དགའ་ལྡན་ཏྲེ་ཧོར་ཁམས་ཚན་གྱི་གྲྭ་ཡ་མ་ཚེ་རིང་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ཁ་སང་ཕྱི་ཟླ་ ༧ པའི་ཚེས་ ༦ ཉིན་འཛམ་གླིང་ཡུལ་གྲུ་གང་སར་ཡོད་པའི་བཙན་བྱོལ་བོད་མི་དང་བོད་དོན་རྒྱབ་སྐྱོར་བ་བཅས་ཀྱིས་༸གོང་ས་མཆོག་དགུངས་གྲངས་ ༧༧ ལ་ཕེབས་པའི་སྐུའི་འཁྲུངས་སྐར་སྲུང་གཙི་གནང་ཡོད་པ་ལྟར། བོད་ནང་གི་ཁམས་རྟའུ་རུ་བོད་མི་ཚོས་རྒྱ་ནག་གཞུང་གིས་རྟའུ་ས་གནས་ཀྱི་རྨ་རྒྱལ་སྦོམ་ར་ཞེས་འབོད་པའི་རི་མགོ་ཡོངས་སུ་དམག་མིའི་བསྐོར་བ་དང་ས་གནས་སུ་དམ་དྲག་ཤུགས་ཆེར་བྱས་པའི་དབང་གིས་ནམ་རྒྱུན་ལྟར་རི་རྩེར་གསང་གསོལ་དང་ས་གནས་སུ་རྟ་རྒྱུགས་འགྲན་བསྡུར་སོགས་བྱས་ཐུབ་མེད་ཀྱང་། ཁ་སང་ཉ་མཚོ་དགོན་པའི་དགེ་འདུན་པ་དང་ས་གནས་མི་མང་གིས་དགོན་པའི་མདུན་གྱི་མཆོད་རྟེན་ཉེ་འཁྲིས་སུ་ལྷ་གསང་བཏང་ཡོད་པ་མ་ཟད། ༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་དགོན་པར་གདན་ཞུ་གནང་བ་དང་། སྐྱ་སེར་གཉིས་ཀྱིས་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་སོགས་བྱས་ཏེ་སྐུའི་འཁྲུངས་སྐར་སྲུང་གཙི་གནང་ཡོད་འདུག་ལ། དེ་བཞིན། ཁ་སང་མདོ་སྨད་ཀན་ལྷོ་ཁུལ་རྨ་ཆུ་རྫོང་མུ་ར་ས་ཁུལ་དུའང་རྒྱ་གཞུང་གིས་དམ་དྲག་དང་ལྟ་རྟོག་བྱས་མིན་ལ་མ་ལྟོས་པར། བོད་མི་བརྒྱ་ཕྲག་བརྒལ་བ་འདུ་འཛོམས་ཀྱིས་ས་གནས་ཀྱི་རི་རྩེར་ལྷ་གསང་བཏང་སྟེ་སྐུའི་འཁྲུངས་སྐར་སྲུང་གཙི་བྱས་ཡོད་འདུག
གནས་ཚུལ་ཤེས་རྟོགས་བྱུང་བ་ལྟར་ན། ད་ལྟའི་ཆར་བོད་ནང་གི་བོད་མི་ཚོས་སྔར་དང་མི་འདྲ་བར་༸གོང་ས་མཆོག་གི་འཁྲུངས་སྐར་གྱི་ཉིན་མོར་དོ་སྣང་ཆེན་པོ་བྱེད་ཀྱི་ཡོད་འདུག་ལ། ལྷག་པར་དུ་ལྷ་སའི་ས་གནས་གང་སར་རྒྱ་གཞུང་གིས་དམག་མི་སྟོང་ཕྲག་མང་པོ་འགྲེམས་འཇོག་གིས་དམ་དྲ་ཤུགས་ཆེར་བྱེད་ཀྱི་ཡོད་ཀྱང་། ཁ་སང་ལྷ་སར་གནས་སྡོད་བོད་མི་ཚོས་ཞོགས་པ་སྔ་བོ་ནས་ཇོ་ཁང་མདུན་དུ་གསང་གསོལ་གཏོང་བ་དང་མཆོད་མཇལ་སོགས་བྱས་ཡོད་པ་མ་ཟད། ཁམས་དང་ཨ་མདོའི་དགོན་སྡེ་ཁག་དང་ས་གནས་ཁག་ཅིག་ཏུའང་རྣམ་པ་འདྲ་མིན་གྱི་ལམ་ནས་སྐུའི་འཁྲུངས་སྐར་སྲུང་གཙི་གནང་ཡོད་འདུག
གཞིས་ལུས་བོད་མིའི་དད་པ་དམ་ཚིག་གཡོ་བ་མེད་པ་དེར་བསྔགས་བརྗོད་ཡོད།
གསར་འགྱུར་གྱི་བདེན་རྫུན་ལ་གཟིགས་ནས་བགོད་རོགས། དོན་དངོས་ཞིག་ཡིན་ནའང་ཡིད་ཆས་བྱེད་དཀའ་བས་གནས་སུ་འགྲོ་སྲིད། རྨ་རྒྱལ་སྦོམ་ར་ཨa་མདོ་མགོ་ལོག་དང་ཐག་ནེ་སར་ཡོད་མདོ་སྨད་རྨ་ཆུ་དང་ཁོ་གཉིས་མཉམ་དུ་ལབ་རྩེ་བསྟོད་སྟེང་ཞིག་དཀའ། ད་དུང་ཁམས་རྟའུ་བོ་ཟེར་བ་དེ་ཚོ་མཉམ་དུ་ཡོད་མེད་ཤེས་ཀྱི་མེད་འོན་ཀྱང་མགོ་ལོག་ཏུ་ཁམས་རྟའུ་ཟེར་བ་ཞིག་མེད་པ་ངས་་གསལ་བོར་ཤེས།
དེང་སྐབས་ཚང་མ་ལོ་དེ་སེ་འཁྲིག་འདུག ཁ་སང་དེ་རིང་བོད་ནང་དམག་མི་ཁེངས་འདུག་པས། རྗོང་རེའི་བར་དུའང་ལམ་ཡིག་དགོས་པ་རེད། མི་རེ་གཉིས་ཤིག་བྱུང་ཡོད་སྲིད་ཀྱང་དེ་ཚང་མ་ལོའི་སེམས་འདུན་མཚོན་བྱེད་ལས་དོན་དངོས་ཡིན་རྒྱུ་མ་རེད། སྐུ་མདུན་ལ་འདི་ལྟར་རྫུན་ཤོད་སྲོལ་ཞིག་འདུག་གམ།
བོད་ནང་ཡོད་པས་རང་སྲོག་འབེན་དུ་བཙུགས་ནས་དད་གུས་ཆེན་པོ་སྐུའི་འཁྲུངས་སྐར་ལ་རྟེན་འབྲེལ་བྱེད་ཀྱི་ཡོད་རུང། བོད་མི་ཕྱི་སྡོད་བཙན་བྱོལ་བ་ཚོར་གསལ་བསྒྲགས་དང་། འབོད་སྐུལ་མ་གཏོགས་རང་ཉིད་ཀྱི་དུས་ཚོར་གཙོ་འཛིན་བྱེད་ཀྱིས་ཡོད་པས་བོད་མིའི་རྩ་དོན་སྒྲུབ་ཆོག་ཡང་དེ་མཚུངས་ཡིན་དེ་ཚོའི་ཐོག་ནས་ང་ཚོ་ཕྱི་སྡོད་པའི་རང་མདོག་གསལ་པོ་མངོན་གྱི་མི་འདུག་གམ།
ཤེས་རབ་འབྱུང་གནས་ལགས་ནས་དོག་འདྲི་བྱས་པ་ཡག་པོ་བྱུང་སོང་ལ། དོན་གོས་གསལ་བཤད་དེ་ཡང་ཡག་བྱུང་། དེ་མ་གཏོགས་ང་དང་ངའི་ཉེ་འཁོར་གྱི་མི་མང་པོ་ཞིག་ཀྱང་གནས་ཚུལ་འདིར་མགོ་རྨོངས་ནས་བསྡད་འདུག ཁྱེད་གཉིས་ལ་ཐུགས་རྗེ་ཆེ་ཞུ།།
ཡིན་དང་ཡིན། གཞི་ལུས་བོད་མིས་རང་གི་གཅེས་པའི་ཚེ་སྲོག་དམར་པོའི་མེ་ལ་བསྒྲོན་ནས་མེད་པར་སྐུའི་འཁྲུངས་སྐར་ཉིན་མོར་སྲུང་བརྩིའི་རྟེན་འབྲེལ་བྱས་དང་བྱེད་བཞིན་ཡོད་ལ་ད་དུང་བྱ་རྒྱུ་ནམ་ཡང་མཚམས་འཇོག་ག་ནས་འོང་།
༸ གོང་ས་སྐྱབས་མགོན་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་སྐུ་ཚེ་ཁྲི་ལོར་བརྟན་པར་ཤོག བོད་འབངས་བདེ་ལ་འཁོད་པར་ཤོག འཛམ་གླིང་ལ་ཞི་བདེ་ཡོང་བར་ཤོག །
ཀློག་པ་པོ་ཤེས་རབ་འབྱུང་གནས་ལགས། རྟའུ་ས་གནས་ཀྱི་སྐྱ་སེར་གཉིས་ཀ་མགོ་ལོག་རྨ་ཆེན་སྤོམ་རའི་འདབས་སུ་སོང་སྟེ་གསང་གསོལ་བཏང་བ་མེད་པ་ཁྱེད་ཀྱིས་ཤེས་ཀྱི་རེད་ལ་ཀློག་མཁན་རྣམ་པས་ཀྱང་ཤེས་ཀྱི་རེད་བསམ། གསང་གསོལ་གཏོང་སའི་གནས་རི་དེའི་མིང་ལ་ས་གནས་མི་མང་གིས་རྨ་རྒྱལ་སྦོམ་ར་ཞེས་འབོད་ཀྱི་འདུག གནས་རི་དེའི་མིང་ད་ལྟའི་བར་གསར་འགྱུར་བརྒྱུད་ལམ་དུ་ཐེངས་མང་པོར་ཡོང་ཡོད་པ་རེད། གནས་ཚུལ་གསལ་ཁ་བཏོད་ཡོད་མེད་ཀྱི་ཐད་ནས་གོ་བ་ལོག་ཡོད་ན་དགོངས་དག་ཞུ་བ་ཡིན།
དྲ་གྲོགས་ཚོ་དང་ཀློག་མཁན་ཚོ།
གསར་འགྱུར་འདི་བདེན་པ་ཡིན་རྒྱུ་རེད་དེ། ཡིན་ན་ཡང་ཅུང་ནོར་ཡོད་པ་འདྲ། ཁམས་རྟའུ་དགོན་པ་གང་ན་ཡོད་ཤེས་དགོས། རྨ་རྒྱལ་སྦོམ་ར་ཨ་མདོ་མགོ་ལོག་རྨ་ཆེན་རྫོང་གི་ཐག་ཉེར་ཡོད་རེད། ཁམས་རྟའུའི་མི་དེ་ཚོ་འཁྲུངས་སྐར་བསྲུང་བརྩི་གནང་ཆེད་མགོ་ལོག་རྨ་ཆེན་དུ་ཕེབས་པ་རེད་དམ།
འདི་ལ་དཔྱད་ཞིབ་བྱེད་དགོས། སྤྱིར་བཏང་གསར་འགོད་པ་ཞིག་ལ་མཚོན་ན། མཐོང་ཐོས་གང་བྱུང་བ་རྣམས་ཐད་ཀར་གསར་འགྱུར་ཐོག་འགོད་རྒྱུ་དེ་ཡིན་མོད། བདེན་མིན་དཔྱད་པ་ཅི་ཡང་མི་གཏོང་བར་གསར་འགྱུར་ཐོག་གཏོང་རྐྱང་བྱས་ན་ཡང་མི་འགྲིགས་པས་རྗེས་ཕྱོགས་དཔྱད་ཞིབ་ཅུང་ཙམ་རེ་གནང་རོགས།