རང་སྲེག་ཐད་འདི་ལྟར་བསམ་སོང་།

བློ་གྲོས་རབ་བརྟན།

གང་དུ་བཙན་གནོན་ཡོད་ན། དེ་རུ་རང་སྲེག་ཡོད། འདས་པའི་ལོ་གཉིས་ལ་བརྩེ་བའི་སྤུན་ཟླ་བརྒྱ་སྐོར་ཞིག་གིས་བོད་དོན་ཆེད་དུ་རྒྱ་གཞུང་ལ་ཞི་རྒོལ་གྱིས་རང་ལུས་མེར་བསྲེགས་བྱས་སོང་། འདི་ནི་ད་བར་འཛམ་གླིང་དུ་བྱུང་དཀོན་པའི་ཟིན་ཐོ་ཞིག་རེད་ལ། ད་ལྟའི་བོད་ནང་གི་བོད་མི་ཚོའི་སྡུག་བསྔལ་གྱི་ཟབ་ཚད་དང་སྙིང་སྟོབས་དེ་ཕྱིར་བསྟན་པ་རེད། ད་ལྟའི་ཆར་རང་སྲེག་གི་རྒྱུ་ཕྱོགས་ཀྱང་ཨ་མདོའི་ལྷོ་རྒྱུད་ནས་བྱང་རྒྱུད་དུ་འཕོ་བཞིན་པའི་སྐབས་སུ། ཡིད་གདུང་བས་མནར་བཞིན་རང་ཉིད་ཀྱི་ལྟ་སྟངས་འགའ་འབྲི་རྒྱུ་ཡིན།

མའོ་ཚེ་ཏུང་གིས་གང་དུ་གཉའ་གནོན་ཡོད་ན་དེ་རུ་ངོ་རྒོལ་ཡོད་ཟེར་བ་ལྟར། གང་དུ་བཙན་གནོན་ཡོད་ན་དེ་རུ་རང་སྲེག་ཡོད། དེའི་དཔེ་མཚོན་ནི་དེང་གི་བོད་རེད། རྒྱ་གཞུང་གིས་བོད་དུ་མི་རིགས་རྩ་མེད་དང་། ཐོབ་ཐང་བཙན་འཕྲོག་གི་སྲིད་ཇུས་ཀྱིས་བོད་མི་ཚོ་འཆི་ལམ་དུ་འདེད་བཞིན་པའི་སྐབས་འདིར། བོད་མི་ཚོར་ལམ་ཁ་གཅིག་མ་གཏོགས་ལྷག་ མེད། ལམ་ཁ་དེ་ནི་རང་གི་ངོ་བོ་སྲུང་སྐྱོབ་ཆེད་དུ་རང་སྲེག་གིས་རྒྱ་གཞུང་ལ་ཞི་རྒོལ་བྱ་རྒྱུ་དེ་རེད། འདི་ནི་བོད་མི་ཚོས་མི་ལོ་ལྔ་བཅུའི་དཀའ་སྡུག་གི་བརྒྱུད་རིམ་ཁྲོད་དུ་ཐབས་ཤེས་འདྲ་མིན་གྱིས་རྒྱ་གཞུང་ལ་ཞི་འབོད་བྱས་ཀྱང་། དགོས་པའི་གྲུབ་འབྲས་མ་བྱུང་སྟབས་མཐའ་མའི་ཐག་ཆོད་འདི་བྱས་པ་རེད། ཐག་ཆོད་འདི་ལྟར་ཡོང་དགོས་དོན་ནི་རྒྱ་གཞུང་གིས་བོད་དུ་བཟུང་བའི་སྲིད་ཇུས་དང་དེང་གི་དྲག་གནོན་ལ་ཐུག་ཡོད། འདིའི་མཇུག་འབྲས་ཅི་བྱུང་དང་། རང་སྲེག་མཚམས་ཇི་ལྟར་འཇོག་མིན་ཡང་རྒྱ་གཞུང་གིས་བོད་དུ་ལས་ཀ་བྱེད་སྟངས་ཀྱིས་ཐག་གཅོད་གི་རེད།

བོད་མི་ཚོ་དོན་དམ་གྱི་འཐབ་རྩོད་ལ་ཞུགས་ཏེ། རང་སྲེག་གིས་རྒྱ་གཞུང་ལ་ཞི་རྒོལ་འཕྲོ་མཐུད་བཞིན་ཡོད། དེས་རྒྱ་གཞུང་གི་དྲག་གནོན་ལ་བཟང་ཕྱོགས་ཀྱི་གཡོ་འགུལ་ཐེབས་རྒྱུའི་ཚབ་ལ། ཇེ་སྡུག་ཇེ་ངན་དུ་གཏོང་བཞིན་ཡོད། འོན་ཏེ་འདིས་བཙན་བྱོལ་དུ་བོད་མི་སྐོར་ཞིག་ལ་གཡོ་འགུལ་ཐེབས་བཞིན་ཡོད་དེ།༼ད་རང་སྲེག་མཚམས་འཇོག་དགོས་འདུག༧ གོང་ས་མཆོག་གིས་དེའི་ཐད་གསུང་གི་མི་འདུག༽ཅེས་སྐད་ཤོད་ཀྱིན་འདུག་ཅིང་། སྐད་ཆ་འདི་དག་ནི་རྒྱ་གཞུང་གིས་རང་སྲེག་གི་རྒྱབ་ན་༧གོང་ས་མཆོག་དང་། བཙན་བྱོལ་བོད་མི་ཡོད་རབས་བཤད་པ་དང་ཐག་ཉེ་བོ་རེད། རང་སྲེག་གིས་ཞི་རྒོལ་མཚམས་འཇོག་མིན་ནི་རྒྱ་གཞུང་གིས་བོད་མི་ཚོར་དྲག་གནོན་མཚམས་འཇོག་མིན་དང་། བོད་མི་ཚོར་དགོས་པའི་ཐོབ་ཐང་སྤྲོད་མིན་ལ་ཐུག་ཡོད་པ་ལས་༧གོང་ས་མཆོག་དང་བཙན་བྱོལ་བོད་མི་ཚོ་ལ་ཐུག་པ་ཞིག་མ་རེད། ༧གོང་ས་མཆོག་དང་བཙན་བྱོལ་བོད་མི་ཚོ་ནི་བོད་ནང་གི་བོད་མི་ཚོའི་རྗེས་འབྲང་བ་ཞིག་དང་། ཁོང་ཚོའི་རེ་བ་རྒྱལ་སྤྱིར་གསལ་བོ་བཟོ་མཁན་ཞིག་རེད།

༧གོང་ས་མཆོག་དང་བཙན་བྱོལ་བོད་མི་ཚོས་རང་སྲེག་བྱེད་དགོས་ཀྱི་འདུག་ལ། དེ་འགྲིག་འདུག་ལབ་མཁན་ཞིག་ཡོད་རྒྱུ་མ་རེད། འོན་ཏེ་ཕྱོགས་གཞན་ནས་བཤད་ན། རང་སྲེག་མཚམས་འཇོག་དགོས་འདུག་ཟེར་ན། བོད་མིའི་རྩ་དོན་ཆེད་དུ་འཐབ་རྩོད་མཚམས་འཇོག་དགོས་འདུག་ཟེར་བ་རེད། འདི་ནི་རྒྱ་གཞུང་ལ་དགོས་པ་ཨ་མ་དེ་ཡང་རེད། ད་ལྟའི་རང་སྲེག་འདི་ནི་བོད་ནང་བོད་མི་ཚོ་དོན་དམ་གྱི་འཐབ་རྩོད་ལ་ཞུགས་ཏེ་ཡོད་ཚད་བློས་གཏོང་གི་རྒྱུ་ཕྱོགས་ཤིག་རེད། འདིས་བོད་མི་ཚོའི་སྙིང་སྟོབས་དང་ཆོད་སེམས་མཚོན་པ་མ་ཟད། ཞི་རྒོལ་གྱི་ས་ཁྱོན་ཀྱང་ཆེ་རུ་འགྲོ་བཞིན་ཡོད།

ཕྱོགས་གཞན་ནས་བལྟས་ན། རང་སྲེག་གི་ཞི་རྒོལ་རེ་བྱུང་བ་ན། དེ་མ་ཐག་རྒྱ་གཞུང་གིས་ས་ཁུལ་དེར་དམ་དྲག་དང་བཙན་གནོན་ཚད་ལས་བརྒལ་བ་བྱེད་བཞིན་ཡོད། དེས་བོད་མི་ཚོ་བཟོད་མི་ཐུབ་པའི་གནས་སུ་བསྐྱལ་ཏེ། ཡང་ནས་བསྐྱར་དུ་ས་གནས་དེ་རང་ལ་རང་སྲེག་འབྱུང་གི་ཡོད། གལ་ཏེ་རྒྱ་གཞུང་གི་བཙན་གནོན་དེ་དག་མེད་ན། རང་སྲེག་དེ་དག་ཡང་ནས་བསྐྱར་དུ་འབྱུང་གི་མ་རེད།

ང་ཚོ་རྫིག་པོ་དང་སྤམ་པོ་བྱས་ནས་སྡོད་སྐབས་མ་རེད། བཙན་བྱོལ་བོད་མིའི་སྒྲིག་འཛུགས་ཀྱིས་བོད་དུ་རང་སྲེག་ཐད་ཤེས་ཡོན་ཅན་གྱི་བགྲོ་གླེང་ངེས་པར་དུ་བསྡུ་དགོས་ལ། འདིས་བཀའ་ཤག་གི་ལས་ཀ་བྱེད་སྟངས་ལ་ཕན་ཐོག་ཡོང་གི་རེད། བོད་རྒྱ་དབྱིན་གསུམ་གྱི་ཤེས་ཡོན་པ་དག་སྡེ་ཚན་སོ་སོར་ཚོགས་ཏེ། བོད་དུ་འབྱུང་བཞིན་པའི་རང་སྲེག་ཐད་དགོངས་ཚུལ་ཅི་ཡོད་དང་། བཙན་བྱོལ་བོད་མི་ཚོས་ཅི་ཞིག་བྱེད་དགོས་མིན་གྱི་བསམ་ཚུལ་ལ་ཉན་དགོས་པ་མ་ཟད། དགོངས་ཚུལ་གྱི་ཆེད་རྩོམ་དག་བཀའ་ཤག་གི་དཔྱད་ཡིག་ཏུ་ཉར་དགོས། འདི་ལྟར་བྱས་ན། བཀའ་ཤག་གིས་གསར་ལམ་ཁག་གི་སྐད་ཆ་ཙམ་མ་ཡིན་པར་རང་སྲེག་ཐད་གཏིང་ཟབ་ས་ནས་སྐད་ཆ་བཤད་ཐུབ་ཀྱི་རེད་ལ། སྲིད་ཇུས་འཛིན་ཕྱོགས་ལའང་ཕན་ཐོགས་ཡོང་གི་རེད། འདི་དགོས་ངེས་ཅན་ཞིག་སྟེ། འདི་ལྟར་མ་བྱས་ན། ད་ལྟའི་བཀའ་ཤག་ཏུ་བོད་ནང་གི་གནས་སྟངས་དངོས་ལ་རྒྱུས་མངའ་ཡོད་མཁན་ཞིག་མེད་ལ། གསར་ལམ་ཁག་གི་གནས་ཚུལ་ཙམ་གྱིས་བོད་ཀྱི་གནས་སྟངས་ལ་གཞིགས་ཏེ་སྲིད་ཇུས་རན་པ་ཞིག་འཛིན་མི་ཐུབ་ལ། རྒྱ་གཞུང་གིས་རང་སྲེག་ཐད་ལོག་འགྲེལ་དག་ལ་གནད་འཁེལ་ལན་འདེབས་ཞིབ་ཚགས་ཤིག་དེ་བས་བྱེད་མི་ཐུབ་པ་རེད།

ཚང་མས་ཤེས་གསལ་ལྟར། ཉེ་ཆར་ཨ་རིའི་གཞུང་གིས་བོད་དུ་རང་སྲེག་བྱེད་མཁན་སྐོར་ཞིག་གི་གཉེན་འབྲེལ་ལ་ཐུག་འཕྲད་བྱས་པ་རེད། འདི་ཡང་བྱེད་ཐབས་ཤིག་རེད་ལ། བྱེད་ཐུབ་ས་ནས་ལས་དོན་ཞིག་བྱས་པ་རེད། བོད་གཞུང་གིས་ཀྱང་བོད་དུ་རང་སྲེག་བྱུང་ས་གཙོ་བོ་རྔ་པ་དང་རེབ་གོང་། བླ་བྲང་། དཀར་མཛེས་སོགས་ཀྱི་རང་སྲེག་བྱེད་མཁན་གྱི་གཉེན་འབྲེལ་ཕྱི་ལོགས་ལ་ཡོད་ན་དེ་དག་གཙོས་ས་ཁུལ་དེ་དག་གི་མི་སྣ་བསྡུ་སྐོང་བྱས་ཏེ། ཁོང་ཚོར་གུས་བརྩི་དང་ཆེ་མཐོང་བྱེད་དགོས་ལ། ཁོང་ཚོའི་སེམས་ཀྱི་སྐད་ཆར་ཉན་དགོས། ཁོང་ཚོ་བརྒྱུད་དེ་བོད་དུ་རང་སྲེག་བྱེད་མཁན་གྱི་ནང་མི་གཉེན་འབྲེལ་དག་ལ་སེམས་གསོ་བྱེད་འོས། འདིས་འགྱུར་བ་ཆེན་པོ་ཞིག་གཏོང་མི་ཐུབ་ཀྱང་། རྒྱ་གཞུང་གིས་རང་སྲེག་བྱེད་མཁན་དག་ཁེ་རྐྱང་དུ་ཕུད་བཞིན་པའི་སྐབས་སུ། ཁོང་ཚོ་ལ་མ་མཐའ་ཡང་ཁེ་རྐྱང་མིན་པའི་ཚོར་བ་ཞིག་བསླེབ་ངེས་རེད།

བོད་དུ་རང་སྲེག་མུ་མཐུད་དུ་འབྱུང་གི་ཡོད། ཁོང་ཚོའི་གནས་ཚུལ་རེག་ཚད་དང་། ཁྱབ་སྒྲོག་གི་ཐད་ནས་བསམས་ན་བསླེབ་དགོས་ས་དེར་བསླེབས་མི་འདུག་ལ། ད་བར་གནས་ཚུལ་རོབ་ཙམ་རེ་རག་པ་དག་ནི་མི་སྒེར་བས་ཐབས་ཤེས་བྱས་པ་རྐྱང་རེད། གནས་ཚུལ་བོད་གཞུང་ལ་ཐད་ཀར་རག་པ་ཞིག་མེད་ཚོད་རེད། མི་སྒེར་བ་དག་གིས་འབད་བརྩོན་མ་བྱས་ན་ད་ལྟའི་གནས་ཚུལ་འདི་དག་ཀྱང་ཡོད་རྒྱུ་མ་རེད། ང་ཚོ་ལ་གནས་ཚུལ་རག་པ་དེས་འདང་གིས་མི་འདུག་ལ། བོད་གཞུང་གིས་ངེས་པར་དུ་མི་རྒྱུ་གཉིས་ཀྱིས་གནས་ཚུལ་བསྡུ་རུབ་བྱེད་མཁན་དག་ལ་མཐུན་འགྱུར་ཚད་མཐོ་གནང་དགོས་ལ། གནས་ཚུལ་ཁྱབ་བསྒྲགས་ཐད་གོ་རིམ་པ་ཡོད་པ་དང་། བོད་པའི་གསར་ལམ་དག་ལས་རྒྱལ་སྤྱིར་ཤུགས་རྐྱེན་སྤྲོད་ཐུབ་པའི་གསར་ཁང་དག་ཏུ་གནས་ཚུལ་སྔོན་ལ་སྤྲོད་དགོས། དེ་ལྟར་མ་བྱས་ན་གསར་ཁང་ཆེ་བ་དག་གིས་གསར་ལམ་གཞན་དུ་བཀོད་ཟིན་པ་ཞིག་ཡང་སྐྱར་འགོད་རྒྱུ་ཉུང་ཉུང་རེད་ལ། གསར་ཁང་ཆེ་བ་དག་གིས་འདྲེན་བཀོད་ལས་རང་གི་གསར་འགྱུར་གཙོ་འདོན་གནང་གི་རེད།

བོད་ཀྱི་ལོ་རྒྱུས་སུ་ཆོས་དང་འབྲེལ་བའི་རང་ལུས་མཆོད་མེར་ཕུལ་བ་བྱུང་འདུག་ལ། འོན་ཏེ་ཆབ་སྲིད་དང་འབྲེལ་བའི་རང་ལུས་མེར་སྲེག་གཏོང་བ་བོད་དུ་ལོ་འགའི་སྔོན་ནས་མགོ་བརྩམས་ཡོད། དེང་གི་བོད་ནང་གི་རང་ལུས་མེར་བསྲེགས་ཀྱིས་རྒྱ་རྒོལ་ལ་ང་ཚོས་རང་ལུས་མཆོད་མེར་ཕུལ་བ་རེད་ཅེས་བརྗོད་ན་དགེ་སྦྱོང་ཞིག་གི་ངོ་བོ་འགྱུར་འགྲོ་ལ། རང་སྲེག་གཏོང་མཁན་ཚོའི་བློས་གཏོང་དང་རང་སྲེག་གི་ལྕི་ཁོག་ཆུང་དུ་གཏོང་བཞིན་ཡོད། དེ་བས་རང་ལུས་མེར་བསྲེགས་ཞེས་ཚིག་འདི་སྤྱད་ན་ཆབ་སྲིད་ཀྱི་ཚིག་ཡིན་པར་མ་ཟད། དོིན་གྱི་ལྕི་ཁོག་ཏག་ཏག་སྟོན་ལ་ཁྱད་པར་འདུག་སྙམ།

འདི་ནས་སྨྲ་མཚམས་འཇོག་གི་ཡིན། དེ་རིང་ཁ་སང་ནི་རྒྱལ་སྤྱིའི་ཁྲོད་ནས་བོད་ནང་གི་གནས་སྟངས་ཐད་ཕྲན་བུ་ཁ་གྲག་བཞིན་ཡོད། བོད་ཕྱི་ལོགས་སུ་བོད་དུ་རང་སྲེག་བྱས་པའི་གནས་ཚུལ་མ་གོ་བར་བདུན་ཕྲག་ཁ་ཤས་འགྲོ་སོང་། འོན་ཏེ་རང་སྲེག་བྱུང་ཡོད་ཀྱང་གནས་ཚུལ་མ་གོ་བའང་ཡིན་སྲིད། འདས་པའི་ཉིན་འགའི་རིང་གོ་བ་ནི་བོད་མི་ཚོ་རྒྱ་གཞུང་གིས་སྡེབ་འཛིན་བྱེད་བཞིན་པའི་གནས་ཚུལ་འདི་རེད། སང་ཉིན་བོད་དུ་ཅི་ཞིག་འབྱུང་གི་རེད།