རྒྱ་གཞུང་གིས་མདང་ནུབ་གཙོད་དགོན་པའི་གྲྭ་བ་གསུམ་འཛིན་བཟུང་བྱས་ཤིང་། ད་ནང་ཞོགས་པར་སླར་ཡང་གྲྭ་བ་སྐོར་ཞིག་འཛིན་བཟུང་བྱས་པ་མང་ཚོགས་ཀྱིས་ཕྱིར་ཕྲོགས་ཡོད་འདུག
དེ་རིང་ཞོགས་པར་བོད་ནས་གནས་ཚུལ་འབྱོར་བ་ལྟར་ན། ཁ་སང་ཉིན་རྒྱབ་བོད་ཨ་མདོ་གཙོད་དགོན་པའི་འཁྲིས་སུ་བོད་རིགས་བུད་མེད་སྒྲོལ་དཀར་མཚོ་ཞུ་བ་ཞིག་གིས་རང་ལུས་མེར་བསྲེགས་བཏང་རྗེས། དགོན་པར་གནས་མཇལ་བ་དང་གྲྭ་མང་ཚོས་ཁོང་མོའི་སྐུ་ཕུང་དགོན་པའི་ནང་ཉར་བར་ཉེས་འགེལ་བྱས་ཏེ། མདང་ནུབ་བོད་ནང་གི་ཆུ་ཚོད་ ༡༠ ཡོལ་ཙམ་ལ་རྒྱ་གཞུང་གི་ཉེན་རྟོག་པ་མང་པོ་ཞིག་དགོན་པའི་ནང་འཛུལ་ཏེ། གྲྭ་ཆོས་འཕེལ་དང་ཤེས་རབ། བརྩོས་འགྲུས་གསུམ་འཛིན་བཟུང་བྱས་ཡོད་འདུག་ཀྱང་། དེ་རིང་ཞོགས་པར་གྲྭ་བརྩོས་འགྲུས་ཕྱིར་ཀློད་གྲོལ་བཏང་ཡོད་འདུག
དེ་རིང་ཞོགས་པའི་བོད་ནང་གི་ཆུ་ཚོད་ ༥ པ་ཙམ་ལ་སླར་ཡང་ཉེན་རྟོག་པའི་རླངས་འཁོར་བཅུ་གྲངས་ཤིག་དགོན་པའི་ནང་འབྱོར་ཏེ། གྲྭ་བ་ ༡༧ ཙམ་གོང་གི་དོན་རྐྱེན་དང་འབྲེལ་བ་ཡོད་པའི་ཉེས་འཛུགས་ཀྱིས་འཛིན་བཟུང་བྱས་སྐབས། གྲྭ་མང་མཉམ་རུབ་ཀྱིས་ཕྱིར་ཕྲོགས་ཡོད་འདུག་ལ། ད་ལྟ་ས་གནས་ཡུལ་མི་དང་གྲྭ་མང་འདུ་ཁང་མདུན་དུ་འཛོམས་ཏེ། གྲྭ་ཆོས་འཕེལ་ཕྱིར་རྩིས་སྤྲོད་མ་བྱས་ཚེས་སྐྱ་སེར་གཉིས་ཀས་ཡར་ལངས་རྒྱག་རྒྱུ་ཡིན་ཞེས་བརྗོད་ཀྱང་། ཉེ་རྟོག་པ་ཚོས་ཆོས་འཕེལ་ཟེར་བ་ཞིག་བཟུང་མེད་ཅེས་ངོས་ལེན་བྱས་མི་འདུག
རྒྱལ་གཅེས་དཔའ་མོ་སྒྲོལ་དཀར་མཚོ་(སྐྱིད)ལགས་ཀྱི་སྐྱེས་ཡུལ་གཙོད་རྟ་གསར་སྡེ་བ་ཡིན་པ་དང་། ད་ལྟ་གཙོད་བར་མ་གོང་མར་མནའ་མར་སོང་ཡོད་ཅིང་། ཁྱོ་གའི་མིང་ལ་སངས་རྒྱས་དོན་གྲུབ་ཟེར་གྱི་ཡོད་འདུག ཁོང་མོར་ཕྲུ་གུ་གཉིས་ཡོད་པ་ལས། ཆེ་བ་བུ་མོ་བནྟེ་མཚོ། རང་ལོ་ ༥ ཡིན་འདུག ཆུང་བ་བུ་གཡུལ་རྒྱལ་རང་ལོ་ ༢ ཡིན་འདུག
ཁོང་མོ་ནི་ནམ་རྒྱུན་བོད་དོན་སྐོར་གླེང་སློང་བྱེད་པ་དང་༧གོང་ས་མཆོག་སོགས་བརྙན་འཕྲིན་ལས་མཐོང་སྐབས། མིག་ཆུ་ཤར་ཤར་དུ་བཞུར་ཏེ་མི་རིགས་ཀྱི་ལ་ཞེན་གནོན་མེད་ཡོད་མཁན་ཞིག་ཡིན་འདུག
