ས་གནས་མི་མང་གི་བསམ་ཚུལ་དཀོན་པོ་རེད།

དེ་རིང་དམིགས་བསལ་ཚོགས་ཆེན་གྱི་ཉིན་དང་པོར་ཚོགས་ཆུང་ཁག་གི་ནང་དུ། ད་ལྟའི་བོད་ནང་གི་ཛ་དྲག་གནས་སྟངས་ཐོག་བགྲོ་གླེང་གནང་བཞིན་ཡོད་འདུག

དེ་རིང་སྔ་དྲོར་ངྷ་སྟེང་བོད་ཁྱིམ་ཚོགས་ཁང་དུ་དམིགས་བསལ་ཚོགས་ཆེན་ཐེངས་གཉིས་པའི་དབུ་འཛུགས་མཛད་སྒོའི་ལས་རིམ་ཁག་གྲུབ་རྗེས། ཚོགས་བཅར་བ་ཡོངས་ཚོགས་ཆུང་ཁག་ ༡༠ རུ་བགོས་ཏེ་ཉིན་དང་པོའི་བརྗོད་གཞི། “ ད་ལྟའི་བོད་ནང་གི་ཛ་དྲག་གནས་སྟངས་ལ་བོད་གཞུང་དམངས་གཉིས་ནས་དགོང་ལེན་ཆེད། བཙན་བྱོལ་བོད་མིའི་ངོས་ནས་བཀའ་སྤྱི་གཉིས་ཀྱི་ལམ་སྟོན་ཞི་བ་དང་། ཡུལ་ཁྲིམས་དང་མི་འགལ་བ། ཆེ་མཐོང་ལྡན་པའི་ངང་བོད་མིའི་སྤྱི་ཚོགས་ནང་ལས་འགུལ་སྤེལ་ཕྱོགས་སྐོར” ལ་བསམ་ཚུལ་དང་བགྲོ་གླེང་གནང་མགོ་ཚུགས་ཡོད།

འདི་གའི་གསར་འགོད་པས་གསོལ་ཇའི་བར་གསེང་དང་བསྟུན་ཏེ་ཚོགས་ཆུང་ ༤ པའི་ཚོགས་ཞུགས་པ་བསྟན་འཛིན་སྒང་རང་བདེན་ཚོགས་ཆུང་གི་ཚོགས་གཙོ་བསོད་ནམས་འབྱོར་ལྡན་ལགས་སུ་། ཚོགས་ཆུང་ནང་བསམ་ཚུལ་གཙོ་བོ་ག་རེ་སྐོར་ལ་ཡོང་གི་ཡོད་མེད་དྲིས་པར། བགྲོ་གླེང་དབུ་འཛུགས་རིང་གཙོ་བོ་བོད་ཀྱི་རིག་གཞུང་དང་སྐད་ཡིག་ལ་བདག་པོ་རྒྱག་རྒྱུ་དང་། ལྷག་དཀར་ལས་འགུལ་ཐོག་མུ་མཐུད་ཤུགས་སྣོན་རྒྱག་རྒྱུ་གལ་ཆེན་ཡིན་སྐོར་བགྲོ་གླེང་གནང་བཞིན་ཡོད་སྐོར་ངོ་སྤྲོད་གནང་སོང་།

ཚོགས་ཆུང་ ༥ པའི་ཚོགས་ཞུགས་པ་སྦེལ་ཀོབ་ལུགས་ཟུང་བསམ་འགྲུབ་གླིང་གི་མི་མང་འཐུས་ཚབ་བསྟན་འཛིན་ཆོས་འཕེལ་ལགས་སུ། ཐེངས་འདིའི་ཚོགས་ཆེན་ཐོག་ས་གནས་མི་མང་གི་བསམ་ཚུལ་བསྡུས་ཡོད་མེད་དྲིས་པར། ཁོ་རང་གིས་མང་ཚོགས་ཀྱི་བསམ་ཚུལ་བསྡུས་ཏེ་ཡིག་ཐོག་བསྣམས་ཡོད་སྐོར་བརྗོད་སོང་ལ། ཡིག་ཐོག་གི་བསམ་ཚུལ་ནང་། དང་པོ། ༧གོང་ས་མཆོག་གི་དགོངས་བཞེད་དབུ་མའི་ལམ་ལ་མུ་མཐུད་རྒྱབ་སྐྱོར་ཞུ་རྒྱུ་དང་། གཉིས་པ། བོད་ནང་གི་ཛ་དྲག་གནས་སྟངས་ཇི་བཞིན་རྟོགས་ཆེད་རྒྱལ་སྤྱིའི་འཐུས་ཚབ་དང་རང་དབང་ཅན་གྱི་གསར་འགོད་པ་བོད་ལ་བསྐྱོད་ཐུབ་པར་འབད་བརྩོན་ཞུ་དགོས་པ། གསུམ་པ། བོད་ནང་གི་དཀའ་ངལ་སེལ་ཐབས་དང་འདས་པོ་རྣམས་ཀྱི་རེ་བ་འགྲུབ་ཆེད་མཆོད་འབུལ་སྨོན་ལམ་རྐྱང་པ་མིན་པར། དབུས་བོད་མིའི་སྒྲིག་འཛུགས་ཀྱི་ངོས་ནས་མང་ཚོགས་མཉམ་ཞུགས་ཀྱི་ལས་འགུལ་གཞན་གང་མང་སྤེལ་དགོས་པ་བཅས་བཀོད་འདུག

ཡང་གསར་འགོད་པས་ཚོགས་ཆུང་ ༨ པའི་ཚོགས་ཞུགས་པ་བལ་ཡུལ་བལ་ལུང་ས་གནས་རང་བདེན་ཚོགས་ཆུང་གི་ཚོགས་གཙོ་གྲྭ་དགེ་ལེགས་ཆོས་འཕེལ་ལགས་སུ། ཐེངས་འདིའི་དམིགས་བསལ་ཚོགས་ཆེན་ལ་རེ་བ་གང་འདྲ་ཞིག་བཟུང་ཡོད་མེད་དྲིས་པར་ཁོང་གིས། ཚོགས་ཆེན་འདི་བརྒྱུད་དེ་བོད་ནང་གི་ཛ་དྲག་གནས་སྟངས་ཐོག་ཁ་ཡོད་ལག་ཡོད་ཀྱི་ཐག་གཅོད་ཅིག་ཡོང་བའི་རེ་བ་བཟུང་ཡོད་པ་དང་། ཚོགས་ཆེན་འདིའི་ཐོག་གི་བསམ་ཚུལ་གལ་ཆེན་ཁག་ལ་ཁྲིམས་ཀྱི་ནུས་པ་ཡོད་པ་ཞིག་ཡོང་ཐབས་ལ། ཚོགས་ཆེན་གྲོལ་རྗེས་གྲོས་ཚོགས་འཕར་མ་ཞིག་ཚོགས་ཏེ་གྲོས་ཆོད་འཇོག་གལ་ཆེ་ཚུལ་སོགས་བརྗོད་བྱུང་།  

གཞན། ཚོགས་ཆུང་མང་པོ་ཞིག་ཏུ་ཉེ་ཆར་༧གོང་ས་མཆོག་གི་ཐུགས་ཕམ་གྱི་བཀའ་སློབ་དང་འབྲེལ་ཏེ། རང་བཙན་དང་དབུ་མའི་ལམ་གྱི་ལྟ་གྲུབ་འཛིན་མཁན་ཚོགས་པ་དང་མི་སྒེར་སོགས་ཀྱི་སྐོར་ལ་བསམ་ཚུལ་དང་བགྲོ་གླེང་ཡོང་བཞིན་པའི་ཐད། ཚོགས་ཆུང་ ༧ པའི་ནང་གི་ཚོགས་བཅར་པ་བྱང་ཨ་རིའི་སྤྱི་འཐུས་བཀྲ་ཤིས་རྣམ་རྒྱལ་ལགས་སུ་ཁོང་རང་ཉིད་ལ་ལྟ་ཚུལ་ག་རེ་ཡོད་མེད་དྲིས་པར་ཁོང་གིས་དབུ་མའི་ལམ་དང་རང་བཙན་གྱི་ལྟ་གྲུབ་འཛིན་མཁན་སུ་ཡིན་རུང་སོ་སོའི་ལངས་ཕྱོགས་ཐོག་བོད་སྤྱི་བའི་དམིགས་ཡུལ་མངོན་འགྱུར་ཡོང་ཐབས་བྱ་རྒྱུ་ལས་གཅིག་གིས་གཅིག་ལ་སྐྱོན་འཛུགས་བྱ་རྒྱུ་དེ་མ་རེད་ཅེས་བརྗོད་བྱུང་།

ཚོགས་ཆེན་གོ་སྒྲིག་གནང་མཁན་སྤྱི་འཐུས་ཚོགས་དྲུང་ལས་ཁུངས་ཀྱི་མགྲིན་ཚབ་པ་བསྟན་འཛིན་ནོར་བུ་ལགས་སུ་བཅར་འདྲི་ཞུས་པར། ཉིན་དང་པོའི་བརྗོད་གཞི་ད་ལྟའི་བོད་ནང་གི་ཛ་དྲག་ལ་གདོང་ལེན་ཆེད་བཙན་བྱོལ་བོད་མི་ཚོས་ག་རེ་བྱ་དགོས་པ་དང་། སང་ཉིན་རྒྱལ་སྤྱིའི་ནང་ག་རེ་བྱ་དགོས་པ། ཉིན་གསུམ་པར་ལྷོ་ཤར་ཨེ་ཤ་ཡའི་ནང་ག་རེ་བྱ་དགོས་པ་བཅས་ཡིན་འདུག་ལ། ཐེངས་འདིའི་ཚོགས་བཅར་པ་ཕལ་ཆེ་བ་ས་གནས་འཐུས་ཚབ་དང་ཚོགས་པ་སྒྲིག་འཛུགས་ཁག་ལ་གོ་སྐབས་ཕུལ་བ་དེ་གཙོ་བོ་མང་ཚོགས་དང་ཚོགས་པ་ཁག་གི་བསམ་ཚུལ་སླེབས་ཐབས་ཡིན་སྐོར་བརྗོད་ཀྱང་། གསར་འགོད་པས་རྒྱུས་ལོན་བྱས་པ་ལྟར་ན། ཐེངས་འདིར་ཚོགས་བཅར་བ་མང་ཆེ་བས་སོ་སོ་སྒེར་གྱི་བསམ་ཚུལ་འདོན་པ་ལས། ས་གནས་མང་ཚོགས་དང་ཚོགས་པའི་བསམ་ཚུལ་བསྡུས་ཏེ་འཁྱེར་ཡོང་མཁན་དཀོན་པོ་ཡིན་འདུག

གསར་འགོད་པ། བནྡེ་སྐྱབས།