ཨ་རིའི་ནེའུ་ཡོག་དང་ནེའུ་ཇར་སི་ས་གནས་བོད་རིགས་སྤྱི་མཐུན་ཚོགས་པས་གོ་སྒྲིག་འོག ཕྱི་ཟླ་ ༧ ཚེས་ ༧ རེས་གཟའ་སྤེན་པའི་གུང་གསེང་དང་བསྟུན་ཏེ། སྐུ་ཚབ་དོན་གཅོད་ཁང་གི་ཉེ་འཁྲིས་སུ་ཡོད་པའི་ཡེ་ཤུའི་ལྷ་ཁང་ཨར་མི་ནི་ཡཱན་ཆ་ཆི་ནང༌། ྋགོང་ས་མཆོག་དགུང་གྲངས་ ༧༧ ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་གཙི་གནང་འདུག
འཁྲུངས་སྐར་མཛད་སྒོའི་སྟེང་ཨ་རི་སྐུ་ཚབ་དོན་གཅོད་བློ་བཟང་སྙན་གྲགས་མཆོག་དང༌བླ་སྤྲུལ་དགེ་བཤེས། བོད་ཀྱི་ཐེབས་རྩའི་འགན་འཛིན། དོན་གཅོད་ཁང་གི་ལས་བྱེད། གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་ཚབ། ཧི་མ་ལ་ཡའི་རི་རྒྱུད་ཀྱི་མི་སྣ། ཕྱི་རྒྱལ་གྲོགས་པོས་བཅས་ཁྱོན་མི་གྲངས་ ༡༥༠༠ ལྷག་འདུ་འཛོམས་བྱུང་ཡོད་འདུག
ཉིན་དེའི་ལས་རིམ་གྱི་ཐོག་མར་སྐུ་ཚབ་དོན་གཅོད་ཁང་གི་ལས་ཁུངས་ནས་མཛད་སྒོ་ཚུགས་ཡུལ་ཡེ་ཤུ་ལྷ་ཁང་བར། དུང་དང་རྒྱ་གླིང་དཀྲོལ་གཏོང་དང༌། གཡག་དང་སེང་གེ་འཁྲབ་སྟོན་གནང་བཞིན་དུ་ྋགོང་ས་མཆོག་གི་སྐུ་པར་མཐོང་འགྲོལ་རིན་པོ་ཆེ་ཚོགས་ཁང་གི་བཞུགས་ཁྲིར་གདན་འདྲེན་ཞུས་རྗེས། སྐུ་ཚབ་དོན་གཅོད་བློ་བཟང་སྙན་གྲགས་མཆོག་དང༌བླ་སྤྲུལ་དགེ་བཤེས་བཅས་སྐུ་མགྲོན་རྣམ་པས་སྐུ་པར་མཐོང་འགྲོལ་རིན་པོ་ཆེར་མནྜལ་རྟེན་གསུམ་འདེགས་འབུལ་ཞུས་ཡོད་འདུག
སྤྱི་མཐུན་ཚོགས་པའི་ཚོགས་གཙོ་ཚེ་རིང་བཟང་པོ་ལགས་ནས་གསུང་བཤད་གནང་སྐབས། ཐེངས་འདིའི་སྐུའི་འཁྲུངས་སྐར་དུས་ཆེན་ནི་ྋགོང་ས་མཆོག་གིས་ཆབ་སྲིད་དང༌འཛིན་སྐྱོང་གི་སྐུ་དབང་མི་མང་གིས་འོས་འདེམ་བྱས་པའི་ཆབ་སྲིད་ཀྱི་དབུ་ཁྲིད་རྣམ་པར་རྩིས་སྤྲོད་གནང་རྗེས་ཀྱི་སྐུའི་འཁྲུངས་སྐར་ཐེངས་དང་པོ་ཡིན་པ་དང༌། རྒྱལ་སྤྱིའི་ཐོག་སྙན་གྲགས་ཆེ་བའི་ཀྲན་པ་ཌན་གཟེངས་རྟགས་འབུལ་བཞེས་མཛད་ཙམ་ཡིན་པའི་དུས་ཚེས་དང་སྟབས་འཁེལ་བའི་སྐོར་སོགས་གསུངས་འདུག
སྐུ་ཚབ་དོན་གཅོད་མཆོག་ནས་གསུང་བཤད་གནང་སྐབས། ཐེངས་འདིའི་སྐུའི་འཁྲུངས་སྐར་གྱི་དམིགས་བསལ་རང་བཞིན་སྐོར་དང༌། བྱང་ཨ་རིའི་ཁྱབ་ཁོངས་སུ་ས་གནས་བོད་རིགས་སྤྱི་མཐུན་ཚོགས་པ་ ༣༠ ཙམ་ཡོད་པ་ཚང་མས་འདས་པའི་དུས་ཡུན་ནང་རྒྱལ་ཁབ་དང༌མི་རིགས་ཀྱི་དོན་དུ་ཕྱག་ལས་ཧུར་ཐག་གནང་བའི་སྐོར། ྋགོང་ས་མཆོག་གིས་དུས་རྒྱུན་བོད་མི་ཚོར་ཡ་རབས་བཟང་སྤྱོད་སྐོར་ལ་བཀའ་སློབ་ཕེབས་ཀྱི་ཡོད་པ་ལྟར་ཚང་མས་སེམས་ལ་ཉར་དགོས་ཚུལ་སོགས་ཀྱི་སྐོར་གསུངས་ཡོད་འདུག
དེ་རྗེས་ཆོལ་གསུམ་ཟློས་གར་ཚོགས་པ་དང༌ཉིན་སློབ། གཞས་པ་དང་གཞས་མ། ཚོགས་པ་སྐྱིད་སྡུག་ཁག་བཅས་ཀྱིས་རྣམ་པ་འདྲ་མིན་གྱི་རིག་གཞུང་དང་། ཡུལ་ལུང་སོ་སོའི་གཞས་དང་ཞབས་བྲོ་འཁྲབ་སྟོན་གནང་ཞིང་། ཉིན་རྒྱབ་ས་གནས་སྤྱི་འཐུན་ཚོགས་པ་སྐབས་ ༡༢ ཀྱི་ལས་རྒྱུན་རྫོགས་པ་བཞིན་རྒྱུན་ལས་གསར་པ་ ༡༣ འོས་འདེམས་གནང་ཡོད་འདུག
ཚེས་ ༧ ཉིན་སེར་སྐྱ་མང་ཚོགས་རྣམས་རྒྱ་གྲོང་ཕྷི་ལ་ཤིང་གི་ཀོ་རོ་ནཱ་སྤྱི་གླིང་དུ་འཛོམས་ནས་རང་རང་སོ་སོའི་དགའ་མོས་ཀྱི་ཐོག་ནས་ཉིན་གང་འཁྲུངས་སྐར་གྱི་སྤྲོ་སྐྱིད་གནང་ཡོད་ཅིང་། ཉིན་དེར་ས་གནས་སྤྱི་མཐུན་ཚོགས་པའི་རིག་གཞུང་སྤྱི་ཁང་གི་ཆེད་དུ་སྒེར་པ་དང༌། ཚོགས་སྐྱིད་བཅས་ནས་ཞལ་འདེབས་ཨ་སྒོར་ཆིག་འབུམ་ལྔ་ཁྲི་ ༡༥༠༠༠༠ ཕུལ་འབྱོར་བྱུང་ཡོད་པ་རེད།
ཐེངས་འདིའི་འཁྲུངས་སྐར་སྐབས་བྱང་ཨ་རིའི་ཁྱབ་ཁོངས་བོད་མི་གནས་ཡུལ་ས་གནས་ཚང་མར་རྣམ་པ་འདྲ་མིན་གྱི་ཐོག་ནས་བཀའ་ཤག་གི་བཀའ་འབྲེལ་ལྟར། སྐུའི་འཁྲུངས་སྐར་སྲུང་གཙི་ཞུས་ཡོད་ཅིང༌། ས་གནས་གཅིག་དཔེ་མཚོན་ཞུས་ན། མི་ནི་སུད་ཀྲར་དུ་ས་གནས་སྤྱི་མཐུན་ཚོགས་པའི་གོ་སྒྲིག་འོག ཕྱི་ཟླ་ ༧ ཚེས་ ༢ ནས་བཟུང་ཕྱི་རྒྱལ་མི་སྣ་འདུ་འཛོམས་ཆེ་བའི་ས་གནས་སུ་བོད་ཀྱི་ཐུང་མོང་མ་ཡིན་པའི་རིག་གཞུང་འགྲེམས་སྟོན་གྱི་གོམ་བགྲོད་དང༌། ཚེས་ ༣ ཉིན་སྤྱི་ཁང་ནང་ྋགོང་ས་མཆོག་ལ་ཞབས་རིམ་གསོག་སྒྲུབ་དང༌། གཞིས་ལུས་དཔའ་བོ་དཔའ་མོ་རྣམས་ཀྱི་ཆེད་དུ་མཆོད་འབུལ། ཕྱི་ཚེས་ ༤ ཉིན་ཁ་ཆེ་དང༌ཡེ་ཤུ། རྗིའུ། ཧིན་རྡུ། ནང་པ་བཅས་ཆོས་ལུགས་འདྲ་མིན་གྱི་སྐུ་ཚབ་ལྷན་འཛོམས་ཀྱིས་རང་ལུས་མེ་ལ་སྒྲོན་མཁན་དཔའ་བོ་དཔའ་བོ་རྣམས་ཀྱི་ཆེད་དུ་བསྔོ་སྨོན་ཞབས་རིམ་གོ་སྒྲིག ཕྱི་ཚེས་ ༦ ཉིན་ཕྱི་རྒྱལ་སྐུ་མགྲོན་ཁག་ཅིག་གདན་ཞུས་ཀྱིས་སྐུའི་འཁྲུངས་སྐར་སྲུང་གཙི་མཛད་སྒོ་གོ་སྒྲིག་གནང་ཡོད་འདུག
གནས་ཚུལ་གཏོང་མཁན། ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲ་ཤིས།
བོད་ནང་བོད་མིས་དད་དམ་གཡོ་བ་མེད་པའི་ངང་རྒྱ་གཞུང་གི་དམ་བསྒྲགས་དང་། འཇིགས་སྣང་ག་ཚོད་བསྐུལ་རུང་སྤྱི་ནོར་༸གོང་ས་མཆོག་༸སྐུ་བལྟམས་པའི་ཉིན་རང་འཁྲུངས་ལྷ་ཡར་གསོའི་རྟེན་འབྲེལ་རྒྱ་མི་ཆུང་གནང་བར་རྙིང་དབུས་བཀའ་འདྲིན་ཆེ། ལྟོས་དང་ང་ཚོ་བཙན་བྱོལ་སྐྱིད་སར་བཞུགས་ཅིང་ཁ་ནས་དད་པ་དམ་ཚིག་ཡོད་མདོག་བྱ་མཁན་གྱི་སྒྲིགས་ཚུགས་དང་། ཚོགས་སྒེར་རྣམས་པའི་སྐུའི་སྐར་རྟེན་འབྲེལ་ཞུ་རྒྱུ་དེ་ཡང་ཕྱིར་འགྱངས་བྱ་དགོས་པ་རྒྱུ་མཚན་གང་ལ་མཐུག་པ་ཡིན་ནམ། ད་ཆ་བཙན་བྱོལ་བས་གཞིས་ལུད་བོད་མིའི་མགྲིན་ཚབ་བྱ་རྒྱུའི་བཀའ་མོལ་གྲ་ཆགས་དེ་ཚོ་བཤད་རྒྱུ་ཡོད་དམ། ཅི་སྟེ་མཛད་སྒོའི་ཉིན་བོད་བཞུགས་བོད་མི་ཞིག་ནས་སྐུ་འཁྲུངས་སྐར་ཉིན་མཛད་སྒོ་བྱ་མི་ཐུབ་པའི་སྐད་ཆ་འདྲི་ཚེ་ལན་གང་ཡོད་དམ།
བོད་ནང་འཁྲུངས་སྐར་ཉིན་རྒྱ་གཞུང་གི་དམ་བསྒྲགས་གང་ཚོད་ཡོད་རུང་རང་སྲོག་འབེན་ལ་བཙུགས་ནས་གཏོང་གི་ཡོད་རུང་ང་ཚོ་རང་དབང་ལུང་པར་འཁྲུངས་སྐར་ཡང་ཕྱི་འགྱངས་བྱ་དགོས་པ་རྒྱུ་མཚན་གང་ལ་མཐུག་པ་ཡིན་ནམ། བོད་ནང་གི་རྒྱལ་གཅེས་དཔའ་བོ་རྣམས་པར་ངོ་གནོངས་མི་དགོས་དམ། ང་ཚོའི་ཀུན་སྤྱོད་ལྟོས་དང།