སང་ཉིན་བོད་དོན་གླེང་དགོས།

སང་ཉིན་གྱི་ལྷོ་ཨ་ཧྥི་རི་ཀའི་རྒྱལ་ཁབ་ལྔའི་ལྷན་ཚོགས་ཐོག་རྒྱ་ནག་གི་སྲིད་འཛིན་ཞི་ཅིན་ཕེན་ལ་གནོན་ཤུགས་སྤྲད་དེ་བོད་ཐོག་འཛིན་པའི་སྲིད་ཇུས་བསྐྱར་བྱེད་འཇུག་དགོས་ཟེར།

དེ་རིང་ཉིན་རྒྱབ་ཆུ་ཚོད་ ༢ པའི་སྟེང་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་ཁང་དུ། དབུས་བོད་ཀྱི་བུད་མེད་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པ་གཉིས་ཀྱིས་གསར་འགོད་ལྷན་ཚོགས་ཤིག་བསྐྱངས་ཏེ། སང་ཉིན་ཕྱི་ཚེས་ ༢༦ ནས་ ༢༧ ཉིན་བར་ལྷོ་ཨ་ཧྥི་རི་ཀའི་རྒྱལ་ས་ཌུར་བྷན་ནང་། རྒྱ་དཀར་ནག་གཉིས་དང་། ལྷོ་ཨ་ཧྥི་རི་ཀ་དང་བྷར་ཛལ། ར་ཤི་ཡ་བཅས་མཐུན་ཕྱོགས་རྒྱལ་ཁབ་ཁག་ལྔ་(BRICS Summit)ཡི་ལྷན་ཚོགས་ཤིག་བསྐོང་འཆར་ཡོད་པའི་ཐོག བོད་དོན་གླེང་སློང་གནང་དགོས་པ་དང་། རྒྱལ་ཁབ་ཁག་གི་སྲིད་འཛིན་ཚོས་རྒྱ་ནག་གི་སྲིད་འཛིན་གསར་པ་ཞཱི་ཅིན་ཕེན་ལ་གནོན་ཤུགས་སྤྲད་དེ། བོད་ཐོག་འཛིན་པའི་སྲིད་ཇུས་ལ་བསྐྱར་ཞིབ་དགོས་པའི་རེ་སྐུལ་ཞུ་དགོས་སྐོར་བརྗོད་བྱུང་།

གསར་འགོད་ལྷན་ཚོགས་སྟེང་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་ལགས་ཀྱིས། ཞཱི་ཅིན་ཕེན་རྒྱ་ནག་གི་སྲིད་འཛིན་དུ་བསྐོ་བཞག་བྱས་པའི་ཚུན་ལ། བོད་ནང་དམག་མི་སྔར་ལས་མང་དུ་བཏང་པ་དང་། ཉེས་མེད་འཛིན་བཟུང་བཀག་ཉར་སྔར་ལས་ཤུགས་ཆེ་རུ་བཏང་ཡོད་སྟབས། ད་རེབ་ཚོགས་བཅར་རྒྱལ་ཁབ་ཁག་གི་དབུ་འཁྲིད་ཚོས་ངེས་པར་དུ་ཞཱི་ཅིན་ཕེན་ལ་བོད་དོན་གླེང་དགོས་ཟེར། ཡང་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་རྡོ་རྗེ་ཚེ་བརྟན་ལགས་ཀྱིས། ཞཱི་ཅིན་ཕེན་གྱིས་ངེས་པར་དུ་བོད་མིའི་མངོན་འདོད་ཁྲིམས་མཐུན་ལག་བསྟར་བྱས་ཏེ། ད་ལྟའི་བོད་ནང་གི་བོད་མིའི་རང་ལུས་མེར་བསྲེགས་ཀྱི་རླབས་རྒྱུན་མཚམས་འཇོག་ཡོང་པར་བྱ་དགོས་ཟེར། 

གཞན་ཐེངས་འདིའི་རྒྱལ་ཁབ་ལྔའི་ལྷན་ཚོགས་ལ་དམིགས་ཏེ་རཱ་ཤཱི་ཡའི་ནང་གི་བོད་སྐྱོབ་ཐེབས་རྩ་ཚོགས་པ་(Save Tibet Foundation, Russia) དང་། བྷར་ཛལ་བོད་ཀྱི་རིག་གཞུང་ལྟེ་གནས་ཁང་(Tibet Culture Brazil)། ལྷོ་ཨ་ཧྥི་རི་ཀའི་བོད་རིགས་མཐུན་ཚོགས་(Tibet Society South Africa)། རྒྱ་གར་བོད་དོན་རྒྱབ་སྐྱོར་ཚོགས་པ་བཅས་ཀྱིས་སོ་སོའི་སྲིད་འཛིན་དང་སྲིད་བློན་ལ་ད་རེབ་ལྷན་ཚོགས་སྟེང་བོད་དོན་གླེང་སློང་བྱ་དགོས་པའི་ཞུ་ཡིག་ཕུལ་ཡོད་པ་མ་ཟད། འབྲེལ་ཡོད་གཞུང་ཚབ་ཁག་ལའང་ཞུ་ཡིག་ཕུལ་ཡོད་འདུག

རྒྱལ་ཁབ་ལྔའི་ལྷན་ཚོགས་འཚོགས་ལ་ཉེ་བའི་སྐབས་སུ་རྒྱ་གར་གྲོས་ཚོགས་འཐུས་མི་ཤཱི་རེ་རཱ་ཇེཝ་(Shri Rajeev Chandrasekhar) མཆོག་གིས་ཟླ་འདིའི་ཚེས་ ༡༤ ཉིན་འཁོད་པའི་ཞུ་ཡིག་ཅིག་སྲིད་བློན་མན་མོན་ཧན་སེན་མཆོག་ལ་ཕུལ་ཏེ། ཐེངས་འདིའི་རྒྱལ་ཁབ་ལྔའི་ལྷན་ཚོགས་ཐོག་རྒྱ་ནག་གི་སྲིད་འཛིན་ཞཱི་ཅིན་ཕེན་ལ་ངེས་པར་དུ་ད་ལྟའི་བོད་ནང་གི་རང་ལུས་མེར་བསྲེགས་སྐོར་གླེང་སློང་བྱ་དགོས་པའི་འབོད་སྐུལ་གནང་ཡོད་འདུག

ཞུ་ཡིག་དེར། རྒྱ་གར་ནི་འཛམ་གླིང་གི་དམངས་གཙོའི་རྒྱལ་ཁབ་ཆེ་ཤོས་ཤིག་ཡིན་པའི་ངོས་ནས་བོད་དང་བོད་མིའི་རྩ་དོན་ལ་རྒྱབ་སྐྱོར་བྱ་དགོས་པའི་འགན་འཁྲི་ཡོད་པ་པ་དང་། ལྷོ་ཨ་ཧྥི་རི་ཀའི་ནང་རྒྱལ་ཁབ་ལྔའི་ལྷན་ཚོགས་འཚོགས་སྐབས་ད་ལྟའི་བོད་ནང་གི་ཛ་དྲག་གནས་སྟངས་དང་འགྲོ་བ་མིའི་ཐོབ་ཐང་སྐོར་ལ། རྒྱ་ནག་གི་སྲིད་འཛིན་ལ་ངེས་པར་དུ་གླེང་སློང་གནང་དགོས་སྐོར་སོགས་འཁོད་ཡོད་འདུག

མཇུག་ཏུ་གོང་གསལ་རྒྱལ་ཁབ་ལྔའི་མགོ་ཁྲིད་ཚོས་བོད་ཐོབ་འཛིན་པའི་རྣམ་འགྱུར་མཚོན་པའི་འཁྲབ་སྟོན་ཞིག་བཅས་གནང་ཡོད།

གསར་འགོད་པ། བནྡེ་སྐྱབས།