ནེལ་སིན་མན་ཌེ་ལཱ་མཆོག་གི་གནས་སྟངས་ཛ་དྲག

ལྷོ་ཨ་ཧྥི་རི་ཀའི་སྲིད་འཛིན་ཟུར་པ་ནེལ་སིན་མན་ཌེ་ལཱ་མཆོག་གློ་ཚད་ཅིག་གི་རྐྱེན་པས་ད་ལྟ་སྨན་ཁང་དུ་སྨན་བཅོས་བྱེད་ཀྱིན་ཡོད་ཀྱང་གནས་སྟངས་ཧ་ཅང་ཛ་དྲག་ཆགས་ཡོད་འདུག
ཟླ་སྔོན་མའི་ཕྱི་ཚེས་ ༧ ཉིན་གྱི་ཡུལ་དེའི་མཚན་མོའི་ཆུ་ཚོད་ ༡༡ སྟེང་། ལྷོ་ཨ་ཧྥི་རི་ཀའི་སྲིད་འཛིན་ཟུར་བ་ནེལ་སིན་མན་ཌེ་ལཱ་( Nelson Mandela)མཆོག་གི་གློ་ཚད་ནད་གཞི་གློ་བུར་དུ་ཇེ་སྡུག་ལ་ཕྱིན་ཏེ། གྲོང་ཁྱེར་ཇོ་ཧན་ནེ་སི་བྷར་གྷི་ (Johannesburg) ཉེ་འགྲམ་དུ་ཡོད་པའི་ཁོང་གི་གཞིས་ཀ་ནས་ཕེར་ཌོ་རཱེ་སྙིང་གི་སྨན་ཁང་(Pretoria)ཞེས་པར་སྨན་བཅོས་བྱེད་དུ་ཕེབས་ཡོད་པ་དང་། འདི་ནི་ལོ་གཉིས་ནང་ཁོང་སྨན་ཁང་དུ་སྨན་བཅོས་བྱེད་པར་ཕེབས་ཐེངས་ལྔ་པ་དེ་ཆགས་ཡོད་འདུག

སྨན་ཁང་དེས་ཁྱད་མཁས་སྨན་པའི་རུ་ཁག་ཅིག་ཆེད་འཛུགས་ཀྱིས་སྨན་བཅོས་བྱས་ཡོད་པ་དང་། སྨན་པ་ཚོས་མན་ཌེ་ལ་མཆོག་གི་གློ་བའི་ནད་གཞི་དེ་ནི། སྔོན་ཆད་ཁོང་བཙོན་དུ་བཞུགས་སྐབས། ཁོང་ལ་བཙོན་རོགས་ཊི་སྦི་(TB)ན་ཚ་ཅན་ཞིག་ཡོད་པ་དེ་ལས་འགོས་པར་ངོས་འཛིན་བྱེད་ཀྱིན་ཡོད་འདུག  

ཁོང་གི་གཟུགས་པོའི་གནས་སྟངས་ཀྱི་སྐོར་ལ་ལྷོ་ཨ་ཧྥི་རི་ཀའི་སྲིད་འཛིན་ལས་ཁུངས་གྱི་མགྲིན་པ་མཱ་ཁུ་མ་ཧཱ་རཱ་ཇི་(Mac Maharaj)ལགས་ཀྱིས་བྷི་བྷི་སི་གསར་འགོད་པར། ཕྱི་ཟླ་ ༤ པའི་ནང་ནེལ་སིན་མན་ཌེ་ལཱ་མཆོག་གི་གློ་ཚད་བསྐྱར་ལོག་བརྒྱབ་སྟེ་སྐུ་སྲོག་ལ་ཉེན་ཁ་ཆེན་པོ་བྱུང་ཡོད་ཀྱང་། ད་ལྟ་ཁྱད་མཁས་སྨན་པ་སྐོར་ཞིག་རྩ་འཛུགས་བྱས་ཏེ་སྨན་བཅོས་གང་ལེགས་བྱེད་ཀྱིན་ཡོད་སྟབས། ད་ལྟ་ཁོང་གིས་རང་སྟོབས་ཀྱིས་དབུགས་གཏོང་ལེན་ཐུབ་ཀྱི་ཡོད་པ་དེ་ནི་བཟང་ཕྱོགས་ཀྱི་རྣམ་པ་ཙམ་ཡིན་སྐོར་བརྗོད་འདུག

ཕྱི་ཚེས་ ༢༤ ཉིན་ལྷོ་ཨ་ཧྥི་རི་ཀའི་སྲིད་འཛིན་ཇད་ཁོད་ཛོ་མཱ་ ( Jacob Zuma) ལགས་སྨན་ཁང་དུ་ཁོང་ལ་གཟིགས་སྐོར་དུ་ཕེབས་པ་གསལ་བསྒྲགས་སྤེལ་བའི་ནང་ “ ང་རང་སྨན་ཁང་དུ་སྲིད་འཛིན་ཟུར་བ་མཆོག་ལ་ཐུག་འཕྲད་དུ་སྐྱོད་སྐབས། ཁོང་ཉིད་གཟིམ་འདུག་ཀྱང་ཁོང་གི་བཟའ་ཟླ་དང་ཁྱད་མཁས་སྨན་པའི་རུ་ཁག་ལ་བཀའ་མོལ་གནང་རྒྱུ་བྱུང་སོང་། ང་ཚོ་རྒྱལ་ཡོངས་མི་མང་ཚོས་ཁོང་གི་ནད་གཞི་དྲག་སྐྱེད་བྱུང་སྟེ་སྐུ་གཟུགས་སྔར་བཞིན་བདེ་ཐང་ཡོང་བར་སྨོན་ལམ་རྒྱག་དགོས། ཡིན་ནའང་ང་ཚོས་དམ་པ་ཁོང་ཉིད་དགུང་གྲངས་མཐོན་པོར་བསླེབས་ཡོད་པར་ངེས་པར་དུ་བསམ་ཤེས་གནང་དགོས ” ཞེས་བརྗོད་འདུག

ཕེར་ཌོ་རཱེ་སྨན་ཁང་གིས་བརྗོད་པ་ལྟར་ན། ནེལ་སིན་མན་ཌེ་ལཱ་མཆོག་གི་ནད་གཞི་དྲག་སྐྱེད་ཡོང་ཆེད་ཞི་བདེའི་ཕུག་རོན་མང་པོ་གློད་གྲོལ་བཏང་ཡོད་པ་དང་། མང་ཚོགས་ཚོས་ཀྱང་ཁོང་བཞུགས་སའི་སྨན་ཁང་མདུན་དུ་མེ་ཏོག་དང་ཤིས་ཚིག་སྣ་ཚོགས་ཕུལ་ཏེ་ཁོང་གི་བཀའ་དྲན་ལ་དྲན་གསོ་ཞུས་ཡོད་འདུག

ཕྱི་ཚེས་ ༢༦ ཉིན་མན་ཌེ་ལ་མཆོག་གི་ནད་གཞི་ཅུང་ཇེ་སྡུག་ཏུ་ཕྱིན་ཏེ་དབུགས་གཏོང་ལེན་ཡོ་བྱེད་བེད་སྤྱོད་གཏོང་དགོས་བྱུང་ཡོད་པ་དང་། མང་ཚོགས་མང་པོས་མུ་མཐུད་སྨན་ཁང་མདུན་དུ་ཁོང་གི་ནད་གཞི་དྲག་སྐྱེད་ཡོང་བར་སྨོན་ལམ་འདེབས་བཞིན་ཡོད་འདུག ད་ལྟ་ཁོང་གི་གནས་སྟངས་ཧ་ཅང་ཛ་དྲག་ཆགས་ཡོད་སྟབས། ཁོང་གི་བུ་ཕྲུག་ཚོ་ལྷན་འཛོམས་གནང་སྟེ་གལ་སྲིད་ཁོང་ཉིད་འདས་གྲོངས་སུ་ཕྱིན་རྗེས་སྐུ་ཕུང་དུར་འཇུག་བྱེད་ཡུལ་དང་འདས་མཆོད་སྒྲུབ་ཕྱོགས་སྐོར་ལ་གྲོས་བསྡུར་བྱས་ཡོད་འདུག

ཕྱི་ཚེས་ ༢༩ ཉིན་ཨ་རིའི་སྲིད་འཛིན་ཨོ་བྷ་མ་མཆོག་དང་ཁོང་གི་སྐུ་ལྕམ་རྣམ་གཉིས་སྐུ་ཞབས་མན་ཌེ་ལཱ་མཆོག་གི་ནང་མི་ཚོར་འཚམས་འདྲིར་བསྐྱོད་དེ། ཨོ་བྷ་མས་ནེལ་སིན་མན་ཌ་ལཱ་མཆོག་ནི་ངའི་སེམས་ནང་གི་སྙན་གྲགས་དང་གཟི་བརྗིད་ཆེ་ཤོས་ཀྱི་དཔའ་བོ་ཞིག་ཡིན་ཞེས་བརྗོད་ཡོད་པ་དང་། སྔོན་མ་ནེལ་སིན་མན་ཌ་ལ་མཆོག་ལོ་ ༡༨ རིང་བཙོན་འཇུག་བྱེད་ཡུལ་རོལ་བྷིན་གླིང་ཕྲན་ (Robben Island)ཞེས་པའི་ས་གནས་དེར་གཟིགས་སྐོར་དུ་ཕེབས་ཏེ། མན་ཌེ་ལཱ་མཆོག་གི་གཟི་བརྗིད་ལ་དྲན་གསོ་ཞུས་ཡོད་པ་དང་། སྲིད་འཛིན་མཆོག་གིས་བཙོན་ཁང་དེའི་སྐུ་མགྲོན་གྱི་ཟིན་དེབ་སྟེང་། “ རོལ་བྷིན་གླིང་ཕྲན་གྱི་དཔའ་བོ་ཁྱེད་རང་འཛམ་གླིང་འདིར་བཀའ་དྲིན་ཆེན་པོ་ཡིན། ཁྱེད་རང་བཞུགས་སའི་བཙོན་ཁང་འདིས་འགྲོ་བ་མིའི་སྙིང་སྟོབས་ལ་འགྲན་ཟླ་མེད་པ་མཚོན་ཡོད་ ” ཅེས་བྲིས་ཡོད་འདུག 

ཕྱི་ཟླ་ ༦ ཚེས་ ༢༨ ཉིན་བོད་མིའི་དབུ་ཁྲིད་༧གོང་ས་མཆོག་གིས་ཀྱང་ནེལ་སིན་མན་ཌེ་ལ་མཆོག་གི་ནད་གཞི་དྲག་སྐྱེད་ཡོང་བའི་ཐུགས་སྨོན་མཛད་པའི་ནང་ “ སྲིད་འཛིན་ཟུར་པ་མན་ཌ་ལ་མཆོག་སྐུ་ཁམས་བདེ་མིན་གྱི་གནས་ཚུལ་བྱུང་བ་དེ་ནི་ཧ་ཅང་བློ་ཕམ་བྱེད་དགོས་པའི་གནས་སྟངས་ཤིག་ཆགས་ཡོད། མི་ཚང་མས་ཁོང་མྱུར་དུ་དྲག་སྐྱེད་ཡོང་ཆེད་སྨོན་ལམ་འདེབས་བཞིན་ཡོད།” ཅེས་གསུངས་འདུག

ནེལ་སིན་མན་ཌ་ལཱ་མཆོག་ནི་ཕྱི་ལོ་ ༡༩༡༨ ཟླ་ ༧ ཚེས་ ༡༨ ཉིན་ལྷོ་ཨ་ཧྥི་རི་ཀའི་ཤར་ཕྱོགས་ཀད་པུ་གྲོང་ཁྱེར་( Cape town)ཞེས་པར་སྐུ་འཁྲུངས་ཤིང་། ལྷོ་ཨ་ཧྥི་རི་ཀའི་ནང་མི་རིགས་དབྱེ་འབྱེད་ཀྱི་སྲིད་བྱུས་ལ་ཁ་གཏད་བཅགས་ཏེ་རྒྱུན་རིང་འཐབ་རྩོད་བྱས་སྟེ། སྔ་ཕྱིར་ལོ་ངོ་ ༢༧ རིང་བཙོན་ཁང་དུ་བཞུགས་མྱོང་ཡོད་པ་དང་། ༡༩༩༠ ལོར་གཞུང་གི་སྲིད་བྱུས་ལ་འགྱུར་བ་ཐེབས་ཏེ་ཁོང་གི་འཐབ་རྩོད་ལ་རྒྱལ་ཁ་ཐོབ་ཡོད། ༡༩༩༣ ལོར་འཛམ་གླིང་ཞི་བདེའི་གཟེངས་རྟགས་ཐོབ་ཡོད། ༡༩༩༤ ལོར་ལྷོ་ཨ་ཧྥི་རི་ཀའི་ལོ་རྒྱུས་ཐོག་གི་མི་རིགས་ནག་པོའི་སྲིད་འཛིན་ཐོག་མ་དེ་ཆགས་ཡོད་པ་དང་། ༡༩༩༩ ལོར་ལྷོ་ཨ་ཧྥི་རི་ཀའི་མགོ་ཁྲིད་ནས་རྒན་ཡོལ་ཞུས་ཡོད།

ཟླ་འདིའི་ཚེས་ ༡༨ ཉིན་ནི་དམ་པ་ཁོང་ཉིད་དགུང་གྲངས་  ༩༥ ལ་ཕེབས་པའི་སྐུའི་འཁྲུངས་སྐར་དུས་ཆེན་ཡིན།