ཨེ་ཤ་ཡ་རང་དབང་རླུང་འཕྲིན་ཁང་གི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས་ཟླ་འདིའི་ཕྱི་ཚེས་ ༡༤ ཉིན་དཀར་མཛེས་བོད་རིགས་རང་སྐྱོང་ཁུལ་དཔལ་ཡུལ་རྫོང་དཔལ་ཡུལ་བཤད་གྲྭའི་གྲྭ་བཀྲ་ཤིས་དོན་འགྲུབ་བམ་༼པུར་མིང་ལ་མེ་འོད༽ཞུ་བ་དང་། གྲྭ་སྐལ་བཟང་རྒྱ་མཚོ་འམ་༼པུར་མིང་ལ་སྒོམ་སྐུལ༽ ཞུ་བའི་གྲྭ་བ་གཉིས་ཉིན་དེར་ཉེན་རྟོག་པས་གློ་བུར་འཇུ་བཟུང་བྱས་ཏེ། ད་ལྟའི་ཆར་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
གྲྭ་བཀྲ་ཤིས་དོན་འགྲུབ་ལགས་ནི། ཆབ་མདོ་རི་བོ་ཆེ་ཟམ་ཁ་ཞང་ཡུལ་ཚོ་ནས་ཡིན་ཞིང་། ད་ལྟའི་བར་དཔལ་ཡུལ་བཤད་གྲྭའི་དགེ་རྒན་དང་འཛིན་གྲའི་སྐྱོར་
དཔོན་ཡིན་པ་དང་། ས་གནས་ཀྱི་གངས་རིའི་གནས་བབ་ཚོགས་པ་ཞེས་པའི་ཚོགས་གཙོའི་འགན་འཁུར་ཡོད་འདུག་ལ། གྲྭ་སྐལ་བཟང་རྒྱ་མཚོ་ལགས་ནི། ཕ་ཡུལ་ནང་ཆེན་ནས་ཡིན་འདུག་ལ། ད་ལྟའི་བར་དཔལ་ཡུལ་བཤད་གྲྭའི་དགེ་རྒན་དང་འཛིན་གྲྭའི་སྐྱོར་དཔོན། ས་གནས་ཀྱི་གངས་རིའི་གནས་བབ་ཚོགས་པ་ཞེས་པའི་ཚོགས་མི་གཙོ་བོ་ཞིག་ཡིན་འདུག
གནས་ཚུལ་མཁོ་སྤྲོད་པས་བརྗོད་དོན་ལྟར་ན། ཉེ་ཆར་རྒྱ་གཞུང་གིས་ཁོང་གཉིས་ནག་ཉེས་ཅི་ཡིན་གསལ་བཤད་ཅི་ཡང་མེད་པར་འཛིན་བཟུང་བཀག་ཉར་བྱས་ཡོད་པ་མ་ཟད། ད་ལྟའི་ཆར་ཆབ་མདོ་ས་ཁུལ་གྱི་དགོན་སྡེ་ཁག་ཏུ་ལྟ་སྲུང་བྱེད་མཁན་གྱི་དམག་མི་ ༡༠༠ ལྷག་དང་། རི་མགོར་ཡོད་པའི་སྒོམ་ཁང་དང་མཚམས་ཁང་སོགས་སུ་དམག་མི་ ༡༠ གྲངས་རེ་བཅས་འགྲེམས་འཇོག་གིས་དམ་དྲག་བྱེད་ཀྱི་ཡོད་སྟབས། དགོན་པའི་གྲྭ་པ་མང་པོ་ཞིག་འདུག་ཐབས་མེད་པའི་གནས་སུ་ལྷག་ཡོད་འདུག
