རྒྱ་གཞུང་སྐབས་ ༡༨ པའི་ཚོགས་འདུ་དང་སྐབས་བསྟུན་ནས། མགོ་ལོག་རྨ་ཆེན་རྫོང་སྡོམ་ཁོག་ཞང་དུ་དྲག་རྡུང་དམག་སྦྱོང་ལས་འགུལ་ཞིག་སྤེལ་ཏེ། ལོ་ ༡༥ ནས་ ༦༥ བར་གྱི་སྐྱེས་པ་ཚང་མར་གཅར་རྡུང་བྱས་ཡོད་འདུག
ཕྱི་ཟླ་ ༡༠ ཚེས་ ༢༤ ནས་བཟུང་རྒྱ་གཞུང་གིས་མགོ་ལོག་ཁུལ་རྨ་ཆེན་རྫོང་གི་ཞང་སོ་སོའི་ནང་དྲག་རྡུང་ལས་འགུལ་ཞིག་སྤེལ་མགོ་བརྩམས་ཡོད་པ་དང་། ཕྱི་ཟླ་ ༡༡ ཚེས་ ༣ ནས་བཟུང་སྡོམ་ཁོག་ཞང་དུའང་དམངས་དམག་སྦྱོང་བརྡར་ལ་ཁ་གཡར་ཏེ། རྨ་ཆེན་རྫོང་ཉེན་རྟོག་པ་དང་སྡོམ་ཁོག་ཞང་ཉེན་རྟོག་པ། ༡༡༠ ཉེན་ཟོན་རུ་ཁག་བཅས་མཉམ་འབྲེལ་ཐོག་ཉིན་ ༡༠ རིང་དྲག་རྡུང་ལས་འགུལ་སྤེལ་མགོ་བརྩམས་ཡོད་འདུག
དྲག་རྡུང་དམག་སྦྱོང་ལས་འགུལ་དེར་སྡོམ་ཁོག་ཞང་ཁོངས་ཀྱི་ལོ་ ༡༥ ཡན་ནས་ ༦༥ མན་གྱི་སྐྱེས་པ་ཡོངས་རྫོགས་ཞུགས་དགོས་པའི་བཙན་བཀའ་བཏང་ཡོད་ལ། གལ་སྲིད་རང་འགུལ་ཐོག་མཉམ་ཞུགས་མ་བྱས་ཚེ་ཉེན་རྟོག་པ་འཇུ་བཟུང་བཙན་ཁྲིད་བྱེད་དུ་ཡོང་རྒྱུ་ཡིན་པའི་བཙན་བཀའ་བཏང་ནས། སྐྱེས་པ་ཡོངས་རྫོགས་སྡོམ་ཁོག་ཞང་ཐོག་ཏུ་བསྡུ་སྐོང་བྱས་རྗེས། བཙན་དྲག་འོག་སྐྱེས་པ་ཚང་མའི་མགོའི་སྐྲ་བཞར་བཅུག་སྟེ་གཅར་རྡུང་དྲག་གནོན་གྱི་ལས་འགུལ་སྤེལ་ཡོད་པ་དང་། དེ་བཞིན། ལམ་མདོ་ཁག་ནས་སྒུག་སྡོད་བྱས་ཏེ་ལས་འགུལ་ལ་གཡོལ་མཁན་སྐྱེས་པ་ཚང་མ་བཙན་ཁྲིད་ཀྱིས་གཅར་རྡུང་དྲག་པོ་གཏོང་བཞིན་ཡོད་འདུག
འདི་གར་གནས་ཚུལ་མཁོ་གཏོང་བ་དམེ་ཚང་བཀྲ་ཤིས་རྒྱ་མཚོ་ལགས་ཀྱིས་བརྗོད་པ་ལྟར་ན། དྲག་རྡུང་ལས་འགུལ་དེའི་ཁྲོད། རྨ་འདབས་རིག་གནས་ཞབས་ཞུ་ཚོགས་པའི་ཚོགས་གཙོ་ཟུར་པ་དང་འབྲོང་ཁེར་ལྡོམ་སྒྲ་བརྙན་སྒྲིག་སྦྱོར་ཁང་གི་གཙོ་གཉེར་བ་དཔལ་ཆེན་སྐྱབས་དང་། རྨ་འདབས་རིག་གནས་ཞབས་ཞུ་ཚོགས་པའི་ཚོགས་གཙོ་རྟ་བོའུ་མགོན་པོ་བཀྲ་ཤིས། རྡུང་ལེན་པ་ཨོ་རྒྱན་ཚེ་རིང་། སྒྱུ་རྩལ་པ་པདྨ་འོད་གསལ་སོགས། བོད་ཀྱི་རིག་གནས་ཡུལ་སྲོལ་ཐད་ཕྱག་ལས་གནང་མཁན་གྱི་གླུ་བ་དང་སྒྱུ་རྩལ་པ། སྐད་ཡིག་སྲུང་སྐྱོབ་ལས་འགུལ་བ་རྣམས་དམིགས་སུ་བཏོན་ཏེ་གཅར་རྡུང་དྲག་པོ་བྱེད་བཞིན་ཡོད་འདུག
ཟླ་འདིའི་ཕྱི་ཚེས་ ༥ ཉིན་རྟ་བོའུ་མགོན་པོ་བཀྲ་ཤིས་དང་ཨོ་རྒྱན་ཚེ་རིང་གཉིས་ལ་རྨས་སྐྱོན་ཚབས་ཆེན་ཕོག་སྟེ། ད་ལྟ་མགོ་ལོག་ཁུལ་མི་དམངས་སྨན་ཁང་དུ་སྨན་བཅོས་བྱེད་བཞིན་ཡོད་པ་དང་། ལོ་ ༥༣ ཅན་གྱི་རྒན་པོ་དགྲ་ལྷར་ཡང་རྨས་སྐྱོན་ཕོག་ཏེ་སྨན་ཁང་དུ་བསྐྱལ་དགོས་བྱུང་ཡོད་ལ། དཔལ་ཆེན་སྐྱབས་ནི་འདུག་བཟོད་མ་ཐུབ་པར་བྲོས་བྱོལ་དུ་ཕྱིན་ཡོད་པ་དང་། དེ་མིན་གྱི་སྐྱེས་པ་གཞན་མང་པོར་རྡུག་རྡེག་ཚ་ནན་བཏང་སྟེ་ཉལ་སར་ལྷུང་བཅུག་ཡོད་འདུག
ས་གནས་མི་མང་གིས་དྲག་རྡུང་ལས་འགུལ་དེ་ནི། སྐབས་བཅོ་བརྒྱད་པའི་ཚོགས་ཆེན་ལ་ཁག་བཞག་སྟེ། ནམ་རྒྱུན་ས་གནས་མི་མང་ལ་ཁ་ཡོད་ལག་ཡོད་ཀྱི་ཕན་ཐོགས་པའི་ལས་དོན་སྒྲུབ་མཁན་དང་། བོད་པའི་སྐད་ཡིག་རྒྱུན་འཛིན་སྐོར་ལ་ཧུར་ཐག་གིས་འབད་འབུངས་བྱེད་བཞིན་པའི་བོད་མི་རྣམས་བསམ་བཞིན་མང་ཚོགས་ཀྱི་མདུན་ནས་གཅར་རྡུང་བྱས་ཏེ། ལུག་བསད་དེ་ར་འདར་བཅུག་པའི་དཔེ་ལྟར་མང་ཚོགས་ལ་འཇིགས་སྐུལ་བྱ་ཐབས་ཀྱི་ལས་འགུལ་ཞིག་ཡིན་པར་བརྗོད་ཀྱི་ཡོད་འདུག
གསར་འགོད་པ། ཚེ་རིང་རྒྱལ།
ཨ་རིག་དང་གངས་ལགས་འབྲི་སྟངས་ཀྱི་ཆ་ནས་རྫུན་དུ་འགྲོ་བ་འགའ་འདུག་ཅེས་པ་དེས་དོན་གསལ་བོ་གོ་མ་སོང་། ཡིན་ནའང་། གནས་ཚུལ་བརྗོད་མཁན་གྱི་འགྲེལ་བརྗོད་གནང་བ་ལྟར་གཅིག་གཅིག་གཉིས་གཉིས་ཀྱིས་བྲིས་ཡོད། གང་ཞིག་ཁ་གསལ་མེད་པ་དང་གང་ཞིག་ལ་དོགས་སློང་པ་ཡིན་ན་དེ་གསལ་འདོན་བྱས་ན་ལེགས་པོ་འདུག དབྱུག་པས་ལེབ་རྡུང་བྱས་ན་གསལ་བཤད་ཀྱང་ཅི་ལྟར་བྱེད་དགོས་ཤེས་ཀྱི་མི་འདུག
དོན་འདི་ཁ་གསལ་བོ་ཞིག་གསུངས་རོགས། གཞི་རྩའི་གནད་དོན་གང་ཡང་མེད་པར་སྐྱེས་པ་ཚང་མར་དྲག་རྡུང་གཏོང་དགོས་བ་ག་རེ་ཡིན་ན། མ་མཐའ་ཡང་ཁག་རྫུན་མ་ཞིག་འཇོག་ས་ཡོད་ཀྱི་རེད། གོང་དུ་ཨ་ཁུ་ཨ་རིག་གིས་གསུང་བ་བཞིན་རེད། མི་སུ་ལ་བཤད་ནའང་ཅུང་ཙམ་ཡིད་ཆེས་དཀའ་བའི་གནས་རེད། དེ་བས་དབྱེ་ཞིབ་གསལ་བོ་ཞིག་བྱས་ནས་རྒྱལ་སྤྱིའི་གསར་ལམ་ཁག་ལ་སྐྱེལ་དགོས། རབ་ཡིན་ན་དེའི་སྐབས་ཀྱི་འདྲ་པར་རེ་ལག་པར་རེགས་ན་དགོས་བ་ཧ་ཅང་ཆེ།
རྒྱ་དང་སྒྱུ་མ་མཁན་ལ་ཡིད་མ་རྟོན་ཞེས་པ་ལྟར། སྐབས་འདིར་ང་ཚོས་ཅིས་ཀྱང་འཚེ་མེད་ཞི་བ་དགོས།
རྩ་བའི་རྒྱ་ནག་གིས་ང་ཚོར་རྡུང་རྡེག་ཚད་མེད་གཏོང་གི་ཡོད་པ་ཀུན་གྱིས་ཤེས་གསལ་རེད། འོན་ཀྱང་འདི་ལ་དབྱེ་ཞིབ་ཅིག་བྱས་ན་མ་གཏོགས་འབྲི་སྟངས་ཐད་ནས་ཏོག་ཙམ་རྫུན་དུ་འགྲོ་ངེས་པའི་གཏམ་འགའ་རེ་འདུག དེ་མིན་ད་ལྟའི་རྒྱ་ནག་གི་བྱ་ལས་བཙོག་ག་དག་ནི་ངས་བཤད་མི་དགོས་པར་འཛམ་གླིང་གི་མཐོང་སར་བསྟར་ཡོད་པ་དེའོ།།
ད་ཡིན་ན་ངོ་མ་ཚད་ལས་བརྒལ་སོང་། རྒྱ་ནག་དམར་གཞུང་དེ། ང་ཚོའི་ག་རེ་བྱེད་དགོས་སམ།
སྤུན་ཟླ་ཚོ། ད་ལངས་ཤོག་ཡ། བཙན་བྱོལ་བའི་སྤུན་ཟླ་ཕུ་ནུ་རྣམས་པ་ཚོ། ་་་་་་་་་་་་་་་་་་་་་་་་་་་
གནས་ཚུལ་འདི་བཙན་བྱོལ་བོད་མི་སྒྲིག་འཛུགས་ཀྱིས་སྤྱི་སྒེར་སུས་འཇོན་ན་རྒྱལ་སྤྱིའི་གསར་ལམ་ཁག་ལ་སྐྱེལ་དགོས། འདི་དག་གིས་བོད་མིའི་རང་སྲེག་གི་རྒྱུ་རྐྱེན་དངོས་གནས་པ་དེ་ཤེས་ཐུབ།