འབྲེལ་
རས་པ།
དཔྱད་རྩོམ་འདི་ཧ་ལས་པའི་ཡག་པོ་ཞིག་བྲིས་གནང་འདུག རྒྱབ་ལྗོངས་འགོད་སྟངས་དང་གནད་འཛིན་སྟངས་གང་གི་ཆ་ནས་ཀྱང་བཙན་བྱོལ་ནང་ནས་རྩོམ་ཡིག་ཅིག་རྩོམ་ཡིག་ལྟར་བྲིས་པའི་དཔྱད་རྩོམ་ཞིག་ཏུ་མཐོང་སོང་། ཚོར་བ་འདི་དང་འབྲེལ་ནས་རྩོམ་ཡིག་འདི་དང་འབྲེལ་བའི་བསམ་ཚུལ་ཞིག་འབྲི་འདོད་སྐྱེས་ཤིང་འདི་བསམ་ཚུལ་རྐྱང་བ་ཞིག་ཡིན་ཡང་སྲིད།
དང་པོ་སིམ་ལའི་ཆིངས་ཡིག་གི་གནད་དོན་སྐོར་ནས་ཡིན། མེག་མོ་ཧན་ས་ཐིག་གིས་བོད་དང་རྒྱ་གར་གཉིས་ཀྱི་ས་མཚམས་ཀྱི་གནད་དོན་ཐག་བཅད་ཆོག་པ་ལས་བོད་དང་རྒྱ་ནག་གཉིས་ཀྱི་ས་མཚམས་ཀྱི་གནད་དོན་ཐག་བཅད་ཆོག་པའི་ནུས་པ་མེད་པ་རེད། གང་ཡིན་ཟེར་ན། ཚང་མས་མཁྱེན་གསལ་ལྟར་རྒྱ་ནག་གིས་ས་ཐིག་དེ་ཁས་བླངས་མེད་པས་དབྱིན་བོད་གཉིས་ཀྱིས་ཟུར་མཆན་བཀོད་དེ་སིམ་ལའི་ཆིངས་ཡིག་དུ་གསལ་བའི་བོད་ཐོག་རྒྱ་ནག་གི་བདག་དབང་ཆ་ཚང་རྩིས་མེད་ཡིན་པ་བྲིས་ཡོད།
དེ་སྔའི་རྒྱ་ནག་གི་གནས་བབ་སྟོན་པའི་ཡིག་ཚགས་མང་ཆེ་བའི་ནང་དུ་བོད་ཀྱི་དཔོན་པོའམ་མདོ་ཁམས་ཀྱི་དཔོན་པོ་དག་ལ་བཀའ་ཕབས་པའི་བརྗོད་བྱ་མང་པོ་ཡོད་ཅིང་། ཐུན་མོང་མ་ཡིན་པའི་འགྲེལ་བརྗོད་བྱེད་སྟངས་འདི་ནི་ཁུང་ཙིའི་ལུགས་ཀྱི་ལྟ་ཚུལ་གྱི་ཐོག་ནས་ཕྱི་མི་ཁག་ལ་འབྲེལ་བའི་སྐོར་ཐུན་མོང་མ་ཡིན་པའི་འགྲེལ་བརྗོད་བྱས་ཡོད་པ་དེ་ཉིད་རེད། འབྲི་ཆུའི་རྒྱུད་ཀྱི་བོད་སྡེ་དག་གཞུང་ས་དགའ་ལྡན་ཕོ་བྲང་ཆེན་པོའི་ཐད་ཀའི་གཏིང་འཛིན་འོག་ཏུ་མེད་པའི་རྒྱུ་མཚན་འགོད་རྒྱུ་ཡོད་ཀྱང་། ལོ་རྒྱུས་དཔྱད་ཞིབ་པ་ཁག་ཅིག་གིས་རྒྱ་ནག་མི་སེར་རྒྱལ་ཁབ་ཀྱི་སྐབས་སུ་མདོ་ཁམས་ཕྱོགས་ཀྱི་མིང་ཙམ་གྱི་བདག་དབང་རྒྱ་ནག་ལ་ཡོད་པར་ཆ་འཇོག་བྱེད་པ་ནི་དཔོན་པོ་དག་གི་མངའ་ཁོངས་མི་མང་ནས་ཕུལ་བའི་དཔྱ་ཁྲལ་གྱི་བརྒྱ་ཆའི་གཅིག་ཟིན་མ་ཟིན་ཙམ་ཞིག་མི་སེར་རྒྱལ་ཁབ་ཀྱི་དཔོན་རིགས་དག་ལ་ཕུལ་དགོས་པ་དེ་ལས་བྱུང་ཞིང་། དེ་ལས་གཞན་གྱི་དབང་ཤུགས་ཤིག་ཡོད་པར་ངོས་འཛིན་ཅི་ཡང་བྱེད་མི་ཐུབ། གལ་སྲིད་འདི་ལྟ་བུའི་གནས་བབ་ལ་བརྟེན་ནས་རྒྱ་ཁོངས་སུ་བརྗོད་པ་ཡིན་ན་ནི་ཨེ་ཤ་ཡའི་རྒྱལ་ཁབ་དག་གི་བདག་དབང་དང་བཅས་པ་གླེང་ཐབས་མེད་ཅིང་། ཀོར་བོད་ཟིང་འཁྲུག་གི་ལོ་རྒྱུས་ལྟ་བུ་ལས་བོད་ཀྱི་བདག་དབང་གི་གནད་དོན་ལ་འགྱུར་བ་གཞན་ཞིག་ཀྱང་འགྲོ་སྲིད།
<<བོད་ཀྱི་གནས་བབས་>>ཞེས་པའི་དེབ་དེ་རུ་མདོ་ཁམས་ས་གནས་འདི་དག་ལ་”བདག་མེད་ཀྱི་ས་ཆ་”ཞེས་བེད་སྤྱོད་བཏང་ཡོད། “བདག་མེད་ཀྱི་ས་ཆ་”ཞེས་པ་ནི་མི་མེད་ལུང་སྟོང་གི་ས་ཆའི་དོན་མ་ཡིན་པར་ལྟོས་གཞི་རྒྱ་ནག་མི་སེར་རྒྱལ་ཁབ་དང་བོད་གཞུང་དགའ་ལྡན་ཕོ་བྲང་བའི་དབར་དུ་བདག་མེད་དུ་ལྷགས་པའི་གནས་སྟངས་ལ་གོ་དགོས། ཆབ་སྲིད་ཚན་རིག་པས་བཤད་ཕྱོགས་ལྟར་ན་”བདག་མེད་ཀྱི་ས་ཆ་”ནི་རང་མགོ་རང་སྐྱོང་ངམ་ཡུལ་ལུང་རེ་ལ་རྒྱལ་ཕྲན་རེ་ཡོད་པའི་དོན་ཡིན། འདིའི་ཞིབ་ཕྲའི་གནས་ཚུལ་ནི་མདོ་ཁམས་ཕྱོགས་ཀྱི་རྒྱལ་པོ་དང་དཔོན་པོ་དག་གི་ལོ་རྒྱུས་ལས་ཤེས་ཐུབ་པ་མ་ཟད། བོད་རྒྱའི་ས་མཚམས་ཀྱི་གྲོ་ཚང་དཔོན་པོའི་ལོ་རྒྱུས་ལས་འདི་ལ་རྒྱུས་མངའ་ཆེ་ཙམ་བྱེད་ཐུབ་ཀྱི་ཡོད་འདུག དེའི་རྐྱེན་གྱིས་གཞུང་ས་དགའ་ལྡན་ཕོ་བྲང་གི་ཐད་ཀའི་དབང་འོག་ན་མེད་པའི་བོད་དེ་རྒྱ་ནག་གམ་ཡང་ན་གཞན་ཞིག་གི་འོག་ཏུ་འཇོག་སྲོལ་མེད་པར་རང་སྐྱོང་གི་ཡུལ་ལུང་འདི་དག་ལ་རྒྱལ་ཁུངས་”རང་ཐག་རང་གཅོད་”ཀྱི་ཐོབ་ཐང་དམིགས་གསལ་བ་དགོས་པ་རེད།
ད་དུང་གཞན་ཞིག་ནི་དམར་དམག་ཕུན་དབང་གི་སྐད་ཆ་རེད། འདི་ཉིད་ཐད་ཀར་རྩ་འཛིན་ནམ་ལོ་རྒྱུས་ཀྱི་དོན་དངོས་སྟོན་བྱེད་དུ་བལྟ་མི་ཐུབ། གང་ཡིན་ཟེར་ན་གཅིག་ནས་གྷོ་སི་ཏྲིན་གྱི་བཤད་སྟོབས་ཆེ་བའི་ཁ་ཆེན་པོའི་ནང་དུ་རྒྱ་ནག་གི་བཟོ་བསྐྲུན་དུ་རླངས་འཐིབས་ཏེ་ར་བཟི་ཡོད་པ་དང་། གཉིས་ནས་སྐབས་ཐོག་དེར་ཕུན་དབང་གིས་ཁམས་པ་རང་བཙན་རྒྱལ་ཁབ་ཀྱི་བསམ་ཚུལ་ཙམ་པོ་བ་ཞིག་བཟུང་ཡོད། དེའི་རྐྱེན་གྱིས་ལྟ་བ་སྒྲུབ་པའི་ལམ་བར་གྱི་བར་ཆད་འདི་དག་མ་ཤི་བར་དུ་ཁོ་རང་གིས་བརྟན་པོ་བཟོ་བ་སུས་ཀྱང་ཚོད་དཔག་ཐུབ་པ་ཞིག་ཡིན། ད་དུང་ཕུན་དབང་གི་སྐད་ཆར་དབྱེ་ཞིབ་བྱེད་ཐུབ་པའི་དེབ་མང་དུ་ཡོད་ཅིང་། དེ་ལས་སྟག་བྲག་རིན་པོ་ཆེའི་མཛད་རྣམ་དུ་གསལ་བ་ལྟར་ན་ཁོང་སོགས་མདོ་སྨད་ནས་དབུས་ཕྱོགས་སུ་ཕེབས་དུས་འབྲི་ཆུའི་ཡར་རྒྱབ་ཀྱི་བོད་དམག་གིས་བོད་མི་ཡོད་དོ་ཅོག་ལ་ལག་འཁྱེར་མ་དགོས་པར་ལྷ་སར་བཏང་ཡོད་པ་དང་། རྒྱ་རིགས་ཡིན་ཚད་བཀག་པའི་སྐོར་འཁོད་ཡོད་ཅིང་། ཅིའི་ཕྱིར་འབྲི་ཆུའི་མར་ཕྱོགས་ཀྱི་བོད་མི་རྣམས་དབུས་ཕྱོགས་སུ་བཏང་པའི་རྒྱབ་ལྗོངས་ཀྱང་ཞིབ་འགོད་བྱས་ཡོད་ལ། དེ་ལ་དབུས་དང་མདོ་ཁམས་ཀྱི་མི་མང་ལ་དབྱེ་འབྱེད་བྱསཔའི་སྣང་ཚུལ་ཙམ་ཡང་མེད་པ་ཡིན། <<ནགས་ཚང་ཞི་ལིའི་སྐྱིད་སྡུག་>>ལས་ཀྱང་བོད་དམག་གིས་བོད་མི་རྣམས་དབུས་ཕྱོགས་སུ་དཀའ་ངལ་མེད་པར་གཏོང་གི་ཡོད་པའི་གནས་ཚུལ་བྲིས་ཡོད། འདི་ལྟ་བུས་ཕུན་དབང་གི་སྐད་ཆར་ལན་འདེབས་བྱས་ཆོག།
ད་དུང་རྩོམ་ཡིག་འདི་རུ་ “ ཕྱི་ལོ་ ༡༩༧༩ བར་གཞུང་ཕྱོགས་ནས་འཐད་རྩོད་བྱས་པའི་རང་བཙན་གྱི་གནས་བབས་དེ་ཡང་འབྲི་ཆུ་ས་མཚམས་སུ་བཟུང་པའི་རང་བཙན་གྱི་གནས་བབས་སྐྱར་གླེང་བྱས་པ་ཙམ་ཡིན་འདུག་“ཅེས་བྲིས་འདུག་པས། ཁོ་བོས་བལྟས་ན་འདི་ཡིས་གནད་དོན་གཞན་ཞིག་ལ་ཐུགས་གཞིགས་གནང་དགོས། དེ་ནི་ཕྱི་ལོ་ ༡༩༦༠ ཟླ་ ༩ བ་ནས་བཙན་བྱོལ་དུ་བོད་མི་མང་སྤྱི་འཐུས་དབུ་བརྙེས་ཏེ་བོད་ཆོལ་ཁ་གསུམ་གྱི་འཐུས་མི་འོས་འདེམས་ཀྱི་བཙན་བྱོལ་བོད་གཞུང་གི་གྲོས་ཚོགས་ཚུགས་ཡོད་པ་དེ་རེད། གནས་སྟངས་འདི་ལ་བལྟོས་ན་གཞུང་ཕྱོགས་ཀྱི་འཐབ་རྩོད་དེ་བོད་ཅེས་པའི་མིང་འདིའི་ཁྱབ་ཁོངས་ཡོངས་ལ་འབྲེལ་ཡོད་པ་ལས་འབྲི་ཆུ་ཕར་ཕྱོགས་དང་ཚུར་ཕྱོགས་ལ་ཁྱད་པར་མེད་པ་ཧ་ཅང་གསལ་བོ་རེད། ལྷག་པར་ཏུ་བོད་ཀྱི་བླ་ན་མེད་པའི་དབུ་ཁྲིད་༸གོང་ས་མཆོག་གི་བཀའ་སློབ་ནང་སྐབས་དེ་དུས་ནས་བོད་གླེང་གི་ཡོད་པ་ལས་བྱེ་བྲག་པ་གང་ཡང་གླེང་མི་འདུག
༼ དོ་བདག་གི་ཟིན་བྲིས་ལས་འདིར་བདམས་བཀོད་བྱས། དྲ་ཐག https://tibettimes.net/blogs.php?id=138&post_id=21894 ༽
བསྐྱར་ཞིབ་འདི་ལ་ཞོར་ལྟ་ཙམ་བྱས་ན། མེག་མོ་ཧན་ས་ཐིག་གིས་བོད་དང་རྒྱ་གར་གཉིས་ཀྱི་ས་མཚམས་ཀྱི་གནད་དོན་ཐག་བཅད་པ་ཞིག་བྱུང་ཚོད་མི་འདུག གང་ཡིན་ཟེར་ན། ཚང་མས་མཁྱེན་གསལ་ཤིང་སྟག་སིམ་ལའི་ཆིངས་ཡིག་འདིར་བོད་ཕྱི་ནང་གཉིས་ཕྱེས་ཡོད་པ་མ་ཟད། ཟུར་ཐོ་ཀུན་པོར། མི་དགོས་པའི་ཆ་གནས་མང་པོ་བྱས་ཡོད་པས་དུས་སྐབས་གསར་པ་དང་༧རྒྱལ་མཆོག་བཅུ་བཞི་པས་འདོན་གནང་མཛད་པའི་ཆོལ་གསུམ་ཆིག་སྒྲིལ་གྱི་བོད་ཀྱི་བདེན་མཐའ་བསལ་ཕྱོགས་ཀྱི་རྒྱབ་རྩར་གནས་ཚུལ་འདི་རིགས་འོས་འཚམས་མིན་ལ། དེ་བཞིན་མཉམ་འབྲེལ་རྒྱལ་ཚོགས་སུ་ཕུལ་བའི་ལྔ་དགུའི་སྔ་གཞུག་གི་བོད་ཀྱི་བདེ་སྡུག་འཁོད་པའི་སྙན་ཞུ་རྣམས་ཀྱང་རྩ་འཛིན་རུང་བ་མིན་སྟབས། རྒྱ་ནག་གིས་ཆིངས་ཡིག་འདི་གཞི་རྩའི་ཆར་ངོས་ལེན་གནང་མེད་པ་ནི་ཁྲིམས་དང་དངོས་ཡོད་གང་གི་ཆ་ནས་བོད་དོན་གྱི་རླུང་རྟར་བརྩི་འོས་པ་ཡིན།
གཞན་འབྲི་ཆུའི་རྒྱུད་ཀྱི་རྒྱ་སྡེར་འབོད་པ་རྣམས་ལ་དགའ་ལྡན་ཕོ་བྲང་པའི་དབང་དང་ལུང་གི་ཁྱབ་ཚུལ་ལ་ཆོས་སྲིད་གཉིས་ཀྱི་ཁྱབ་ཚུལ་དང། ཆོས་ཕྱོགས་གཅིག་པུའི་ཁྱབ་ཚུལ་རྣམས་མཁས་དབང་བཀྲ་ཤིས་ཚེ་རིང་གི་ཕྱོགས་བསྡོམས་གནང་བ་ཞིག་ཡོད་པ་དེར་གཟིགས་ན་མུན་པ་སངས་རེ་ཆེ་བ་འདུག་བཅས་བསམ་ཚུལ་ཙམ་དུ།།