ཉེ་ཆར་ལི་ཁྲང་ཁྲོན་བོད་རང་སྐྱོང་ལྗོངས་ནང་ཡོང་སྟེ་ཁ་བྲལ་ལ་ངོ་རྒོལ་དང་། རྒྱ་ནག་མི་རིགས་གཅིག་གི་འདུ་ཤེས་སྤེལ་དགོས་པ་བརྗོད་འདུག
ཟླ་འདིའི་ཕྱི་ཚེས་ ༡༧ ནས་ ༢༡ བར། རྒྱ་གཞུང་དབུས་ཆབ་སྲིད་ལྷན་ཁང་གི་རྒྱུན་ལས་ལིས་ཁྲང་ཁྲོན་གྱིས་བོད་ཀྱི་རྒྱལ་ས་ལྷ་ས་གཙོས་ལྷོ་ཁ་དང་འདམ་གཞུང་སོགས་སུ་སྐོར་བསྐྱོད་བྱས་ཡོད་པ་དང་། སྐབས་དེར་ཁོས་ཞིང་འབྲོག་གཞི་རིམ་ས་ཁུལ་ཏུ་དྲིལ་བསྒྲགས་བའི་ལས་དོན་ཤུགས་ཆེ་རུ་བཏང་སྟེ། དམར་ཤོག་སྐབས་བཅུ་བདུན་པའི་རྒྱལ་ཡོངས་ཚོགས་ཆེན་ཐེངས་ ༦ པ་དང་། རྒྱ་ནག་དབུས་གཞུང་གི་ཐེངས་ལྔ་པའི་བོད་ཀྱི་ལས་དོན་བཞུགས་མོལ་ཚོགས་འདུའི་ནང་དོན་གཞིར་བཟུང་སྟེ། བོད་ནི་གདོད་མ་ནས་རྒྱ་ནག་དང་ཁ་བྲལ་ཐབས་མེད་པའི་ལོ་རྒྱུས་ཀྱི་ཆ་ཤས་ཤིག་ཡིན་པ་གསལ་འདོན་དང་། ལས་བྱེད་དཔུང་སྡེ་ཡི་སྣེ་ཁྲིད་དེ་རླབས་ཆེ་བའི་རྒྱ་ནག་མེས་རྒྱལ་དང་ཀྲུང་ཧྭ་མི་རིགས་ངོས་ལེན་ཡོང་རྒྱུར་མུ་མཐུད་ཤུགས་སྣོན་བརྒྱབ་སྟེ། མཐའ་ཁུལ་གྲངས་ཉུང་མི་རིགས་ཀྱི་ས་ཁུལ་དུ། སྔར་ལས་ལྷག་པར་དམར་ཤོག་པ་བཟང་བ་དང་། སྤྱི་ཚོགས་རིང་ལུགས་བཟང་བ། བཅོས་བསྒྱུར་སྒོ་འབྱེད་བཟང་བ། རླབས་ཆེ་བའི་རྒྱ་ནག་མེས་རྒྱལ་བཟང་བ་སོགས་ཀྱི་བསམ་བློའི་རིག་གནས་དར་སྤེལ་བྱས་ཏེ། ཁ་བྲལ་བར་ངོ་རྒོལ་གྱི་ལས་དོན་གཏིང་ཟབ་ཏུ་སྤེལ་དགོས་སྐོར་བརྗོད་འདུག
ལི་ཁྲང་ཁྲོན་བོད་ཀྱི་གནའ་བོའི་རྒྱལ་མཁར་ཕོ་བྲང་པོ་ཏ་ལ་དང་ལྷ་སའི་གཙུག་ལག་ཁང་གཉིས་ཀྱི་ནང་དུའང་སྐོར་བསྐྱོད་བྱས་འདུག་ལ། སྐབས་དེར་ཁོས་ལོ་ ༡༣༠༠ ལྷག་གི་ལོ་རྒྱུས་ཡོད་པའི་ལྷ་སའི་ཇོ་ཁང་ནི་བོད་བརྒྱུད་ནང་བསྟན་ཆོས་ལུགས་ཀྱི་བྱ་འགུལ་སྤེལ་སའི་ཁོར་ཡུག་གལ་ཆེན་ཞིག་དང་ལོ་རྒྱུས་ཀྱི་ཤུལ་བཞག་རྩ་ཆེན་ཞིག་ཡིན་པ་མ་ཟད། བོད་རྒྱ་མི་རིགས་མཐུན་འབྲེལ་མཚོན་པའི་ཐང་བོད་མཛའ་འབྲེལ་རྡོ་རིང་ཡང་ཇོ་ཁང་གི་མདུན་ཐང་དུ་ཡོད་སྐོར་གླེང་སྟེ། རྒྱལ་གཅེས་ཆོས་གཅེས་ཀྱི་སློབ་གསོ་མུ་མཐུད་སྤེལ་དགོས་སྐོར་དང་། དེ་བཞིན། ལིས་ཁྲང་ཁྲོན་རྒྱ་ནག་མི་དམངས་ཉིན་རེའི་ཚགས་པར་གྱི་ལྷ་ས་ས་གནས་བོད་ཡིག་ཚགས་པར་ཁང་དང་། བོད་ལྗོངས་ཉིན་རེའི་ཚགས་པར་ཁང་དུ་སོང་སྟེ། བོད་ལྗོངས་སུ་འཐབ་ཇུས་བསམ་བློའི་རིག་གནས་དྲིལ་བསྒྲགས་ཀྱི་ལས་གནས་ཐོག་ཡོད་པའི་ལས་བྱེད་ཚོར་འཚམས་འདྲི་དང་བསྔགས་བརྗོད་བྱས་ཏེ། མུ་མཐུད་དུ་བོད་ལྗོངས་སྔར་ལས་ལྷག་པའི་འཕེལ་རྒྱས་དང་འགྱུར་ལྡོག་ཆེན་པོ་བྱུང་ཡོད་པ་འཛམ་གླིང་ལ་དྲིལ་བསྒྲགས་བྱ་དགོས་པ་བརྗོད་ཡོད་པ་རེད།
ཐེངས་འདིར་ལི་ཁྲང་ཁྲོན་བོད་རང་སྐྱོང་ལྗོངས་ནང་སླེབས་པ་དེ་ནི། ཉེ་བའི་ལོ་འགའི་ནང་བོད་ནང་རྒྱ་གཞུང་གི་མི་སེར་སྤེལ་བའི་དབང་བསྒྱུར་གྱི་སྲིད་ཇུས་ལ་ངོ་རྒོལ་གྱིས། བོད་མི་སྐྱ་སེར་རྒན་གཞོན་ ༤༢ ལྷག་གིས་རང་ལུས་མེར་བསྲེགས་ཀྱི་ལས་འགུལ་བྱུང་བའི་རྗེས། རྒྱ་ནག་དབུས་གཞུང་གི་མཐོ་རིམ་དཔོན་རིགས་ཤིག་བོད་རང་སྐྱོང་ལྗོངས་སུ་ཡོང་སྟེ། རྒྱ་ནག་དབུས་གཞུང་གིས་དྲག་གནོན་དབང་བསྒྱུར་གྱི་ལངས་ཕྱོགས་དང་རྣམ་འགྱུར་བསྐྱར་བསྟན་པ་ཐོག་མ་དེ་ཆགས་ཡོད།
གསར་འགོད་པ། ཚེ་རིང་རྒྱལ།
ཁོ་རང་སྤྱང་ཀི་ཞིག་རེད་ལ། རང་ཉིད་ཀྱི་ནག་ཉེས་འགེབས་ཐབས་སུ་ཧུའུ་ཅིན་ཐོར་རྔ་མ་གཡུགས་ཀྱིན་ཡོད་པ་རེད།
རྒྱ་དམར་ཚང་གིས་རྒྱལ་ས་ལྷ་སའི་ཕྱོགས་ལ་རྟག་ཏུ་འགྲུལ་བཞུད་ཀྱིས་མི་མང་གི་བསལ་བློ་ལ་འགྱུར་ལྡོག་འགྲོ་བའི་ལམ་ཁ་སྟེན་པ་དང་སྒེར་གཅོད་ཀྱི་ཁྲིམས་ལུགས་སློབ་གསོ་སྤེལ་བ་སོགས་བྱེད་ཐབས་སྣ་ཚོགས་བྱས་བཞིན་འདུག་་དེའི་ཤུགས་རྐྱེན་ཡང་བོད་མི་མི་ཉུང་བ་ཞིག་ལ་སླེབས་འདུག མུ་འཐུད་འདི་ལྟར་སོང་ན་་ཡིད་སྐྱོ་བ་ལ།