མདང་ནུབ་བོད་ནང་གི་ཆུ་ཚོད་ ༨ ཡས་མས་ལ། ཨ་མདོ་བྱ་ཁྱུང་དགོན་པའི་ནང་། མཚན་ལ་ཕག་མོ་དོན་གྲུབ་ཞུ་བ་ཞིག་གིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་ཡོད་འདུག
མདང་དགོང་བོད་ནང་གི་ཆུ་ཚོད་ ༨ ཡས་མས་ལ། མཚོ་སྔོན་མངའ་ཁུལ་བྱ་ཁྱུང་དགོན་པའི་ནང་དུ། བོད་མི་རང་ལོ་ ༢༡ ཡས་མས་ཡིན་པ་ཕག་མོ་དོན་གྲུབ་ཞུ་བ་ཞིག་གིས་རྒྱ་གཞུང་གི་དྲག་གནོན་སྲིད་ཇུས་ལ་ངོ་རྒོལ་གྱིས་རང་ལུས་མེར་བསྲེགས་གནང་ཡོད་པ་དང་། གནས་ཚུལ་དེ་བྱུང་མ་ཐག་བྱ་ཁྱུང་དགོན་པའི་དགེ་འདུན་པ་ཁག་ཅིག་གིས་ཁོང་སྨན་ཁང་དུ་འཁྲིད་ཡོད་ཅིང་། དེ་མ་ཐག་རྒྱ་གཞུང་གི་ཉེན་རྟོག་པ་མང་པོ་དགོན་ནང་དུ་འབྱོར་ཡོད་འདུག ཁོང་འདས་གྲོངས་སུ་སོང་ཡོད་མེད་གསལ་ཁ་མེད་ཀྱང་། དེའི་རྗེས་སུ་གནས་ཚུལ་ཐོན་པའི་ནང་བྱ་ཁྱུང་དགོན་པའི་དགེ་འདུན་པ་ཡོངས་ཀྱིས་བསྔོ་སྨོན་གསུང་བཞིན་ཡོད་སྐོར་ཞིག་བསྟན་འདུག
རྒྱལ་གཅེས་དཔའ་བོ་ཁོང་གི་མཚན་ལ་ཕག་མོ་དོན་གྲུབ་དང་། རང་ལོ་ ༢༡ ཡས་མས་ཡིན་ཞིང་། ཁོང་གི་སྐྱེས་ཡུལ་ནི། བྱ་ཁྱུང་དགོན་པའི་ཉེ་འཁྲིས་བ་ཡན་རྫོང་༼དཔའ་ལུང་རྫོང་༽ཚྭ་ཕུག་ཞང་ས་དཀར་གོང་བ་སྡེ་བ་ནས་ཡིན་འདུག
ཨ་མདོའི་ཕྱོགས་ཀྱི་ལོ་ཐོ་རྩི་སྟངས་ལྟར། ཁ་སང་ནི་ལུགས་རྙིང་གི་ཟླ་ ༡ ཚེས་ ༡༥ ལ་ཁེལ་ཡོད་ཅིང་། དགེ་ལུགས་པའི་དགོན་སྡེ་མང་ཆེ་བར་ཆོ་འཕྲུལ་སྨོན་ལམ་ཆེན་མོ་ཚོགས་བཞིན་ཡོད་པ་དང་། ཚེས་ ༡༥ ཉིན་གྱི་མཚན་མོར་དགོན་པ་སོ་སོའི་ནང་མེ་ཏོག་གི་མཆོད་པ་བཤམས་ཏེ་མི་མང་ལ་མཇལ་ཁ་གཏོང་བའི་དུས་ཚོད་ལ་ཁེལ་ཡོད་འདུག
བྱ་ཁྱུང་ཐེག་ཆེན་ཡོན་ཏན་དར་རྒྱས་གླིང་དགོན་པ་ནི། ས་གླང་ཕྱི་ལོ་ ༡༣༤༩ ལོར་ཆོས་རྗེ་དོན་རིན་པོ་ཆེ་༼དོན་གྲུབ་རིན་ཆེན༽མཆོག་དགུང་གྲངས་ཞེ་གཅིག་ཐོག་ཁོང་གིས་ཕྱག་བཏབས་གནང་ཤིང་། དུས་དེ་ནས་བཟུང་དགེ་ལུགས་པའི་བྱང་གི་དགོན་ཆེན་བཞིའི་ཡ་གྱལ་དུ་འཇོག རྗེ་ཙོང་ཁ་བ་ཆེན་པོས་ཤེས་རབ་ཀྱི་ལྷ་འཇམ་པའི་དབྱངས་སྒྲུབ་གནས་ཀྱང་འདི་ཡིན་པ་སོགས་ཀྱིས། མདོ་སྨད་ཆོས་འབྱུང་སོགས་སུ་ལྷོ་རྒྱུད་གནས་ཀྱི་སྙིང་བོ་དང་། ཞཱ་གསེར་བསྟན་པའི་འབྱུང་ཁུངས་ཞེས་བསྔགས་བརྗོད་གནང་ཡོད།
དགོན་པ་འདི་ལ་བུ་དགོན་ ༢༥ དང་། སྡེ་ཚ་ནང་སོ་དང་ཚེར་ཕུག་དཔོན་པོ། ཀྱོའུ་ཀྱ་དཔོན་པོ། ལུང་བཟང་དཔོན་པོ་བཅས་ཀྱི་མངའ་འོག་ཏུ་རོང་བོ་ཉིན་ཐུབ་བཅུ། ཨ་འདར་ཆ་གའི་དཔོན་པོ། ཁོ་ཚེ་དཔོན་པོ། མདོ་བ་ཡར་ནང་མར་ནང་གི་དཔོན་པོ་གཉིས། ཤིས་བཞིན་དཔོན་པོ་བཅས་ཀྱི་མངའ་ཞབས་སུ་གཅན་ཚ་ཉིན་ཐུབ་བརྒྱད། གཤོང་ཤན་ཚོ་བ་ལྔ། དོར་ཤུལ་ཚོ་བ་ལྔ། ཚེར་ཕུག་ཚོ་བ་བཅུ་གསུམ། བྲ་ནག་ཁག་བཞི། གཟི་ལུང་ཚོ་དགུ། བྱ་ཁྱུང་གི་ལྷ་སྡེ་ས་དཀར་གོང་བ། ཚྭ་ཆུ། ཞིང་བའི་སྒང་། ཁྲོམ་ཚང་རྣམས་དང་། ཁོ་ཚེ་དགོན་གྲོང་བཅོ་བརྒྱད། དཔྱི་མར་ནང་ཚོ་བ་བརྒྱད། མདོ་བ་ཡར་ནང་ཚོ་བ་ལྔ། སོ་སྨན་ལྕང་ཤར་ཚོ་བ་བཅུ་གཉིས། ཀ་རྒྱ་ཚོ་བ་དགུ་སོགས་མཆོད་གཞིས་རྒྱ་ཆེན་པོ་ཡོད།
གསར་འགོད་པ། དོན་འགྲུབ་བཀྲ་ཤིས།
ཡུལ་གྱར་བོད།
སྐྱོ་གར་གྱི་ལོ་ཟླ་ཞིག་གི་དབུ་ནས
ཁྱེད་ཀྱིས་མིའི་གཟུགས་སུ་གྲུབ་པའི་མེ་ལྕེའི་གྲངས་བགྲངས་ཙམ་གྱིས་བྲང་ཁོག་བསྲེགས་སོང་ངམ
ན་ཟུག་ལངས་སོང་ངམ
ཚོར་བ་རྒྱས་བྱུང་ངམ
པོ་ཏ་ལའི་ཁ་མདངས་དྲི་མེད་ཅིག་ཁྱེད་ཀྱིས་མ་འོངས་མ་འོངས་ཤིག་ཏུ་མཐོང་པར་སྒུག་ཡོད་པ་ཡིན་ནམ
གཞོན་ནུ་ཁྱུ་གཅིག་གི་ཕྱི་ཡུལ་སྤྲོ་སྐྱིད་ཁྲོད་ཀྱི་རང་བཙན་ལ་སྒུག་ཡོད་པ་ཡིན་ནམ
ཇ་ཁང་དང་སྐོར་ལམ་ནང་གི་དབུ་མའི་ལམ་ལ་སྒུག་ཡོད་པ་ཡིན་ནམ
ཡང་ན་མགོ་བདེ་དྲན་འཕྲུལ་འགས་རང་གི་ཕོར་བ་ཕྱིལ་ཕྱིལ་བཏང་བའི་རུལ་དྲིས་ཟིན་པའི་བོད་དོན་ཕྱི་བསྒྲགས་ལ་སྒུག་ཡོད་པ་ཡིན
ད་ནི་སྣང་བ་མཐའ་ཡིས་གཡོ་སྒྱུ་ཡིས་སྦས་པ་ཤེས་རན་འདུག
ད་ནི་ཕྱག་ན་པད་མོ་བགྲེས་པ་ཤེས་རན་འདུག
ཚོར་བ་ཡོད་ན་རྒྱས་རན་འདུག
ལས་འགུལ་ཡོད་ན་སྤེལ་རན་འདུག
གསོན་ལ་རེ་བ་ཞིག་ཨེ་རྙེད་ལྟ་རན་འདུག་གོ།།།།
གཅིག་འབར་གཉིས་འབར་ཞི་བའི་མེ་ལྕེ་ཡིས།།
བོད་ཀྱི་རང་དབང་དང་ནི་༧གོང་ས་མཆོག།
འབོད་པའི་སྒྲ་ནི་ས་སྟེང་ཡོངས་ཁྱབ་ཀྱང་།།
མུན་པའི་མཁའ་དབྱིངས་ད་དུང་འཇིགས་སུ་རིང་།།
ཤི་བོའི་རྗེས་ཀྱི་གསོན་པོ་ང་ཚོ་ཡིས།།
ཞི་བའི་གྱེན་བླངས་ཤུགས་ཀྱིས་མ་བྱས་པར།།
ཞི་བའི་དུ་སྤྲིན་གནམ་མཁའི་ཁ་ཟས་ཉིད།།
ད་ནི་ཐུགས་རྗེ་གཟིགས་ལྷག་བསམ་རབ་ཏུ་དཀར་བའི་གཞིས་བཞུགས་སྤུན་ཟླ་ཚོ། ཁྱེད་ཚོའི་རླབས་ཆེ་བའི་གཟི་བརྗེད་ལབསྔགས་བརྗོད་དང་གུས་བཀུར་ཡོད། ཡིན་ན་དེ་རིང་ནས་གཟུང་རང་ལུས་མེ་བསྲེགས་ལས་འགུལ་འདི་འཚམས་འཇོག་གནང་རོགས་ཞེས་འབུལ་བསྐུལ་ཞུ།
ས་གནས་འདི་མཚོ་ཤར་ཕྱོགས་རེད། ཙོང་ཁ་ཉིན་སྲིབ་གཉིས་སུ་ཕྱེ་བའི་ཙོང་ཁ་སྲིབ་ཀྱི་དཔལ་ལྡན་བྱ་ཁྱུང་དགོན་པ་དང་། སྔོན་གྱི་ཁྲི་ཆེན་ངག་མཆོག་ལྡན་དང་ཁྲི་སྦྱིན་པ་རྒྱ་མཚོ། ཁྲི་ངག་དབང་སྙན་གྲགས། ཁྲི་ངག་དབང་ཆོས་གྲགས་རྣམས་ཀྱི་གདན་ས་ཡང་ཡིན་འདུག གཙོ་བོ་རྒྱལ་གཅེས་པ་དེའི་ད་ལྟའི་གནས་ཚུལ་ཞིབ་ཕྲ་ས་གནས་མི་དམངས་ཀྱིས་རྒྱུས་ལོན་དུས་ཐོག་བྱ་ཐུབ་པ་ཞིག་བྱེད་ཐུབ་ན་ལེགས།