རང་བཙན་གྱིས་བོད་མི་མང་ལ་སྒུག་ཡོད།

མི་འཇིགས་པ།

ལོ་རྒྱུས་ཐོག་བོད་ནི་མི་ལོ་བརྒྱ་ཕྲག་རིང་མངའ་ཐང་དང་སྟོབས་སྦྱོར་ཤིན་ཏུ་ཆེ་བའི་རང་བཙན་གྱི་རྒྱལ་ཁབ་ཅིག་ཡིན།

ཟླ་དུས་ཚེས་གྲངས་གང་ལ་ཡིན་པ་གསལ་པོ་ཞིག་མི་དྲན་ནའང་ངས་ད་དུང་གང་ཞིག་གསལ་པོ་དྲན་གསོས་པ་ནི་ངའི་རོགས་པ་དང་ངེད་གཉིས་ཀྱི་བར་དུ་བྱུང་བའི་སྐད་ཆ་ཚིག་ཀ་གཅིག་རང་གཅིག་ཡིན། “ད་རྦད་དེ་ཚར་སོང་། ྋ རྒྱལ་བ་རིན་པོ་ཆ་ཚང་གིས་བཀའ་དེ་འདྲ་ཞིག་གནང་བས། ད་ང་ཚོའི་རེ་བ་རྦད་དེ་བརླགས་སོང་།”སྐད་ཆ་འདི་ནི་ངའི་རོགས་པས་ང་ལ་བྷོ་དྷ་མཆོད་རྟེན་སྐོར་ལམ་ཟུར་གྱི་ཇ་ཁང་ཆུང་ཆུང་ཞིག་ཏུ་བཤད་པ་ཡིན། སྐད་ཆ་འདི་ཁོང་རང་ཉིད་ཀྱི་ཕུགས་འདུན་དང་རེ་སྤོབས་ང་ལ་སྟོན་སྟངས་ཤིག་ཡིན་པ་དང་། ད་ལྟ་ཁོང་གིས་ང་ལ་སྐད་ཆ་འདི་བཤད་ནས་ལོ་ལྔ་བགོར་ཟིན།

ལོ་དེ་ནི་ ༢༠༠༨ ལོའི་དཔྱིད་ཀ་རེད། ལོ་དེའི་སྤྱི་ཟླ་གསུམ་པའི་ཚེས་བཅུའི་ཉིན་ལྷ་ས་ནས་བྱུང་བའི་ཞི་བའི་ངོ་རྒོལ་གྱི་རྦ་རླབས་དེ་ཆུ་བོ་རག་ལས་ཤོར་བ་ལྟར་བར་སྐོར་ནས་སྐད་ཅིག་གིས་བོད་ཁམས་ཡོངས་སུ་ཁྱབ་པར་གྱུར། སྐྱ་སེར་ཁྲི་ཕྲག་མང་པོ་ཞི་བའི་ངོ་རྒོལ་དེར་མཉམ་ཞུགས་བྱས་ཤིང་། བོད་མི་བརྒྱ་ཕྲག་མང་པོ་ཞི་བའི་ངོ་རྒོལ་དེའི་ཁྲོད་ནས་ཚེ་སྲོག་རྒྱ་དམག་གི་མེ་མདའི་འོག་ཤོར་བ་དང་། དེ་ལས་མང་བ་རྒྱའི་བཙོན་དུ་ཚུད་པ་རྣམས་དེ་རིང་ད་དུང་བཙོན་དུ་ལྷག་ཡོད།

ྋརྒྱལ་བ་རིན་པོ་ཆེ་ཚང་གིས་སྐབས་དེའི་གནས་ཚུལ་ཁ་ཤས་ལ་གཟིགས་ནས་ད་ནས་བཟུང་བོད་མི་མང་རྣམས་དྲག་པོ་ངོ་རྒོལ་གྱི་ལམ་དུ་ཞུགས་པར་བྱས་ཚེ། བདག་གིས་ཆབ་སྲིད་ཀྱི་འགན་དབང་འཕྲལ་མ་ཉིད་དུ་མཚམས་འཇོག་གི་ཡིན་ཞེས་བཀའ་ཕེབས་པ་དང་། དེ་ལ་ངའི་རོགས་པས་བཤད་ན། ད་ལྟ་བོད་ནང་གི་བོད་མི་རྣམས་ཀྱིས་རང་སྲོག་བློས་གཏོང་གིས་ཞི་བའི་ངོ་རྒོལ་འདི་འདྲ་ཆེན་པོ་ཞིག་འབྱུང་བཞིན་པའི་སྐབས་སུ། ྋརྒྱལ་བ་རིན་པོ་ཆེ་ཚང་གི་བཀའ་དེ་འདྲ་ཞིག་ཕེབས་པ་དེས་བོད་མི་རྣམས་ཀྱི་སེམས་ཤུགས་ཆག་གཞིར་འགྱུར་རྒྱུ་ཡིན་པ་དང་། དེ་དང་མཉམ་དུ་བོད་མིའི་རེ་བ་བརླག་ངེས་ཡིན་པའི་ངོས་འཛིན་བྱེད་ཀྱིན་འདུག་པར་མ་ཟད། ད་དུང་ཁོང་གིས་ཤུགས་རིང་འཐེན་ནས། ྋ རྒྱལ་བ་རིན་པོ་ཆེ་ཚང་གི་བཀའ་དེ་འདྲ་ཞིག་ཕེབས་པར་བློ་ཕམ་གྱི་རྣམ་འགྱུར་སྟོན་གྱིན་འདུག

འོན་ཀྱང་ངའི་མཐོང་སྣང་ནི་ཁོང་གི་ལྟ་ཚུལ་དང་རྦད་དེ་ཤར་ནུབ་དང་གནམ་ས་བཞིན་ལྡོག་ཕྱོགས་ཡིན་པས། བདག་གིས་འཕྲལ་མ་ཉིད་དུ་ཁོང་གི་ངོས་འཛིན་དེ་དངོས་དོན་དང་མི་མཐུན་པའི་རྩོད་གླེང་བྱེད་མགོ་བརྩམས་པ་ཡིན་ལ། ད་དུང་འདི་ལས་ཀྱང་གཞི་རྒྱ་ཆེ་ཞིང་གཏིང་ཟབ་པའི་ཞི་རྒོལ་ཞིག་གིས་ང་ཚོའི་མིག་མདུན་ན་བསྒུགས་ཡོད་པའི་སྐོར་ནས་ངས་ཁོང་ལ་མུ་མཐུད་རྩོད་སྒྲུབ་བྱེད་སྐབས་ཇ་ཁང་ཆུང་ཆུང་དེའི་ནང་འཚང་ཀ་ཤིག་ཤིག་གི་མགྲོན་པོ་ཚོས་རྣམ་འགྱུར་ཅི་སྟོན་ལ་ངས་གཏན་ནས་དོ་སྣང་བྱེད་རྒྱུ་མ་བྱུང་།

ཡིན་ཡང་། ཉིན་དེར་ལོ་ངོ་གཅིག་གི་རྗེས་ཏེ། ༢༠༠༩ ལོ་ཟླ་ ༢ ཚེས་ ༢༧ ཉིན་ནས་བཟུང་འདི་འདྲའི་བོད་མི་ཤིན་ཏུ་མང་པོ་ཞིག་གིས་རང་ལུས་མེར་བསྲེགས་ཀྱི་ཞི་རྒོལ་བྱེད་ངེས་ཡིན་པ་ཁོང་གིས་ག་ལ་དྲན་ཏེ། ངའི་སེམས་ཀྱི་ཟུར་ཙམ་ལའང་དྲན་མེད་ལ། ད་དུང་ངེད་གཉིས་ཀྱིས་རྩོད་གླེང་བྱེད་ས་དེ་རིང་ནས་རྒྱལ་གཅེས་དཔའ་བོ་ཚེ་སྒྲུབ་ཀྱིས་༢༠༡༣ ལོ་ཟླ་ ༢ ཚེས་ ༡༣ ཉིན་གྱི་ཞོགས་ཀ་རྒྱ་ནག་གཞུང་གི་བཙན་འཛུལ་ལ་ངོ་རྒོལ་གྱིས་རང་ལུས་མེར་བསྲེགས་བཏང་རྒྱུ་ཡིན་པ་དེ་བས་ཀྱང་སུ་གང་གིས་ཤེས་མེད། བདག་གིས་བསམ་ན་དེ་ནི་ང་དང་ང་ཚོས་ཁོང་ཚོའི་ཆོད་སེམས་དང་བློ་སྟོབས། རྟུལ་ཕོད་བཅས་ལ་རྒྱུས་ལོན་ཞན་དྲགས་པའི་ཆ་ཕྱིར་མངོན་སྟངས་ཙམ་རེད།

ཡིན་ཡང་ངས་ངའི་རོགས་པ་ནང་བཞིན་ད་ལན། ྋརྒྱལ་བ་རིན་པོ་ཆེ་ཚང་གི་བཀའ་ཕེབས་པ་དེས་རྐྱེན་བྱས་ཏེ་ཉིན་དེ་ག་རང་ནས་ཞི་བའི་ངོ་རྒོལ་འདི་དེ་ལྟར་ལྟག་ཆུ་ཆད་པའི་རྫིང་བུ་ལྟར་བསྐམས་འགྲོ་བ་དང་འོ་འཁོལ་ལ་ཆུ་འཁྱགས་བླུགས་པ་ལྟར་ལྷིང་འཇགས་སུ་འགྲོ་ངེས་ཡིན་པའི་ངོས་འཛིན་གཏན་ནས་བྱེད་ཐུབ་མ་སོང་ལ། དེ་ནི་ངས་ལོ་དེའི་ཞི་རྒོལ་སྒུལ་ཤུགས་ཀྱི་འཕར་རྩ་ངོ་མ་བོ་དེ་གང་དུ་ཟུག་ཡོད་མེད་ཧ་ཅང་གསལ་པོ་ཤེས་ཡོད་པས་ཡིན།

ངས་རྒྱུན་དུ་དོ་སྣང་བྱེད་ས་གཙོ་བོ་གཅིག་ནི་བོད་ནང་གི་ན་གཞོན་ཚོའི་ཐོག་ལ་ཡིན། ང་རང་ཉིད་ད་ལྟ་ཁོང་ཚོ་དང་ཁ་ཐག་ཅི་བས་རིང་ས་ཞིག་ཏུ་ཡོད་ནའང་། ངས་རྒྱུན་དུ་དྲ་རྒྱུའི་བརྒྱུད་ལམ་ཐོག་ནས་བོད་ནང་གི་ན་གཞོན་ཚོའི་སེམས་ཀྱི་ན་ཟུག་དང་བློ་སྤོབས། རེ་བ་དང་ཆོད་སེམས། སྙིང་སྟོབས་དང་རྟུལ་ཕོད་སོགས་ཀྱི་ཆ་རྣམས་ཕྱིར་མངོན་སྟངས་ཐད་ཧ་ཅང་མཉམ་བཞག་ནས་དཔྱད་ཞིབ་ཀྱིས་བལྟས་བསྡད་པ་ཡིན།

དེ་ལྟ་ནའང་། བདག་གི་ལྟ་སྟངས་གང་ཞིག་ལ་ནོར་འཁྲུལ་གཅིག་རང་གཅིག་བྱུང་བ་དེ་ནི་ད་ལྟ་འབྱུང་ བཞིན་པའི་ཞི་རྒོལ་ཆེན་མོ་འདི་ངའི་ཚོད་དཔག་གི་རྒྱ་ལས་འགོངས་པ་དེ་རེད། ཁ་ཇེ་གསལ་དུ་བཏང་ནས་བཤད་ན་དེ་ནི་བྱུང་བ་ཧ་ཅང་སྔ་དྲགས་པ་དང་ངོ་བོ་ཧ་ཅང་གཏིང་ཟབ་པ་དེ་རེད། བདག་གིས་སྐབས་དེར་ད་དུང་མུ་ནས་མུར་ཞི་རྒོལ་འབྱུང་ངེས་ཡིན་པའི་ཚོད་དཔག་བྱས་ཡོད་ནའང་། འདི་འདྲའི་ཚད་གཞི་མཐོ་ཤོས་དང་ཟབ་ཤོས་ཀྱི་ཞི་རྒོལ་ཞིག་འབྱུང་བའི་ཚོད་དཔག་བྱས་མེད་ལ། འདི་འདྲའི་ཞི་རྒོལ་ཞིག་གང་མགྱོགས་མགྱོགས་འབྱུང་བའི་ཚོད་དཔག་དེ་བས་ཀྱང་གཏན་ནས་བྱས་མེད།

ཐ་ན་གོང་གི་ངའི་ཚོད་དཔག་དེ་ལ་ཉིན་གཅིག་རྒྱ་གར་པའི་ཇ་ཁང་ཆུང་ཆུང་ཞིག་ཏུ་ཇ་འཐུང་སྐབས་བོད་ནས་གསར་དུ་བསླེབས་མ་ཐག་པའི་ངའི་གྲོགས་པོ་ཞིག་གིས་ཀྱང་གཏན་ནས་མོས་མཐུན་བྱས་མ་སོང་།

སྒྲུང་ལྟ་བུའི་བདག་གི་སྐད་ཆ་འདི་ལ་བརྟེན་ནས་ད་ལྟ་ང་ཚོས་རང་བཙན་བསྐྱར་གསོའི་སྐོར་སྐད་ཆ་ཚིག་ཀ་གཅིག་གིས་བཤད་ཆོག གལ་སྲིད་རང་བཙན་ཞེས་པའི་ཐ་སྙད་འདི་བོད་མི་ཞིག་ཡིན་པའི་དབང་དུ་བཏང་ནས་བཤད་ན། ཧ་ལས་པའི་བོད་མི་སྡུག་ཅག་ཅིག་རེད། འདིས་རྒྱ་ནག་ལྟ་ཅི། བཙན་བྱོལ་ནང་གི་ཕྱོགས་ཁག་མང་པོ་ཞིག་ལའང་ཕོག་ཐུག་བཟོས་ཡོད། ཨ་ལེ། ཀུ་རེ་ཡིན། ད་ལྟ་རྒྱལ་སྤྱིའི་ཐོག་མི་མང་པོ་ཞིག་གིས་བོད་ཀྱི་རང་བཙན་བསྐྱར་གསོ་ནི་འབྱུང་མི་སྲིད་པ་ཞིག་ཡིན་པའི་ལྟ་ཚུལ་བཟུང་ཡོད་ནའང་། ང་ཚོས་འཛམ་གླིང་རིལ་རིལ་འདིའི་ལོ་རྒྱུས་ས་ལ་བཀྲམ་ནས་བལྟས་ཚེ། ཁོང་ཚོའི་དེ་ལྟའི་ལྟ་ཚུལ་བཟུང་བ་དེར་བདག་གིས་བརྒྱ་ཆ་བརྒྱ་འགྲིགས་ཡོད་པའི་བདེན་ཁ་སྟེར་ཐུབ་པ་མི་འདུག

རང་བཙན་བསྐྱར་གསོ་ནི་མི་ལོ་ལྔ་བཅུ་དང་། ཡང་ན་ལོ་བརྒྱའི་དམིགས་འབེན་དུ་འཛིན་མི་རུང་། ཁྱེད་ཀྱི་སེམས་ལ་ཉུང་མཐའ་ལོ་ངོ་སྟོང་གི་དམིགས་འབེན་འཛིན་དགོས། ལོ་ངོ་སྟོང་། ཁྱེད་ཀྱིས་ལོ་ངོ་སྟོང་གི་དམིགས་འབེན་བཟུང་ཚེ། རང་བཙན་བསྐྱར་གསོ་བྱེད་རྒྱུ་དེ་ཤིན་ཏུ་ནས་ཀྱང་སླ་བོ་ཞིག་ཡིན། དེ་བས་ཁྱོད་ཀྱིས་རང་བཙན་བསྐྱར་གསོའི་ཐད་ཉུང་མཐར་ལོ་ངོ་སྟོང་གི་དམིགས་འབེན་འཛིན་དགོས་པ་ཡིན། ང་ཚོས་དམིགས་ཡུལ་གྱི་རྒྱང་ཐག་ཧ་ཅང་ཐུང་དྲགས་པའི་རྐྱེན་གྱིས་ནམ་རྒྱུན་བྱ་བ་ཕྲན་ཚེགས་ཤིག་བསྒྲུབ་རྒྱུ་ཡང་ཤིན་ཏུ་དཀའ་ལས་ཁག་པོ་ཆགས་ཀྱི་ཡོད། ང་ཚོས་ལས་ཀ་གང་ཞིག་བསྒྲུབ་རྒྱུའི་དམིགས་ཡུལ་གྱི་རྒྱང་ཐག་ཇི་ལྟར་ཐུང་ན་དེ་ལྟར་ང་ཚོ་ལ་ལས་ཀ་དེ་སྒྲུབ་རྒྱུར་དཀའ་ངལ་དང་འགལ་རྐྱེན་འཕྲད་ཀྱི་ཡོད། དེར་བརྟེན། ང་ཚོས་དམིགས་ཡུལ་རྒྱང་དུ་བསྲིངས་ན། ལོ་ངོ་སྟོང་གི་རྗེས་ཀྱི་དེ་རིང་གི་ཉིན་མོར་འདིར། རང་བཙན་གྱིས་བོད་མི་མང་ལ་སྒུག་ནས་བསྡད་ཡོད་པ་དང་། དེ་ནི་ངས་གནམ་འོག་གི་བོད་ཀྱི་ན་གཞོན་ཚོའི་བློ་སྟོབས་དང་། ཆོད་སེམས། རྟུལ་ཕོད་བཅས་ལས་དེ་ལྟར་ཡིན་པ་མཐོང་བས་བདག་གིས་དེ་རིང་འདིར་དེ་ལྟར་བཤད་པ་ཡིན།