“སྲིད་ཇུས་ལ་འགྱུར་བ་གཏོང་བ་དང་བསྐྱར་ཞིབ་བྱེད་པའི་རྣམ་འགྱུར་ཞིག་མཐོང་ཡོང་གི་འདུག”

ཉེ་ལམ་བོད་ནང་གི་དགོན་སྡེ་ཁ་ཤས་ནང་རྒྱ་གཞུང་གིས་༧གོང་ས་མཆོག་གི་སྐུ་པར་སྒྲིག་གཤོམ་བྱེད་ཆོག་སྐོར་དྲིལ་བསྒྲགས་བྱས་ཡོད་པའི་གནས་ཚུལ་ཐད། རྒྱ་ནག་ལ་ལྟ་ཞིབ་བྱེད་མཁན་ཚོས་རྒྱ་ནག་གི་སྲིད་འཛིན་ཞི་ཡི་བཤད་སྤྱོད་ལ་གཞིགས་ན་གཞུང་གིས་འགྱུར་བ་ཕྲན་བུ་གཏོང་རྒྱུའི་རྣམ་པ་ཡོད་ཀྱང་ད་ལྟའི་ཆར་གཞུང་འབྲེལ་མིན་པའི་ངོ་བོའི་ཐོག་ན་འགྲོ་བཞིན་ཡོད་སྐོར་བརྗོད་བྱུང་།

ཟླ་འདིའི་ཕྱི་ཚེས་ ༡༧ ཉིན་མཚོ་སྔོན་མང་རའི་དགོན་སྡེ་ཁག་ཅིག་ནང་ས་གནས་གཞུང་གི་ཆོས་ལུགས་མི་སྣ་ཚོས་ཡིག་ཆ་ཞིག་དྲིལ་བསྒྲགས་བྱས་པའི་ནང་། ༸གོང་ས་མཆོག་གི་སྐུ་པར་སྒྲིག་བཤོམ་བྱེད་ཆོག་པ་དང་ཁོང་ལ་མཚན་སྨད་མི་ཞུ་རྒྱུ། དགོན་པའི་ལས་སྣེ་ཚོའི་བཀའ་འཁྲོལ་མེད་པར་ཉེན་རྟོག་པ་དང་དམག་མི་དགོན་ནང་ལ་ཐད་ཀར་མི་འཛུལ་རྒྱུ་བཅས་ཡིན་འདུག དེ་བཞིན། ཕྱི་ཚེས་ ༢༦ ཉིན་ལྷ་སའི་དགའ་ལྡན་དགོན་པར་ཡང་དེ་བཞིན་དྲིལ་བསྒྲགས་བྱས་ཡོད་པ་དང་། དཀར་མཛེས་ས་ཁུལ་དུའང་གནས་ཚུལ་དེ་འདྲ་ཞིག་བྱུང་ཡོད་སྐོར་བརྒྱུད་ལམ་ཁག་ཏུ་གནས་ཚུལ་ཐོན་ཡོད་སྟབས། ཚེས་ ༢༨ ཉིན་འདི་གའི་གསར་འགོད་པས་བོད་མི་མང་སྤྱི་འཐུས་དང་རྒྱ་ནག་ཉམས་ཞིབ་པ་འབའ་བ་སྐལ་བཟང་རྒྱལ་མཚན་ལགས་སུ་གོང་གསལ་གནས་ཚུལ་དེའི་སྐོར་ལ་དགོངས་ཚུལ་དྲིས་ཡོད།

འབའ་བ་སྐལ་བཟང་རྒྱལ་མཚན་ལགས་ཀྱིས་རྒྱ་གཞུང་གིས་བོད་ཐོག་འཛིན་པའི་སྲིད་ཇུས་ལ་མངོན་གསལ་མེད་པའི་ཐོག་ནས་འགྱུར་བ་ཕྲན་བུ་འགྲོ་བཞིན་ཡོད་པའི་མཐོང་ཚུལ་ཡོད་སྐོར་བརྗོད་དོན། “ སྤྱིར་བཏང་རྒྱ་ནག་གཞུང་གིས་སྔོན་མ་ནང་བཞིན་གྱིས་བོད་ཐོག་ལ་མཁྲེགས་འཛིན་གྱི་སྲིད་ཇུས་དང་དགོན་སྡེ་ཁག་གི་ནང་དུ་དམ་དྲག་བྱེད་པ་དང་། དེ་བཞིན་ཉེན་རྟོག་པ་དང་ལས་དོན་རུ་ཁག་སྡོད་པ་སོགས་ཀྱི་སྲིད་ཇུས་ལ་འགྱུར་བ་གཏོང་བ་དང་བསྐྱར་ཞིབ་བྱེད་པའི་རྣམ་འགྱུར་ཞིག་མཐོང་ཡོང་གི་འདུག ཡིན་ནའང་། རྒྱ་ནག་གཞུང་གིས་ལམ་སང་སྔོན་ཆད་ཀྱི་སྲིད་ཇུས་ནོར་འཁྲུལ་ཡིན་པ་ངོས་ལེན་བྱེད་མ་ཐུབ་པར་རིམ་གྱིས་དགོན་སྡེ་ཁག་གི་བླ་མ་དང་དགེ་འདུན་པ་ཚོ་མཉམ་དུ་ཚོགས། དེ་ནས་བླ་མ་གྲྭ་བ་ཚོས་མང་ཚོགས་ནང་དུ་མར་དྲིལ་བསྒྲགས་བྱས་ཏེ་ག་ལེར་འགྱུར་བ་གཏོང་སྲིད་པ་ཞིག་རེད། ཡིན་ནའང་། གོང་གི་གནས་ཚུལ་དེ་ཚོ་བདེན་པ་ཡིན་ནའང་རྒྱ་ནག་གཞུང་འབྲེལ་གྱི་ཐོག་ནས་གནས་ཚུལ་དེ་ཚོ་ཕྱིར་བསྒྲགས་བྱས་མེད་སྟབས། དྲ་ལམ་གྱི་མང་ཚོགས་རང་བཞིན་ཀྱི་སྐད་ཆ་ལྟ་བུ་ཆགས་ཡོད་དུས་གཞུང་རང་གི་སྲིད་ཇུས་ཤིག་ལ་ངོས་འཛིན་བྱས་ན་ཏག་ཏག་བསྡད་ཡོད་པ་མ་རེད། ཡིན་ནའང་གནས་ཚུལ་དེ་འདྲ་བྱུང་བ་བདེན་པ་རེད། ” ཅེས་བརྗོད་བྱུང་།   

ཡང་ཁོང་གིས་རྒྱ་ནག་གི་སྲིད་འཛིན་གསར་པ་ཞིས་ཅིན་ཕིན་དང་ཤེས་ལྡན་པ་ཁག་ཅིག་གི་ཆབ་སྲིད་ལྟ་བའི་སྐོར་བརྗོད་དོན། “ རྒྱ་གཞུང་གི་མགོ་ཁྲིད་ཞིས་ཅིན་ཕིན་གྱིས་བོད་ཀྱི་ཆོས་ལུགས་དད་མོས་རང་དབང་དང་སྐད་ཡིག་རིག་གཞུང་ལ་སྲུང་སྐྱོབ་བྱེད་དགོས་པའི་ཐོག ས་གནས་མི་རིགས་རང་སྐྱོང་གི་ཁྲིམས་ལག་བསྟར་ལེགས་པོ་བྱས་ན། གཞི་ནས་བོད་དེ་ཡུན་རིང་བརྟན་ལྷིང་ཡོང་བའི་སྐད་ཆ་བཤད་ཀྱི་ཡོད་པ་རེད། དེ་བཞིན་རྒྱ་ནག་ཏང་གི་སློབ་གྲྭ་ཆེན་མོའི་སློབ་དཔོན་ཆེན་མོ་ཅིན་ཝེ་ཡིས་ཀྱང་བཅར་འདྲི་ཞིག་གི་སྐབས་སུ། ༸རྒྱལ་བ་རིན་པོ་ཆེའི་སྐུ་ཚབ་མཉམ་དུ་འབྲེལ་མོལ་བྱེད་དགོས་པ་དང་། ལྷག་པར་དུ་སྔོན་ཆད་རྒྱ་ནག་གཞུང་གིས་བོད་རང་སྐྱོང་ལྗོངས་ལ་བཏང་བའི་མགོ་ཁྲིད་རིམ་པ་མང་པོ་ཞིག་གི་ཆོས་ལུགས་ཐད་ཀྱི་སྲིད་ཇུས་ལ་ཐལ་ཆ་ཆེན་པོ་ཕྱིན་སྟབས། བོད་ནང་གི་བོད་མི་ཚོའི་སེམས་ལ་རྨ་ཁ་དང་མ་འདོད་པ་ཤུགས་ཆེན་བཟོས་ཡོད་སྐོར་བཤད་པ་སོགས་ཀྱི་ཐོག་ནས་ང་ཚོས་ག་རེ་མཐོང་གི་འདུག་ཟེར་ན། གཞུང་རང་གི་ངོས་ནས་འགྱུར་བ་གཏོང་བའི་འཆར་གཞི་ཞིག་ཡོད་པ་དང་། དེ་ས་གནས་ས་ཐོག་ཏུ་གང་ལ་གང་འཚམ་ཞིག་གཞུང་འབྲེལ་མིན་པའི་ཐོག་ནས་འགྲོ་བཞིན་པ་དང་། ཡང་བོད་ཐོག་འཛིན་པའི་སྲིད་བྱུས་ལ་བསྐྱར་ཞིབ་གཏོང་བའི་གཅིག་གྱུར་གྱི་སྲིད་ཇུས་མིན་པར་༸གོང་ས་མཆོག་ལ་མཚན་སྨོད་ཞུ་བ་དང་སྔོན་ཆད་ལྟར་རྩོམ་ཡིག་སྡུག་པོ་འབྲི་བ། དེ་བཞིན་ད་ལྟའི་བོད་རང་སྐྱོང་ལྗོངས་ཀྱི་མགོ་ཁྲིད་ཚོ་ཕྱི་ལ་འགྲོ་སྐབས་བོད་ནང་བྱུང་བའི་གནས་ཚུལ་ཚང་མ་ཏཱ་ལའི་ཁ་བྲལ་རིང་ལུགས་ཀྱིས་བརྒྱུད་སྐུལ་བྱས་ཚུལ་བརྗོད་པ་སོགས་ཀྱི་གནས་སྟངས་མུ་མཐུད་འགྲོ་བཞིན་ཡོད་པ་དང་། ཚགས་པར་དང་དྲ་རྒྱ་སོགས་སུ་ཡོད་པ་དེ་ཚོར་ཡང་འགྱུར་བ་གང་ཡང་སོང་ཡོད་པ་མ་རེད། དེར་བརྟེན། ཐེངས་འདིའི་གནས་ཚུལ་དེ་ཚོར་བོད་ནང་གི་རྩོམ་པ་པོ་ཚེ་རིང་འོད་ཟེར་སོགས་ཀྱིས་དེ་རྒྱ་ནག་གི་གཡོ་སྒྱུ་ཞིག་ཡིན་སྟབས། ག་དུས་ཡིན་ནའང་ང་ཚོ་དེ་ལ་མགོ་འཁོར་རྒྱུ་མེད་པའི་སྐད་ཆ་བཤད་མཁན་ཤུགས་ཆེན་པོ་རེད། ཡིན་ནའང་། རྒྱ་ནག་གཞུང་གི་མགོ་ཁྲིད་དང་ཤེས་ཡོན་ཅན་ཚོས་བཤད་པའི་བོད་སྐོར་གྱི་སྐད་ཆ་དེ་ཚོ་ལས། ང་ཚོས་རྒྱ་ནག་བཟང་ཕྱོགས་ལ་འགྱུར་བ་ཐེབས་པ་མཐོང་ཐུབ་དགོས་པའི་གནས་ཚུལ་གལ་ཆེན་པོ་ཞིག་རེད་དྲན་གྱི་ཡོད། ”ཅེས་བརྗོད་བྱུང་།

མཇུག་ཏུ་རྒྱ་ནག་གི་འགྱུར་བ་ཁག་ལ་བལྟས་ཡོང་ན། ང་ཚོས་ཀྱང་གྲ་སྒྲིག་བྱེད་གལ་ཆེ་བའི་སྐོར་ལ་ཁོང་གིས། “ ང་རང་ཚོས་གསལ་བོ་ཧ་གོ་དགོས་པ་ཞིག་ལ། རྒྱ་ནག་གཞུང་གིས་ཆོས་ལུགས་དང་ཆབ་སྲིད་ཀྱི་སྲིད་ཇུས་ཁ་ཁ་བཟོས་ཏེ། དཔེར་ན། ༸གོང་ས་མཆོག་ལ་ཆོས་ལུགས་ཀྱི་ཐོག་ནས་དད་པ་བྱས་ན་འགྲིག་གི་རེད། ཡིན་ནའང་། ཆབ་སྲིད་ཀྱི་ཕྱོགས་ནས་ཁོའི་རྗེས་སུ་རྩ་བ་ནས་འབྲང་རྒྱུ་མེད་སྐོར་བཤད་ཡོང་སྐབས། བོད་ཀྱི་གནད་དོན་དེ་ག་འདྲ་ཆགས་ས་རེད། ང་རང་ཚོའི་ཕྱོགས་ནས་གྲ་སྒྲིག་ག་འདྲ་བྱེད་དགོས་པ་དང་། བོད་ནང་གི་གནས་སྟངས་ལ་འགྱུར་བ་ག་འདྲ་ཐེབས་དགོས་པ་སོགས། ང་རང་ཚོའི་ངོས་ནས་དོ་སྣང་དང་གྲ་སྒྲིག་སྔ་ས་ནས་བྱེད་དགོས་པ་གལ་ཆེན་པོ་མཐོང་གི་འདུག ” ཅེས་བརྗོད་བྱུང་།