ལྷུན་གྲུབ་རྫོང་དུ་གཏེར་ཁ་སྔོག་འདོན།

རྒྱ་གཞུང་གིས་བོད་རང་སྐྱོང་ལྗོངས་ལྷུན་གྲུབ་རྫོང་ཁོངས་སུ་གཏེར་ཁ་སྔོག་འདོན་བྱས་ཏེ། ས་གནས་རོང་འབྲོག་གཉིས་ཀ་དཀའ་ངལ་ཁྲོད་ལྷག་ཡོད་འདུག

བསོད་ནམས་ལགས་ཀྱིས་འདི་གར་གནས་ཚུལ་བཏང་འབྱོར་བྱུང་བ་ལྟར་ན། རྒྱ་ནག་གཞུང་གིས་ ༢༠༠༥ ལོ་ནས་བཟུང་བོད་རང་སྐྱོང་ལྗོངས་ལྷ་ས་ལྷུན་གྲུབ་རྫོང་མཁར་རྩེ་ཤང་། མདུང་གྲོང་ཚོའི་འབྲོག་པ་ཚོ་ས་གནས་གཞན་དུ་གནས་སྤོ་རུ་བཅུག་ཏེ། ཡུལ་མིའི་ཕྱུགས་ཟོག་འཚོ་སྐྱོང་བྱེད་སར་གཏེར་ཁ་སྔོག་འདོན་གྱི་བཟོ་གྲྭ་བཙུགས་ཡོད་པ་དང་། ༢༠༠༦ ལོར་གཏེར་ཁ་བཟོ་གྲྭའི་ཁང་པ་གསར་རྒྱག་གིས་ཉིན་རེར་སྐྱེལ་འདྲེན་རླངས་འཁོར་ཆེ་བ་ ༡༠ རེ་དབོར་འདྲེན་བྱེད་ཀྱི་ཡོད་འདུག་ལ། གཏེར་ཁ་སྔོག་འདོན་དང་གཏེར་རྫས་བཟོ་གྲྭ་བཙུགས་རྗེས་ས་གནས་ཀྱི་ཤིང་ནགས་དང་སྦང་རི། འཐུང་ཆུ་སོགས་འབག་བཙོག་བཟོས་ཡོད་པ་མ་ཟད། ཁ་རླུང་འབག་བཙོག་ཆགས་པའི་སྙིགས་རོ་རྣམས་རྒྱུགས་ཆུའི་ནང་བཞུར་བཅུག་པ་སོགས་ཀྱིས་འབྲོག་པའི་རྩྭ་སར་རྩྭ་ཡག་པོ་མི་སྐྱེ་བ་དང་ཕྱུགས་ཟོག་མང་པོ་ཤི་རྨས་ཐེབས་པ། རོང་པ་རྣམས་ཀྱི་ཞིང་ཁ་མ་སྐྱེ་བ་སོགས་དཀའ་ངལ་མང་དག་ཅིག་འཕྲད་ཀྱི་ཡོད་འདུག

འདིའི་ཐད་ས་གནས་མི་མང་གིས་གཏེར་རྫས་སྔོག་འདོན་པར་བརྡ་ལན་དང་རྒྱ་ནག་གཞུང་ཕྱོགས་ལ་ཞུ་གཏུག་ཐེངས་མང་བྱས་ཀྱང་། གཞུང་ཕྱོགས་ནས་མི་མང་གི་རེ་འདུན་ངོས་ལེན་བྱས་མེད་པའི་ཁར་མི་མང་གི་རེ་སྐུལ་ཆབ་སྲིད་ཀྱི་ངོ་བོར་བསྒྱུར་ཏེ་ས་གནས་མི་མང་དཀའ་ངལ་ཁྲོད་ལྷག་ཡོད་འདུག་ལ། ས་གནས་ཀྱི་གཏེར་ཁ་སྔོག་མཁན་ཚང་མ་རྒྱ་རིགས་ཡིན་སྟབས། མི་མང་གིས་གསེར་དཀར་པོའི་གཏེར་རྫས་སྔོག་གི་ཡོད་པ་གོ་ཐོས་བྱུང་བ་ཙམ་ལས། གཏེར་རྫས་ཅི་ཞིག་སྔོག་གི་ཡོད་མེད་ཤེས་ཀྱི་མེད་པ་དང་། ཉེ་བའི་ལོ་འགའི་རིང་ནས་གཏེར་ཁ་སྔོག་འདོན་པ་ཁྲི་ ༡ ལྷག་གིས་ལོ་རེར་ཕྱི་ཟླ་ ༣ པ་ནས་གཏེར་ཁ་སྔོག་འདོན་དང་། དགུན་ཁར་མཚམས་འཇོག་བྱེད་ཀྱི་ཡོད་འདུག  

གཞན། ༢༠༠༤ ལོ་ནས་བཟུང་རྒྱ་གཞུང་གིས་འཕེན་པོ་ལྷུན་གྲུབ་རྫོང་གི་མངའ་འོག་དུ་ཡོད་པའི་ཕུ་མདོ་གྲོའཕེན་པོ་ལྷུན་གྲུབ་རྫོང་ཕུ་མདོ་གྲོང་ཚོ་དང་གསེར་རྩ་གྲོང་ཚོ་བཅས་ཀྱི་ཁྱིམ་ཚང་ ༤༠༠ ལྷག་གཏེར་ཁ་སྔོག་འདོན་དང་ཆུ་ཁ་བསྒྱུར་རྒྱུར་ཁ་གཡར་ཏེ་ས་གནས་གཞན་དུ་གནས་སྤོར་བྱས་བཅུག་ཡོད་འདུག

གསར་འགོད་པ། དོན་གོ