗེས། ཨ་རིའི་ནེའུ་ཡོག་རྒྱལ་ཚོགས་ལས་ཁུངས་དང་ཇི་ནེ་ཝ་རྒྱལ་ཚོགས་འགྲོ་བ་མིའི་ཐོབ་ཐང་ལས་ཁུངས། རྒྱ་གར་ནང་རྟེན་གཞི་བྱས་པའི་རྒྱལ་ཚོགས་ལས་ཁུངས་བཅས་སུ་ཉིན་རྒྱ་དུས་གཅིག་ཏུ་སྙན་ཞུ་དང་མཚན་རྟགས་བཅས་དང་མཉམ་དུ་བདེན་པའི་མེ་ལྕེའི་དཔལ་འབར་རེ་རེ་བཅས་འབུལ་རྒྱུ་ཡིན་འདུག
གསར་འགོད་པ། དོན་གོ
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
དུས་བབ་ཚང་ནས་སྤྱིའི་ལས་དོན་ལ་ཁུང་མེད་ཟུར་ཟ་དང་སྐྱོན་འཛུགས་བྱེད་པའི་མཆན་འདི་རིགས་ངེས་པར་དུ་འགོག་དགོས་ཀྱི་འདུག །དེ་དོན་དགོངས་བཞེས་གནང་བའི་རེ་བ་ཡོད།
སྤྱི་འཐུས་རྣམ་པའི་ལས་འགུལ་ལ་རྒྱབ་སྐྱོར་ཡོད། སྐྱག་འབུ་ཚོའི་སྐྱག་བཤད་དེ་ཚོ་ཨ་མཆོག་རྒྱབ་ཀྱི་ལྷག་པར་བཏང་གནང་ན་འགྲིག་གི་རེད། སྐྱག་འབུ་ཚོས་ལས་ཀ་བྱས་ན་ཡང་སྐྱོན་བརྗོད་བྱེད་ཀྱི་རེད་ལ་མ་བྱས་ན་ཡང་སྐྱོན་བརྗོད་བྱེད་ཀྱི་རེད། ཁོང་ཚོས་སྐྱོན་བརྗོད་མ་བཏོགས་ཅི་གང་ཤེས་ནི་མ་རེད། འདི་ཚོ་ལ་རྣམ་པ་ཚོ་ཐུགས་ཕམ་དགོས་ཀྱི་མ་རེད་ལ། དོ་སྣང་ཡང་གནང་དགོས་དོན་མེད་པ་རེད།
སྤྱི་འཐུས་མགོ་བདེ་བོ་ཁ་ཤས་ཤིག་ཕྱི་རྒྱལ་དུ་ཕེབས་འདོད་བྱུང་ནས་ལས་འཆར་ཡག་པོ་སྒྲིག་འདུག ཨེ་ད། པེད་ཤག་མང་པོ་འགྲོ་ཡི་མེད་འགྲོ འབྲས་བུ་ཞིག་དང་ཁྱབ་བསྒྲགས་སྔར་མེད་ཅིག་བྱུང་ན་ཡག་པོ་རེད། ད་ལྟ་རྒྱུ་རེད།
སྤྱི་འཐུས་ལྷན་རྒྱས་ཀྱི་ལས་འགུལ་ལ་དགའ་བསུ་ཞུ།
བོད་བསྟན་སྲིད་ཀྱི་ཆེད་དུ་རང་ལུས་མེར་བསྲེགས་གཏོང་མཁན་དཔའ་བོ་དཔའ་མོ་རྣམས་ཀྱི་སེམས་སྐྱེད་དང་སྙིང་སྟོབས་མངོན་བསྟོད་སོགས་ཀྱི་ཆེད་དུ་ཡིན་པའི་ལས་འགུལ་འདིར་དགའ་བསུ་ཡོད།
འོན་ཀྱང་། བདེན་པའི་མེ་ལྕེའི་དཔའ་འབར་དེ་ཐོག་མར་ཡར་བསྒྲེངས་པའི་གསལ་བསྒྲགས་སྤེལ་སྐབས་འདི་འདྲ་ལའང་། རྫིག་མདོག་ཁ་པོའི་ངང་རྐུབ་སྟེགས་སྒང་ལ་བཞུགས་སྟངས་འདིས། ལས་འགུལ་འདིའི་འགན་ཁུར་མཁན་དང་གསལ་བསྒྲགས་ཐོག་མ་བསྐྱངས་མཁན་ཚོར་སེམས་ཚོར་དམིགས་བསལ་བ་ཞིག་མེད་པར་མཐོང་སོང་། དམའ་མཐའ་ལའང་རང་སྲོག་བློས་གཏོང་གནང་མཁན་དཔའ་བོ་ཚོའི་ཆེད་དུ་སྐུ་བཞེངས་ཤིག་གནང་བཞག་ན་མ་འགྲིག་པ་ཅི་ཡོད།
སྐུ་ངོ་རྣམ་པ་ཆེ་དྲག་པས་རེད་དམ་ག་རེ་རེད། མང་ཚོགས་ཀྱི་བསོད་ནམས་དམན་པས་རེད་དམ་ག་རེ་རེད། འདས་པོ་དེ་དག་གི་མངོན་འདོད་འདེགས་པའི་ཆེད་ཡིན་ན། སྐུ་བཞེངས་ཤིག་གནང་བཞག་ན་དེས་སྐུ་ངོ་ཚོ་གང་ཞིག་ལ་ཟགས་འགྲོ་གི་མ་རེད་པ།
སྤྱི་འཐུས་རྣམ་པ་ལ་སྙིང་ནས་ཐུགས་རྗེ་ཆེ་ཞུ། ། དེ་དང་མཉམ་དུ་གསལ་འདེབས་ཞུ་རྒྱུ་ཞིག་ལ་བདེན་པའི་མེ་ལྕེ་དེ་དག་རྒྱ་སྤྱིའི་སྡེང་ཆའི་སྟེང་ནས་སྐོར་སྐྱོད་བྱེད་སྐབས་བོད་ནང་གི་དཔའ་བོ་དེ་དག་གི་རང་རང་སོའི་མངོན་འདོད་དངོས་གནས་དེ་གང་ཡིན་པ་དང་དཔའ་བོ་དེ་དག་གིས་འཆི་ཁ་ཁ་ཆིམ་ཇི་ལྟར་བཞག་ཡོད་པ་དག། མ་ཆད་མ་ལྷག་པར་རྒྱལ་སྤྱིའི་སྡེང་ཆའི་སྟེང་སྐྱེལ་ཐུབ་པ་གནང་རོགས། གཞན་བཙན་བྱོལ་གྱི་གསར་འགྱུར་ལས་ཁང་ཁ་ཤས་ཀྱིས་བྱེད་ལུགས་ལྟར་རང་གི་ལྟ་བ་དང་ལང་ཕྱོགས་གང་ཡོད་པ་དེའི་ཕྱོགས་སུ་འགྲེལ་བཤད་ལོགས་པ་རྐྱང་རྐྱང་རྒྱབ་ནས་བསྡད་ན་གཞིས་བཞུགས་བོད་མི་རྣམས་ཀྱི་ངོ་ཚབ་བྱེད་ཐུབ་ཐབས་མེད་པས། གཞིས་ལུས་སྤུན་ཟླའི་མངོན་འདོད་དེ་དག་རེ་རེ་བཞིན་གསལ་པོ་གསལ་རྐྱང་གསལ་བཤད་དང་ཁྱབ་སྒྲགས་བྱེད་རོགས་ཞེས་གུས་ཞབས་དང་བཅས་ཏེ་ཕུལ།
བདེན་པའི་མེ་ལྕེའི་བསྐོར་བསྐྱོར་ཟེར་བའི་ལས་འགུལ་འདི་སྤེལ་དགོས་དང་མི་དགོས་ཐད་སྔོན་ཚུད་ནས་བསམ་གཞིགས་ནན་མོ་ཞིག་བྱ་དགོས། བོད་ནང་ད་བར་བོད་ནང་ད་བར་མི་བཞི་བཅུ་ཙམ་བདེན་པའི་མེ་ལྕེ་སྤར་ནས་སྐུ་སྲོག་དོར་ཡོད་པ་རེད།
བཙན་བྱོལ་ནང་ཉེ་བའི་འཆར་ཡང་བདེན་པའི་མེ་ལྕེའི་འཁྲོད་མི་གཅིག་གྲོང་ཡོད།
ད་དུང་བདེན་པའི་མེ་ལྕེ་ག་ཚོད་གཅིག་སྤོར་དགོས་དང་། མི་དགོས། དེར་གྲུབ་འབྲས་གཅིག་སོན་དང་མ་སོན་བཅས་ལ་ངེས་པར་བསམ་གཞིགས་བྱེད་དགོས་པའི་དུས་ལ་སླེབས་ཡོད།
གལ་ཏེ་བདེན་པའི་མེ་ལྕེ་དེ་མུ་མཐུད་སྤར་དགོས་ཚེ་ད་གཟོད་བོད་མི་དམངས་སྤྱི་འཐུས་དང་བོད་མི་འཐབ་རྩོད་པ་ཅན་ཚོས་འགོ་འཁྲིད་དེ་རང་སྔོན་ལ་རང་ཉིད་ཀྱི་ལུས་པོར་བདེན་པའི་མེ་ལྕེ་སྤར་ནས་སྣེ་འཁྲིད་དགོས།
དེ་རིང་སྤྱི་འཐུས་རྣམ་པས་་་་་་་་་བདེན་པའི་མེ་ལྕེ་སྐོར་སྐྱོད་ཚོགས་ཆུང་གི་ཚོགས་གཙོ་སྤྱི་འཐུས་པདྨ་འབྱུང་གནས་ལགས་དང་ཚོགས་དྲུང་སྤྱི་འཐུས་ཀརྨ་ཡེ་ཤེས་ལགས། ཚོགས་མི་སྤྱི་འཐུས་སྨོན་ལམ་མཐར་ཕྱིན་ལགས། སྤྱི་འཐུས་འཇམ་དབྱངས་བཟོད་པ་ལགས། སྤྱི་འཐུས་རྒྱ་རིགས་མཐར་ལགས་བཅས་ཕེབས་འདུག་ལ། སྐབས་དེར་སྤྱི་འཐུས་པདྨ་འབྱུང་གནས་ལགས་ཀྱིས་གསལ་བསྒྲགས་སྤེལ་བའི་ནང་།་་་་་་་ཞེས་དུས་བབ་ནང་འཁོད་པ་ལྟར་བདེན་པའི་མེ་ལྕེ་དངོས་འབྲེལ་ཞིག་སྤར་དགོས་ཚེ་ད་བོད་ནང་གཞི་ལུས་མི་དམངས་ཅན་ཚོ་རྐྱང་པ་མ་ཡིན་པར་བཙན་བྱོལ་བོད་མིའི་ལས་ཀྱི་སྣེ་མོར་གཏོགས་པའི་འགོ་བཀའ་ཁྲི་བློ་སེང་ནས་སྤྱི་འཐུས་རྣམ་པ་མཇུག་གད་པ་ཡན་ཆད་ཀྱིས་སྐུ་གཤེགས་དཔའ་བོ་འཇམ་དཔལ་ཡེ་ཤེས་ལྟར་སྔོན་ལ་ཁྱེད་ཚོས་བདེན་པའི་མེ་ལྕེ་སྤོར་ཐུབ་པ་བྱེད་དགོས།
དེ་མིན་གང་བྱུང་མང་བྱུང་གིས་བོད་ནང་བཙན་འོག་ཏུ་ལུས་པའི་གཞི་ལུས་མི་དམངས་ཀྱི་ཚེ་སྲོག་ལ་རྩོད་མོ་རྩེད་དྲགས་པ་དང་། གཞི་ལུས་མི་དམངས་ཀྱི་ཉིན་རེའི་འཚོ་བའི་གནས་སྟངས། དཔལ་འབྱོར་གྱི་གནས་སྟངས། ཁྱིམ་ཚང་གི་གནས་སྟངས་སོགས་ཚང་མར་བསམ་བློ་མ་བཏང་བར་གང་བྱུང་ཡིད་ལ་གང་དྲན་བྱེད་དྲགས་ན་མ་འོངས་པར་འཇུག་འབྲས་ངན་པ་ཞིག་ཡོང་ངེས་རེད།
གང་ལྟར་ངས་གསལ་བཤད་བྱས་པ་འདི་ང་བོད་རིགས་གཅིག་ཡིན་པ་དང་། བོད་ཀྱི་རྩ་དོན་དང་བོད་དོན་ལ་དགའ་ཞེན་དང་ཤ་ཚ་གཅིག་གིས་ངོས་ནས་བཤད་བཞིན་ཡོད་པ་ལས་དེར་ངས་མཐའ་གཅིག་ཏུ་ངོ་རྒོལ་བྱེད་ཀྱིན་མེད།
ང་ཚོས་ཕྱི་ཕྱོགས་ནས་བསམ་བློ་ཡག་པོ་ཞིག་མ་བཏང་ན་མ་འོངས་པ་ན་གཞི་ལུས་བོད་ནང་རྦད་དེ་རེ་ཐག་དང་། ཡིད་ཐང་ཆད་པའི་ཉིན་མ་ཤར་ཚེ་དེ་དུས་སུས་ཀྱང་བྱ་ཐབས་མེད་པ་ཞིག་ཏིུ་འགྱུར་ངེས་ཡིན།
ལས་འགུལ་འདི་མི་སྒེར་པ་དང་། ཚོགས་སྡེ་བྱ་བྲག་པ་ཞིག་གིས་ངོ་བོའི་ཐོག་ནས་སྤེལ་གྱིན་མེད་པར་བཙན་བྱོལ་བོད་མིའི་སྒྲིག་འཛུགས་ཀྱི་བོད་མི་དམངས་སྤྱི་འཐུས་ཀྱིས་སྤཻལ་གྱིན་ཡོད་སྟབས་སྔོན་ལ་བསམ་གཞིགས་ཡག་པོ་བྱེད་དགོས།
བྱ་བ་ལམ་ལྷོངས་དང་། རྩ་དོན་ལ་ཕན་འབྲས་ཡོང་བའི་རེ་བ་དང་ཡིད་ཆེས་ཡོད།
སྤྱི་འཐུས་འདི་རྣམས་ལ་ལས་ཀ་ཞིག་ཐོན་པ་ཞེ་དྲག་ཡག་པོ་རེད། ཡིན་ནའང། འགོ་ཁྱོན་ནས་འཚོས་མེད་པ་ཞིག་ལ་མཉམ་འབྲེལ་རྒྱལ་ཚོགས་ཀྱི་༡༩༥༩ དང་ ༡༩༦༡ ། ༡༩༦༥ ལོའི་གྲོས་ཆོད་དེ་དག་གི་མ་གདན་ཁ་རང་ལྷ་སའི་སྡེ་བ་གཞུང་གི་དོན་དག་ཅིག་རེད་མ་གཏོགས། དེར་བོད་ཆོལ་ཁ་གསུམ་ག་བ་ཡོད། མེད་པཱ། དེ་བས་གནའ་ཤི་རུལ་བ་དེ་འདྲ་ཁྱེར་མ་ཡོང་ན་ཡག་གི་རེད། མི་ཤེས་ན་སྡོད་རོགས།།།།