ཕ་ཡུལ་དུ་ཕྱིན་པའི་མཐོང་ཐོས་གླེང་བ།

རྒྱ་གཞུང་གིས་ད་ལོའི་ལོ་སར་སྔོན་ལ་བོད་ནང་གི་གཞི་རིམ་ཞིང་འབྲོག་ཁུལ་གྱི་སྡེ་བ་སོ་སོའི་སྡེ་དཔོན་རྣམས་ས་གནས་ཞང་སྲིད་གཞུང་ནང་འབོད་འགུག་གིས་རང་ལུས་མེར་བསྲེགས་བཀག་སྡོམ་སྐོར་གྱི་ཟབ་སྦྱོང་ཞིག་སྤྲད་ཡོད་པ་དང་། ལོ་སར་རྗེས་སྡེ་བ་སོ་སོར་རང་སྲེག་བཀག་སྡོམ་སྐོར་གྱི་དེབ་དང་ཡིག་ཆ་སྣ་ཚོགས་བཀྲམས་ཏེ་མང་ཚོགས་ལ་སློབ་སྦྱོང་བྱེད་བཅུག་ཡོད་པ་མ་ཟད། མི་རེ་ངོ་རེར་རང་ལུས་མེར་བསྲེགས་མི་གཏོང་རྒྱུར་མཛུབ་ཐེལ་གནོན་དུ་བཅུག་ཡོད་འདུག

        གསར་འགོད་པས་ཉེ་ཆར་བོད་ནང་གཉེན་འཕྲད་དུ་བསྐྱོད་དེ་ཕྱིར་བསླེབས་མ་ཐག་པའི་ལྷ་ཐར་ལགས་དང་གླེང་མོལ་བྱེད་སྐབས། ཁོས་ཕ་ཡུལ་གྱི་སྡེ་མི་ལས་བྱེད་ཅིག་དང་གླེང་མོལ་བྱུང་བའི་སྐོར་བརྗོད་དོན། “ཞོགས་པ་སྔ་བོ་ཞིག་ལ་སྡེ་མི་ལས་བྱེད་ཅིག་ལ་ཐུག་སྟེ་ཁ་བརྡ་བྱས་པ་ཡིན། ཁོས་ང་ཞང་སྲིད་གཞུང་ནང་རང་ལུས་མེར་བསྲེགས་བཀག་སྡོམ་སྐོར་གྱི་ཟབ་སྦྱོང་ལ་འགྲོ་བཞིན་ཡོད། ད་སྐབས་སྲིད་གཞུང་གིས་སྡེ་བ་སོ་སོར་དྲིལ་བསྒྲགས་སློབ་གསོའི་ལས་འཆར་དང་། ལོ་གཅིག་གི་འོས་འགན་ལག་བསྟར་བྱས་ཏེ། མང་ཚོགས་ལ་སུན་གཙེར་བཟོས་ཡོང་གི་འདུག་ལབ་སོང་། དེ་བཞིན། ཁོའི་ལག་ཏུ་སློབ་གསོའི་དེབ་ཅིག་བཟུང་ཡོད་པའི་དོན་ཚན་གསུམ་པའི་ནང་། ཏཱ་ལའི་བླ་མར་དགག་རྒྱག་དང་ཁ་བྲལ་ལ་ངོ་རྒོལ་བྱེད་དགོས་པའི་སྐོར་བཀོད་འདུག ”ཅེས་བརྗོད་བྱུང་། 

        འདི་ལོ་ནས་བཟུང་རྒྱ་གཞུང་གིས་བོད་ནང་དུ་ཕྱི་ཕྱོགས་ཀྱི་རླུང་བརྙན་འཕྲིན་དང་བརྡ་འཕྲིན་བརྒྱུད་ལམ་ཁག་བཀག་སྡོམ་བྱེད་ཤུགས་སྔར་བས་ཆེ་རུ་བཏང་ཡོད་པའི་ཐད། ལྷ་ཐར་ལགས་ཀྱིས། “ ང་རང་འགྲོ་སའི་བོད་མི་ཚོར་མཚོན་ན། བཙན་བྱོལ་སྤྱི་ཚོགས་ཀྱི་གནས་ཚུལ་དང་། ཐ་ན་སྲིད་སྐྱོང་བློ་བཟང་སང་གེ་མཆོག་གིས་ཚོགས་འདུ་གང་ཞིག་གི་སྐད་ཆ་ག་རེ་བཤད་པ་སོགས་ཧ་ཅང་གསལ་བོ་བཤད་རྒྱུ་འདུག མང་ཚོགས་རང་བཞིན་གྱི་ཆབ་སྲིད་གོ་རྟོགས་ཡག་པོ་འདུག ཁོང་ཚོས་སྒེར་གྱི་རླུང་འཕྲིན་བརྙན་འཕྲིན་བརྒྱུད་ནས་ཤེས་ཀྱི་འདུག ཡིན་ནའང་། རྒྱ་གཞུང་གིས་ད་ལོར་བོད་ནང་གི་གྲོང་སྡེ་ཁག་ནང་འཁོར་སྐར་སྡེར་མ་ཡོངས་ཕྱིར་བསྡུ་བྱས་ཏེ་མེར་བསྲེགས་གཏོང་བཞིན་འདུག དེའི་ཚབ་ལ་རྒྱ་གཞུང་གིས་འཁོར་སྐར་སྡེར་མ་དཀར་པོ་ཆུང་བ་ཞིག་འཛུགས་བཞིན་འདུག དེའི་ནང་རྒྱ་གཞུང་གིས་ལྐོག་ཉན་འཕྲུལ་ཆས་བཞག་ཡོད་པ་རེད་ཟེར་ནས་མང་ཚོགས་ཀྱིས་དོགས་པ་བྱེད་ཀྱི་འདུག” ཅེས་བརྗོད་སོང་།

        ཡང་བོད་ནང་གི་སྐད་ཡིག་སྐོར་གླེང་སྐབས་ཁོས། “ དེང་སྐབས་བོད་ནང་བོད་སྐད་གཙང་མ་བཤད་པ་སྔོན་མ་དང་བསྡུར་ན་རྦད་དེ་ཡག་ཏུ་ཕྱིན་འདུག ཐ་ན་རྒན་རྒོན་ཚོས་ཀྱང་དེང་རབས་ཀྱི་ཅ་དངོས་རིགས་ཀྱི་མིང་བོད་སྐད་ཐོག་བཤད་ཡོང་གི་འདུག བོད་སྐད་ནང་རྒྱ་སྐད་བསྲེས་མཁན་ཚོར་ལྟ་སྟངས་མི་ལེགས་པ་འཛིན་གྱི་འདུག ཡིན་ནའང་གཞི་རིམ་སྡེ་བའི་སློབ་གྲྭ་ཁག་ནང་སློབ་ལོ་མ་རན་པའི་བྱིས་མ་གཏོགས་བཞག་མེད་པར། སློབ་ཕྲུག་ཡོངས་རྫོགས་ཞང་དང་རྫོམ་རིམ་པའི་སློབ་གྲྭ་ཁག་ནང་བསྡུས་ཏེ། བོད་རིགས་དགེ་རྒན་གྱི་གྲངས་འབོར་ཀྱང་ཉུང་དུ་བཏང་ཡོད་པ་མ་ཟད།  སློབ་གྲྭ་ཁག་ནང་བསླབ་གཞི་ཚང་མ་རྒྱ་ཡིག་ནང་འཁྲིད་དགོས་པའི་སྲིད་ཇུས་དེ་ལག་བསྟར་བྱེད་བཞིན་འདུག” ཟེར།

        དེ་བཞིན། རེབ་གོང་གི་གསོ་རིག་སློབ་གྲྭར་སྐྱོད་བཞིན་པའི་ལྷ་ཐར་ལཊ་ཀྱི་ཚ་མོས་ཁོ་རང་ལ་བརྗོད་པ་ལྟར་ན།  སློབ་ཕྲུག་ཚོས་སློབ་གསོའི་སྲིད་ཇུས་དེར་ངོ་རྒོལ་སྐད་འབོད་བྱས་པའི་རྗེས། རེབ་གོང་ཁུལ་དུ་རྒྱ་གཞུང་གིས་འདི་ལོ་སློབ་མཐར་ཕྱིན་དགོས་པའི་སློབ་ཕྲུག་ཚོར་མཐར་ཕྱིན་འཛིན་ཡིག་དང་། མཐོ་རིམ་སློབ་གྲྭར་ཡིག་རྒྱུཊ་སོགས་ཀྱི་ལམ་ཁ་ཆ་ཚང་མེད་པ་བཟོས་ཡོད་སྟབས། སློབ་མ་སོ་སོའི་ངོས་ནས་ཐབས་ཤེས་གཏོང་དགོས་ཆཊ་ཡོད་འདུག

        དེང་སྐབས་ཁམས་དང་ཨ་མདོའི་ཕྱོགས་ཀྱི་བོད་མི་ཚོ་ལྷ་ས་དང་གཞིས་ཀ་རྩེ་སོགས་བོད་རང་སྐྱོང་ལྗོངས་ཀྱི་ཁོངས་གཏོགས་གྲོང་ཁྱེར་ཁག་ནང་མགྲོན་ཁང་ལ་སྡོད་མཇུག་གི་མེད་པ་མ་ཟད། ནག་ཆུ་ཁུལ་ནས་བསླེབས་པའི་མཇལ་བ་རྣམས་ཀྱང་ལྷ་སར་ཟླ་གཅིག་ལྷག་སྡོད་མི་ཆོག་པ་བཟོས་ཡོད་འདུག ལྷ་ཐར་ལགས་ཀྱིས་བརྗོད་དོན། “མཚན་གཅིག་ལ་གཞིས་རྩེ་རུ་ཞག་སྡོད་བྱ་རྩིས་བྱས་ཀྱང་། ཨ་མདོ་དང་ཁམས་ཁུལ་གྱི་བོད་མི་བསྡད་ཆོག་གི་མ་རེད་ལབ་སོང་། རྒྱུ་མཚན་དྲིས་པར་འདི་སྲིད་གཞུང་གི་གཏན་འབེབས་རེད། འདི་དང་འགལ་ན་མགྲོན་ཁང་སྒོ་རྒྱག་རྒྱུ་ལས་ཡོད་པ་མ་རེད་ཟེར། ལྷ་སའི་མེ་འཁོར་འབབ་ཚིགས་སུའང་ཁམས་དང་ཨ་མདོ་བ་ཡིན་ཚད་ལོགས་སུ་བཀར་ཏེ། ཉེན་རྟོག་ཁང་དུ་ཁྲིད་ནས་འདྲི་རྩད་བྱེད་དགོས་ཀྱི་འདུག ” ཅེས་བརྗོད་སོང་། 

        ཡང་ལྷ་ཐར་ལགས་ཀྱིས་ལྷ་སའི་ཚོང་བ་ཁག་ཅིག་དང་གླེང་མོལ་བྱུང་བའི་སྐོར་བརྗོད་དོན། དེང་སྐབས་ལྷ་སའི་ཁུལ་ཏུ་རྒྱ་མགོ་ཇེ་མཐོར་ཕྱིན་ཏེ།  གལ་སྲིད་ཚོང་ཙག་ཙིག་ཐོག་ཁ་རྩོད་ཙམ་ཤོར་ཡང་ལམ་སང་ཉེན་རྟོག་པ་བསླེབས་ཏེ། ཁ་བྲལ་གྱི་བྱ་སྤྱོད་སོགས་ཆབ་སྲིད་ཀྱི་ངོ་བོར་བསྒྱུར་ཏེ་བོད་མི་ཚོ་མགོ་འགྱོག་ས་མེད་པ་ཆགས་འདུག ལྷ་སར་མེ་འཁོར་ལྕགས་ལམ་བཟོས་པ་ནས་བཟུང་། ལྷ་ས་གྲོང་ཁྱེར་གཙོས་གཞིས་ཀ་རྩེ་དང་། ནག་ཆུ། འདམ་གཞོང་སོགས་ས་ཁུལ་མང་པོའི་ནང་རྒྱ་མི་ལས་ཀ་བས་ཁེངས་ཤིང་། བོད་ནང་གཏེར་ཁ་སྔོག་འདོན་དང་འཛུགས་སྐྲུན་ལས་གཞི་སྣ་ཚོགས་ནང་ལས་ཀའི་གོ་སྐབས་བརྒྱ་ཆ་ ༩༠ ཡན་རྒྱ་མི་ཚོར་སྤྲོད་བཞིན་ཡོད་ཅིང་། རྒྱ་གཞུང་གིས་བོད་ཁུལ་དུ་སྤེལ་བཞིན་པའི་ལས་གཞིའི་རྣམ་གྲངས་མང་པོ་ཞིག་རྒྱ་ནང་གི་སྡེ་བ་སོ་སོར་གན་བརྒྱ་བཞག་སྟེ། རྒྱ་སྡེ་རེ་ནས་མི་བརྒྱ་སྐོར་རེ་མཉམ་དུ་བསླེབས་ཏེ་གཏན་སྡོད་བྱེད་ཀྱི་འདུག་ཟེར། 

        གཞན་ཡང་། ད་སྐབས་བོད་མིའི་སྒེར་ལངས་གསུམ་བཅུའི་དུས་དྲན་བསླེབས་ལ་ཉེ་སྟབས།  བོད་ནང་གི་གྲོང་ཁྱེར་དང་གྲོང་རྡལ། དགོན་སྡེ་ཁག་ཏུ་དམག་མིས་ཁེངས་ཡོད་པ་མ་ཟད། བལ་ཡུལ་ནང་ཚོང་ལས་གཉེར་མཁན་བོད་མི་ཚོ་ཡང་། བོད་ནང་ལོག་རྗེས་ཕྱི་སྐྱོད་ལག་ཁྱེར་གཞུང་བཞེས་བཏང་སྟེ། ཕྱིར་བལ་ཡུལ་དུ་ལོག་རྒྱུར་བཀག་འགོག་བྱེད་ཀྱི་ཡོད་འདུག

གསར་འགོད་པ། ཚེ་རིང་རྒྱལ།