༄༅།། ༸སྐྱབས་རྗེ་འབྲུག་པ་ཐུགས་སྲས་རིན་པོ་ཆེ་སྐུ་ཕྲེང་གཉིས་པ་འཇིགས་མེད་མི་ཕམ་བཤད་སྒྲུབ་བསྟན་འཛིན་མཆོག་འབྲུག་ཡུལ་གྱི་བཤད་གྲྭ་རྟ་མགོ་ཆོས་དབྱིངས་ཕོ་བྲང་དུ་གསན་སྦྱོང་མཐར་ཕྱིན་ཏེ་བོད་ཟླ་ ༣ ཚེས་ ༢༥ ཕྱི་ཟླ་ ༥ ཚེས་ ༤ ཉིན་རྡོར་གླིང་གདན་ས་འབྲུག་གསང་སྔགས་ཆོས་གླིང་དུ་ཕྱིར་ཕེབས་གནང་བ་དང་། རྡོར་གླིང་རང་གཞུང་བདེ་དོན་བསོད་ནམས་བཟང་མོ་ལགས་ཀྱིས་དབུས། ༡ དྷརྨ་ཅཀྲ་ཚོགས་པ། ༢ མདོ་སྟོད་ཚོགས། ༣ མདོ་སྨད་ཚོགས་པ། ༤ དབུས་གཙང་ཚོགས་པ། ༥ ས་གནས་རང་བཙན་ཚོགས་ཆུང༌། ༦ ས་གནས་བོད་ཀྱི་བུད་མེད་ཚོགས་པ། ༧ ཕ་མའི་ཚོགས་པ། ༨ འཇམ་དབྱངས་བོད་ཀྱི་རིགས་གཞུང་ཚོགས་པ། ༩ ས་གནས་བོད་ཀྱི་གཞོན་ནུ་ཚོགས་པ། ༡༠ རྡོར་གླིང་རང་འཚོ་བཟོ་གྲ། ༡༡ རྟ་མང་ཚོགས་པ། ༡༢ ཤར་པ་ཚོགས་པ། ༡༣ ཡོལ་མོ་ཚོགས་པ། ༡༤ འབྲུག་པ་ཚོགས་པ། ༡༥ སིཀྐི་མིས་ཚོགས་པ། ༡༦ གུ་རུང་ཚོགས་པ། ༡༧ ཝ་ལུང་ཚོགས་པ། ༡༨ ཧི་མ་ལ་ཡའི་བུད་མེད་ཚོགས་པ། ༡༩ སྐྱིད་གཏེར་སྨྱུང་གནས་སྐྱིད་སྡུག ༢༠ གསང་གླིང་སྐྱིད་སྡུག༢༡མ་ན་ཀ་ཇི་བླ་མ་དགོན་པ། ༢༢ ཌ་ལི་སྨྱུང་གནས་སྐྱིད་སྡུག ༢༣ རྡོར་གླིང་སྐྱིད་སྡུག་བཅུ། ༢༤ ཨ་མདོ་སྐྱིད་སྡུག ༢༥ ཁམས་པ་སྐྱིད་སྡུག ༢༦ སྐྱིད་རོང་སྐྱིད་སྡུག ༢༧ ཀ་ལོབ་ཚོགས་པ། སྟེང༌། ༢༨ ཀ་ལོབ་ཚོགས་པ་འོག།༢༩ གངས་ཅན་སྐྱིད་སྡུག ༣༠ སྣང་རྫས་ཁང་སྐྱིད་སྡུག ༣༡ གསུམ་མདོ་ཁང་སྐྱིད་སྡུག ༣༢ བྷ་ཛར་སྐྱིད་སྡུག ༣༣ སི་ཀྲེ་ཤན་སྐྱིད་སྡུག།༣༤ གུམ་མ་ཎི་སྐྱིད་སྡུག་བཅས་པའི་ཚོགས་སྐྱིད་ཁག་གི་སྐུ་ཚབ་རྣམས་རྡོར་གླིང་རྫོང་ཁོངས་ཁར་ཤང་ས་གནས་སུ་ཕེབས་བསུར་བཅར་ནས་རིམ་པས་གདན་ས་འབྲུག་གསང་སྔགས་ཆོས་གླིང་དུ་ཕེབས་འབྱོར་སྐབས་སེར་བྲེང་དང་བཅས་འདུ་ཁང་དུ་གདན་ཞུས་ཀྱིས་རྒྱལ་དབང་འབྲུག་པ་མཆོག་དབུ་བཞུགས་ཀྱིས་ཕེབས་བསུའི་མཛད་སྒོ་ཟབ་རྒྱས་ཤིག་ཚོགས་གནང་ཐོག་གདན་སའི་འཛིན་སྐྱོང་གི་འགན་དབང་ཆ་ཚང་འབུལ་བཞེས་གནང་བ་རེད། ༸སྐྱབས་རྗེ་འཇིགས་མེད་མི་ཕམ་བཤད་སྒྲུབ་བསྟན་འཛིན་ནི་ལ་དྭགས་ཆུ་ཤུལ་ཡུལ་དུ་ཕྱི་ལོ་ ༡༩༨༥ ལོར་སྐུ་བལྟམས་ཤིང་། ༡༩༨༧ ལོར། ལ་དྭགས་ཧེ་མི་རྒོད་ཚང་བྲག་ཕུག་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཐུགས་རྟགས་ཀྱིས་འབྲུག་པ་ཐུགས་སྲས་གོང་མའི་ཡང་སྤྲུལ་དུ་ངོས་འཛིན་མཛད། དགུང་གྲངས་གཉིས་དང་ཕྱེད་ཀར་ཕེབས་པ། ཕྱི་ལོ་ ༡༩༨༨ ལོར། གོང་མའི་གདན་ས་རྡོ་རྗེ་གླིང་འབྲུག་ཐུབ་བསྟན་གསང་སྔགས་ཆོས་གླིང་དགོན་པར་གདན་དྲངས་ནས་གསེར་ཁྲི་མངའ་གསོལ་ཞུས།ཡི་གེ་ཕྱི་མོ་སུམ་ཅུ་ནསབཟུང་འབྲི་ཀློག་དག་གསུམ། མཐོང་བ་བརྒྱུད་པའི་ཕྱག་ལེན་སོགས་གསན་སྦྱོང་མཛད། ཕྱི་ལོ་ ༢༠༠༤ ལོར། འབྲུག་ཏུ་ཕེབས་ནས་རྟ་མགོ་ཆོས་དབྱིངས་ཕོ་བྲང་གཙུག་ལག་སློབ་གྲ་ཆེན་མོར་ལོ་དགུའི་རིང་གཞུང་ཆེན་ཁག་ལ་གསན་བསམ་མཛད་ནས་སློབ་གཉེར་མཐར་སོན་གྱི་རྒྱུགས་འབྲས་ཕྱག་ཁྱེར་སོན་པ་རེད། ཡང་༸སྐྱབས་རྗེ་འབྲུག་པ་ཐུགས་སྲས་རིན་པོ་ཆེ་སྐུ་ཕྲེང་དང་པོ་བཤད་སྒྲུབ་ཆོས་ཀྱི་ཉིན་བྱེད་མཆོག་ནི། རབ་བྱུང་བཅོ་ལྔ་པའི་མེ་སྦྲུལ།ཕྱི་ལོ་༡༩༡༧ལོར། ༸རྒྱལ་དབང་འབྲུག་པ་སྐུ་འཕྲེང་བཅུ་པ་མི་ཕམ་ཆོས་ཀྱི་དབང་པོའི་སྲས་སུ་འཁྲུངས། ཕྱི་ལོ་ ༡༩༥༩ ལོའི་དུས་འགྱུར་སྐབས་སུ་རྒྱ་གར་དུ་ཕེབས་འབྱོར་གྱིས་སྦག་ས་ཆོས་སྒར་དུ་༸རྒྱལ་དབང་འབྲུག་པ་སྐུ་ཕྲེང་བཅུ་གཅིག་པ་བསྟན་འཛིན་མཁྱེན་རབ་དགེ་ལེགས་དབང་པོའི་ལྷན་དུ་སྐུ་བཞུགས་གནང༌། འབྲུག་པ་སྐུ་ཕྲེང་བཅུ་གཅིག་པ་སྦག་སར་དགོངས་པ་རྫོགས་རྗེས།རྡོ་རྗེ་གླིང་དུ་གནས་སྤོས་གནང་ནས་ཕྱི་ལོ་ ༡༩༦༡ ལོར། རྡོ་རྗེ་གླིང་རྫོང་ཁོངས་མ་ནི་བན་འཇང་གི་རི་ལྡེབས་སྐྱིད་གཏེར་རི་ཞེས་པར་བྱེས་ཀྱི་གདན་ས་དང་པོ་མཛད་ཅིང་། དེ་རྗེས་རྡོ་རྗེ་གླིང་སུ་ཁེའི་འདབས་ཞོལ། མིམ་ཀ་མན་ཇ་ཞིང་ཉེ་འཁྲིས་སུ་དགོན་ཆུང་ཞིག་འབུལ་བཞེས་ཀྱིས་དེར་ཡང་སྐུ་བཞུགས་མཛད། དེ་སྐབས་༸རྒྱལ་དབང་འབྲུག་པ་སྐུ་འཕྲེང་བཅུ་གཅིག་པའི་ཡང་སྲིད་བསྟན་འཛིན་འཇིགས་བྲལ་བློ་གྲོས་སམ།འཇིགས་མེད་མི་འགྱུར་དབང་གི་རྡོ་རྗེ་འཕྲིན་ལས་ཀུན་ཁྱབ་དཔལ་བཟང་པོ་མཆོག ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་བཀའ་དྲིན་ཆེ་བ་ལྟར།བཞུགས་གནས་ཌ་ལ་ཧའུ་སི་ནས་ཆུང་སྲིད་རིན་པོ་ཆེ་རྡོ་རྗེ་གླིང་དུ་གདན་འདྲེན་ཞུས་ཏེ་གསེར་ཁྲི་མངའ་གསོལ་མཛད། ཕྱི་ལོ་ ༡༩༧༡ ལོར། རྡོ་རྗེ་གླིང་གྲོང་ཁྱེར་ནས་ཀི་ལོ་མི་ཀྲར་བཞིའི་མཚམས་ཌ་ལི་ཞེས་པའི་ས་ཁུལ་དུ་སྤྲོ་ཁང་ཞིག་དང་འབྲེལ་བའི་ས་ཆ་ཨེ་ཀར་གཉིས་སྤུས་གཟིགས་ཀྱིས་ཕྱི་ལོ་ ༡༩༧༤ ལོར། ཨར་ལས་དབུ་འཛུགས་ཀྱིས་ལོ་གཉིས་ནང་ཚུད་དུ་འདུ་ཁང་དང༌། གཟིམ་ཆུང༌། གྲྭ་ཤག་བཅས་ཡོད་པའི་དགོན་པ་ཐོག་བརྩེགས་བཞི་ཅན་རྟེན་དང་བརྟེན་པར་བཅས་པ་ལེགས་བསྒྲུབས་ཀྱིས་དགེ་འདུན་ཞལ་གྲངས་བརྒྱ་སྐོར་ལ་སྔར་སྲོལ་མཐོང་བ་བརྒྱུད་པའི་ཆོ་ག་ཕྱག་ལེན་དང༌། ཕྱག་ཆེན་སྔོན་འགྲོ་དང་དངོས་གཞི།ཟབ་ལམ་ནཱ་རོ་ཆོས་དྲུག་སོགས་བཀའ་ཁྲིད་དང༌། སྨིན་བྱེད་དབང་གི་རིམ་པ་ཁག་བཅས་བཀའ་དྲིན་བསྐྱངས་ནས་སྐྱིད་གཏེར་རིར་ལོ་གསུམ་ཕྱོགས་གསུམ་གྱི་མཚམས་གྲྭ་བརྒྱད་ཀྱི་བཞུགས་གནས་སྒྲུབ་སྡེ་ཕྱག་འདེབས་མཛད། ༸རྒྱལ་དབང་འབྲུག་པ་མཆོག་ལ་རང་ལུགས་སྨིན་སྒྲོལ་གྱི་གདམས་པ་ཕལ་ཆེ་བ་ཕུལ་བསྒྲུབས་ནས། ཕྱི་ལོ་ ༡༩༨༣ ལོར་དགོངས་པ་ཆོས་དབྱིངས་སུ་ཐིམ། ༸སྐྱབས་རྗེ་དམ་པ་དེ་ཉིད་ནི་མཁས་སྒྲུབ་གཉིས་ལྡན་གྱི་སྐྱེས་ཆེན་དམ་པར་༸གོང་ས་སྐྱབས་མགོན་ཆེན་པོ་མཆོག་ནས་ཡང་ཡང་བསྔགས་བརྗོད་གནང་ཡོད་ཅིང་། སྐུ་ཕྲེང་གཉིས་པ་འཇིགས་མེད་མི་ཕམ་བཤད་སྒྲུབ་བསྟན་འཛིན་མཆོག་ལའང་༸གོང་ས་མཆོག་ནས་ཐུགས་གཟིགས་པ་ཆེན་པོ་གནང་བ་དང་གོང་མའི་རྣམ་ཐར་སྐྱོང་དགོས་པའི་བཀའ་སློབ་རིམ་པར་ཕེབས་མུས་ཡིན།
རྡོར་གླིང་འབྲུག་སྒར་ཐུབ་བསྟན་གསང་ཆོས་གླིང་ནས།
ཕྱི་ལོ་ ༢༠༡༣ ཕྱི་ཟླ་ ༥ ཚེས་ ༤ ཉིན་སྤེལ།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
