ཁ་སང་ཕྱི་ཚེས་ ༡༦ ཉིན་གྱི་ཉི་ཧོང་གྲོས་ཚོགས་འོས་བསྡུའི་ཁྲོད་ད་ལྟའི་གཞུང་འཛིན་ཚོགས་པ་༼ཉི་ཧོང་དམངས་གཙོ་ཚོགས་པ༽ཤོར་ཞིང་། ཁ་གཏད་ཚོགས་པ་ཉི་ཧོང་གུ་ཡངས་དམངས་གཙོ་ཚོགས་པར་རྒྱལ་ཁ་ཐོབ་ཡོད་པས། དེ་སྔའི་སྲིད་བློན་ཟུར་པ་སྐུ་ཞབས་ཤེན་ཛོ་ (Shinzo Abe) སྐབས་རྗེས་མའི་སྲིད་བློན་ཆགས་རྒྱུ་ཡིན་འདུག
གུ་ཡངས་དམངས་གཙོ་ཚོགས་པར་གྲོས་ཚོགས་འོས་བསྡུའི་རྒྱལ་ཁ་ཐོབ་འཕྲད། སྲིད་བློན་ཟུར་པ་སྐུ་ཞབས་ཤེས་ཛོ་ཡིས་གསར་འགོད་གསལ་བསྒྲགས་ཤིག་སྤེལ་ཏེ། ཐེངས་འདིར་གུ་ཡངས་དམངས་གཙོ་ཚོགས་པར་མི་མང་གི་རྒྱབ་སྐྱོར་འོས་ཤོག་ཐོབ་པ་དེ་ནི། ཞི་བདེ་རྒྱ་མཚོའི་མངའ་ཁུལ་བདག་དབང་ཐད་ནས་རྒྱ་ནག་ལ་བཟུང་པའི་མཁྲེགས་བཟུང་སྲིད་ཇུས་ལ་རྒྱབ་སྐྱོར་བྱས་པ་ཞིག་ཡིན་སྟབས། ཁོང་དང་ཁོང་གི་ཚོགས་པས་མི་མང་གི་མངོན་འདོད་འགྲུབ་པར་བྱ་རྒྱུ་ཡིན་ཞེས་བརྗོད་ཡོད་པ་མ་ཟད། རྒྱ་ནག་གིས་སན་ཀཱ་ཀུ་གླིང་ཕྲན་གྱི་བདག་དབང་ཐད་རྩོད་ལེན་བྱེད་བཞིན་པ་མཚམས་འཇོག་བྱ་དགོས་པ་དང་། གླིང་ཕྲན་དེའི་བདག་དབང་ཉི་ཧོང་ལ་ཡོད་པས། ཕྱོགས་གཉིས་ཀྱི་གནས་བབ་ཛ་དྲག་ཏུ་མི་འགྱུར་པའི་ཐད་རྒྱ་ནག་གིས་རང་ཚོད་ཟིན་དགོས་པའི་ཉེན་བརྡ་བཏང་ཡོད་འདུག
རང་ལོ་༥༨ཡིན་པ་སྐུ་ཞབས་ཤེན་ཛོ་ནི་༢༠༠༦ལོར་ཉི་ཧོང་གི་སྲིད་བློན་ཆགས་ཡོད་ཀྱང་། ༢༠༠༧ལོར་ཁོང་གིས་ན་ཚའི་དབང་གིས་དགོངས་ཞུ་བྱས་ཡོད་པ་དང་། དུས་རྒྱུན་ཉི་ཧོང་རྒྱལ་གཅེས་རིང་ལུགས་པ་ཞིག་དང་ལྷག་པར་དུ་རྒྱ་ནག་ཐད་ལངས་ཕྱོགས་མཁྲེགས་པོ་འཛིན་མཁན་ཞིག་ཡིན་འདུག
གསར་འགོད་པ། བནྡེ་སྐྱབས།
་་་་མ་ཟད། རྒྱ་ནག་གིས་སན་ཀཱ་ཀུ་གླིང་ཕྲན་གྱི་བདག་དབང་ཐད་རྩོད་ལེན་བྱེད་བཞིན་པ་མཚམས་འཇོག་བྱ་དགོས་པ་དང་། གླིང་ཕྲན་དེའི་བདག་དབང་ཉི་ཧོང་ལ་ཡོད་པས། ་་་་་ཟེར།