ཁ་སང་ཕྱི་ཚེས་ ༢༡ ཉིན་དབྱིན་ཡུལ་གྱི་རྒྱལ་མོ་ཨེ་ལེ་ཛཱ་བྷེ་ཐི་ཡི་སྨན་ཁང་ (Queen Elizabeth Hospital Birmingham) གིས་གསར་བསྒྲགས་ཤིག་སྤེལ་ཏེ། ད་ཆར་པཱ་ཀི་སི་ཐན་གྱི་བུ་མོ་མཱ་ལཱ་ལཱ་ (Malala Yousufzai) སྨན་ཁང་དེར་སྨན་བཅོས་ལ་འབྱོར་པའི་ཉིན་ ༦ འགྲོ་བཞིན་པ་དང་། སྨན་པ་ཚོས་ཁོ་མོར་སྲོག་ཉེན་མེད་པའི་ཁེག་ཐག་བྱས་ཡོད་འདུག
ཕྱི་ཚེས་ ༩ ཉིན་རང་ལོ་ ༡༤ ཡིན་པའི་བུ་མོ་མཱ་ལཱ་ལཱ་པཱ་ཀི་སི་ཐན་གྱི་མེན་གྷོ་རཱ་ (Mingora) ས་གནས་ཀྱི་སློབ་གྲྭ་ནས་སྤྱི་སྤྱོད་རླངས་འཁོར་བསྡད་དེ་ཕྱིར་རང་ཁྱིམ་དུ་ལོག་སྐབས། ཊ་ལེ་བྷན་ (Taliban) དྲག་སྤྱོད་པས་མེ་མདའ་བརྒྱབ་སྟེ་མོའི་མགོ་དང་སྐེ་ལ་རྨས་སྐྱོན་ཚབས་ཆེན་ཕོག་ཡོད་པ་དང་། སྐབས་དེར་ས་གནས་སྨན་ཁང་དུ་ཁྲིད་ཀྱང་སྨན་བཅོས་བྱས་ཐུབ་མེད་པ་ལྟར། ཨ་རི་དང་དབྱིན་ཇི་སོགས་ཀྱིས་ཁོ་མོར་སྨན་བཅོས་མཐུན་འགྱུར་བྱ་རྒྱུའི་ཁས་ལེན་འོག་དབྱིན་ཡུལ་དུ་སྨན་བཅོས་ལྟ་སྐྱོང་དུ་བླངས་ཡོད།
མཱ་ལཱ་ལཱ་ནི་པཱ་ཀི་སི་ཐན་ནང་གི་བུད་མེད་ཀྱི་ཤེས་ཡོན་རྩོད་ལེན་བྱེད་མཁན་ཞིག་ཡིན་པ་དང་། ཁོ་མོར་ཐེངས་འགར་ཊ་ལེ་བྷན་ཤོག་ཁག་གིས་འཇིགས་སྐུལ་ཉེན་བརྡ་བཏང་ཡོད་ཀྱང་། ཁོ་མོས་བརྒྱུད་ལམ་འདྲ་མིན་བརྒྱུད་འཛམ་གླིང་ཕྱི་ཕྱོགས་སུ་པཱ་ཀི་སི་ཐན་ནང་གི་བུད་མེད་ལ་ཤེས་ཡོན་ཐོབ་ཐང་མེད་སྐོར་དང་། མོས་སོ་སོའི་ཉེན་ཁར་མ་འཛེམས་པར་སློབ་གྲྭར་སྐྱོད་པའི་དབང་གིས་ཁོ་མོ་གསོད་རྩིས་བྱས་པ་ཞིག་ཡིན་འདུག མཱ་ལཱ་ལཱ་ཡི་ཕ་རྒན་གྱིས་སྔོན་ཆད་བུད་མེད་སློབ་གྲྭ་ཞིག་བཙུགས་ཡོད་པའང་ཊ་ལེ་བྷན་དང་། ཁ་ཆེ་ལྟ་བ་མཁྲེགས་འཛིན་པའི་གནོན་ཤུགས་འོག་སྒོ་རྒྱག་དགོས་བྱུང་ཡོད་པ་རེད།
གསར་འགོད་པ། བནྡེ་སྐྱབས།
ཨེ་མ་བུ་མོ་འདི་ལ་འདི་འདྲ་བས་དོ་སྣང་ཡོད་པ་ནི་སེམས་ཀྱི་རྨ་ཁར་འགྱུར། ངས་དཔའ་རྒོད་ཕོ་མོས་མཛད་རྗེས་འདི་ལས་ཧ་ཅང་གི་ཟབ་ཟབ་པོ་འགྱུར་ཡོད། ཡིནའང་སུས་ཀྱང་ཡ་ང་བ་མེད་རེད། ཨ་ཁ་འཛམ་གླིང་འདི་ནང་དྲང་བདེན་གྱི་བདུད་རྩི་ཡེ་ནས་མེད་པ་རེད་་་་་་་་་ཡ་སྐྱོ་བ་ལ་་་་་བོད་་་་་བོད་་་་བོད་་་་