བསམ་གཞིག་བཏབ་པ།

གུ་རུ།

         མཐོ་སྒང་གི་ས་ཁྱོན་རྒྱ་བསྐྱེད་པའི་ས་ཁོངས་དང་བདག་དབང་བརྩི་དགོས་ཚེ་གངྒཱ་ཚུར་ཕྱོགས་བོད་ཀྱི་ས་ཁོངས་སུ་བགྲང་དགོས་པར་མངོན་ལ། ཤར་ཕྱོགས་རྒྱའི་ཡུལ་ནས་ཀྱང་བླ་སྐྱེས་འབུལ་བ་དང་བོད་ཀྱི་བཀའ་ལུང་ལེན་པའི་རྒྱལ་ཕྲན་མང་དུ་ཡོད་པས།  འཛམ་གླིང་མི་འབོར་བརྒྱ་ཆའི་དྲུག་ཅུ་ཟིན་པའི་ཨེ་ཤ་ཡའི་སྟོབས་ཆེན་རྒྱལ་ཁབ་དག་གི་དབུས་ན་བོད་དང་མཉམ་པའི་རྒྱལ་ཁབ་སྟོབས་ཆེན་སུ་ཡང་མེད་ལ། བོད་ལས་དཔའ་བ་དང་བརྟུལ་ཕོད་པའང་སུ་གང་མ་བྱུང་བའི་ལོ་རྒྱུས་ཡོངས་སུ་གྲགས་མྱོང་། ད་ལྟ་བོད་མི་རིགས་དང་རྒྱལ་ཁབ་ཀྱི་ཆེད་དུ། ས་ཆ་དང་བདག་དབང་གི་ཆེད་དུ། མི་སེར་སྤེལ་བའི་རིང་ལུགས་དང་དབང་ཆ་གཅིག་སྡུད་རིང་ལུགས། ཁྲིམས་མེད་ལུགས་མེད་ཀྱི་སྲིད་ཇུས་འཛིན་པའི་དམར་བོའི་སྲིད་གཞུང་གི་འོག་ནས། སླར་ཡང་མིང་ཙམ་གྱི་རང་སྲིད་རང་སྐྱོང་ལས་ལོ་རྒྱུས་དང་ལྡན་པའི་རང་བཙན་གཙང་མའི་ལམ་ལ་བསྐྱོད་དགོས་སམ།

   སེམས་ལ་ལག་པ་ཞོག འཚེ་མེད་ཞི་བ་དང་དབུ་མའི་ལམ་ཁོ་ནས་རང་དབང་རྩོད་མི་ཐུབ་པ་མ་ཟད། གྲོས་མོལ་ཞིག་ཀྱང་ཡོང་དཀའ་བ་འདིས། དམག་འཐབ་ཀྱི་གདམས་ཀ་ཞིག་ལས་གཞན་ཅི་ཡང་ལྷག་མེད་པ་བསྟན་ཡོད་གི  འཛམ་གླིང་དམག་ཆེན་གཉིས་པའི་རྗེས་ཀྱི་ཕྱི་ལོ་ ༡༩༤༨ ལོར་རྒྱལ་ས་པ་རིའི་སུ་ནས་འགྲོ་བ་མིའི་གཞི་རྩའི་ཐོབ་ཐང་གསལ་བསྒྲགས་སྤེལ་བཏུབ་ཡོད་གི དེའི་ཉམས་མྱོང་ལ་གཞིགས་དང་།

རང་དབང་དང་ཐོབ་ཐང་། རྒྱལ་ཁབ་རང་བཙན་ཟེར་བ་འདི་རྕོད་དུས་ངེས་པར་དུ་ཞི་དྲག་གཉིས་ཀྱི་དམག་འཐབ་ཅིག་ཡོང་དགོས་འདུག རྒྱལ་དབང་ལྔ་བ་ཚང་གིས་བོད་རིགས་མི་སེར་གྱི་དམག་ཤུགས་དང་གཞུང་གི་སྲིད་ཇུས་ཀྱི་ལངས་ཕྱོགས་བརྟན་པོ་ཁབ་མིག་གཅིག་ལ་བརྒྱུས་ཏེ་མན་ཇུ་མཐའ་སྐྲོད་བཏང་། བོད་རང་བཙན་གསལ་བསྒྲགས་རིན་པོ་སྤེལ་ཡོད་གི

    མེ་ལ་གཤོག་པ་ཐོགས་པའི་བློས་གཏོང་མེར་བསྲེགས་ཀྱི་སེམས་འདུན་དེ་དག་འུ་ཐུག་ཐབས་ཟད་ཅིག་མ་ཡིན་པར། དཔའ་བོའི་ང་རྒྱལ་དང་བློས་གཏོང་ཚང་མ་མི་རིགས་དང་རྒྱལ་ཁབ་རང་བཙན་ཀྱི་དོན་དུ་འབར་བ་རེད། དུས་རབས་འདིར་རླབས་ཆེ་བའི་ལུས་སྲོག་མེ་ལ་སྒྲོན་པའི་ཞི་བའི་འཐབ་རྩོད་འདི་གཞི་ལ་བརྟེན། དེའི་ཞ་དང་ཞོར་ནས་དམག་འཐབ་སྲིད་ཇུས་ཤིག་སྒྲིག་ན་ཅིས་མི་ཆོག་གམ། ད་ལྟ་ཡིན་ན་འཇིག་རྟེན་འདིའི་སྒང་གི་རྒྱལ་ཁབ་སྟོབས་ཆེན་དང་མི་རིགས་བཙན་པོ་ཚང་མས་རང་གི་ས་ཆ་རང་གི་དམག་ཤུགས་ལ་བློས་འཁེལ་ཏེ། རང་ས་བརྟན་སྲུང་བྱས་ཡོད་པས་མི་ཚད་གཞན་གྱི་ས་སྣེ་ཆུ་སྣེ་བརྩད་དེ་དམག་དཔུང་དང་མེ་ཤུགས་འཕུར་མདའི་གཡུལ་འཁྲུག་གིས་ནམ་མཁའ་རྡུལ་གྱིས་བཀང་ནའང་། ད་རུང་དེའི་མིང་ལ་སྟོབས་ཆེན་དང་རྒྱལ་ཁ་ཟེར་གི་ཡོད།

   ༡༩༤༩ ལོར་རྒྱ་ནག་གིས་ཞི་བའི་བཅིངས་བཀྲོལ་ལ་ཁ་གཡར་ནས་མིང་ཙམ་དབང་བསྒྱུར་གྱི་སྲིད་ཇུས་ཀྱིས་བོད་ས་ཡོངས་བཙན་འཛུལ་བྱེད་པའི་སྐབས་སུ་དམར་བོའི་སྐུ་ཚབ་རྒྱ་གར་གྱི་སྲིད་བློན་ནེ་རོ་མཆོག་ལ་ཐུག་ཏེ། གལ་སྲིད་བོད་ལ་ཞི་བའི་བཅིངས་བཀྲོལ་བྱུང་བ་ཡིན་ན་བོད་ས་སྤྱི་ཡོངས་བགོ་བཤའ་རྒྱག་ཆོག་པའི་རྫུན་གྱི་རྣམ་འགྱུར་བསྟན་པས་དམ་པ་ཁོང་གིས་ཀྱང་བོད་ནི་རྒྱ་ནག་གི་ཆ་ཤས་ཡིན་པ་ཁ་ནས་ཤོར་ཡོད། རིམ་གྱིས་རྒྱ་ནག་གིས་བོད་རིགས་ཚང་མ་རྦད་དེ་རྩ་མེད་བཟོ་བའི་ཇུས་ངན་འཐེན། བཙོན་འཇུག་དང་གཅར་རྡུང་། བཙན་གཡེམ་དང་སྐྱེ་སྒོ་འགོག་པ་ལ་སོགས་ཀྱིས་སེམས་ལ་རྨ་ཕབས་པ་ཉུང་ཉུང་མིན། ད་སྐབས་བོད་ཆོལ་ཁ་གསུམ་གྱི་འགྲོ་སྡོད་རང་དབང་དང་སྐད་ཡིག་རང་དབང་སོགས་རྒྱ་དམག་གི་ཐག་པས་བསྡམས་ཏེ། བོད་རིགས་ཚང་མ་འགུལ་དུ་མ་བཅུག ཞི་བའི་བློས་གཏོང་གིས་གཅེས་སྲོག་མེ་ལ་བསྒྲོན་ཏེ་རང་དབང་ཞེས་པའི་ཞལ་ཆེམས་ཤིག་བསྒྲགས་པ་དེས་ཤི་བོའི་རྗེས་ཀྱི་གསོན་པོ་ཚང་མའང་དམག་བྱེད་པའི་སྟོབས་ཤུགས་ཆ་ཚང་འདུག་པ་མ་ཟད། འཛམ་གླིང་ཞི་བདེ་དང་བོད་ཀྱི་བདེན་མཐའི་འགན་ཟུར་ཙམ་འཁུར་ན་མི་འཚམ་པ་ཆེར་མེད་པར་སེམས།

  འཛམ་གླིང་ཞི་བདེ་གཟེངས་རྟགས་ཐོབ་པའི་སྲིད་འཛིན་གསར་བ་ཨོ་བྷ་མ་གཙོ་བྱས་བའི་ནུབ་ཕྱོགས་པ་དག་གིས་དམག་འཐབ་ལ་བརྟེན་ནས་གོ་ལ་གཅིག་གྱུར་ལ་འབད་པའི་སྐབས་དང་བསྟུན་ནས། བོད་བཙན་པོའི་སྐབས་ཀྱི་དམག་བྱེད་པའི་བྱ་བ་བསྐྱར་གསོ་བྱས་ཏེ་ནུབ་ཕྱོགས་ཀྱི་དམག་དཔུང་གི་གྲོགས་དན་བཙལ་དགོས། གལ་སྲིད་འུ་ཚོའི་འཐབ་རྩོད་ཀྱི་ནང་དུའང་བོད་རང་བཙན་དང་དེའི་བདག་དབང་འཐབ་རྩོད་ཀྱི་དམག་ཇུས་སྲིད་ཐབས་ཤིག་ལྡན་ཚེ་། རྒྱ་ནག་དང་གདོང་ཐུག་བརྒྱབ་ཡོད་པའི་སྟོབས་ཆེན་རྒྱལ་ཁབ་དག་ལ་རོགས་འདེགས་བྱེད་ཐུབ་ལ། ༧རྒྱལ་དབང་སྐུ་ཕྲེང་བཅུ་བཞི་བའི་རིང་ལ་ཞི་བའི་གྲོས་མོལ་ཡོང་ན་དགོས་ཕན་ཡོད་པར་རྒྱ་ནག་གིས་ཀྱང་མཐོང་སྲིད་པ་རེད།  བོད་རིགས་བཙན་བྱོལ་བའི་མར་མེ་ཁྲོམ་སྐོར་དང་སྐད་འབོད་ཁྲོམ་སྐོར་དེ་དག་དམག་འཐབ་ཁྲོམ་སྐོར་གྱི་ཕྱོགས་སུ་བསྒྱུར་དགོས་པར་སེམས། གཞོན་ནུ་ལྷན་ཚོགས་གཙོ་བྱས་པའི་སྒེར་གྱི་ཚོགས་པ་དག་གིས་བོད་རིགས་གཞོན་སྐྱེས་མི་ཉུང་བ་ཞིག་ལ་ངེས་པར་དུ་ནུབ་ཕྱོགས་དམག་འཐབ་སྦྱོང་བརྡར་གྱི་གོ་སྐབས་རག་ཐབས་ལ་འབད་ཚེ་ཁ་ཕྱོགས་ཤིག་རྙེད་བཏུབ་པར་སེམས།

ཨ་རིའི་སྲིད་འཛིན་གསར་བ་ཨོ་བྷ་མས་བོད་ལ་རྒྱབ་སྐྱོར་མ་བྱས་པ་མ་རེད་འདོད་གི  དྲང་མོར་བཤད་ན་བོད་ནི་གོ་ལ་གཅིག་གྱུར་དང་འཛམ་གླིང་ཞི་བདེ་སྐྲུན་པ་ལ་ཤིན་ཏུ་མཁོ་གལ་ཆེ་བའི་ནང་གི་གཅིག་རེད། དེ་ལས་ཀྱང་བོད་རང་བཙན་ནི་ང་ཚོ་ལས་ནུབ་ཕྱོགས་ལ་དགོས་ཕན་ཡོད་པ་མཐོང་གི་ཡོད་པ་རེད། རྒྱ་ནག་གཞུང་གི་མངའ་ཁོངས་སམ་དམར་བོའི་སྒྲོམ་གཞིའི་འོག་ཏུ་ཕྱི་ནུར་བྱེད་བཞིན་པའི་ང་ཚོའི་གཞུང་གི་སྲིད་བྱུས་ལ་རྒྱབ་སྐྱོར་བྱས་ན་ཨོ་བྷ་མར་ཅི་ཞིག་ཐོབ་བམ། འུ་ཚོས་ཁེ་ཕན་ཅི་ཞིག་བྱིན་ཡོད་དམ། ད་ལྟ་ཨ་རི་གཙོ་བྱས་པའི་ནུབ་ཕྱོགས་སྟོབས་ཆེན་རྒྱལ་ཁབ་དག་གི་ཡར་རྒྱས་ཀྱི་ཡོང་ཁོངས་གཙོ་བོ་དམག་གི་སྲུང་སྐྱོབ་བྱས་ཡོད་པའི་རྒྱལ་ཁབ་ཆུང་ཆུང་དག་གི་ས་འོག་ན་འདྲུད་གི་ཡོད། བོད་རང་གི་ས་ཐོག་ན་ཆུ་དང་ནགས་ཚལ། གཏེར་རྫས་མང་བའི་ཁེ་ཕན་ལེན་རྒྱུ་སྟེར་རྒྱུ་གཉིས་ཆ་ཡོད། དེ་གཙོ་བོ་བོད་རང་གི་སྲིད་ཇུས་ཀྱི་ཁ་ཕྱོགས་ལ་རག་ལས་ཡོད།

    རང་རེའི་བོད་ཀྱི་སྲིད་སྐྱོང་བ་མཆོག་ནུབ་ཕྱོགས་གཙོ་བྱས་པའི་འབྲེལ་ཡོད་རྒྱལ་ཁབ་དག་ལ་ཕྱོགས་སྐྱོད་བྱེད་པའི་སྐབས་སུ། བོད་ནང་གི་འགྲོ་བ་མིའི་དཀའ་ངལ་དང་ཛ་དྲག་གི་གནས་བབ་ཡིག་ངག་གཉིས་ཐོག་ནས་ཞུ་བཞིན་ཡོད་པ་དེར་བསྔགས་འོས་པ་ཞིག་རེད། ཡིན་ནའང་དེ་གཅིག་པུས་རྒྱལ་སྤྱིའི་ཚོགས་སྡེ་ཁག་གི་རྣ་བ་དང་མིག་ཟུང་གཡར་མ་བཏུབ་པའི་རྒྱུ་རྐྱེན། ནུབ་ཕྱོགས་པས་ཞི་བདེ་ངོ་མ་བསྐྲུན་ཐབས་ལ་རྒྱ་ནག་གཞུང་དང་བསྟུན་ཐབས་མེད་པ་སྔ་མོ་ནས་མཐོང་ཡོད་པ་རེད། དེའི་སྟབས་ཀྱིས་བོད་ཀྱི་འཐབ་རྩོད་སྲིད་ཇུས་ཀྱི་ཁ་ཕྱོགས་ཕྱི་གསལ་ནང་གསལ་ཆགས་ཐབས་མེད་པ་གསལ་བོ་རེད། ད་ནི་གཙོ་བོ་གཏུགས་གཤེར་ཙམ་མ་ཡིན་པར་མ་འོངས་པའི་ནུབ་ཕྱོགས་ལ་སྨན་པའི་བོད་ཀྱི་རང་བྱུང་དཔལ་འབྱོར་གྱི་ཕྱུག་ཚད་བགྲང་། རྒྱ་ནག་གཞུང་དང་དམིགས་ཡུལ་ཐད་དད་ཡིན་པ་བོད་ཀྱི་དགོས་འདུན་ཞུ་ཐུབ་པའི་སྙིང་སྟོབས་མཐོ་དགོས་པ་འདྲ་།

  ཡིད་སྐྱོ་བ་ཞིག་ལ། ད་སྐབས་དབུ་མའི་ལམ་ལ་ཧ་ཅང་ཚབ་ཆེ་བའི་ཉམས་ཉེས་བྱུང་བཞིན་ཡོད་པར་གྲགས། ལྷག་པར་དུ་དགོངས་གཞི་ངོ་མ་དང་བཙན་བྱོལ་བོད་གཞུང་གི་ལམ་སྲོལ་དང་འགལ་ཡོད་པར་སེམས།  རྒྱུ་མཚན་ངྷ་རམ་ས་ལ་ན་བོད་མི་སྐྱ་སེར་འགས་དབུ་མའི་ལམ་ལས་འགུལ་ཁང་ཟེར་བ་ཞིག་གསར་དུ་བཙུགས་ཡོད་གི དེ་ལ་བོད་མི་མང་ཤོས་དང་ཕྱི་རྒྱལ་བོད་དོན་རྒྱབ་སྐྱོར་བ་མང་བོ་ཡིད་ཐང་ཆད་བཞིན་ཡོད་པ་འདྲ། མི་སུ་ཞིག་ཡིན་ནའང་བོད་དོན་ཚོགས་པ་གསར་བ་འཛུགས་ཆོག་པ་མ་ཟད། དེ་ནས་ཁེ་གྱོང་ཅི་ཞིག་བྱུང་ནའང་སྒེར་བ་ལས་གཞུང་ལ་གནོད་སྐྱོན་བཟོ་མི་བཏུབ་པ་རེད། ཉེ་སྔོན་བཙན་བྱོལ་བོད་གཞུང་དང་༧རྒྱལ་བ་རིན་པོ་ཆེ། དབུ་མའི་ལམ་ནི་འཕྲེང་ཐག་གཅིག་ལ་བརྒྱུས་པ་ལྟ་བུ་རེད། ང་ཚོས་སྐབས་འཚོལ་བ་ཚོར་གཟབ་གཟབ་མ་བྱས་ན། གཞུང་གི་སྲིད་ཇུས་ཀྱི་མིང་བྱང་སྒེར་ལ་དབང་། སྒེར་གྱི་ཁ་རྒྱབ་འགེབ་སྤྱད་དང་ཅ་ལག་ཉོ་སྤྱད་བྱས་ན་གྱོང་ཡིན་པ་མ་ཟད་ངོ་ཚ་ཞིག་ཀྱང་རེད། གཙོ་བོ་དབུ་མའི་ལམ་ནི་རྒྱ་ནག་དང་བཙན་བྱོལ་བོད་གཞུང་བར་གྱི་གྲོས་མོལ་ཡོང་ཐབས་ཀྱི་སྲིད་ཇུས་ཤིག་ཡིན་ཟེར་གི་ཡོད་པ་མིན་ནམ། དེ་བོད་སྐད་ཁོ་ནས་ཡོང་ཐབས་ཡོད་པ་ཞིག་ཨེ་རེད། ཡིག་རྨོངས་པ་ཁ་དར་ན་རྒན་རབས་པའི་ལོ་རྒྱུས་ཡིད་ཐང་མི་ཆད་པའི་ངེས་པ་མེད་དོ།།