གསར་དེབ་ཅིག་གི་ཞིབ་འཇུག་ལྟར་ན་ཨ་རིའི་ནང་ལོ་རེར་ན་གཞོན་ ༤༦༠༠༠ རང་ཤི་རྒྱག་གི་ཡོད་འདུག
ཉེ་ཆར་ཨ་རིའི་གསར་དེབ་༼ཇཱ་མཱ་སེམས་གཅོང་བཅོས་ཐབས་(JAMA Psychiatry)༽ ཞེས་པའི་ནང་། ཨ་རིའི་ན་གཞོན་མང་པོ་རང་ཤི་རྒྱག་གི་ཡོད་པའི་རྒྱུ་རྐྱེན་སྐོར་ལ་རྒྱལ་ཡོངས་ནང་ཞིབ་འཇུག་སྙན་ཐོ་ཞིག་བཏོན་ཡོད་པ་ལྟར་ན། ཞིབ་འཇུག་ཚོགས་ཆུང་གིས་ཨ་རིའི་ནང་ན་གཞོན་(teens) ༦༥༠༠ ཙམ་གྱི་བསལ་ཚུལ་ལ་རྒྱུས་ལོན་བྱས་སྐབས། རང་ལོ་ ༡༣ ནས་ ༡༩ བར་གྱི་ན་གཞོན་ ༢༥ རེའི་ཁྲོད་ཀྱི་གཅིག་གིས་རང་ཤི་རྒྱག་གི་ཡོད་པ་དང་། ན་གཞོན་ ༨ རེའི་ཁྲོད་ཀྱི་གཅིག་གིས་རང་ཤི་རྒྱག་རྒྱུའི་བསམ་བློ་འཁོར་གྱི་ཡོད་འདུག
ཞིབ་འཇུག་སྙན་ཐོ་དེའི་བརྒྱ་ཆ་བགོ་སྟངས་ཐད་ནས། ན་གཞོན་བརྒྱ་ཆ་ ༡༢ ལ་རང་ཤི་རྒྱག་པའི་བསལ་བློ་སྐྱེས་ཀྱི་ཡོད་པ་ལས། བརྒྱ་ཆ་ ༨ ཀྱིས་རང་ཤི་རྒྱག་རྒྱུར་འཆར་གཞི་བཟོ་ཡི་ཡོད་པ་དང་། དེ་ལས་བརྒྱ་ཆ་ ༤ དངོས་སུ་རང་ཤི་རྒྱག་པའི་སྦྱོར་བ་རྩོམ་གྱི་ཡོད་འདུག ཨ་རིའི་ཧ་ཝར་ཌི་སློབ་ཆེན་གྱི་སེམས་ཁམས་རིག་པ་བ་མཱ་ཐེབ་(Matthew Nock) ཀྱིས་རང་ཤི་རྒྱག་པའི་ཉེན་ཚབ་ཆེ་ཤོས་ལང་ཚོ་དར་བཞིན་པའི་ན་གཞོན་གྱི་ལོ་ཚད་སྐབས་འབྱུང་གི་ཡོད་པར་བརྗོད་འདུག
ན་གཞོན་ཚོར་རང་ཤི་རྒྱག་པའི་བསམ་བློའི་འབྱུང་རྐྱེན་ཤུགས་ཆེ་ཤོས་ནི། གནད་དོན་རིགས་ཀྱི་ཐད་ནས་སེམས་ཚོར་རྣོ་བ་དང་ལྷན་པར་དུ་སེམས་ཁམས་ལ་སྟངས་འཛིན་བྱེད་མ་ཐུབ་པ། སེམས་ཁམས་ཐང་ཐང་མེད་པར་འགྱུར་སླ་བ། ཆང་རག་དང་ཐ་མ་ནག་པོ་བེད་སྤྱོད་བྱས་པ་བཅས་ཡིན་འདུག་ལ། ན་གཞོན་སྐྱེས་པ་ཕལ་ཆེ་བ་ཞིག་མེ་མདའི་ཁ་ནས་རང་ཤི་རྒྱག་གི་ཡོད་ཚུལ་གསལ་འདུག
ཨ་རིའི་ནད་གཞི་སྔོན་འགོག་བསྟི་གནས་ཁང་གི་གནས་ཚུལ་སྤེལ་བ་ལྟར་ན། ཨ་རིའི་ན་གཞོན་འདས་གྲོངས་སུ་འགྱུར་བཞིན་པའི་སྤྱིའི་གྲངས་འབོར་ནང་རང་ཤི་བརྒྱབ་པའི་གྲངས་འབོར་ཨང་གསུམ་པར་བསླེབས་ཀྱི་ཡོད་འདུག་ལ། ལོ་རེར་ཆ་སྙོམས་ན་གཞོན་ ༤༦༠༠༠ རང་ཤི་བརྒྱབ་སྟེ་རྐྱེན་འདས་སུ་འགྱུར་བཞིན་ཡོད་འདུག
གསར་འགོད་པ། བནྡེ་སྐྱབས།
