དེ་རིང་བོད་མདོ་སྨད་རེབ་གོང་མདོ་བ་འབྲོག་སྡེའི་རྒྱལ་གཅེས་དཔའ་བོ་སྐལ་བཟང་སྦྱིན་པ་ལགས་ཀྱིས། རང་ལུས་མེར་བསྲེཊ་ཀྱིས་རྒྱ་ནག་གཞུང་ལ་ངོ་རྒོལ་བྱས་ཏེ་སྐུ་གྲོངས་འདུག
སུད་སུ་གནས་སྡོད་རེབ་གོང་ཤ་བོ་རྡོ་རྗེ་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། དེ་རིང་ཕྱི་ཚེས་ ༨ ཉིན་གྱི་བོད་ནང་གི་ཆུ་ཚོད་ ༤།༠༠ ཡས་མས་སུ་བོད་མདོ་སྨད་རྨ་ལྷོ་རེབ་གོང་མདོ་བ་འབྲོག་སྡེའི་རང་ལོ་ ༡༨ ཡིན་པའི་རྒྱལ་གཅེས་དཔའ་བོ་སྐལ་བཟང་སྤྱིན་པ་ལགས་ཀྱིས། རེབ་གོང་རོང་བོ་དགོན་པའི་སྒྲོལ་མ་ཐང་ཆེན་དུ་རང་ལུས་མེར་བསྲེཊ་ཀྱིས། “ ༸རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་དགོས། ” ཞེས་སྐད་འབོད་བྱེད་བཞིན་རྒྱ་གཞུང་གིས་དྲག་གནོན་དབང་བསྒྱུར་སྲིད་ཇུས་ལ་ངོ་རྒོལ་བྱས་ཏེ་སྐུ་གྲོངས་འདུག
དེ་བཞིན། ནོར་གླིང་གནས་སྡོད་བསྟན་འཛིན་རབ་རྒྱས་དང་རྡོ་རྗེ་དབང་ཕྱུག་ཉིས་ཀྱིས་གནས་ཚུལ་བཏང་འབྱོར་ལྟར་ན། དེ་རིང་ཕྱི་ཚེས་ ༨ ཉིན་རྨ་ལྷོ་རེབ་གོང་དུ་རང་ལུས་མེར་བསྲེཊ་གནང་མཁན་རྒྱལ་གཅེས་དཔའ་བོ་ཁོང་གིས། བོད་ནང་གི་ཆུ་ཚོད་ ༤ དང་སྐར་མ་ ༥༥ སྟེང་། རེབ་གོང་རོང་པོ་དགོན་པའི་སྒྲོལ་མ་ཐང་ཆེན་ནས་རང་ལུས་མེར་བསྲེགས་བཏང་སྟེ་འདས་གྲོངས་ཕྱིན་ཡོད་འདུག་ལ། རྒྱལ་གཅེས་དཔའ་བོ་ཁོང་ནི། རེབ་གོང་མདོ་བ་འབྲོག་སྡོང་བེ་སྡེ་བ་རྒྱ་སྡང་ཚོ་བ་ནས་ཡིན་པ་བླ་མ་སྐྱབས་ཀྱི་བུ་མོ་བདེ་མཆོག་སྐྱིད་ཀྱི་བུ་ཡིན་པ་དང་། མིང་ལ་སྐལ་བཟང་སྦྱིན་པ་འབོད་ཀྱི་ཡོད་པ་དང་། དེ་སྔ་རོང་པོ་དགོན་པའི་གྲྭ་པ་དང་ད་ལྟ་མི་སྐྱ་ཡིན་འདུག
སྐལ་བཟང་སྦྱིན་པ་ལགས་ཀྱི་ཕ་མིང་ལ་གཅོད་པ་དང་། མ་མིང་ལ་བདེ་མཆོག་སྐྱིད་ཟེར་བ་དང་། ཕ་གཅོད་པ་སྐྱབས་ནི་མ་བདེ་མཆོག་སྐྱིད་ཀྱི་ནང་ལ་མག་པར་ཡོང་བ་ཞིག་ཡིན་འདུག་ནའང་། ཕྱིས་སུ་གཅོད་པའི་ཕ་མ་གཉིས་ལ་བདག་པོ་རྒྱག་དགོས་བྱུང་བའི་གནས་སྟངས་འོག་མག་པའི་ནང་དུ་ཕར་སྤོར་འདུག་པ་དང་། སྐལ་བཟང་སྦྱིན་པ་ལགས་བདེ་མཆོག་སྐྱིད་ཀྱི་ཕ་བླ་མ་སྐྱབས་དང་མ་བདེ་མཆོག་སྐྱིད་གཉིས་ཀྱི་འཁྲིས་ནས་འཚར་ལོངས་བྱུང་ཡོད་འདུག་སྟབས། ད་ལྟ་ཁོང་གི་སྐོར་གནས་ཚུལ་འགྲེལ་བརྗོད་བྱེད་མཁན་ཚོས། བླ་མ་སྐྱབས་ཀྱི་བུ་མོ་བདེ་མཆོག་སྐྱིད་ཀྱི་བུ་སྦྱིན་པ་རྒྱ་མཚོ་ཞེས་འགྲེལ་བརྗོད་བྱེད་ཀྱིན་འདུག
དེ་རིང་སྐལ་བཟང་སྦྱིན་པ་ལགས་ནས་ཐོག་མར་མེར་བསྲེགས་གཏོང་སྐབས་མི་མང་བརྒྱ་སྐོར་ཙམ་འཛོམས་ནས་མེ་གསོད་ཐབས་དང་ཕུང་པོ་རྒྱ་ལག་ཏུ་
མི་ཤོར་བའི་ཐབས་ཤེས་གང་ཡོང་བྱས་འདུག་ལ། སྐབས་དེར་མི་མང་གིས་ ”རྒྱལ་བ་བསྟན་འཛིན་རྒྱ་མཚོ་ཁྲི་ལོར་བརྟན་པར་ཤོག” ་ཅེས་སྐད་འབོད་དང་། རིམ་པར་མི་མང་ཕོན་ཆེ་འདུ་འཛོམས་བྱུང་སྟེ་ཁྱོན་བསྡོམས་མི་གྲངས་བཞི་སྟོང་ནས་ལྔ་སྟོང་ཙམ་སྒྲོལ་མ་ཐང་ཆེན་དུ་འཛོམས་ནས། རྒྱལ་བ་བསྟན་འཛིན་རྒྱ་མཚོ་ཁྲི་ལོར་བརྟན་པར་ཤོག་ཅེས་སྐད་འབོད་ལྡིར་བའི་ཀློང་ནས། སྐལ་བཟང་སྦྱིན་པ་ལགས་ཀྱི་ཕུང་པོ་ཐད་ཀར་གདོང་རྒྱ་ཀླད་དུ་གདན་ཞུ་ཞུས་འདུག་ལ། གདོང་རྒྱལ་ཀླད་དུ་ཕྱོགས་ཡར་མར་ནས་སླེབས་པའི་མི་མང་སྟོང་ཕྲག་བརྒྱད་དགུ་ཞིག་འཛོམས་ཡོད་ཚོད་དེ་དག་ཁྲོད། རྒྱལ་བའི་ཞབས་བརྟན་སྐྱོར་འདོན་དང་། གཞན་ཡང་། “རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག” ཅེས་སྐད་འབོད་ཀྱང་ཤུགས་ཆེ་བྱས་ཡོད་འདུག
ས་གནས་ཀྱི་མིས་འགྲེལ་བརྗོད་བྱས་པ་ལྟར་ན། དེ་རིང་གི་མེར་བསྲེགས་གནས་ཚུལ་འདི་བྱུང་རྗེས་རེབ་གོང་རོང་པོའི་ལམ་འགག་ཚང་མར་དམག་མི་འགྲེམས་འཇོག་དང་། དེ་བཞིན་ཐོག་མར་མི་མང་འདུ་འཛོམས་བྱུང་ཡུལ་སྒྲོལ་མ་ཐང་དང་དེ་ནས་གདོང་རྒྱ་ཀླད་དུ་སྐུ་ཕུང་གདན་ཞུའི་སྐབས་དང་། སྦྱིན་སྲེག་གི་སྐབས་བཅས་ལ་དམིགས་བསལ་དམ་དྲག་གི་གནས་ཚུལ་བྱུང་ཡོད་མི་འདུག་ནའང་། ས་གནས་ཀྱི་མིས་བརྗོད་གསལ་ལ། གནས་ཚུལ་འདི་རིགས་བྱུང་སྐབས་རྩ་བས་ཞི་འཇགས་ཡོང་ཐབས་ཆེད་དམག་མི་དང་མང་ཚོགས་གདོང་ཐུག་གི་གནས་ཚུལ་རིགས་མ་ཡོང་བ་གཙོ་འདོན་བྱེད་བཞིན་འདུག་སྟབས། མངོན་གསལ་དེ་ཙམ་མེད་པ་མ་གཏོགས། མི་མང་ཁྲོད་དཀྱུས་ཆས་གྱོན་པའི་དམག་མི་དང་ཉེན་རྟོག་པ་འགྲེམས་འཇོག་བྱེད་པ་དང་། སོ་མྱུལ་བ་འགྲེམས་འཇོག་བྱེད་ཀྱི་ཡོད་པ་ནི་རྒྱུན་ལྡན་གྱི་གནས་ཚུལ་ཞིག་ཡིན་སྐོར་ཤོད་ཀྱི་འདུག
སྐལ་བཟང་སྦྱིན་པ་ལགས་ནི། རེབ་གོང་རོང་པོ་དགོན་པར་དུས་འཁོར་གྲྭ་ཚང་དང་། རྒྱུད་པ་གྲྭ་ཚང་། ཐོས་བསམ་གླིང་གྲྭ་ཚང་བཅས་གྲྭ་ཚང་གསུམ་ཡོད་པ་ལས་ཐོས་བསམ་གླིང་དུ་ཞུགས་ནས་ལོ་ཤས་རིང་གཞུང་ཆེན་ཁག་སློབ་གཉེར་གནང་མྱོང་མཁན་ཞིག་ཡིན་འདུག
གཞན་ཡང་། བསོད་ནམས་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཁ་སང་དང་དེ་རིང་ཉིན་གཉིས་རིང་རྒྱལ་གཅེས་དཔའ་མོ་རྟ་མགྲིན་འཚོ་དང་རྒྱལ་གཅེས་པ་སྐལ་བཟང་སྦྱིན་པ་གཉིས་ཀྱིས་རང་ལུས་མེར་བསྲེཊ་ཀྱིས་རྒྱ་གཞུང་ངོ་རྒོལ་བྱས་པའི་གནས་ཚུལ་བྱུང་རྗེས། མདོ་བ་ཞང་གི་སློབ་ཆུང་སློབ་མ་ཚོས་སྐད་འབོད་བྱས་ཡོད་འདུག་ལ། སློབ་མ་རྣམས་རེབ་གོང་རྫོང་ཐོག་ཏུ་བསྐྱོད་འཆར་ཡོད་པའི་ཐད་དགེ་རྒན་དང་ལས་བྱེད་རྣམ་པའི་བཀག་འགོག་བྱེད་ཀྱི་ཡོད་འདུག
གསར་འགོད་པ། དོན་གོ
ད་ངོ་མ་གང་དྲག་་་ང་ཚོས་སྨོན་ལམ་འདེབས་ནས་འདུག་རྒྱུ་ལས་ཐབས་ཤེས་གང་ཡང་ཁག་པོ་རེད། ཁོང་རྣམ་འཕགས་མཆོག་སྤྱན་རས་གཟིགས་ཀྱིས་རྗེས་སུ་འཛིན་པར་སྨོན། གསར་འགོད་པ་ཚོས་ཁོང་རྣམས་པའི་མཚན་གསལ་པོ་བཀོད་དགོས་པ་ལས་སྣང་ཆུང་ནམ་ཡང་མི་རུང་།
གོང་གི་དཔའ་བོ་འདིའི་མིང་ནོར་འདུག མིང་ལ་སྐལ་བཟང་སྦྱིན་པ་ཟེར་བ་རེད།
རེབ་གོང་སྤྱིན་པ་རྒྱ་མཚོའི་མཛད་རྗེས་ལ་ཡི་རེངས་དང་ནང་མི་ཡོངས་ལ་གདུང་སེམས་མཉམ་བསྐྱེད་གཙོས་རེབ་གོང་མི་དམངས་ཡོངས་ལ་ གདུང་སེམས་མཉམ་བསྐྱེད་བྱེད་པར་ཐུགས་རྗེ་ཆེ་ཞུ།