གཟའ་སྤེན་པའི་ཉིན་རྒྱ་གར་བྱང་ཤར་རྡོ་གླིང་ཁུལ་དུ། གཏན་སློབ་ཁག་བཞིའི་ནང་བོད་ཡིག་དག་ཆ་འགྲན་བསྡུར་གྱི་ལས་འགུལ་ཞིག་སྤེལ་འདུག
ཟླ་འདིའི་ཕྱི་ཚེས་ ༡༣ ཉིན་རྒྱ་གར་བྱང་ཤར་ཁུལ་གྱི་རྡོར་གླིང་འཇམ་དབྱངས་བོད་ཀྱི་རིག་གཞུང་གཅེས་སྐྱོང་ཁང་གི་གོ་སྒྲིག་འོག བོད་ཡིག་གི་མིང་ཚིག་དག་ཆ་འགྲན་སྡུར་ཞིག་རིག་གཞུང་གཅེས་སྐྱོང་ཁང་དེའི་ཚོགས་ཁང་ནང་སྤེལ་ཡོད་པ་དང་། དག་ཆའི་འགྲན་སྡུར་ཁྲོད་འབྲུག་གསང་སྔགས་ཆོས་གླིང་དགོན་པ་དང་།རྡོ་རྗེ་གླིང་དབུས་གཞུང་བོད་ཀྱི་སློབ་གྲྭ། བསོད་ནམས་དར་དབུས་གཞུང་བོད་ཀྱི་སློབ་གྲྭ།སྤོག་རི་སྦོང་སཾ་བྷོ་ཊ་གཏན་སློབ་བཅས་གཏན་སློབ་ཁག་གསུམ་དང་། དགོན་སྡེ་གཅིག་བཅས་མཉམ་ཞུགས་བྱས་འདུག
མིང་ཚིག་བརྒྱད་ཅུ་ཅན་གྱི་དཔོད་བྲིས་དག་ཆ་འགྲན་སྡུར་དེའི་ནང་། ཨང་དང་པོ་སྤོག་རི་སྦོང་སཾ་བྷོ་ཊ་གཏན་སློབ་ཀྱི་འཛིན་གྲྭ་བཞི་བའི་སློབ་ཕྲུག་སྐལ་བཟང་རྣམ་རྒྱལ་དང་། ཨང་གཉིས་པ་སྤོག་རི་སྦོང་སཾ་བྷོ་ཊ་གཏན་སློབ་ཀྱི་འཛིན་གྲྭ་བཞི་བའི་སློབ་མ་ཀུན་བཟང་ཆོས་འཕེལ། ཨང་གསུམ་པ་སྤོག་རི་སྦོང་སཾ་བྷོ་ཊ་གཏན་སློབ་ཀྱི་འཛིན་གྲྭ་བཞི་བའི་སློབ་ཕྲུག་བདེ་ཆེན་སྒྲོལ་མ་དང་། འབྲུག་གསང་སྔགས་ཆོས་གླིང་གི་དགེ་འདུན་པ་བཤད་སྒྲུབ་རྒྱ་མཚོ་གཉིས་ལ་ཐོབ་ཡོད་པ་དང་། འགྲན་བསྡུར་ཁྲོད་བྱ་དགའ་ཐོབ་མཁན་རྣམས་ལ། འཇམ་དབྱངས་བོད་ཀྱི་རིག་གཞུང་གཅེས་སྐྱོང་ཁང་གི་ངོས་ནས་བྱ་དགའ་ཕྱག་ཁྱེར་བཅས་སྩལ་ཡོད་པ་རེད།
ཧ་ཅང་གི་ཡག་པོ་རེད། ལས་འགུལ་འདི་འདྲ་མང་ཙམ་སྤེལ་རོགས། བོད་མི་འདུ་སྡོད་ས་གནས་ཚང་མ་ནས་སྤེལ་རོགས། ད་རེས་དག་ཆ་འགྲན་སྡུར་གོ་སྒྲིག་གནང་མཁན་དང་འཛུལ་ཞུགས་གནང་མཁན། དམིགས་བསལ་བྱ་དགའ་ཐོབ་པའི་སློབ་ཕྲུག་དང་། སློབ་ཕྲུག་དེ་དག་གི་དགེ་རྒན་ཚོར་སྙིང་ཁོང་ནས་ཡག་བྱུང་ཐུགས་རྗེ་ཆེ་ཞུ།